Ae, e au angera kino tetai. Noea mai ratou? E akamaara, kua anga te Atua i te au angera ma te apinga aroa o te tu rangatira. I muri ua ake te angaia anga te tangata e te vaine mua ko Adamu raua ko Eva, kua taangaanga tau kore tetai vaerua apa kore i tona tu rangatira ei akamata i te meameaau i te enua. Kua rauka iaia te uri ke ia Adamu raua ko Eva mei te Atua. (Genese 3:1-7; Apokalupo 12:9) Kare te Pipiria i akakite mai ana i te ingoa o teia vaerua e tona taoonga i te rangi i mua ake ka meameaau ei. Inara i muri ake i tana meameaau anga, kua kapiki te Pipiria iaia ko Satani, tona aiteanga Tei Patoi e te Tiaporo koia oki Tei Akakino.​—Mataio 4:8-11.

Te mea mii ra, kare teia meameaau i akamutu ana. I te tuatau ia Noa, kua “akaruke iora [tetai au angera] i to ratou nooanga tikai” i te rangi ma te Atua. Kua aere mai ratou ki te enua nei e kua rave i te kopapa tangata ei rave i te angaanga viivii e te tau kore, te aere ke i te akakoroanga i angaia ai ratou.​—Iuda 6; Genese 6:1-4; 1 Petero 3:19, 20.

Eaa tei tupu ki taua au angera kino? Te apai mai anga te Atua i te vai tiruvi ei tāma i te enua, kua akaruke ratou i to ratou kopapa tangata e kua oki ki te ao vaerua. Inara, kare te Atua i akatika ana i teia au angera meameaau kia oki akaou ki “ta ratou orai taoonga ra.” Mari ra, kua tapeka aia ia ratou ki roto i “te poiri [i te pae vaerua]” tei matauia ko te Poiri i te po. (Iuda 6; 2 Petero 2:4) Kua tuku teia au temoni ia ratou uaorai i raro ake ia Satani te Tiaporo, “te demoni maata,” “tei akatutu angela katoa iaia uaorai no te mārama.”​—Mataio 12:24; 2 Korinetia 11:14.

Te apii ra te Pipiria e kua akamouia te Patireia o te Atua, e kavamani i te rangi, i te mataiti 1914. * Aru mai i teia tupuanga umere, kua uriia a Satani e tana au temoni mei te rangi ki te enua nei. Te riro ra te kino maata e te au angaanga tau kore e te viivii e takino ra i te enua ei akapapu i to ratou vaerua makitakita e te takinokino.​—Apokalupo 12:9-12.

Inara, no te maata o te angaanga viivii e te tā ua, te akapapu maira e kua vaitata te openga o ta ratou angaanga kino. Kare e roa atu ana, ka akaateaia teia au vaerua kino. Me tutara te Patireia o te Atua i rungao i te enua parataito no te 1,000 mataiti, ka orongaia tetai tuatau poto no teia au vaerua kino kia timata i te tangata. E oti ka takore takiriia ratou.​—Mataio 25:41; Apokalupo 20:1-3, 7-10.