“E terono tei akatuia ki runga i te rangi, e te noo ra tetai ki rungao i taua terono ra. E ko tei noo i rungao i taua terono ra, mei te toka iasepe ra e te sarido ra, te tu: e i takakoia taua terono ra i te anuanua, mei te emeradino ra te tu.”​—Apokalupo 4:2, 3.

“E kua pini akera aia i te kakā. Mei te tu o te anuanua e vai i roto i te tumurangi i te rā ua nei, ko te tu ïa o te kakā e pini ua ake. Ko te tu ïa teia o te arite anga o te kakā o Iehova.”​—Ezekiela 1:27, 28

Teia nga orama, tei orongaia ki te apotetoro ko Ioane e te peroveta ko Ezekiela, te akaari maira i te kakā o te Atua Teitei Rava, ko Iehova, na roto i te tu ka māmā ua ia tatou i te akamanako​—koia te au toka purapura, te anuanua, e tetai terono kakā. Te akakite maira te reira kia tatou e tei mua i to Iehova aroaro te manea maata, maru e te au.

Te rotai ra teia nga akatutuanga no te Atua ki te au tuatua a te tata salamo tei karanga e: “E maata oki a Iehova, e kia maata tona akapaapaa angaia: Kia matakuia oki aia, auraka te au atua katoa. Te au atua ravarai o te au etene ra, e idolo ïa: ko Iehova ra tei anga i te au rangi ra. Te kakā e te akangateitei tei mua i tona mata; te ririnui, e te manea, tei tona ïa ngai-tapu.”​—Salamo 96:4-6.

Noatu e ko Iehova Tei Teitei Rava, te pati nei aia ia tatou kia pure kiaia e te akapapu maira e ka akarongo aia ia tatou. (Salamo 65:2) Te aroa e te akono maira tikai te Atua ia tatou, no reira rai te apotetoro ko Ioane i tata tika ai: “Ko te Atua oki te aroa.”​—1 Ioane 4:8.

“Ki akera [te pipi Kerititiano ko Setephano] i te Vaerua Tapu, akara tamou tikai atura ki runga i te rangi, e kite atura i te kakā o te Atua, e ia Iesu i te tu anga i te rima katau o te Atua ra. Kua na ko akera aia, I na, te kite atura au i te rangi i te vetea angaia, e te Tamaiti na te tangata i te tu anga i te rima katau o te Atua.”​—Angaanga 7:55, 56

I mua ua ake ka kite ei a Setephano i teia orama, kua tamateia a Iesu e te aronga tikai ta Setephano i tuatua atu​—koia te au arataki ngati Iuda. Kua akapapu teia orama e te ora nei a Iesu e kua akatuia aia ma te ngateitei. No runga i teia, kua tata a Paulo e:  “Ka akatu mai ei [a Iehova ia Iesu] i te matenga ra, e akanoo iora oki iaia i tona uaorai rima katau i te ao ra, Ki runga rava atu i te au ariki ravarai, e te aronga mana, e te marōrō, e te maata, e te au ingoa katoa i akaikiia nei, eiaa i teianei ao anake, i te ao katoa ra a muri atu.”​—Ephesia 1:20, 21

Kapiti mai ki teia akatakaanga i tona turanga teitei, te akaari maira te au Tuatua Tapu e mei ia Iehova rai, e inangaro tikai to Iesu i te tangata. I te tuatau o tana angaanga tutu aere i te enua nei, kua rapakau a Iesu i te aronga maki e te apikepike, e kua akatu mai i te aronga tei mate. Na roto i tona mate akaatinga, kua akaari aia i tona aroa oonu no te Atua e te tangata. (Ephesia 2:4, 5) Te tu nei aia i te rima katau o te Atua, e kare e roa atu ana ka taangaanga a Iesu i tona mana kia apai mai i te au akameitakianga maata no te au tangata akarongo i te au ngai ravarai.

“Te akara ra au [te peroveta ko Daniela], e kua akanooia iora te au terono, e kua noo maira To te au rā taito ra [ko Iehova], . . . kua tausani oki te tausani anga i te tavini anga kiaia, e kua ngauru oki te tausani anga i te manotini i te tu anga ki mua iaia.”​—Daniela 7:9, 10

I roto i teia orama no te rangi, kare a Daniela i kite i te okotai anake angera mari ra e manotini ua atu. Mei teaa tikai te umere i teia orama! E au vaerua kakā, kite karape e te ririnui te au angera. Kapiti mai to ratou taoonga seraphi e te kerubi. Kua taiku te Pipiria i te au angera e 250 tuma taime.

Kare te au angera i te au tangata tei noo i te enua nei i mua ana. Kua anga te Atua i te au angera i mua roa ake ka anga ai i te tangata. I te akatumuia anga te enua nei, kua akara te au angera e kua maeva ratou.​—Iobu 38:4-7.

Tetai mataara e tavini ra te au angera meitaki i te Atua koia oki na te turuturu anga i te angaanga puapinga rava atu e raveia nei i te enua i teia tuatau​—te akakitekiteanga i te nuti meitaki o te Patireia o te Atua. (Mataio 24:14) Kua akaariia ta ratou turuturu anga i teia angaanga i roto i tetai orama a te apotetoro ko Ioane tei tata e: “Akara atura au i tetai angela i te rere anga na rotopu i te mareva nei, ma te evangelia mutu kore, e tutu ki te aronga e noo i te ao nei, ki te pa enua katoa, e te au kopu, e te au reo, e te au iti-tangata.” (Apokalupo  14:6) Noatu e kare te au angera e tuatua ana ki te tangata i teia tuatau mei ta ratou i rave i mua ana, te arataki nei ratou i te aronga e tutu aere ra i te nuti meitaki ki te aronga ngakau tika.

“E e tamaki tei runga i te rangi: ko Mikaela [Iesu Mesia] e tana au angela, tamaki atura i te taae; e kua tamaki maira te taae e tana au angela, Kare ra i riro te re ia ratou; e kare rava atura o ratou e nooanga i runga i te rangi. Uriia atura oki te taae maata ki vao, ko taua ovi taito ra ïa, ko tei karangaia i te diabolo ra, e ko Satani oki, ko tei pikikaa i to te ao katoatoa nei, i uriia aia ki vao ki runga i te enua nei, e tana au angela katoa, kua uri katoaia ki vao.”​—Apokalupo 12:7-9.

Kare te au i tupu ua ana i te rangi. I te akamata anga te tuatua enua o te tangata, no tona inangaro kia akamoriia aia, kua meameau tetai angera ia Iehova e kua riro mai ko Satani, te aiteanga “Tei Patoi.” I muri mai kua kapiti atu tetai au angera ki tana meameaau anga e kua riro mai ei au temoni. E tu kino tikai to ratou, e te patoi pakari ra ia Iehova e kua arataki ke i te maata anga o te tangata kia kore e aru i ta Iehova aratakianga aroa.

E tu viivii tikai e te kino to Satani e tana au temoni. E au enemi ratou no te tangata e kua akatupu i te mamae maata i te enua nei. Ei akaraanga, kua tamate a Satani i te au animara e te au tavini o te tangata tiratiratu ko Iobu. Aru mai, kua tamate pouroa aia i te tamariki a Iobu e tai ngauru na te akatupuanga i “te matangi viviki” kia takore i te are e noo ra ratou. I muri ake i te reira, kua tā atura a Satani ia Iobu ki te “ee mamae, mei tona tapuae e tae ua atu ki tona take upoko.”​—Iobu 1:7-19; 2:7.

Noatu ra, kare e roa atu ana ka takoreia a Satani. Mei te tuatau i uriia ai aia ki te enua nei, kua kite aia “e manga tuatau poto ua tona e toe nei.” (Apokalupo 12:12) Ae ka takore takiriia a Satani, e e nuti meitaki teia.

“E kua oko koe [a Iesu] ia matou ei tangata no te Atua i toou uaorai toto, no roto i te au kopu ravarai, e te au reo katoa, e te au iti-tangata katoa, e te pa enua katoa; E kua akariro koe ia matou ei ui ariki e ei kau taunga na to matou Atua: e e riro ia matou te au i teianei ao.”​—Apokalupo 5:9, 10

Mei ia Iesu rai tei akatuia mei te enua nei ki te oraanga i te rangi, koia katoa tetai pae. Karanga a Iesu ki tana au apotetoro tiratiratu: “Te aere nei  au e akamanea i tetai ngai no kotou. E . . . ka oki mai au, e arataki ia kotou ki oku ra; ei reira katoa kotou, i te ngai e nooia e au ra.”​—Ioane 14:2, 3.

Te aronga te ka aere ki te rangi, e akakoroanga to ratou. Ma Iesu katoa, ka riro mai ratou ei kavamani Patireia te ka tutara ki rungao i te au tangata i te enua katoa e ka apai mai i te akameitakianga kia ratou. Ko teia te Patireia ta Iesu i akakite ki tana au pipi kia pure i roto i te pure a te Atu: “E to matou Metua i te ao ra, Kia tapu toou ingoa. Kia tae toou basileia. Kia akonoia toou anoano i te enua nei, mei tei te ao katoa na.”​—Mataio 6:9, 10

“Kua akarongo atura au [te apotetoro ko Ioane] i tetai reo maata no te rangi maira, i te na ko anga mai e, I na, tei ko te tangata ra te puakapa o te Atua . . . E nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.”​—Apokalupo 21:3, 4.

Te akataka ra teia orama totou i te Patireia o te Atua, tei kapiti mai ia Iesu e te aronga tei akatuia mei te enua, i te tuatau me takore te reira i te tutara a Satani e ka akariro i te enua ei parataito. Ka kore rava te au mea tei akatupu i te mamae e te taitaia maata ki te tangata. Ka kore katoa te mate.

Akapeea ra, te pirioni ua atu tangata tei mate e kare e akatuia ki te rangi? A tetai tuatau ki mua, ka akatuia mai ratou ma te manakonakoanga no te ora mutukore i te enua Parataito.​—Luka 23:43.