“Te au mea memeitaki i o maiia ra, e te au mea tika ravarai, no runga ïa, no runga mai i te Metua o te au mārama ra.” (Iakobo 1:17) E tikai, te tuatua ra teia irava no te tu oronga ua o to tatou Metua i te rangi, te Atua ko Iehova. Inara, i te au apinga aroa e manganui ta te Atua i oronga mai ki te tangata, te vaira okotai tei maata roa atu i te katoatoa. Eaa te reira? Akakite mai te au tuatua rongonui a Iesu ia Ioane 3:16, kia tatou: “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.”

Te apinga aroa, koia te Tamaiti anau tai a te Atua​—teia te apinga aroa maata rava atu ka rauka i tetai ua atu ia tatou, kia akarangatiraia mei te tuikaa o te ara, te tu ruaine, e te mate. (Salamo 51:5; Ioane 8:34) Noatu ta tatou tauta anga, kare rava tatou e matara mai mei teia tuikaa anga. Inara, na roto i tona aroa maata, kua oronga mai te Atua tei anoanoia kia matara mai tatou mei te tuikaa anga. Na roto i tana Tamaiti anau tai, ko Iesu Mesia, ei atinga oko, kua oronga mai te Atua ko Iehova i te manakonakoanga o te ora mutukore ki te tangata tei akarongo. Inara eaa tikai te atinga oko? Eaa te reira i anoanoia ai? E akapeea tatou e puapinga ai mei te reira?

Te atinga oko, e tutaki te reira ei oko i tetai apinga tei ngaro me kore kia akamatara i tei tuikaaia. Akataka te Pipiria kare e ara a to tatou nga metua mua, ko Adamu e Eva, e manakonakoanga rekareka to raua e tuatau ua atu i te enua parataito ma te uanga ka anau mai. (Genese 1:26-28) Ma te maromaroa, kua ngere raua i teia au mea te ikianga i te akarongo kore i te Atua​—kua riro mai raua ei nga tangata ara. Eaa tei tupu? Te pau ra te Pipiria: “No te tangata okotai ra i o mai ei te kino i te ao nei, e no te kino oki te mate; e kua taea katoaia oki te tangata ravarai e te mate, no te mea kua ara katoatoa.” (Roma 5:12) Kare a Adamu i oronga i te oraanga apa kore ki tana uanga, kua oronga ra aia i te ara e te mate.

Na roto i te atinga oko, kia aite tei tutakiia ki tei ngereia. Te akakoro anga a Adamu i te akarongo kore i te Atua, kua ara aia, e tei tupu kua ngere aia i te oraanga apa kore​—to Adamu oraanga. Kia tau ki te Pipiria, kua akatupu te reira i ta Adamu uanga kia akatuikaaia e te ara e te mate. No reira, kua anoanoia te oraanga apa kore​—to Iesu oraanga—​kia orongaia ei atinga kia rauka te akamatara anga mei te tuikaa anga. (Roma 5:19; Ephesia 1:7) Na roto anake i te Atua aroa i tutakiia ai teia atinga i rauka ai te manakonakoanga o te tangata kia rekareka i ta Adamu e Eva i ngere​—te ora e tuatau ua atu i te enua parataito.​—Apokalupo 21:3-5.

Te akamanako anga ta te reira ka akatupu, kare e ekoko anga ko te apinga aroa a te Atua, koia te atinga oko, te apinga aroa maata rava atu. Kia āriki mei teaa atura i “te au mea tika ravarai” ka akara tatou akapeea, na roto i te au tu maata rava atu, te tauturu anga ia tatou kia akariro i te au apinga aroa ei mea puapinga, mei tei uriuriia i te atikara i mua akenei.

Ka akatupu i to tatou inangaro. E anoano natura to tatou kia ora e tuatau ua atu. (Koheleta  3:11) Kare e rauka ia tatou uaorai i te akatupu i teia anoano, ka rauka ra i te atinga oko i te rave i te reira no tatou. Karanga te Pipiria: “E utunga te mate no te ara; kareka te ora mutu kore ra, e mea oronga uaia mai e te Atua i roto i to tatou Atu ia Iesu Mesia.”​—Roma 6:23.

Ka akatupu i to tatou anoano. Kare e rauka i te tangata i te oronga mai i te atinga oko. Akamārama te Pipiria: “Ko te oko oki o te vaerua, e maata ua atu ïa, e ko te kore rai ïa e tuatau ua atu.” (Salamo 49:8) No reira, kua anoano tikai tatou i te tauturu a te Atua kia matara mai mei te tuikaa anga ki te ara e te mate. Inara “i te ora e vai i te Mesia ra ia Iesu,” kua oronga mai te Atua i tei anoanoia.​—Roma 3:23, 24.

Tau tikai te taime. Te akakite maira te Pipiria: “I te mea te vai tangata ara ua nei rai tatou, i mate ei te Mesia no tatou nei.” (Roma 5:8) “I te mea te vai tangata ara ua nei rai tatou,” kua orongaia mai te atinga oko ei akapapuanga i te aroa oonu o te Atua no tatou, noatu to tatou tu ara. E te rekareka ra tatou i teia noatu e ka akakoromaki tatou i te utunga o te ara.

Akakoro anga ngateitei e te akaatinga. Te akakite ra te Pipiria eaa tei akakeu i te Atua kia oronga i tana Tamaiti ei oko: “Kua kitea to te Atua aroa ia tatou nei, koia i tono mai i tana Tamaiti anau tai ki te ao nei, kia ora tatou iaia. Ko te aroa mou teia, kare ïa na tatou i aroa atu i te Atua, koia ra tei aroa mai ia tatou nei.”​—1 Ioane 4:9, 10.

Akapeea koe me akaari e te āriki ra koe i te apinga aroa maata rava atu? Akamaara ana i te tuatua a Iesu ia Ioane 3:16, te akakite ra ko te aronga anake tei “akarongo iaia” te ka ora. Te akarongo i roto i te Pipiria, “Ko te tumu tikai ïa i te au mea i tatariia nei.” (Ebera 11:1) Kia rauka te reira akapapuanga, ka anoanoia te kite tikai. Teia te tumu, te akamaroiroi nei matou ia koe kia apii no runga i te Atua ko Iehova, tei oronga mai i “te au mea tika ravarai,” e kia kite i taau ka rave kia mataora i te oraanga mutukore tei rauka na roto i te atinga oko o Iesu.

Ka apii pouroa koe i teia na te akara matatio anga i te apiianga Pipiria i runga i te initaneti www.pr418.com. Ka rekareka te Au Kite o Iehova i te tauturu ia koe. Te papu nei ia matou, ia koe e apii ra kia puapinga mei teia apinga aroa maata rava atu, ka akakeuia koe kia kapiki: “E akameitaki au i te Atua i te mea e ora i to tatou Atu ra ia Iesu Mesia.”​—Roma 7:25.