Kare te Pipiria e apii maira e angera tiaki to te tangata tataki tai. E tika, kua karanga a Iesu: “Kia matakite ko te akavaavaa aea kotou i tetai o teianei aronga tangata rikiriki [te au pipi a Iesu], te karanga atu nei au kia kotou, Ko to ratou au angela i te rangi, e tika ïa i te akara anga i te mata o taku Metua i te ao ra.” (Mataio 18:10) Kare te aiteanga e e angera tiaki to tetai tangata mari ra, te karanga ra a Iesu te manako tikai ra te au angera i tana au pipi tataki tai. No reira, kare te aronga akamori mou e tuku neneva ua i to ratou oraanga ki roto i te kino ma te manako e ka paruru te angera a te Atua ia ratou.

Ko te aiteanga ainei kare te au angera e tauturu ana i te tangata? Kare. (Salamo 91:11) Irinaki pu tikai tetai pae e kua tono te Atua i tetai angera ei paruru e ei arataki ia ratou. Kua manako pera a Kenneth, tei taikuia i te atikara mua. Kare matou e akakite papu e ko teia te tika, inara penei e tano rai tana. Te kite putuputu nei te Au Kite o Iehova i te au akapapuanga e te tauturu nei te au angera ia ratou me rave i te angaanga tutu aere. Inara, no te mea kare tatou e kite mata i te au angera, kare tatou e kite mei teaa rai te maata me taangaanga te Atua ia ratou kia tauturu i te tangata. Noatu ra, ka akameitaki tatou i te Mana Katoatoa no tetai ua atu tauturu tana i oronga mai.​—Kolosa 3:15; Iakobo 1:17, 18.