AKAURU a Iehova i te apotetoro ko Paulo kia tata e iva tu no ko mai i te vaerua tapu. (Galatia 5:22, 23) Kua kapikiia teia au tu manea katoatoa ko “ta te Vaerua e akatupu.” * (Akara i te tataanga rikiriki i raro.) E tuanga katoa teia no te “akatangata ou” i te au Kerititiano. (Kolosa 3:10) Mei tetai tumu rakau tei akatupu i te ua me tamauu meitakiia, ka akatupu tetai tangata i teia au tu manea me tuku aia i te vaerua tapu kia angaanga meitaki i tona oraanga.​—Salamo 1:1-3.

Te tu mua ta Paulo i tata ko te aroa. Mei teaa te puapinga o teia tu? Karanga a Paulo me kare ona aroa, “kare ua aku e puapinga.” (1 Korinetia 13:2) Inara eaa te aroa, e akapeea tatou me akatupu e me akaari i te reira i te au rā ravarai?

Noatu e ngata tikai te akamārama meitaki eaa te aroa, te akataka maira te Pipiria i ta tetai tangata aroa ka akamanako e te rave. Ei akaraanga, “e akakoromaki anga roa to te [tangata] aroa, e te takinga-meitaki” e “e rekareka ra i te tuatua-mou.” Me e aroa to tetai tangata, “e tapoki i te au mea katoa, e akarongo i te au mea katoa, e manakonako i te au mea katoa, e akakoromaki i te au mea katoa.” E inangaro oonu tona no tetai ke, te manako tikai ra ia ratou e e oa tiratiratu aia. Inara me kare o tetai tangata aroa, ka vareae aia, akatietie, tau kore, karapii, e kare e akakore i tetai. Kare tatou e akaari i te au tu tau kore mei te reira, ka akaari ra tatou i te aroa ngakau tae no tetai ke, te tu aroa “kare e kimi i te meitaki nona uaorai.”​—1 Korinetia 13:4-8.

“Ko te Atua oki te aroa.” (1 Ioane 4:8) Akapapu tana angaanga pouroa e tana e rave ra i te reira. Ko tana angaanga maata rava atu no te aroa i te tangata ko te tonoanga ia Iesu ki te enua kia mamae e kia mate no tatou. Karanga te apotetoro Ioane e: “Kua kitea to te Atua aroa ia tatou nei, koia i tono mai i tana Tamaiti anau tai ki te ao nei, kia ora tatou iaia. Ko te aroa mou teia, kare ïa na tatou i aroa atu i te Atua, koia ra tei aroa mai ia tatou nei, e kua tono mai i tana Tamaiti ei tarangaara i ta tatou nei ara.” (1 Ioane 4:9, 10) No te aroa o te Atua, ka akakoreia ta tatou ara e e manakonakoanga to tatou no te ora.

Kua akaari a Iesu i tona aroa no te tangata na te akaatinga anga i tona oraanga kia rave i te anoano o te Atua. Akakite te apotetoro ko Paulo kia tatou: “No taua inangaro e tapu ei tatou nei i te apai anga okotai i te kopapa o Iesu Mesia.” (Ebera 10:9, 10) Kare atu e tangata tei akaari i te aroa maata. Karanga a Iesu: “Kia oronga te tangata i tona uaorai ora no tona au taunga, kare rava e tangata aroa maata atu i te reira.” (Ioane 15:13) Ka rauka ainei i te aronga apa ua i te aru i  te aroa o Iehova e Iesu? Ae! Akamanako tatou akapeea me rave i te reira.

Akamaroiroi a Paulo ia tatou: “E teianei ei aru kotou i te Atua, mei te tamariki akaperepere ra; Ei aerenga aroa to kotou mei te Mesia i aroa mai ia tatou ra, e kua oronga mai iaia uaorai” no tatou. (Ephesia 5:1, 2) Eaa te aiteanga “ei aerenga aroa to kotou”? Tona aiteanga kia akaari i te aroa i te au taime ravarai. Kare tatou e karanga ua e te aroa nei tatou i tetai ke. Ka akaari ra i te reira na roto i ta tatou e rave ra. Tata a Ioane: “E aku au tamariki ra, auraka to tatou i te aroa vaa ua, e te aroa arero; ei aroa rave ra, ei mea mou.” (1 Ioane 3:18) Ei akaraanga, ka tutu aere tatou i “te evangelia o te basileia nei” no to tatou aroa ia Iehova e te tangata. (Mataio 24:14; Luka 10:27) “Ei aerenga aroa” to tatou me akakoromaki, takinga meitaki e te akakore i te ara. Ka akono tatou i te ako a te Pipiria: “Mei te Mesia i akakore i ta kotou na, e akapera katoa kotou.”​—Kolosa 3:13.

Inara, me ako e me akatikatika i tetai ke, kare te aiteanga e kare o tatou aroa. Ei akaraanga, kia akamutu ta ratou tamariki i te aue, ka rave tetai au metua i tetai ua atu mea ta te tamariki i inangaro. Inara me aroa tikai tetai metua i tana tamaiti ka akaari aia i te tu ngaueue kore. Mei te reira katoa, i te mea e ko te Atua te aroa, “ko tei akaperepereia e Iehova ra, ko tana ïa e pāpā mai.” (Ebera 12:6) No reira e mea aroa kia oronga i te akoanga tau me anoanoia. (Maseli 3:11, 12) Kia akamaara ra, e aronga ara ua tatou e ka ngere i te akaari i te aroa. No reira ka rauka ia tatou pouroa i te akameitaki atu i te akaari i te aroa. Akapeea tatou me rave i teia? Ka akamanako tatou e toru mataara.

Mea mua, e pati i te Atua kia oronga mai i tona vaerua tapu, tei akatupu i te aroa. Karanga a Iesu e ka oronga a Iehova i “te vaerua tapu i te aronga e pati atu [i]aia ra.” (Luka 11:13) No reira ka papu ia tatou me pure no te vaerua tapu e me tuku i te reira kia tauturu ia tatou, ka maata ua atu to tatou aroa. (Galatia 5:16) Ei akaraanga, me e tangata pakari koe, e pati no te vaerua tapu kia tauturu ia koe kia akaari i te aroa me ako koe i tetai ke mei te Pipiria. Me kore me e metua koe, e pati no te vaerua o te Atua kia tauturu ia koe kia ako i taau tamariki ma te aroa, kare na roto i te riri.

Te rua, e akamanako oonu akapeea a Iesu te akaari anga i te aroa noatu e kua takinokino tetai ke iaia. (1 Petero 2:21, 23) Me akariri mai tetai ia koe me kore me aro atu i te tu tika kore, e ui kia koe uaorai, ‘Eaa ta Iesu ka rave?’ Kua ui tetai tuaine ko Leigh i teia uianga e kua tauturu iaia kia akamanako i mua ake ka tuatua ai. Karanga aia: “I tetai rā, kua tuku toku oa angaanga i te imere ki te aronga angaanga ma te au tuatua tau kore no runga iaku e taku angaanga. Kua mamae tikai au. Inara kua ui au kiaku uaorai, ‘Akapeea au me aru ia Iesu na te akono anga i teia oa angaanga?’ I muri ake te akamanakoanga i ta Iesu ka rave, kua iki au i te tuku ua i te reira e auraka kia riro ei manamanata. I muri mai kua apii au e kua tuia toku oa angaanga e te maki kino e kua taitaia maata aia. Kua āriki au e kare aia i akakoro ana i tana i tata. Na te akamanakoanga i to Iesu akaraanga no te akaari i te aroa noatu kua akaririia aia, kua tauturu iaku kia akaari i te tu aroa ki toku oa angaanga.” Me aru tatou ia Iesu, ka akaari ua rai tatou i te aroa ki tetai ke.

Toru, e apii i te akaari i te aroa akaatinga. Ko teia te tu aroa tei akataka i te au pipi mou a Iesu. (Ioane 13:34, 35) Kua akaari rai a Iesu i teia tu aroa, e kua akanoo aia i te akaraanga apa kore no tatou. Akapeea ra? Na te akarukeanga i te rangi, “kua tuku ke atura ra aia i tona uaorai tu” no tatou “e tae ua atu ki te mate.” (Philipi 2:5-8) Me aru tatou i to Iesu aroa akaatinga, ka aru vaitata to tatou manako i tona e ka tuku tatou i te au anoano o tetai ke na mua ake i to tatou.

E maata te au puapinga ka rauka me akaari tatou i te aroa. Akamanako ana e rua nga akaraanga:

• TETAI AKATAEAKEANGA PA ENUA: No to tatou aroa i tetai e tetai, kua kite tatou e pouroa te au taeake e te au tuaine i roto i te au putuputuanga ta tatou ka atoro i teianei ao ka āriki pumaana ia tatou. E akameitakianga tikai te kite e kua aroaia koe e “to kotou au taeake katoa i te ao nei”! (1 Petero 5:9) Ka kitea anake teia aroa i rotopu i te iti tangata o te Atua.

• TE AU: “Te tauturu anga atu tetai i tetai ma te aroa” tei akatika ia tatou kia mataora i “te ruru o te au.” (Ephesia 4:2, 3) Ka kite tatou i teia au i ko i ta tatou au uipaanga, au akaputuputuanga, e te au uruoaanga. Ka āriki ainei koe e apinga takake teia tu au i roto i teia ao oripu ua? (Salamo 119:165; Isaia 54:13) Me aruaru tatou i te au ma tetai ke, e aroa tikai to tatou no ratou, e ka akamareka teia i to tatou Metua i te rangi.​—Salamo 133:1-3; Mataio 5:9.

Tata a Paulo: “Kareka te aroa, e tamaata ïa i te meitaki.” (1 Korinetia 8:1) Eaa te aiteanga o teia? Ia 1 Korinetia pene 13, tei kapikiia ko te “Salamo o te Aroa,” akamārama mai aia akapeea te aroa me tamaata i te meitaki. Ka kimi te aroa i te meitaki o tetai ke. Te akamanako ra te aroa i te au anoano o tetai ke. (1 Korinetia 10:24; 13:5) E no te mea e manako tau e te meitaki, te akakoromaki e te takinga meitaki to te reira, ka akatupu te reira i te ngutuare aroa e te au putuputuanga taokotaiia.​—Kolosa 3:14.

E maata te au mataara no te akaari i te aroa ki tetai ke, inara ko to tatou aroa no te Atua te mea maata rava atu e te akamaroiroi. No teaa ra? No te mea na te aroa nona e taokotai ia tatou! Ka akamori kapiti te au tangata mei te pa enua ravarai, te iti tangata, e te au reo ia Iehova e te tavini iaia “ma te manako okotai.” (Zephania 3:9) Kia tauta tatou i te akaari i teia tu akaperepere o te ua o te vaerua tapu o te Atua i te au rā ravarai.