Te akaari maira te Pipiria e ka akatupuia te anoano o te Atua, e ka paruru te au angera i te aronga akamori mou i tetai au atianga. (Salamo 34:7) Ei akaraanga:

• Te takore anga a Iehova i te nga oire kino ko Sodoma e Gomora, kua tauturu te nga angera ia Lota e tona ngutuare kia oro.​—Genese 19:1, 15-26.

• I Babulonia taito, te akautungaia anga e toru mapu Epera kia mate i roto i te umu ai ka, kua “tono mai [te Atua] i taua angela, e kua akaora i ona puke tavini.”​—Daniela 3:19-28.

• Te nooanga te tangata tuatua tika ko Daniela i te po katoa i roto i te vaarua riona, akamārama aia e kua ora aia no te mea “kua tono mai taku Atua i tana angela, e kua topiri i te vaa o te au liona.”​—Daniela 6:16, 22.

Tetai taime, kua tauturu te au angera a te Atua i te angaanga a te putuputuanga Kerititiano mua i te au taime tei anoanoia kia akatupu i to Iehova akakoroanga. Ei akaraanga:

• Kua akatuera te angera i te ngutupa o te areauri e kua arataki i te au apotetoro ki vao kia tutu aere i ko i te iero.​—Angaanga 5:17-21.

• Kua ikuiku tetai angera i te tangata tutu evangeria ko Philipi kia aere ki te mataara mei Ierusalema ki Gaza ei tutu aere ki te tangata Etiopia, tei aere mai no Ierusalema no te akamori.​—Angaanga 8:26-33.

• Te taeanga te tuatau no te aronga kare i te ngati Iuda, kia riro mai ei au Kerititiano, kua mama mai tetai angera ki te rangatira vaeau Roma ko Korenelio na roto i te orama i te ikuiku anga iaia kia tiki mai i te apotetoro ko Petero ki tona kainga.​—Angaanga 10:3-5.

• Te tapekaia anga te apotetoro ko Petero, kua mama mai tetai angera kiaia e kua taki atu iaia ki vao i te areauri.​—Angaanga 12:1-11.

Kare e akapapu anga e te taangaanga ra te Atua i te au angera i teia tuatau kia tauturu temeio i te tangata mei tei akatakaia i roto i te Pipiria. Inara, karanga a Iesu no runga i to tatou tuatau: “E tutu aereia te evangelia o te basileia nei, e kako rava ake te ao katoa nei; ei kite no te pa enua ravarai; ko te openga iora ïa i reira ra.” (Mataio 24:14) Kua kite ainei koe e te rave ra ta Iesu au pipi i teia angaanga i raro ake i te akaaereanga a te au angera?

Te akakite ra te puka o Apokalupo e te maroiroi ra te au angera i te tauturu i te tangata i te ao katoa kia kite i te Atua ko Iehova e tona akakoroanga no te tangata. Tata te apotetoro ko Ioane: “Akara atura au i tetai angela i te rere anga na rotopu i te mareva nei, ma te evangelia mutu kore, e tutu ki te aronga e noo i te ao nei, ki te pa enua katoa, e te au kopu, e te au reo, e te au iti-tangata, I te na ko anga ma te reo maata, Ka mataku i te Atua, e akakakā iaia; kua tae oki ki te ora akautunga anga nana; e akamori kotou iaia i tei anga i te rangi, e te enua, e te tai, e te au vai pupui ra.” (Apokalupo 14:6, 7) E maata te au tupuanga no teia tuatau te akapapu ra e te turu nei te au angera i te angaanga tutu aere o te Patireia i te ao katoa. Me tataraara e okotai ua tangata e me ariu kia Iehova, “mei te reira katoa te tu o to te au angela a te Atua ra rekareka.”​—Luka 15:10.

Eaa te ka tupu me oti te angaanga tutu evangeria? Ka turu te au angera, “te au nuku o te rangi ra,” ia Iesu Mesia, te Ariki o te au ariki, “te tamaki i taua rā maata o te Atua mana katoatoa ra” ia Aramagido. (Apokalupo 16:14-16; 19:14-16) Na te au angera ririnui e rave i te akautunga anga a te Atu ko Iesu “te tuku anga mai i te mate i te aronga . . . tei kore i akarongo i te evangelia o to tatou Atu o Iesu Mesia.”​—2 Tesalonia 1:7, 8.

No reira, kia irinaki papu e te manako maira te au angera ia koe. E inangaro maata to ratou no te aronga tei inangaro i te tavini i te Atua, e te taangaanga putuputu ra a Iehova ia ratou kia akamaroiroi e te paruru i tona au tavini tiratiratu i te enua nei.​—Ebera 1:14.

No reira, e ikianga puapinga ta tatou tataki tai ka rave. Ka akarongo ainei tatou ki te nuti meitaki te akakiteia ra i te ao katoa? Ka mataora te Au Kite o Iehova i toou ngai i te tauturu ia koe kia puapingaia mei te tauturu aroa a te au angera ririnui a te Atua.