Mataora tikai a Don raua ko Margaret i te atoro anga mai ta raua tamaine e tona ngutuare tangata ia raua. * No ta ratou kaikaianga kapiti openga, kua maani a Margaret, e vaine karape i te tunu kai, i tetai macaroni e te titi, e kai rekaia na tana nga mokopuna tamaroa.

Te noo ra te katoatoa ki raro, kua apai mai a Margaret i te kai ki runga i te kainga kai. Kua mou aia i te tapoki e kua poitirere i te kite e titi ua to roto i te pani! Kua ngaropoina ia Margaret te tuku i te macaroni ki roto!

E tarevake ana tatou pouroa noatu e mapu me kore e pakari. Penei ko ta tatou ka tuatua, ta tatou ka rave, e penei kua ngaropoina ia tatou i tetai apinga. Eaa ra te au tarevake ka tupu ei? Eaa ta tatou ka rave me tupu te reira? Ka rauka ainei te reira i te kopaeia? Na te akamanako anga i te au tarevake, ka tauturu te reira ia tatou kia kite i te pauanga ki teia au uianga.

Me rave tatou i tetai apinga meitaki, ka āriki ua tatou i te au tuatua akameitaki e te akapaapaa tei tau no tatou. Me rave tatou i te tarevake, noatu kare i te mea akakoro me kore kare i kitea mai e tetai ke, ka āriki ainei tatou e kua tarevake tatou? E rauka ai ia tatou i te rave i teia ka anoanoia te tu akaaka.

Me manako ua tatou ia tatou uaorai, penei ka tauta tatou i te kimi kotoeanga, akaapa atu i tetai ke, me kore ka pikikaa atu no te reira. Te maata anga o te taime ka akatupu te reira i te kino. Ka vai ua rai te manamanata, e penei ka akaapaia tetai ke. Noatu e kare e kitea mai to tatou tarevake, akamanako meitaki e na tatou e “aaki i te tuatua iaia uaorai i te Atua ra.”​—Roma 14:12.

Kua kite a Iehova eaa tatou i rave ei i te tarevake. Roto i te puka o Salamo, e Atua “aroa e te takinga-meitaki” Aia; e kare “e tamou i te akamura mai: kare oki e vaoo māro i tona riri e tuatau ua atu.” Kite meitaki aia i te tu apa ua o te tangata e te tu paruparu, “te manako ra aia e, e one tatou nei.”​—Salamo 103:8, 9, 14.

Mei tetai metua aroa rai, inangaro te Atua ia tatou, tana au tamariki, kia akamanako meitaki i te au tarevake. (Salamo 130:3) Te oronga maira tana Tuatua i te au akoanga e te kaveinga ei tauturu ia tatou kia akatikatika i to tatou uaorai tarevake e pera katoa to tetai ke.

Me tupu te tarevake, ka kimi ravenga tetai tangata i te akaapa i tetai ke, kare aia e āriki e kua tarevake aia. Inara, me kua riri tetai tangata no taau i tuatua, e tauta i te akatupu i te au, e tataraara e te tuatua maru kia vai ua to korua pirianga  taeake. Kua rave ainei ana koe i te tarevake me kore kua akatupu i te manamanata ki tetai ke? Eiaa e riri ua e te akaapa i tetai ke, e tauta i te akatupu i te au? Me ka akaapa ua rai koe i tetai ke, ka kino rava atu te manamanata. E tamou ra i taau i kite, akatupu i te au, e kia rave i taau ka rauka i te akatikatika i te manamanata.

Me rave ra tetai ke i te tarevake ka viviki ua tatou i te riri i tera tangata. E mea meitaki kia aru i ta Iesu i tuatua: “E te au mea katoa ta kotou i anoano ia etai ke ra, na reira katoa kotou ia ratou.” (Mataio 7:12) Me rave koe i te tarevake, noatu te meangiti, kare e ekoko anga ka inangaro koe i te katoatoa kia tangi mai ia koe e kia akakore i toou tarevake. No reira, e tauta i te akaari i te tu takinga meitaki ki tetai ke?​—Ephesia 4:32.

E tupu ana te tarevake “me kare e tano to tatou manako, kare e mārama ana i te tumu, kare e akamanako meitaki ana,” te karanga ra tetai puka. E tika, e akapera ana tatou pouroa. Inara, ka tauturu te au kaveinga i roto i te Tuatua Tapu ia tatou kia akakore i te au tarevake.

Roto ia Maseli 18:13, te karanga ra te kaveinga i reira e: “Ko tei tuatua vave mai e kare i akakiteia atu, e neneva tona, e ka akama ïa aia.” Ae, na te akarongo anga e te akamanako anga i taau ka tuatua ka kopaeia te tuatua riri e te rave i te kino. Ka tauturu katoa ia koe kia kore e akaapa i tetai ke e kia kore e rave i te tarevake.

Akakite katoa ra tetai kaveinga Pipiria e: “Peneiake ko te tika, ko ta kotou ïa e aruaru e, kia noo au ua kotou i roto i te tangata katoa nei.” (Roma 12:18) E rave i taau ka rauka kia akatupu i te au e te tu taokotai. Me angaanga kapiti ki tetai ke, e akaari i te tu āriki ua, te tu akangateitei, e kia akameitaki e te akamaroiroi ia ratou. Ka riro teia au tu i te tauturu ia tatou kia kore e akamoupuku, e kia akatupu i te au ki tetai ke.

Ka riro toou tarevake i te tauturu ia koe kia rave i te meitaki. Eiaa e akaapa i tetai ke no toou tarevake, mari ra e akaari i te au tu meitaki, mei te akakoromaki, te takinga meitaki, te akono meitaki, te tu maru, te au e te inangaro. (Galatia 5:22, 23) Te mea maata rava atu, ka kite koe eaa taau ka rave a te tuatau ki mua. Auraka e akapou i toou taime i te akamanako i toou turanga. Ka tauturu te tu maoraora ia koe kia akaari i te tu maru.

Me tupu te tarevake ka riro te akamanako meitaki i te tauturu ia tatou kia kite eaa ta tatou ka rave. Ka akatupu teia i te au kia koe uaorai e tetai ke. Me te tauta ra tatou i te apii mei teia au tarevake, ka rauka te pakari e ka rekaia mai tatou e te tangata. Kare tatou e taitaia e te manako kino ia tatou uaorai. Te kiteanga e te tupu ra te au tarevake ki tetai ke ka mārama tatou i to ratou turanga. Ka puapinga ia tatou me aru i to Iehova akaraanga no te aroa e te akakore i te ara a tetai ke.​—Kolosa 3:13.

Kua riro ainei te tarevake o Margaret ei tamanamanata i ta ratou kaikai anga? Kare. Kua riro ei mea kataanga na ratou e Margaret katoa, e kua mataora ratou i ta ratou kaikai kapitianga. I te au mataiti i muri mai, kua akakite te nga mokopuna tamaroa i teia tua ki ta raua nga tamariki e kua riro ei akamaara anga na ratou no to raua nga metua ruau. E tarevake ua rai!