VAITATA ki te openga o Noema 1932 i Mexico City, e oire maatamaata e tai mirioni tuma tangata. I te epetoma i mua ake, kua tamouia te au mori arataki apinga akaoro no te taime mua. Inara kua umere te tangata i tetai apinga ke. Kua papa ua te aronga ripoti i ko i te ngai rerue ma ta ratou au nenei, te tiaki ra i tetai manuiri puapinga kia tae mai. Koai? Ko Joseph F. Rutherford, te peretiteni o te Watch Tower Society. Te tiaki katoa ra te Au Kite o te reira ngai i te turou i te Taeake Rutherford, tei aere mai no te uruoaanga e toru rā.

Karanga The Golden Age e: “Kare e ekoko ka riro teia uruoaanga ei tupuanga puapinga roa atu i roto i te tuatua enua” i te akatotoa i te tuatua mou i Mexico. Inara e uruoaanga meangiti ua teia mei tetai 150 aronga tei tae mai ki reira. Eaa i reira i puapinga ai?

I mua ake i te reira uruoaanga, kare te tuatua mou i totoa maata ana i Mexico. Mei te 1919 mai, kua raveia te au akaputuputuanga meangiti, inara i tera mai mataiti kua iti mai te numero o te au putuputuanga. I te akatuera anga te opati Betela i Mexico City i te 1929, kua manakoia e ka meitaki atu te turanga, inara kua vai rai te au arairai anga. Kua ikuiku te akaaerenga i te au painia auraka e kapiti i te angaanga pitiniti ki te tutu aere. Riri tikai tetai painia i te reira e kua akaruke i te tuatua mou e kua akatupu i tana uaorai pupu apii Pipiria. I tera tuatau, kua anoanoia kia monoia te akaaere Betela no tana angaanga tarevake. Kua anoanoia te Au Kite tiratiratu i Mexico kia akamaroiroiia.

I tana atoro anga, kua akamaroiroi te Taeake Rutherford i teia au taeake tiratiratu na te oronga anga e rua ako akamaroiroi i ko i te uruoaanga e e rima ako tei akakiteia na runga i te ratio. Ko te taime mua teia i taangaangaia ai te ratio ei akakitekite i te nuti meitaki takapini ia Mexico. I muri ake i te uruoaanga, kua akanooia tetai akaaere Betela ou kia akaaere i te angaanga. I teianei, kua maroiroi tikai te Au Kite, e kua tutu ua atu rai ma te mareka anga a Iehova.

I tera mai mataiti, i te 1933, e rua uruoaanga tei raveia i tera enua, e tai i Veracruz e tetai i Mexico City. Te angaanga pakari ra te au taeake i te ngai tutu aere e kua tupu te meitaki. Ei akaraanga, i te 1931, e 82 papuritia i reira. Tae mai ki te 1941, e tai ngauru taime maata atu te numero tei tae mai! Mei tetai 1,000 tangata tei tae mai ki Mexico City no te Akaputuputuanga Teokaratiki i te 1941.

I te 1943 kua akamata te Au Kite i te akakite aere i te Akaputuputuanga Teokaratiki “Enua Akarangatiraia,”  te ka raveia i roto i te 12 oire i Mexico. * (Akara i te tataanga rikiriki i raro.) Kua rave ratou i teia na te aaoanga i te au akairo akaariari anga. Kua maaniia teia e rua akairo maatamaata tei tapekaia e ka aaoia ki runga i nga pakuivi, e tai akairo i mua e tai ki muri. Kua taangaanga te Au Kite i teia au akairo akaariari anga ei akakite aere i ta ratou au uruoaanga mei te 1936 mai.

Kua puapinga tikai te akakitekiteanga ma te au akairo akaariari i Mexico City e kua tata te makatini La Nación no te Au Kite tei aere ki te akaputuputuanga: “Te rā mua, kua ikuikuia ratou kia pati maata atu i te tangata kia aere mai. I tera mai rā kua ki takiri te reira ngai.” Kare te akonoanga Katorika i mareka ana i te reira, no reira kua patoi ratou i te Au Kite. Kare ra te au taeake e te au tuaine i mataku ana. Kua akakite ua atu ratou i te uruoaanga. Ripoti tetai akaou atikara La Nación e: “Kua kite te oire katoa ia ratou.” Karanga te reira e kua riro te au taeake e te au tuaine ei “au akairo akaariari.” Akaari katoa teia atikara i tetai tutu o te au taeake i runga i te mataara o Mexico City. I raro mai i te tutu ko te tataanga: “Tomo anga i te au mataara.”

I tera au mataiti, kua anoanoia te Au Kite kia rave i te au akaatinga maata kia tae ki te au uruoaanga tei raveia i Mexico. E maata te au taeake e te au tuaine tei aere mai mei te au oire mamao kare e ara rerue e kare katoa e mataara. Tata tetai putuputuanga, “Te apinga anake tei na ko nei mai ko te ara telegraph.” No reira kua na runga te au manuiri i te asini me kore kua na raro ua no tetai au rā kia tae ki te ngai rerue te ka apai ia ratou ki te oire o te uruoaanga.

E putaua te maata anga o te Au Kite e kare e peke i te aere ki te uruoaanga. Te tae anga ratou ki reira, e manganui tei noo i ko i te Au Kite o te reira ngai, tei aroa mai ia ratou. Kua moe tetai pae i ko i te au Are Uipaanga Patireia. I tetai atianga, e 90 au taeake tei noo i ko i te Betela, e kua moe ratou ki runga i te au pia puka. Karanga te Yearbook e kua mareka tikai te au taeake no te mea “e maru ake [te au pia] e te maana atu i te taua timeni.”

No teia Au Kite, kua pauna te taime i te rave i tetai ua atu akaatinga kia uipa kapiti ki to ratou au taeake e te au tuaine. I teia rā, tere atu i te 850,000 Au Kite i Mexico, e te akaari nei i taua tu mareka ra. * (Akara i te tataanga rikiriki i raro.) Karanga tetai ripoti i roto i te 1949 Yearbook e kare te au akaatinga a te au taeake i rave ei akaiti i to ratou maroiroi no te akamori ia Iehova. Kua riro te au akaputuputuanga tataki tai “ei pukapuka anga maata no tetai tuatau roa i muri mai.” Te uianga tei ui putuputuia e te au taeake, “Aea e Rave Akaouia ai ta Tatou Akaputuputuanga?”​—Au apinga takere i Central America.