Kua akataka a Paulo ia Iehova * “e ko te Atua nona anake te pumaana; Ko tei akapumaana mai ia matou i to matou au mate katoa nei.” (2 Korinetia 1:3, 4) No reira te akapapu maira te Pipiria e kare tetai ua atu tangata i mamao roa mei te tauturu a te Atua e kare e tumatetenga tei maata roa e kare e rauka i to tatou Metua i te rangi i te akapumaana ia tatou.

Te tika, ka anoanoia tatou kia rave i tetai angaanga me inangaro tatou kia akapumaanaia e te Atua. Ka akapeea tetai taote me tauturu ia koe me kare koe e inangaro i te aere ki te taote? Kua ui te peroveta ko Amosa e: “E aaere ainei e toko rua i te aerenga okotai, kia kore raua e tau?” (Amosa 3:3) No reira te raurau maira te au Tuatua Tapu ia tatou e: “E akavaitata atu ki te Atua, e nana e akavaitata mai kia kotou.”​—Iakobo 4:8.

Akapeea tatou e papu ei ka akavaitata mai te Atua kia tatou? Te mea mua, e akakite putuputu ana aia kia tatou, ka inangaro aia i te tauturu ia tatou. (Akara i te  pia.) Te rua, e akapapuanga taka meitaki to tatou mei te aronga ta te Atua i akapumaana​—e aronga tika tikai, mei te tuatau i topa e i teia tuatau.

Mei te manganui tei kimi i te tauturu no ko mai i te Atua i teia tuatau, kua tupu katoa te tumatetenga ki te Ariki ko Davida. I tetai atianga, kua pati akatenga aia kia Iehova: “E akarongo mai koe i te reo o taku patianga, kia pure atu au ia koe.” Kua akarongo ainei te Atua kiaia? Ae. Karanga a Davida: “Te irinaki nei toku ngakau iaia, e kua turuia mai au: i maataʼi te rekareka o toku nei ngakau.”​—Salamo 28:2, 7.

Kua akakoro te Atua ia Iesu kia riro ei tuanga maata no te oronga i te akapumaana. Kapiti mai ki te au angaanga ta te Atua i oronga kiaia kia rave, kua tonokia a Iesu “ei vaî i te aronga ngakau paruparu” e “ei akapumaana i te aronga ravarai i mii ra.” (Isaia 61:1, 2) Tei totouia, kua akaari a Iesu i te inangaro maata no “te aronga katoa i roiroi, e te aronga teiaa i te apainga.”​—Mataio 11:28-30.

Kua akapumaana a Iesu i te tangata na roto i tana akoanga tau, te takinga meitaki ia ratou, e i tetai au atianga, na te akaora anga i to ratou maki. I tetai rā, kua pati akatenga tetai tangata lepera kia Iesu: “Kia tika ia koe, e mā au ia koe.” Aroa akera Iesu iaia e kua pau atu: “Kua tika ïa iaku; kia mā koe.” (Mareko 1:40, 41) Kua ora te maki o te lepera.

 I teia rā, kare te Tamaiti a te Atua i te enua nei ei akapumaana ia tatou tataki tai. Inara te tauturu nei rai tona Metua ko Iehova, “te Atua nona anake te pumaana” i te aronga e mii ra. (2 Korinetia 1:3) Ka akamanako ana e ā ravenga maata e akapumaana ra te Atua i te tangata.

• Te Pipiria. “Te au tuatua ravarai oki i tataia i muatangana, i tataia ïa kia kite tatou; kia rauka to tatou tatari anga, i te akakoromaki e te pumaana o te tuatua i tataia ra.”​—Roma 15:4.

• Te Vaerua Tapu o te Atua. Kare i roa ana i muri ake i to Iesu matenga, kua na roto te putuputuanga Kerititiano i te tuatau au. No teaa ra? No te mea “mataku atura oki i te Atu i to ratou aerenga, e ma te akapumaana oki a te Vaerua Tapu.” (Angaanga 9:31) E mana ririnui te vaerua tapu koia oki te mana o te Atua. Ka taangaanga te Atua i te reira ei akapumaana i tetai ua atu tangata i te au turanga ravarai.

• Te Pure. Te ako maira te Pipiria kia tatou: “Auraka rava kotou e apiapi i te au mea katoa nei.” Mari ra, “e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki. E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako.”​—Philipi 4:6, 7.

• Te au Taeake Kerititiano. Ka riro mai ratou ei au oa mou tei irinakiia kia oronga mai i te akapumaana i te tuatau ngata. Kua karanga a Paulo no runga i tona au taeake e “ko ratou tei akapumaana mai iaku nei” i te tuatau o “to matou nei au mate katoa e te tumatetenga.”​—Kolosa 4:11; 1 Tesalonia 3:7.

Inara penei ka manako koe akapeea ra me taangaanga i teia i roto i toou oraanga. Ka akara ana tatou i tei tupu ki te aronga tei aro atu i te au manamanata tei taikuia i mua atu ana. Mei ia ratou rai, ka rauka ia koe te kite i te Atua me akatupu i teia taputou manea: “Mei tei akapumaanaia e tona ra metua vaine, ko toku ïa akapumaana ia kotou.”​—Isaia 66:13.