Taputou mai te Atua ki te peroveta ko Aberahama e ka apai mai tetai o tana uanga i te akameitakianga ki “te pa enua katoa o te ao nei.” (Genese 22:18) Koai te uanga?

E 2,000 mataiti akenei, kua oronga te Atua kia Iesu, e uanga na Aberahama i te mana kia rave i te temeio. Akaari mai teia au temeio i ta te Atua taputou kia Aberahama, ka tupu na roto ia Iesu.—Galatia 3:14.

Akaari mai ta Iesu temeio e koia ta te Atua i iki no te akameitaki i te tangata, e ka taangaanga katoa te Atua iaia kia akameitaki i te tangata e tuatau ua atu. Akaari maira ta Iesu au temeio i tona au tu manea.

Maru—Akaora a Iesu i tei maki.

Kua pati te tangata lepera kia Iesu kia akaora iaia. Amiri a Iesu iaia e kua tuatua: “Kia tika ia koe!” Mā atura tona lepera.—Mareko 1:40-42.

Oronga ua—Angai a Iesu i tei pongi.

Kare a Iesu i inangaro e kia pongi te tangata. I tetai atianga, kua angai temeio aia e tauatini tangata ki te varaoa e te ika. (Mataio 14:17-21; 15:32-38) I muri ake i te kai anga, kua pangia ratou e e maata ua atu te toenga.

Takinga meitaki—Akatu a Iesu i tei mate.

“Aroa atura iaia,” kua akatu mai a Iesu i te tamaiti okotai a te vaine takaua e aue ra.—Luka 7:12-15.