E tuke te papaanga a Mataio no te anauanga e te oraanga o Iesu ki ta Luka no te mea kua akamou nga tata ki runga i te au manako e te au tupuanga o tetai tangata ke.

Te akamou ra ta Mataio papaanga ki runga i tei tupu kia Iosepha. Te akataka maira te reira i ta Iosepha ariu anga te kite anga aia kua nui a Maria, tana moemoea no te angera tei akamārama i te turanga, e tana aruanga i te ikuiku anga a te angera. (Mataio 1:19-25) Te akataka katoa maira i te akamatakiteanga a te angera ia Iosepha na roto i te moemoea kia oro ki Aiphiti ma tona ngutuare e tona akarongo anga. I reira, akakite mai a Mataio e kua moemoea akaou a Iosepha e kua akakite te angera kiaia e oki ki te enua o Iseraela e oti kua oki aia e kua akanoo i tona ngutuare i Nazareta. (Mataio 2:13, 14, 19-23) I te nga pene mua o tana Evangeria, kua taiku a Mataio i te ingoa o Iosepha e varu taime, kareka a Maria, e ā taime.

Inara, kua akamou ta Luka papaanga ki runga ia Maria. Te akataka maira te reira i te atoroia anga a Maria e te angera ko Gaberiela, tona aravei anga i tona kopu tangata ko Elizabeta, e tana tuatua akapaapaa ia Iehova. (Luka 1:26-56) Te akataka katoa ra i ta Simeona i tuatua kia Maria no to Iesu tamamaeanga i te tuatau ki mua. I reira kua akataka mai a Luka i te atianga e atoro ei a Iesu i te iero ma tona ngutuare i tona 12 anga mataiti. I roto i te papaanga, kua taiku a Luka i te tuatua a Maria, kare kia Iosepha, e oti akakite mai aia e kua akakeuia a Maria e teia au tupuanga. (Luka 2:19, 34, 35, 48, 51) I te nga pene mua o tana Evangeria, kua taiku a Luka i te ingoa o Maria e 12 taime, kareka a Iosepha e 3 taime. No reira te akakite maira ta Mataio papaanga i ta Iosepha i manako e i rave. Inara, kua akamou a Luka ki runga i to Maria au manako e te au tupuanga.

E tuke katoa te papaanga uanga o Iesu i roto i nga Evangeria. Kua akapapa a Mataio i te papaanga uanga o Iosepha e te akaari maira e ko Iesu te tamaiti angai a Iosepha, tei iaia te tika anga tau ki te taoonga ariki o Davida. No teaa ra? No te mea e uanga a Iosepha no te Ariki ko Davida na roto i te tamaiti a Davida ko Solomona. (Mataio 1:6, 16) Inara, akapapa a Luka i te papaanga uanga o Maria e te akaari maira e tei ia Iesu te tika anga natura ki te taoonga ariki o Davida “i te akonoanga i te kopapa nei.” (Roma 1:3) No teaa ra? No te mea e uanga a Maria no te Ariki ko Davida na roto i te tamaiti a Davida ko Natana. (Luka 3:31) Inara, eaa te tumu kare a Luka i taiku ia Maria ei tamaine na Eli, tona metua tane? No te mea kua taangaanga putuputu te au papaanga uanga i te au tane o te ngutuare. No reira te taiku anga a Luka ia Iosepha ei tamaiti na Eli, kua mārama ua te tangata e e unonga tane a Iosepha na Eli.—Luka 3:23.

Kua akapapu te nga papaanga uanga i roto i te Evangeria o Mataio e Luka e ko Iesu te Mesia ta te Atua i taputou. I te mea ko Iesu te uanga a te Ariki ko Davida kua rongo meitakiia e kare katoa te au Pharisea e te au Sadukea i patoi i te reira. E puapinga tikai te akatakaanga a Mataio e Luka i te papaanga uanga o Iesu no te akaketaketa i to tatou akarongo e te akapapu kia tatou e ka tupu pouroa ta te Atua au taputou.