1, 2. (a) Akapeea tatou i kite ei ka rauka i te akatangata ou ia tatou? (e) Eaa te au tu o te tangata ou ta tatou ka kite ia Kolosa 3:10-14?

I ROTO i Te Bibilia Tapu Ra, e rua taime ka kite tatou i te tuatua “akatangata ou.” (Ephesia 4:24; Kolosa 3:10) No runga te reira i te tu tangata “tei angaia kia tau i te Atua ra.” Ka rauka ainei te akatangata ou ia tatou? Ae. Kua anga a Iehova i te tangata i tona uaorai tu, no reira ka rauka ia tatou te aru i tona au tu manea.​—Genese 1:26, 27; Ephesia 5:1.

² E tika no te mea kua iri mai te tu apa ki runga ia tatou, ka tupu te au anoano tarevake i tetai taime. Pera katoa ka akakeuia tatou e te ngai e noo ra tatou. Inara no te tauturu aroa o Iehova, ka riro mai tatou ei aronga tana e inangaro ra. Ei tauturu ia tatou kia tauta i te rave i teia, ka uriuri tatou i te au tu o te tangata ou. (E tatau ia Kolosa 3:10-14.) I reira ka akara tatou akapeea me akaari i teia i roto i ta tatou angaanga tutu aere.

3. Eaa tetai tu o te tangata ou?

³ Akamārama mai a Paulo e ko te papakitai kore tetai tuanga puapinga o te tangata ou. Karanga aia: “Kare oki e Eleni e te ngati Iuda, kare e peritome e te peritome kore, kare e tangata maori, e te Sekuti, kare e tuikaa e te rangatira.” * (Akara i te tataanga rikiriki i raro.) I roto i te putuputuanga, kare tetai ua atu e manako e meitaki atu aia i tetai ke no tona iti tangata, pa enua, me kore turanga. No teaa ra? No te mea ei au pipi na Karaiti, kua “okotai rai oki [tatou] katoa.”​—Kolosa 3:11; Galatia 3:28.

4. (a) Akapeea te au tavini o Iehova me akono i tetai e tetai? (e) Eaa tetai turanga ka tupu te akaaoanga ki te taokotaianga Kerititiano?

⁴ Me akatangata ou ia tatou, ka akono tatou i te katoatoa ma te akangateitei e te kauraro, noatu to ratou kara e te enua. (Roma 2:11) I tetai au ngai i teianei ao, e ngata tikai teia. Ei akaraanga, i te tuatau i topa i Aperika Apatonga kua akanoo te kavamani i te au ngai kia noo te au tu tangata kara ke. Te manganui o te tangata i teia enua, kapiti mai te Au Kite, te noo ra rai i teia au ngai. Inangaro te Pupu Akaaere i te akamaroiroi i te au taeake “kia maora katoa oki” ratou. No reira ia Okotopa 2013, kua akatika ratou i tetai akanoonoo anga takake ei tauturu i te au taeake iti tangata ke kia kite meitaki i tetai e tetai.​—2 Korinetia 6:13.

5, 6. (a) Eaa te au akanoonooanga i tetai enua tei tauturu i te iti tangata o te Atua kia taokotai? (Akara i te tutu mua.) (e) Eaa te au tupuanga?

⁵ Kua akanoonoo te au taeake e i tetai au openga epetoma, ka akapou te Au Kite mei tetai nga putuputuanga tuke to raua reo e te kara i te taime ki tetai e tetai. Kua angaanga kapiti te au taeake e te au tuaine i roto i nga putuputuanga i te tutu aere, te aere ki te au uipaanga e te atoro i te kainga o tetai e tetai. E anere ua atu putuputuanga tei piri mai ki teia akanoonooanga, e kua rauka i te opati Betela te au ripoti meitaki. Umere katoa te aronga kare i te Au Kite. Ei akaraanga, karanga tetai orometua akonoanga: “Kare au i te Kite, karanga ra au e kua akaaere meitakiia ta kotou angaanga tutu aere, e kua taokotai kotou ei iti tangata.” Eaa te manako o te au taeake e te au tuaine no teia akanoonooanga?

⁶ I te akamataanga, kua ru tikai tetai tuaine reo Xhosa ko Noma i te pati i te Au Kite i roto i te putuputuanga reo Papaa i tona kainga tau ua. Inara i muri ake i tona tutu kapiti anga ma te Au Kite Papaa e kua atoro i to ratou kainga, kua maru tona manako. Karanga aia: “E tangata ua ratou mei ia tatou rai!” No reira te aere anga mai te au taeake e te tuaine i roto i te putuputuanga reo Papaa i te tutu kapiti ma te putuputuanga reo Xhosa, kua pati  a Noma i tetai pae ia ratou ki tona kainga no tetai kai manga. Kua umere aia i te kite i tetai manuiri, e tangata pakari Papaa, e noo ua ra i runga i tetai pia plastic akaaka. No teia porokaramu, e maata te au taeake e te au tuaine tei akaoa atu i tetai ke e kua kite meitaki i te aronga mei te enua ke.

7. No teaa ra tatou ka akaari ua rai i te tu akaaroa?

⁷ Kia akaatea roaia to Satani ao, ka tupu te timata anga ki te iti tangata o Iehova. Me ngere i te ngai angaanga, te maki kino, te takinokino, te tumatetenga natura, tei ngere i te apinga no te tā ua, e tetai au turanga ngata ka akakeu ia tatou pouroa. Ei tauturu i tetai e tetai i te tuatau timata anga, ka anoanoia tatou kia rauka te tu akaaroa tikai. Na te tu akaaroa e akakeu ia tatou kia takinga meitaki i tetai ke. (Ephesia 4:32) E tuanga teia nga tu no te tangata ou. Ka tauturu te reira ia tatou kia aru i te Atua e te akapumaana i tetai ke.​—2 Korinetia 1:3, 4.

8. Eaa te meitaki ka tupu me akaaroa e te takinga meitaki i te katoatoa i roto i te putuputuanga? Oronga mai i tetai akaraanga.

⁸ Akapeea tatou me takinga meitaki maata i te aronga i roto i ta tatou putuputuanga no tetai enua ke mai me kore tei rokoia e te manamanata? Ka inangaro tatou i te turou ia ratou, te riro ei oa no ratou, e te tauturu ia ratou kia kite e te anoanoia ra ratou i roto i te putuputuanga. (1 Korinetia 12:22, 25) Ei akaraanga, kua neke a Dannykarl ki Tiapani mei te Philippines. No te mea e tangata ke aia, kare aia i akono meitakiia ana i tana ngai angaanga. I reira kua aere aia ki tetai uipaanga a te Au Kite o Iehova. Karanga a Dannykarl: “Vaitata rai e aronga Tiapani te katoatoa i reira, noatu ra kua āriki pumaana ratou iaku, mei te mea e e au oa taito ratou noku.” Kua tauturu te tu takinga meitaki o te au taeake iaia kia akavaitata atu kia Iehova. I muri mai kua papetitoia a Dannykarl, e te tavini nei ei tangata pakari i teia rā. Mataora tikai te aronga pakari e tei roto raua ko tana vaine, ko Jennifer, i ta ratou putuputuanga e kua karanga e: “E oraanga māmā ua to raua ei nga painia e te akanoo ra i te akaraanga meitaki no te kimi i te Patireia na mua.”​—Luka 12:31.

9, 10 Oronga mai i te au tupuanga meitaki me akaari tatou i te tu akaaroa i roto i te angaanga tutu aere?

⁹ E tikaanga to tatou kia “takinga-meitaki tatou i te tangata ravarai” me tutu aere i te nuti meitaki o te Patireia. (Galatia 6:10) Akaaroa te Au Kite i te au tangata tei aere mai mei tetai enua ke e te tauta i te apii i te reo. (1 Korinetia 9:23) Ka apai mai ta ratou tauta anga i te au tupuanga meitaki. Ei akaraanga, kua apii tetai tuaine painia i Autireria ko Tiffany i te reo Swahili kia tauturu i te putuputuanga reo Swahili i te oire o Brisbane. Noatu e ngata i te apii i te reo, kua puapinga maata tona oraanga. Karanga a Tiffany: “Me inangaro koe kia oraora taau angaanga tutu aere, e tavini koe i roto i tetai putuputuanga reo ke. Mei te mea e te teretere aere ra koe ki tetai enua ke. Ka kite koe i to tatou akataeakeanga i te ao katoa e tona tu taokotai umere.”

 ¹⁰ Kua pera katoa tetai ngutuare tangata i Tiapani. Karanga te tamaine ko Sakiko: “Kua aravei putuputu matou i te au tuitarere Brazil i roto i te angaanga tutu aere. Me akaari matou i te au irava i roto i ta ratou Pipiria reo Portugal, mei ia Apokalupo 21:3, 4 me kore Salamo 37:10, 11, 29, kua akarongo meitaki ratou e tetai taime ka pururu te roimata.” Kua akaaroa te ngutuare tangata i te au tuitarere e kua inangaro i te tauturu ia ratou kia apii i te tuatua mou, no reira kua apii ratou i te reo Portugal ei ngutuare tangata. I muri mai, kua tauturu teia ngutuare i te akamata i tetai putuputuanga reo Portugal. I te au mataiti i aereia, e maata te au tuitarere ta ratou i tauturu kia riro mai ei au tavini no Iehova. Karanga a Sakiko: “E angaanga maata te apii i te reo Portugal, inara e maata roa atu te au akameitakianga i te tautaanga. Akameitaki tikai matou ia Iehova.”​—E tatau ia Angaanga 10:34, 35.

11, 12 (a) Eaa te tumu ka akatupu tatou i te akakoroanga tau no te akatangata ou ia tatou? (e) Eaa te ka tauturu ia tatou kia vai akaaka ua?

¹¹ Te akakoroanga kia akatangata ou ia tatou koia oki kia akangateitei ia Iehova, kare kia akapaapaaia mai e tetai ke. E akamaara e kua akaparau tetai angera apa kore e kua ara. (Akaaite ia Ezekiela 28:17.) E aronga apa ua tatou no reira e ngata atu i te kopae i te tu parau. Noatu ra ka rauka i te akakakau ia tatou ki te tu akaaka. Eaa te ka tauturu ia tatou kia pera?

¹² Tetai ravenga te ka tauturu ia tatou kia akaaka koia oki kia tatau i te Tuatua a te Atua i te au rā ravarai ma te akamanako oonu i ta tatou e tatau ra. (Deuteronomi 17:18-20) Ka inangaro tikai tatou i te akamanako oonu i ta Iesu i apii mai e tona akaraanga umere no te tu akaaka. (Mataio 20:28) E akaaka tikai a Iesu kua tāmā aia i te vaevae o tana au apotetoro. (Ioane 13:12-17) Tetai akaou ravenga, kia pure tatou kia Iehova no tona vaerua. Ka tauturu tona vaerua ia tatou kia tamaki i tetai ua atu manako e e meitaki atu tatou i tetai ke.​—Galatia 6:3, 4; Philipi 2:3.

13. Eaa te au akameitakianga no te tu akaaka?

¹³ E tatau ia Maseli 22:4. Te umuumu  ra a Iehova ia tatou kia akaaka. Ka apai mai te tu akaaka i te au akameitakianga e manganui. Me akaaka tatou, ka tupu te au e te taokotai i roto i te putuputuanga. Pera katoa, ka aroa ua mai a Iehova ia tatou. Karanga te apotetoro ko Petero: “Kia kakauia kotou i te akaaka; ‘e patoi te Atua i tei nengonengo, e oronga mai i te meitaki no tei akaaka.’”​—1 Petero 5:5.

14. Koai te akaraanga meitaki roa atu no te tu maru e te akakoromaki?

¹⁴ I teianei ao, me akaari tetai tangata i te tu maru e te akakoromaki, ka manako tetai ke e e apikepike aia. Kare ko teia te tu. No ko mai teia au tu manea ia Iehova, Tei ririnui roa atu i te ao katoa e pini ua ake. Koia te akaraanga meitaki roa atu no te tu maru e te akakoromaki. (2 Petero 3:9) Ei akaraanga, akamanako ana i to Iehova akakoromaki anga te pau anga aia ia Aberahama e Lota na roto i Tana au angera. (Genese 18:22-33; 19:18-21) Akamanako katoa mei teaa te maata to Iehova akakoromaki anga i te iti tangata akarongo kore ko Iseraela no tetai 1,500 mataiti.​—Ezekiela 33:11.

15. Eaa te akaraanga ta Iesu i akanoo no te akaari i te tu maru e te akakoromaki?

¹⁵ E tu “maru” to Iesu. (Mataio 11:29) E akakoromaki anga roa tona i te au tu apikepike o tana au pipi. I te tuatau o tana angaanga tutu aere i te enua nei, kua aviri kinoia a Iesu e kua akaapaia. Inara kua vai maru aia ma te akakoromaki e tae ua atu ki te matenga. Iaia e mamae maata ra i runga i te rakau tamamae, kua pati aia i tona Metua kia akakore i te ara a te aronga tei tamate iaia. Karanga aia: “Kare oki ratou i kite i ta ratou i rave nei.” (Luka 23:34) Noatu e kua na roto a Iesu i te taitaia e te mamae, kua vai maru ua aia e te akakoromaki.​—E tatau ia 1 Petero 2:21-23.

16. Akapeea tatou me akaari i te tu maru e te akakoromaki?

¹⁶ Taiku a Paulo i tetai mataara kia akaari tatou i te maru e te akakoromaki i te tata anga: “E tauturu atu tetai ki tetai, e akakore tetai i ta tetai ara, e tapepeanga ta tetai ki tetai ra; mei te Mesia i akakore i ta kotou na, e akapera katoa kotou.” (Kolosa 3:13) Ei akakore i te ara a tetai ke, ka anoanoia tatou kia maru e te akakoromaki. Ka akatupu e ka paruru te reira i te tu taokotai o te putuputuanga.

17. Eaa ra i puapinga ai teia tu maru e te akakoromaki?

¹⁷ Te umuumu ra a Iehova ia tatou kia maru e te akakoromaki i tetai ke. E puapinga teia nga tu me inangaro tatou i te noo i roto i te ao ou. (Mataio 5:5; Iakobo 1:21) Me maru tatou e te akakoromaki, ka akangateitei tatou ia Iehova e ka tauturu i tetai ke kia pera katoa.​—Galatia 6:1; 2 Timoteo 2:24, 25.

18. Eaa te pirianga o te aroa e te tu papakitai kore?

¹⁸ Te piri atura te au tu ta tatou i uriuri ki te aroa. Ei akaraanga, kua anoanoia te pipi ko Iakobo kia ako i tona au taeake no te mea kua akono ua ratou i te aronga apinganui kare i te aronga putaua. Akamārama aia e te patoi ra teia tu i te akauenga a te Atua “e aroa atu koe i to tangata tupu mei to aroa ia koe uaorai na.” Karanga katoa aia: “Te akono ana ra kotou i te tu o te tangata ra, te rave ra kotou i te ara.” (Iakobo 2:8, 9) Me aroa tatou i te tangata, kare tatou e akavaavaa i tetai ua atu no tana apii, te kara, me kore te turanga. Kare tatou e akaari ua i te tu papakitai kore. Kia riro ra ei tuanga maata ia tatou.

19. Eaa ra i puapinga ai kia akakakau ia tatou uaorai i te aroa?

¹⁹ “E akakoromaki anga roa to te aroa, e te takinga-meitaki” e “kare oki e akatietie.” (1 Korinetia 13:4) Ka anoanoia tatou kia akakoromaki, takinga meitaki, e kia akaaka e rauka ai i te tutu i te nuti meitaki ki te tangata. (Mataio 28:19) Ka tauturu teia au tu ia tatou kia piri meitaki ki te au taeake e te au tuaine katoatoa i roto i te putuputuanga. Me akaari tatou i teia tu aroa, ka vai taokotai ua ta tatou putuputuanga e ka akangateitei ia Iehova. Ka kite tetai ke i teia tu taokotai e ka akakeuia ki te tuatua mou. E mea tau e te taopenga ra te akataka anga a te Pipiria i te tu tangata ou i te na ko anga: “E ei runga ravao i taua au mea katoa nei e kakau na i te aroa, ko taua tatua apa kore ua ra ïa.”​—Kolosa 3:14.

20. (a) Eaa te au uianga ka ui tatou kia tatou uaorai? No teaa ra? (e) Eaa te manakonakoanga mataora ta tatou e tapapa atu nei?

²⁰ E ui kia tatou uaorai, ‘Eaa te au taui anga taku ka rave kia kopae e te akaruke takiri i te tu taito?’ Kia pure tatou kia Iehova e te pati akatenga i tana tauturu. Anoanoia tatou kia angaanga pakari kia taui i te au manako e te au angaanga tarevake kia “noo i te basileia o te Atua.” (Galatia 5:19-21) Kia ui katoa tatou, ‘Te akatano ra ainei au i toku aerenga manako kia akamareka ia Iehova?’ (Ephesia 4:23, 24) E tu apa ua to tatou, no reira ka angaanga pakari ua rai i te akatangata ou ia tatou e te tamou marie. Ka tupu ua rai teia. Mei teaa atura te oraanga mataora me akatangata ou te katoatoa e te aru vaitata i to Iehova au tu manea!