Maara ia Seth * e: “Kua ngere maua ko taku vaine i ta maua ngai angaanga i taua taime rai. E rua mataiti to maua irinaki anga ki te ngutuare no te tauturu e tetai manga angaanga no te tuatau poto ua. Tei tupu mai, kua taitaia taku vaine ko Priscilla e kua manako puapinga kore au.

“Eaa ta maua i rave? Kua akamaara ua rai a Priscilla i ta Iesu i tuatua ia Mataio 6:34. Karanga aia e auraka tatou e apiapi i to apopo ra, ko te rā ko tona uaorai kino. Pera katoa kua akamaroiroiia aia na te pure anga ma te ngakau tae. Iaku uaorai, kua akapumaanaia au e Salamo 55:22. Mei te tata salamo rai, kua tuku au i taku apainga kia Iehova, e nana i tauturu mai iaku. Noatu e ngai angaanga taku i teianei, kua akamāmā maua i to maua oraanga kia tau ki ta Iesu akoanga ia Mataio 6:20-22. Tei maata rava atu, kua akavaitata maua ki te Atua e ki tetai e tetai.”

“Kua mataku au i te tuatau ki mua te pou anga te moni o te pitiniti meangiti o te ngutuare,” i karanga ai a Jonathan. “No tetai turanga kino i te pae moni, kua puapinga kore ua tetai 20 mataiti i te angaanga pakari anga. Kua akamata maua ko taku vaine i te karo no runga i te moni. Kare maua e oko apinga ana no te mea kua mataku maua e kare te credit card e akatikaia mai.”

“Noatu ra kua tauturu te Tuatua a te Atua e tona vaerua tapu ia maua kia rave i te ikianga meitaki. Kua āriki au i tetai ua atu angaanga, e kua akaiti mai maua i te au apinga ta maua e tutaki ra. Ei Au Kite no Iehova, kua turuia maua e te au taeake irinakiia. Kua akamaroiroi ratou ia maua kia manako  papu e kua tauturu ia maua i te tuatau ngata tikai.”

Akamaara a Raquel e: “Te akaruke anga taku tane iaku, kua mamae au e kua riri. E oti kua maromaroa tikai au. Inara kua akavaitata au ki te Atua, e nana i akapumaana mai iaku. Kua paruruia toku ngakau e te au o te Atua i te pure anga au kiaia i te au rā ravarai. Mei te mea rai e nana i akamaru mai i toku mamae ngakau.

“No tana Tuatua te Pipiria, kua autu au i te manako riri e te akamoupuku. Kua akamanako oonu au i te tuatua a te apotetoro ko Paulo ia Roma 12:21: ‘Auraka e mate i te kino, kia mate ra te kino ia koe i te meitaki.’

“Kua tauturu tetai oa meitaki iaku kia akangaropoina i tei tupu e kia neke ki mua. Kua akaari mai aia ia Koheleta 3:6 e kua akakite maru mai kiaku ‘e e tuatau to te riro anga.’ E akoanga pakari teia, inara teia taku e anoano ra. I teia taime e au akakoroanga ou toku no te oraanga.”

Karanga a Elizabeth e: “Me matara toou oraanga akaipoipo, ka anoanoia te tauturu noou. E oa meitaki tikai toku tei oronga mai i te reira tauturu i te au rā ravarai. Kua aue kapiti maua, kua akapumaana aia iaku, e kua tauturu iaku kia kite e kua inangaroia au, kare i kopaeia. Te irinaki nei au kua taangaanga a Iehova iaia ei akameitaki i toku mamae ngakau.”

Ko Luis, tei taikuia te akamataanga e maki pukuatu tona e kua vaitata i te mate e rua taime. I teianei e 16 ora i te au rā, ka anoanoia aia kia taangaanga i te moina aʼo ei tauturu iaia kia akaea. Karanga aia: “E pure putuputu ana au kia Iehova. Me oti au i te pure ki te Atua, ka kite au i tona vaerua tapu te akamaroiroianga iaku. Te tauturu nei te pure iaku kia maroiroi no te mea e akarongo toku kiaia e kua kite au e te manako maira aia iaku.”

Akamārama a Petra e 80 ona mataiti: “E maata taku angaanga ka inangaro i te rave, kare ra e rauka. E ngata tikai i te kite i toku maroiroi e ngaro atura. E roiroi ua ana au e ka anoanoia kia kai i te vairakau. E manako ua ana au mei ia Iesu rai, tei pati ki tona Metua me ka tika e apai ke atu i teia manamanata. Inara kua akamaroiroi a Iehova ia Iesu e au katoa. Kua riro te pure putuputu mei te vairakau rai. E  meitaki ua ana au me pure au ki te Atua.”​—Mataio 26:39.

Kua manako akapera a Julian, tei tuia e tetai maki kino tikai no tetai 30 mataiti. Karanga aia, “Kua taui toku turanga mei te nooanga o tetai pu angaanga ki te pereoo oparapara. Noatu ra e mataora toku oraanga no te mea kua akatumuia ki runga i te tavini anga i etai ke. Ka akaitiia te mamae me oronga ua e ka akatupu a Iehova i tana i tia kia akamaroiroi ia tatou i te tuatau manamanata. Mei te apotetoro ko Paulo, ka rauka iaku te karanga e: ‘E tika iaku te au mea ravarai nei i te Mesia, ko tei akamaroiroi mai iaku nei.’”​—Philipi 4:13.

Maara ia Antonio: “Te mate anga toku metua tane i te ū anga aia i te motoka, i te akamataanga kare au e irinaki ana i te reira. Kare e tau ana kia tupu no te mea te aaere ua ra aia. Inara kare aku apinga e rauka i te rave. E rima rā tona moe ua anga i mua ake ka takake ei. Kua tauta au auraka kia aue i mua i toku metua vaine, inara kua aue maata au ko au anake ua. ‘No teaa ra?’ i ui ei au kiaku uaorai.

“I tera tuatau tumatetenga, kua pati ua rai au kia Iehova kia tauturu iaku kia akatere i toku au manako e kia oronga mai i te au. I reira kua maru mai au. Kua maara iaku ta te Pipiria akamārama anga ‘e tuatau ra, e te manuia ua’ to tetai ua atu ia tatou. No te mea kare e rauka i te Atua i te pikikaa, kua papu iaku e ka kite akaou au i toku metua tane i te tuakaouanga.”​—Koheleta 9:11; Ioane 11:25; Tito 1:2.

Aiteite te manako o Robert tei taikuia i te atikara mua. Karanga aia: “Kua kite maua ko taku vaine i te manako au tei taikuia ia Philipi 4:6, 7. Kua rauka mai te reira na roto i ta maua pure kia Iehova. Kua tauturu teia turanga au ia maua kia tuatua ki te aronga tata nuti no runga i te manakonakoanga o te tuakaouanga. Noatu kua takake ta maua tamaiti i te ū anga te pairere, e maata to maua tuatau mataora i te kapitianga kiaia. Kua tauta maua i te akamaara ua rai i te reira.

“Te akakiteanga te au taeake Kite e kua kite ratou ia maua i runga i te tivi e akamārama ra i to maua irinakianga, kua karanga maua e e mea papu no te au pure a te au taeake no maua i rauka ai i te rave i te reira. Te irinaki nei au kua turuturu a Iehova ia maua na roto i ta ratou tuatua akapumaana.”

Ka kite tatou mei te au akaraanga i runga ake, ka rauka i te Atua i te akapumaana i te aronga e aro atura i te au manamanata tukeke. Akapeea koe? Noatu te manamanata taau e na roto nei, te vaira te akapumaana ei tauturu ia koe i te tuatau ngata tikai. * Eaa ka kore ei e uri kia Iehova no te tauturu? Koia “te Atua nona anake te pumaana.”​—2 Korinetia 1:3.