1. Eaa tetai au mataara ka rauka ia tatou i te angaanga kapiti kia Iehova?

TE ANGA anga a Iehova i te tangata, kua inangaro aia ia ratou ei au oa angaanga nona. Noatu e tu ara ua to te tangata i teia tuatau, ka rauka rai i te aronga tiratiratu i te angaanga kapiti kia Iehova i te au rā ravarai. Ei akaraanga, “e oa rave angaanga oki [tatou] no te Atua” me tutu aere tatou i te nuti meitaki o tona Patireia e te akariro i te tangata ei pipi. (1 Korinetia 3:5-9) E tikaanga ngateitei rava e kua iki Tei Anga mana katoatoa ia tatou kia rave i tetai angaanga puapinga maata! Kare ra ko te angaanga tutu aere anake te mataara kia angaanga kapiti tatou kia Iehova. I teia atikara, ka apii tatou akapeea me angaanga kapiti katoa kiaia, me tauturu i to tatou ngutuare tangata, e te au taeake i roto i te putuputuanga, me akono i te manuiri, me tauturu i te angaanga a te akaaerenga e rave ra i teianei ao, e me akamaata atu tatou i te tavini ia Iehova.—Kolosa 3:23.

2. Eaa te tumu kare tatou e akaaite i ta tatou ka rave na Iehova ki tetai atu?

² Ia tatou e apii nei i teia atikara, e mea puapinga kia akamaara e e tuke te tu o te katoatoa. Kare to tatou mataiti,  oraanga kopapa, au turanga, e te au tu karape e aiteite ana. No reira auraka e akaaite i taau ka rauka i te rave na Iehova, ki tetai atu. Karanga te apotetoro ko Paulo e: “Ka timata te tangata ravarai i tana uaorai angaanga, ei reira aia e rekarekaʼi iaia uaorai, eiaa i tetai ke.”—Galatia 6:4.

3. Eaa ra tatou ka karanga ai e me akono tetai ua atu i tona ngutuare tangata, te angaanga kapiti ra aia ki te Atua?

³ Te tapapa maira a Iehova ia tatou kia akono i to tatou ngutuare tangata. Ei akaraanga, penei ka anoanoia koe kia angaanga moni ei akono i te ngutuare tangata. E manganui te au metua vaine te noo ra ki te kainga ei akono i ta ratou tamariki. E me kare e rauka i te au metua i te akono ia ratou uaorai, penei ka anoanoia tatou kia akono ia ratou. E au mea anoanoia teia. Karanga te Pipiria: “Ko te tangata oki kare i takinga-meitaki i tona uaorai, e maata ua atu rai i tona uaorai ngutuare, kua akaruke ïa aia i te akarongo, e e maata atu ïa tona kino i to te tangata akarongo kore ra.” (1 Timoteo 5:8) Me e apainga taau i te ngutuare, penei kare e maata ana taau e rave ra i te tavini ia Iehova. Inara auraka e tivata! Te mareka ra a Iehova me akono koe i toou ngutuare tangata.—1 Korinetia 10:31.

4. Akapeea te au metua me tuku i te au anoano o te Patireia na mua, e eaa te ka tupu me pera ratou?

⁴ Ka rauka i te au metua Kerititiano i te angaanga kapiti kia Iehova na te tauturu anga i ta ratou tamariki kia rauka te au akakoroanga no te tavini ia Iehova. E manganui te au metua tei rave i teia. Tei tupu mai, kua manako ta ratou tamariki tamaroa e te tamaine i te tavini tamou ia Iehova, i te ngai mamao. Tetai pae e mitinari, te painia ra tetai pae i te ngai te anoano maataia ra te au papuritia, e te tavini ra tetai pae i ko i te Betela. E tika, me aere te tamariki ki te ngai mamao, kare e rauka i te au metua i te akapou maata i tetai tuatau kia ratou. Inara ka akamaroiroi meitaki ratou i ta ratou tamariki kia tavini ua atu ia Iehova i te reira ngai. No teaa ra? No te mea, te mataora tikai ra e te tuku ra ta ratou tamariki ia Iehova na mua, i to ratou oraanga. (3 Ioane 4) E manganui te au metua tei manako mei ia Hana rai, tei karanga e kua “oronga” aia i tana tamaiti ko Samuela kia Iehova. Te manako ra ratou e e tika anga ngateitei rava i te angaanga kapiti kia Iehova mei teia te tu.—1 Samuela 1:28.

5. Akapeea koe me tauturu i te au taeake e te au tuaine i roto i taau putuputuanga? (Akara i te tutu mua.)

⁵ Me kare aau apainga rapurapu i te ngutuare, ka rauka ainei ia koe i te tauturu i te au taeake e te au tuaine maki me kore pakarikari me kore e anoano ke atu to ratou? Me kore ra, ka rauka ainei ia koe te tauturu i te aronga te akono ra ia ratou? E kimi i teia aronga i roto i taau putuputuanga penei ka anoano i te tauturu. Ei akaraanga, penei te vaira tetai tuaine te akono ra i tona nga metua ruaine. Ka rauka ainei ia koe i te akapou i tetai tuatau ki tona nga metua kia rauka iaia i te akono i tetai au mea ke? Me kore ra, penei ka rauka ia koe i te tauturu i tetai na te apai anga iaia ki te au uipaanga, te aere ki te toa, me kore te atoro i tetai ke i roto i te are maki. Me akapera koe, penei te angaanga kapiti ra koe kia Iehova ei pauanga ki tetai pure.—E tatau ia 1 Korinetia 10:24.

6. Akapeea tatou me akono i te manuiri?

⁶ Kua kiteaia te au oa angaanga o te Atua ei aronga akono i te manuiri. I roto i te Pipiria, te aiteanga o te tuatua Ereni koia oki ko “te kite atu i te tangata ke ke ra.” (Ebera 13:2) I roto i te Tuatua a te Atua, ka tatau tatou i te au akaraanga te apii maira akapeea tatou me akaari i teia tu takinga meitaki. (Genese 18:1-5) Ka rauka e ka tau tatou kia tauturu i tetai ke me rauka te tuatau no te rave i te reira, noatu me e “ngutuare [ratou] o te akarongo” e me kare.—Galatia 6:10.

7. Eaa te au puapinga me akono koe i te au manuiri tavini tamou?

⁷ Ka rauka ainei ia koe i te angaanga kapiti kia Iehova na te akono anga i te manuiri koia oki te au tavini tamou te anoano ra i te ngai nooanga? (E tatau ia 3 Ioane 5, 8.) Me pera tatou, ka puapingaia ratou e tatou katoa. Te kapiki ra te Pipiria i te reira e e ‘akapumaana anga’ i tetai e tetai. (Roma 1:11, 12) Akamanako ana i te tua o Olaf. I tona meangiti anga, kua atoro mai tetai akaaere kotinga takaua i tana putuputuanga e kua anoanoia tetai ngai nooanga nona, inara kare okotai tangata i roto i te putuputuanga i tauturu ana iaia. Kua pati a Olaf ki tona nga metua, kare i te Au Kite, me ka rauka i te akaaere kotinga kia noo ki to ratou kainga. Kua akatika mai raua inara kua akakite raua kia Olaf kia moe aia ki runga i te tōpa. Kua pera atu rai a Olaf. Mataora tikai tona epetoma ki te akaaere kotinga! I te au popongi ravarai kua tu mai raua e kua uriuri i te au tumu manako reka ia raua e kai ti ra. No tei akamaroiroi maata te akaaere kotinga ia Olaf, kua manako aia i te tavini tamou ia Iehova. No te 40 mataiti i topa, kua tavini ana a Olaf ei mitinari i te au enua ke ke.

8. No teaa tatou ka takinga meitaki ei i tetai ke noatu kare ratou e āriki mai i te akamata anga? Oronga mai i tetai akaraanga.

⁸ E maata te au mataara ka akaari tatou i te aroa ki te aronga ke, noatu kare ratou e āriki mai i te akamata anga. Ei akaraanga, kua apii tetai tuaine i Paniora i te Pipiria kia Yesica, e vaine no Ecuador mai. I tetai rā, i te tuatau o te apii Pipiria, kare e rauka ia Yesica i te akamutu i te aue. Kua ui atu te tuaine, eaa te tumu. Karanga a Yesica, i mua ake ka aere mai ei aia ki Paniora, e vaine putaua aia. I tetai rā kare ana kai mari ua e vai, na tana tamaine. Kua pure a Yesica no te tauturu, iaia e tamoe ra i te pepe. I muri akera, kua atoro mai e rua nga Kite ia Yesica e kua oake mai i tetai makatini. Inara kua takinokino aia ia raua e kua vevete i te makatini, te na ko anga: “Ko te kai ainei teia taku ka oake ki taku tamaine?” Kua tauta te nga tuaine i te akapumaana iaia, inara kare a Yesica i akarongo mai ana. I muri mai, kua akaruke te nga tuaine i tetai kete kai ki tona ngutupa. I teianei, i te tuatau o te apii, te aue ra aia no te mea kua kopae aia i te pauanga a te Atua ki tana pure. Inara kua anoano tikai a Yesica i te tavini ia Iehova.  Te taka meitaki ua ra, e no ko mai te au tupuanga meitaki i te tu oronga ua o te nga tuaine.—Koheleta 11:1, 6.

9, 10 (a) Eaa tetai au tuatau kua oronga ua te ngati Iseraela i te tauturu? (e) Eaa te au mataara ka rauka i te au taeake i te tauturu i roto i te putuputuanga i teia tuatau?

⁹ I mua ana, e maata te au tuatau ke ke no te ngati Iseraela kia tauturu ua atu. (Exodo 36:2; 1 Paraleipomeno 29:5; Nehemia 11:2) I teia tuatau, e maata katoa te au tuatau no te oronga ua i toou taime, te au apinga materia, e te au tu karape no te tauturu i te au taeake e te au tuaine. Me pera koe, ka mataora tikai koe e ka akameitaki a Iehova ia koe.

¹⁰ Te akamaroiroi ra te Tuatua a te Atua i te au tane i roto i te putuputuanga kia angaanga kapiti kia Iehova na te tavini anga i tetai ke ei tavini tauturu e ei aronga pakari. (1 Timoteo 3:1, 8, 9; 1 Petero 5:2, 3) Ko te aronga tei rave i teia, ka inangaro ratou i te tauturu i tetai ke na te au mataara tau pera katoa i ta ratou akamorianga. (Angaanga 6:1-4) Kua pati ainei te aronga pakari ia koe kia riro ei aronga raverave, kia tauturu i te ngai o te puka, te mapu, te tama, me kore i tetai atu ngai? Karanga te au taeake tei tauturu atu e kua reka tikai ratou i te rave i te reira.

11. Akapeea tetai tuaine i puapinga ai mei te angaanga akatuanga?

¹¹ Te aronga tei tauturu i te angaanga akatuanga, kua akatupu ratou i tetai au oa ou. Kua angaanga tetai tuaine ko Margie i ko i te akatuanga Are Uipaanga Patireia no tetai 18 mataiti. I te reira au angaanga, ka akono aia i te au tuaine mapu e ka tereni ia ratou. Karanga aia e e ravenga meitaki tikai teia no te aronga tauturu kia akamaroiroi i tetai e  tetai. (Roma 1:12) Te tika, i tona kite anga i te au tuatau ngata i tona oraanga, kua riro teia au oa nona ei akamaroiroi iaia. Kua tauturu ainei koe i tetai angaanga akatuanga? Ka rauka ia koe i te tauturu, noatu kare oou tu karape?

12. Akapeea koe me tauturu i tetai ke i muri ake i tetai tumatetenga?

¹² Ka rauka katoa ia tatou i te angaanga kapiti kia Iehova na te tauturuanga i to tatou au taeake i muri ake i tetai tumatetenga. Ei akaraanga, ka rauka ia tatou i te oronga ua i te moni tauturu. (Ioane 13:34, 35; Angaanga 11:27-30) Tetai tauturu, na te tamaanga me kore te ripea anga i te au ngai kinokino i muri ake i tetai tumatetenga. Tetai tuaine no Poland mai, ko Gabriela, te takinoia anga tona kainga e te vaipuke, kua rekareka tikai aia i te au taeake tei aere mai i te tauturu no te au putuputuanga i te pae mai. Me akamanako aia i te reira, kare aia i manata ana i tona au apinga materia tei pou, mari ra kua akamou ua aia ki runga i tei tupu kiaia. Karanga aia: “Akapapu mai teia e, ei tuanga no te putuputuanga Kerititiano, e akameitakianga tikai teia kiaku ma te rekareka e te mataora.” E manganui tei karanga katoa i teia, tei rauka te tauturu i muri ake i tetai tumatetenga. Kua mataora maata katoa te aronga tei angaanga kapiti kia Iehova, no te tauturu i teia au taeake.—E tatau ia Angaanga 20:35; 2 Korinetia 9:6, 7.

13. Akapeea tatou me akaketaketa i to tatou aroa no Iehova me tauturu tatou i tetai ke? Oronga mai i tetai akaraanga.

¹³ Kua angaanga kapiti tetai tuaine ko Stephanie ki tetai au papuritia i tona ngai na te tauturu anga i te Au Kite tei oro ki Marike, no te tamaki i to ratou enua. Kua tauturu ratou i teia aronga tuitarere kia kitea te ngai nooanga e te au apinga no te ngutuare. Karanga aia: “Akakeuia matou no to ratou rekareka e te tu āriki te kite anga i te aroa o te taokotaianga taeake i te ao katoa. Manako te au ngutuare tangata e kua tauturu matou ia ratou, inara te tika anga, e maata atu ta ratou i tauturu mai.” Kite matou i te aroa, te tu taokotai, te akarongo, e te irinaki kia Iehova tei akaketaketa tikai i to matou aroa no Iehova, e kua rauka te tu āriki oonu tikai no te au mea ravarai no ko mai i tana akaaerenga.”

14, 15 (a) Eaa te tu tei rauka i te peroveta ko Isaia? (e) Akapeea te au Kerititiano me aru i te tu o Isaia?

¹⁴ Ka inangaro ainei koe i te angaanga kapiti maata atu kia Iehova? Ka inangaro ainei koe i te neke ki te ngai te anoano maataia ra te au papuritia? E tika, kare tatou e  anoanoia kia neke mamao no te oronga ua. Inara te vaira te au taeake e te au tuaine te ka rauka ia ratou. Aiteite ua to ratou tu ki to te peroveta ko Isaia. Te ui anga a Iehova, “Koai taku e tono? koai te ka aere no tatou?” karanga atura aia: “I na, teia au; ko au taau e tono.” (Isaia 6:8) Ka rauka ainei e ka inangaro ainei koe i te tauturu i te akaaerenga a Iehova? Eaa tetai au mataara ka rauka ia koe i te tauturu?

¹⁵ Karanga a Iesu no te angaanga tutu aere e te akariro anga ei pipi: “Te maata ua nei te mou, te iti nei ra te aronga e kokoti: E teianei, e pure kotou i te Atu o te mou, kia unga mai aia i tetai aronga ei rave i taua mou nana ra.” (Mataio 9:37, 38) Ka rauka ainei ia koe te tavini ei painia i te ngai te anoano maataia ra te au papuritia? Me kore ra, ka rauka ainei ia koe te tauturu i tetai ke kia pera? E manganui te au taeake e te au tuaine te manako ra e ko te mataara meitaki rava atu no te akaari i to ratou aroa no te Atua e te tangata tupu koia oki kia painia i te ngai te anoano maataia ra te au papuritia. E mataara ke atu ainei tetai ka rauka ia koe i te akamaata atu i taau tavini anga i te Atua? Me koia ia, ka mataora tikai koe.

16, 17 Eaa tetai atu au mataara ka rauka ia koe i te akamaata atu i taau tavini anga ia Iehova?

¹⁶ Te inangaro ra ainei koe i te tavini i ko i te Betela me kore te tauturu i te angaanga akatuanga, no tetai tuatau poto me kore no te rā okotai me kore e maata atu i te epetoma? Te anoano ua ra te akaaerenga a Iehova i te tangata tei inangaro i te tavini i tetai ua atu ngai e ka rave i tei patiia kia ratou noatu e tu karape to ratou no tetai atu angaanga ke. Te inangaro ra a Iehova i te katoatoa tei puareinga ua i te akaatinga ia ratou uaorai no te tavini i te ngai te anoanoia ra.—Salamo 110:3.

¹⁷ Ka inangaro ainei koe kia tereniia e rauka ai i te tavini maata atu ia Iehova? Penei ka rauka ia koe i te aere ki te Apii no te Aronga Tutu Evangeria. Ka tereni teia apii i te au taeake e te au tuaine pakari tei tavini tamou takere ia Iehova, e rauka ai i te akaaerenga a Iehova i te taangaanga maata atu ia ratou. Ko te aronga tei aere ki teia apii, ka anoanoia ratou kia puareinga ua i te tavini i tetai ua atu ngai. Ka inangaro ainei koe i te akamaata atu i taau tavini anga ia Iehova?—1 Korinetia 9:23.

18. Eaa te au puapinga no te angaanga kapiti anga kia Iehova i te au rā ravarai?

¹⁸ No te mea e iti tangata tatou no Iehova, e tu oronga ua, e tu meitaki, e tu takinga meitaki e te aroa to tatou. Te manako ra tatou i tetai ke i te au rā ravarai. Ka akatupu teia i te rekareka, te ‘au, e te mataora kia tatou. (Galatia 5:22, 23) Noatu eaa toou turanga, ka mataora ua koe me aru i to Iehova tu oronga ua e ei oa angaanga akaperepereia nona!—Maseli 3:9, 10.