Takapini i teianei ao kua irinaki te tangata i te Kiritimiti e ko te rā te reira i anauia ai a Iesu Mesia. Inara, kua akono ana ainei te au Kerititiano o mua ana, te au taeake mou o Iesu i te Kiritimiti? Kua kite ainei koe e eaa ta te Pipiria e akakite ra no runga i te rā anauanga? Ka tauturu te au pauanga ia tatou, kia kite me kua akono ana te au Kerititiano i te Kiritimiti.

Mea mua, kare te Pipiria i akakite e kua akono ana a Iesu i tona rā anauanga e tetai ua atu tavini tiratiratu o te Atua. Akakite te irava e rua nga tangata tei akamaara i to raua rā anauanga. Kare raua e akamori ana ia Iehova, te Atua o te Pipiria, e kua tupu te tumatetenga i te rā i akamaara ei raua i to raua rā anauanga. (Genese 40:20; Mareko 6:21) Te akakite ra te Encyclopædia Britannica, e kua patoi te au Kerititiano o mua ana “i te peu akamaara i te rā anauanga a te aronga kare i irinaki i te Atua.”

Kare te Pipiria i taiku mai ana i te rā i anauia ai a Iesu. “Kare i tataia te rā i anauia ai te Mesia i roto i te K[oreromotu] O[u] me kare i roto i tetai ua atu puka,” i akakite ei te Cyclopedia na McClintock e Strong. Me kua inangaro a Iesu i tana au pipi kia akamaara i tona rā anauanga ka akakite aia kia ratou i te reira rā.

Te rua, kare i tataia i roto i te Pipiria e kua akamaara ana a Iesu e tana au pipi i te Kiritimiti. Akakite te New Catholic Encyclopedia, no runga i te akamaaraanga i te peu Kiritimiti kua tataia “ki roto i te Chronograph na Philocalus, e tangata Roma aia, e e tangata tata puka mei te mataiti 336 [T.N.].” Taka meitaki e kua oti te katoa anga o te Pipiria i te tataia e kua tae ke mai ana a Iesu ki te enua. No reira kua akakite a McClintock e Strong “ko te akamaara anga o te Kiritimiti kare no ko mai i te Atua, e kare katoa i roto i te K[oreromotu] O[u].” *

Ei Puapii Maata, kua akakite a Iesu ki tana au pipi e eaa ta ratou ka akamaara e kua tataia teia i roto i te Pipiria. Inara, kare ratou e akono i te peu Kiritimiti. Mei tetai puapii e inangaro ra i te au tamariki kia aru i tana au apii anga, kua inangaro katoa a Iesu i tana au pipi e “auraka kia rai to kotou manako i te tangata nei i tei tataia ra,” i roto i te Tuatua a te Atua.​—1 Korinetia 4:6.

I tetai tua, kua matau meitaki te au Kerititiano i te akono i tetai akakoroanga puapinga—Akamaaraanga i te matenga o Iesu. Kua akakite a Iesu ki tana au pipi aea ratou e akono ei i te reira e ka akapeea me rave i te reira. Teia au ikuikuanga, e pera te rā e akamaaraia ai tona matenga, kua tataia i roto i te Pipiria.​—Luka 22:19; 1 Korinetia 11:25.

Mei ta tatou i kite mai, ko te Kiritimiti e rā akamaara anga te reira i te rā anauanga, e kare te au Kerititiano o mua ana i akono ana i te reira. Te aiteanga, kare te Pipiria i taiku ana e kua akono ana a Iesu me kore tetai ua atu i te Kiritimiti. No reira, kua iki te au Kerititiano takapini i teianei ao, kare ratou e akamaara i te Kiritimiti.