Na te Tu Meitaki Ainei o te Tangata e Raukaʼi te Oraanga Tinamou?
No tetai anere ua atu mataiti, e manganui te tangata tei manako e me e tangata meitaki koe ma te tu akono ka rauka te oraanga tinamou. Ei akaraanga, kua akangateitei te iti tangata Asia te karanga anga te puapii-kimi-kite ko Confucius (551-479 B.C.E.) e: “Ko taau kare e inangaro kia raveia kia koe, auraka e rave atu ki tetai.” *
E MANGANUI TE ARU RA I TEIA ARA
E manganui te irinaki ra e na te tu meitaki e rauka ai te oraanga tinamou. Ka tauta ratou kia rauka te tu ngateitei, te tu meitaki, te turanga, e te akava ngakau meitaki. “Irinaki ua rai au e e tu tika e te ngakau tae toku,” i na Linh ei, e vaine i Vietnam, “e ka akameitakiia mai au.”
Kua akakeuia tetai pae e te au irinakianga akonoanga kia rave i te meitaki. Karanga tetai tangata ko Hsu-Yun, i Taiwan e, “Kua apiiia au e na te angaanga a tetai tangata iaia e ora ra e kitea ai me ka mataora tona oraanga e me ka tamamaeia aia i muri ake i te mate anga.”
EAA TEI TUPU?
E tika me takinga meitaki tatou i tetai ke, ka puapingaia tatou. Inara, e manganui tei rave i te meitaki kua kite mai kare te reira i tupu ana mei ta ratou i manako. “Kite mai au ko te aronga tei rave i te meitaki kare ratou e akameitaki uaia ana,” i na te vaine ko Shiu Ping, i Hong Kong ei. “Kua tauta au i te akono i toku ngutuare e te rave i te meitaki. Inara kua puapinga kore toku oraanga akaipoipo e kua akaruke taku tane ia maua ko taku tamaiti.”
E manganui tei kite mai kare te akonoanga i tauturu ana i te tangata kia meitaki atu. “Kua o au ki roto i tetai akaaereanga akonoanga e ko au te akatere o te au angaanga a te mapu,” i na Etsuko ei, e vaine i Tiapani. “Poitirere tikai au te kite anga i te tu akono tau kore, te putoto anga kia akatere, e te tu tika kore o te aronga akonoanga i te pae o te moni.”
“Kua tauta au i te akono i toku ngutuare e te rave i te meitaki. Inara kua puapinga kore toku oraanga akaipoipo e kua akaruke taku tane ia maua ko taku tamaiti.”—SHIU PING, HONG KONG
Kua mareka kore tetai pae me kare ta ratou angaanga meitaki e akameitakiia mai. Kua kite mai a Van i te reira, e vaine i Vietnam. “E apai ua ana au i te au ua rakau, te tiare, e te kai ki te atarau o toku ui tupuna tei mate, te manako anga e ka mataora au i te au akameitakianga a te tuatau ki mua,” i nana ei. “Noatu te au angaanga meitaki e te au peu akonoanga taku i rave no tetai tuatau roa, kua tuia taku tane e te maki kino. E oti, kua takake atu taku tamaine mapu iaia e apii ra i te enua ke.”
Mei te mea kare e akapapu anga e ka rauka te oraanga tinamou noatu te tu meitaki o te tangata, eaa i reira te pauanga? Ei pau i teia uianga, ka anoanoia te arataki anga papu—e tumu anga papu te ka pau i ta tatou uianga e te akaari mai i te ara ki te oraanga tinamou. Ka kitea teia arataki anga kiea?
^ para. 2 No tetai uriurianga o te apiianga a Confucius, akara i te pene 7, parakarapa 31-35, o te puka Mankind’s Search for God, neneiia e te Au Kite o Iehova e tei runga i te www.pr418.com.
Ka Reka Katoa Koe i Teia
E ARA!
Kia Kite i te Meitaki Mei te Kino
Me apii i taau tamariki i te mea meitaki e te kino, ka riro ei arataki ia ratou no te tuatau ki mua.
TE PUNANGA TIAKI
Tupu te Kino ki te Aronga Meitaki—Eaa te Tumu?
Akataka mai te Pipiria e toru tumu i tupu ei te kino ki te tangata.
