I teia mataiti i topa akenei, e tauatini ua atu au taeake takapini i teianei ao tei ikiia ei tangata pakari e ei tavini tauturu. Me ko koe tetai o teia aronga, papu roa te mataora nei koe i te tavini ia Iehova e te au taeake i roto i teia turanga.

Me te ru ra koe, e mea matau ua te reira. Karanga a Jason, tetai tangata pakari mapu ua: “Te ikiia anga au no te taime mua, kua poitirere tikai au i teia apainga ou naku.” Kua manako ana a Mose raua ko Ieremia e kare raua i tau, te oronga anga a Iehova i ta raua apainga ou. (Exodo 4:10; Ieremia 1:6) Me kua manako akapera koe, eaa i reira te ka tauturu i te akamatutu ia koe e kia meitaki ua atu rai koe? E maata taau ka apii mai mei te akaraanga o Timoteo.—Angaanga 16:1-3.

Penei e 20 o Timoteo mataiti te akamata anga aia i te aru atu i te apotetoro ko Paulo. Te patiia anga aia no te taime mua, penei kua manako a Timoteo e kare aia i tau no te apii e te ako atu i tetai ke no te mea e mapu ua aia. (1 Timoteo 4:11, 12; 2 Timoteo 1:1, 2, 7) Inara kua meitaki ua atu rai aia, e e tai ngauru mataiti i muri mai, kua akakite a Paulo ki to Philipi: “Te irinaki nei au i te Atu ra ia Iesu, e kia roa poto ake, e tono atu ei au ia Timoteo kia kotou na.” Eaa a Paulo i manako akapera ei? Akamārama mai aia: “Kare oki oku e tangata mei iaia nei te tu.”—Philipi 2:19, 20.

Eaa a Timoteo i riro e ei akaraanga meitaki no te aronga pakari? Akamanako ana i teia au tumu.

1. Ka akono tikai aia i te tangata. Akakite a Paulo ki te au taeake i Philipi e ka “akono tikai” a Timoteo ia ratou. (Philipi 2:20) Inangaro a Timoteo i te au taeake kia noo vaitata kia Iehova, e kua puareinga ua aia i te akaatinga i tona taime e te maroiroi no te tauturu ia ratou.

E karanga ua ana a William, e tangata pakari no tetai 20 tuma mataiti, ki te au tangata pakari ou: “Kia aroa i te au taeake. E akamou ki runga i to ratou au anoano, eiaa ki runga i te tua o te akatereanga.” Auraka ratou kia aite ki tetai tangata akaoro bus tei akamanako ua ki te ora e tae ei ki tetai akaou ngai tapu anga, e kare e tuku i te tangata kia piki ki runga i te bus.

2. Ka tuku aia i te tavini anga ia Iehova ei mea mua. Karanga a Paulo e tuke a Timoteo ki te aronga ‘e kimi nei i ta ratou uaorai, kare i ta Iesu Mesia.’ (Philipi 2:21) Kua kite a Paulo e kua akamou ua te au taeake i to ratou manako ki runga i to ratou uaorai oraanga. Tetai taime ka tuku ratou i to ratou uaorai inangaro na mua ake ia Iehova. Inara kare a Timoteo i pera! Te orongaia anga tetai atianga nona kia tavini maata atu i te Atua, kua opu aia i te reira mei ia Isaia rai, tei karanga: “Teia au; ko au taau e tono.”—Isaia 6:8.

Akapeea e rauka ai ia koe te akono i toou uaorai anoano e te anoano o te putuputuanga? Mea mua, aru i ta Paulo akoanga: “Kia timata oki kotou i te au mea e maata ua atu te meitaki.” (Philipi 1:10) Te tavini anga ia Iehova te mea mua. Te rua, kopae i te au angaanga te ka akapou maata i toou taime e te maroiroi. Akakite a Paulo kia Timoteo: “E rere ke koe i te au anoano o to mea ou anga ra: e aruaru ra i te tuatua-tika, te akarongo, te aroa, te au.”—2 Timoteo 2:22.

3. Ka rave maroiroi aia i te angaanga a Iehova. Karanga a Paulo no Timoteo: “Mei ta te tamaiti akono anga i te metua ra, ko tana ïa akono anga iaku i te  angaanga i te evangelia nei.” (Philipi 2:22) Kare a Timoteo i te tangata kope. Kua maroiroi aia i te angaanga kapiti kia Paulo, e kua ketaketa tikai to raua pirianga oa.

E maata te angaanga i roto i ta Iehova akaaerenga i teia tuatau. E au angaanga mataora tikai teia e ka tauturu te reira ia koe kia akapiri vaitata atu ki toou au taeake e te au tuaine. No reira e akapapu koe e te “maata nei te rave anga i te angaanga a te Atu.”—1 Korinetia 15:58.

4. Kua taangaanga aia i tana i apii mai. Tata a Paulo kia Timoteo: “Kua kite ua ra koe i taku i apii ra, taku aerenga, taku e umuumu, te akarongo tikai, te maru, te aroa, te akakoromaki.” (2 Timoteo 3:10) Kua taangaanga a Timoteo i tana i apii mai, no reira i orongaia ai tetai akaou apainga maata nana.—1 Korinetia 4:17.

Kore ei koe e kimi i tetai tangata pakari tukatau te ka riro ei akaraanga naau? Maara mai ia Tom, e tangata pakari no tetai tuatau roa, te akamanako mai anga tetai tangata pakari tukatau iaia e tei tereni meitaki mai iaia. Karanga aia: “Ka pati putuputu ua rai au i tana ako e ka taangaanga au i te reira. Kua akamatutu viviki mai te reira iaku.”

5. Kua tereni ua rai aia iaia uaorai. Kua ako atu a Paulo ia Timoteo: “E akamātau ua ra koe i te akono i te Atua.” (1 Timoteo 4:7) Noatu ka anoano tetai tangata oro i tetai tangata tereni iaia, ka anoanoia aia kia tereni iaia uaorai. Kua raurau a Paulo ia Timoteo: “E akamaroiroi rai i te tatau i te tuatua, e te ako, e te apii. . . . Ka akamanako tikai i teianei au tuatua; ko taau ïa e rave auraka e tivata; kia kite te tangata katoa i te tupu anga o toou kite.”—1 Timoteo 4:13-15.

Ka anoano katoaia koe kia akameitaki ua rai i toou tu karape. E apii meitaki i te Pipiria, e kia rauka ua rai ia koe te au ikuikuanga ou mei ko mai i te akaaerenga. Auraka e irinaki maata ia koe uaorai. E mea tarevake i te manako e no toou tu karape, ka rauka ia koe i te akono i tetai ua atu turanga ma te kore e rave i tetai kimikimi anga. Mei ia Timoteo rai, “kia matakite ia koe, e taau e apii ra.”—1 Timoteo 4:16.

6. Kua irinaki aia ki runga i to Iehova vaerua. Te tuatua anga a Paulo i te angaanga orometua a Timoteo, kua akamaara atu iaia: “Taua tuatua meitaki i tukuia atu ia koe ra, e mou meitaki ïa, i te vaerua tapu e noo ki roto ia tatou nei ra.” (2 Timoteo 1:14) Ka anoanoia a Timoteo kia irinaki ki runga i te vaerua o te Atua.

Karanga a Donald, e tangata pakari no tetai au mataiti: “Kia akaperepere te au taeake tei ikiia i to ratou pirianga ki te Atua. Te aronga ka pera, ka rauka ia ratou ‘te maroiroi ki te maroiroi.’ Me pure ratou no te vaerua o te Atua e kia akatupu i te ua o te vaerua, ka riro ratou ei akameitakianga maata ki to ratou au taeake.”—Salamo 84:7; 1 Petero 4:11.

E mea akamaroiroi tikai i te kite i te au tavini tauturu e te aronga pakari ou, mei ia koe rai, e meitaki atura i roto i ta ratou tavini anga ia Iehova. Karanga a Jason, tei taikuia i mua ana e: “I toku tuatau e tavini ra ei tangata pakari, e maata taku apinga i apii mai e kua matutu katoa mai au. Teianei, kua reka tikai au i taku au tuanga angaanga e e tikaanga ngateitei tikai teia noku!”

Ka meitaki ua atu ainei rai koe? Me aru koe i te akaraanga o Timoteo, ka riro katoa mai koe ei akameitakianga ki toou au taeake e te au tuaine.