Tetai aiai Tapati, kua aere a Kenneth e Filomena, tei noo i Curaçao i te atoro i tetai nga tokorua akaipoipo no te apii Pipiria.

“Te tae anga maua,” i karanga ai a Kenneth, “kua piri te are e kare e motoka. Inara kua akakeuia au kia ringi i teia vaine.”

Kua pau mai teia vaine e kua akamārama mai e kua aere tana tane ki te angaanga. Inara, te kite anga aia e tei reira a Kenneth e Filomena, kua vaʼi aia i te ngutupa e kua pati ia raua ki roto.

Kua kite raua e kua aue ana teia vaine. Te akamata anga a Kenneth i te apii Pipiria na roto i te pure, kua aue akaou teia vaine. I reira, kua ui maru atu a Kenneth e Filomena, eaa te manamanata.

Akamārama teia vaine e kua akakoro aia i te tamate iaia uaorai i tera aiai, e i mua ake ka rave ei i te reira, te tata reta ra aia ki tana tane e kua tangi tana phone, ko Kenneth tei ringi mai iaia. Akakite aia kia raua e maki taitaia tona, no reira kua akaari raua i te au irava akapumaana mei roto i te Pipiria. Kua riro teia akamaroiroi anga ei akaora iaia.

“Akameitaki maua ia Iehova no tei tono ia maua kia tauturu i teia vaine tei rokoia e te tumatetenga,” i na Kenneth ei, “e te akakeu ia maua​—penei na roto i tana angera me kore Tona vaerua tapu—​kia ringi mai iaia!” *

Ka tau ainei no Kenneth e Filomena kia irinaki e kua tauturu a Iehova na roto i tana angera me kore Tona vaerua tapu, koia oki Tona mana ririnui? Me e tupuanga poitirere ua te ringi anga a Kenneth i teia vaine?

Kare tatou i kite papu. Kua kite ra tatou e taangaanga ana te Atua i tana au angera kia tauturu i te tangata i te pae vaerua. Ei akaraanga, karanga te Pipiria kua taangaanga te Atua i te angera kia arataki i te Kerititiano tutu evangeria ko Philipi ki tetai tangata Etiopia e kimi ra i te tauturu i te pae vaerua.​—Angaanga 8:26-31.

Tukeke te akonoanga e turu ra i ta ratou irinakianga mea vaerua ririnui, tetai pae e au angera meitaki tei rave i te anoano o te Atua e tei paruru i te tangata. E manganui tei irinaki e e tika rai te au angera e ka akakeu ia ratou na roto i te mataara puapinga. Inara, e manganui tei kore i irinaki i te au angera.

E tika ainei te au angera? Me koia ïa, noea mai ratou? Eaa te tika no te au angera? Ka akakeu ainei ratou i toou oraanga? Akara tatou i te pauanga.