Kare e puka mei te Pipiria rai. Kare atu e puka tei tauturu i te tangata e manganui no tetai tuatau roa. I tetai tua, kare atu e puka tei akakeu i te kimikimi anga maata e te akaapa anga kino.

Ei akaraanga, te ekoko ra tetai aronga kite me e tataanga irinakiia te au Pipiria o teia tuatau? Karanga tetai tangata kite o te akonoanga e: “Kare i papu ia tatou e kua tata tikaia te tataanga mua. E au tataanga anake teia tei ki i te au tarevake, e te maata anga o teia kua roa te tuatau i muri mai i tataia ai te reira, e tauatini tuma ngai tuke.”

No ta ratou irinaki anga akonoanga, te ekoko ra tetai pae i te tika anga tikai o te Pipiria. Ei akaraanga, kua apii a Faizal e tona ngutuare tangata kare i te Kerititiano e e puka tapu te Pipiria, inara kua tauiia te reira. “Tei tupu mai, kua tarotokaka au me inangaro te tangata i te uriuri i te Pipiria kiaku,” i nana ai. “Mei tera te tu kare a ratou Pipiria mua. Kua taui te reira!”

E manata ainei tetai me kua taui te Pipiria e me kare? Ka akamanako ana i teia au uianga: Ka irinaki ainei koe i te au taputou manea a te Pipiria no te tuatau ki mua me kare koe i papu e no roto mai te reira i te tataanga mua? (Roma 15:4) Ka taangaanga ainei koe i te au kaveinga Pipiria kia rave i te au ikianga puapinga no te ngai angaanga, te ngutuare tangata, e te akamorianga, mei te mea e au tataanga tarevake te au Pipiria o teia tuatau?

Noatu e kua ngaro te au puka mua o te Pipiria, ka rauka ia tatou i te akara i te au tataanga taito​—kapiti mai te tauatini tuma tataanga Pipiria. Akapeea taua au tataanga ra te vai ua anga noatu te patoianga, te turanga pe ua, e te tauta anga i te taui i te au tuatua? Akapeea tona vai ua anga te akamaroiroianga ia koe no te Pipiria o teia tuatau? Ka akara ana i te au pauanga ki teia au uianga i roto i te tua ka aru mai.