E manganui tei manako e na te apii teitei e te apinganui e raukaʼi tetai oraanga tinamou. Irinaki ratou e na te apii teitei e akameitaki atu i te turanga i te ngai angaanga, i te ngutuare e ei tangata meitaki. E ka rauka te ngai angaanga moni maata e ka mataora ratou.

Akamanako i te au tuatua a Zhang Chen, no Tinito mai. Karanga aia, “Irinaki au e ka anoanoia tetai pepa apii teitei kia kore au e putaua e ka rauka te oraanga mataora e te merengo me rauka te ngai angaanga moni maata.”

Ei akameitaki atu i to ratou oraanga tinamou, kua inangaro ratou i te aere ki te au apii teitei rongonui, penei i te au enua ke. Kua tupu maata teia e tae ua atu ki te taime i tupu ei te COVID-19 e kua araiia te teretere atu ki te au enua mamao. Karanga te ripoti 2012 a te Organisation for Economic Co-operation and Development e: “E 52% aronga apii teitei no Asia mai te apii ra i te enua ke.”

E akaatinga maata ana te au metua no ta ratou tamariki kia aere ki te au apii teitei i te enua ke. Maara ia Qixiang, i Taiwan e: “Kare toku nga metua i te aronga moni, inara kua tuku raua ia matou tokoa tamariki ki te apii teitei i Marike.” Ei tutaki i teia apii, kua kaiou maata tona nga metua mei tetai pae rai.

Ka akameitaki rai te apii teitei i te oraanga, inara e mea ke ta te aronga apii i kite mai. Ei akaraanga, i muri ake i te tauta anga ma te kaiou maata, kare e kitea te ngai angaanga tei inangaroia. Karanga tetai ripoti na Rachel Mui na te Singapore Business Times e: “E maata ua atu te aronga tei puapinga mei te apii teitei kare e ngai angaanga.” Karanga a Jianjie, i Taiwan, e maata tana pepa apii teitei, “E manganui kare e ravenga mari ra kua āriki i te ngai angaanga kare i tau ki te pepa apii teitei.”

Kua kite mai tetai pae tei rauka te ngai angaanga tei inangaroia e kare te oraanga i taui mei ta ratou i manako. Muri ake i te apii teitei i Peritane, kua rauka ta Niran ngai angaanga tei inangaroia, i Thailand. “Mei taku i tamanako, kua rauka te ngai angaanga ma te moni maata no tei rauka te pepa apii teitei. Inara, no taku moni maata kua anoanoia au kia angaanga maata atu. Kare i roa, kua akakite te kamupani kia akaruke te maata anga o te aronga angaanga, e au rai. Kite mai au kare e oraanga tinamou i roto i tetai ua atu ngai angaanga.”

Kua o rai te aronga apinganui e te puapinga ki roto i te au manamanata o te ngutuare, te maki, e te moni. Karanga a Katsutoshi no Tiapani mai, “Reka au i te oraanga apinganui, inara kua apiapi au i te oraanga tarere, te vareae, e te takinokino.” Karanga a Lam, e vaine i Vietnam, “E maata taku tangata i kite tei aruaru kia rauka te ngai angaanga moni maata e te turanga tinamou, inara e tuke tei tupu mai—tupu te maromaroa, te maki, te roiroi, e te taitaia.”

Mei ia Franklin, e manganui tei manako me e maata atu te vaira i te oraanga ka aruaru atu ei i te apii teitei e te apinganui. I te mea e ka akamou i to ratou oraanga ki runga i te au apinganui, kua kimi tetai pae i te oraanga meitaki atu na te tauta anga kia riro ei tangata meitaki e kia takinga meitaki i tetai. Ka rauka ainei te oraanga tinamou na te aruaru anga i teia tu oraanga? Ka pauia teia i te atikara ka aru mai.