1. Eaa te akapapu anga e e Atua oronga ua a Iehova?

E TUATAU tetai kua noo ana a Iehova koia anake ua. E oti kua iki aia i te oronga i te ora no te au angera i runga i te rangi e no te au tangata i runga i te enua nei. E inangaro ana te Atua mataora ko Iehova, i te oronga i te au mea meitaki. (1 Timoteo 1:11; Iakobo 1:17) E no te mea te inangaro maira a Iehova kia mataora katoa tatou, te apii maira aia ia tatou kia oronga ua, e kia papa ua i te oronga atu.—Roma 1:20.

2, 3. (a) Eaa tatou ka rekareka ai me oronga ua tatou? (e) Eaa ta tatou ka apii mai i teia atikara?

² Kua anga te Atua i te tangata i tona uaorai tu. (Genese 1:27) Te aiteanga i reira, kua aite to tatou au tu ki to Iehova. E rauka ai te tu mataora tikai e ta Iehova akameitakianga, ka anoanoia tatou kia aru i tona akaraanga. Ka anoanoia tatou kia akaari i te tu inangaro no te tangata e kia oronga ua i ta  tatou i rauka. (Philipi 2:3, 4; Iakobo 1:5) No teaa ra? No te mea ko te tu teia i maani ei a Iehova ia tatou. Noatu e tu apa ua to tatou, ka rauka ia tatou te aru ia Iehova e kia oronga katoa.

³ Ka uriuri tatou i teianei i tetai au apiianga mei te Pipiria no runga i te tu oronga ua. Ka apii tatou i te tumu ka rekareka mai ei a Iehova me oronga ua tatou. Ka apii katoa tatou akapeea te tu oronga ua te tauturu anga ia tatou kia rave i te angaanga ta Iehova i oronga mai e te tumu ka rekareka ai tatou me oronga ua. E ka uriuri tatou i te tumu kia oronga ua rai tatou.

4, 5. Akapeea a Iehova raua ko Iesu te akaari anga i te tu oronga ua, e akapeea tatou me aru ia raua?

⁴ Inangaro a Iehova kia aru tatou iaia, no reira ka rekareka aia me oronga ua tatou. (Ephesia 5:1) Inangaro katoa a Iehova i te tangata kia rekareka. Kua kite tatou i teia no te mea kua anga aia ia tatou na roto i tetai tu taka ke, e kua anga aia i tetai enua manea no tatou e te au mea ravarai kia mataora tatou. (Salamo 104:24; 139:13-16) No reira ka akangateitei tatou ia Iehova me tauta tatou i te akarekareka i tetai ke.

⁵ Ka aru katoa tatou ia Iesu, koia tei akanoo i te akaraanga meitaki rava atu akapeea te tangata me oronga ua. Karanga aia: “Kare oki te Tamaiti a te tangata i aere mai kia taviniia tona, ei tavini ra, e kia oronga i tona ora ei oko no te tangata e manganui. (Mataio 20:28) E kua akamaroiroi te apotetoro ko Paulo i te au Kerititiano: “Kia okotai rai o kotou tu ngakau e to te Mesia ra to Iesu. Kua tuku ke atura ra aia i tona uaorai tu, e kua rave i to te tavini.” (Philipi 2:5, 7) No reira e ui kia tatou uaorai, ‘Ka rauka ainei iaku i te aru vaitata i to Iesu akaraanga?’—E tatau ia 1 Petero 2:21.

6. Eaa ta Iesu e apii maira te akakite anga aia i te tua o te tangata Samaria? (Akara i te tutu mua.)

⁶ Ka rekareka a Iehova me aru tatou i te akaraanga meitaki ta raua ko Iesu i akanoo no tatou. Ka rave tatou i te reira na te inangaro anga i te au tangata e te kimi anga i te au ravenga no te tauturu ia ratou. Kua akaari mai a Iesu i te puapinga o teia i tona akakite anga i te tua o te tangata Samaria. (E tatau ia Luka 10:29-37.) Kua apii aia i tana au pipi e ka anoanoia ratou kia tauturu i tetai ke, noatu koai ratou me kore noea mai ratou. Te maara ra ainei ia koe te tumu i akakite ei a Iesu i teia tua? No tei ui mai tetai tangata ngati Iuda kiaia: “Koai oki toku tangata tupu?” Kua apii mai ta Iesu pauanga e ka anoanoia tatou kia oronga ua mei te tangata Samaria rai me ka inangaro tatou i te akamareka ia Iehova.

7. Akapeea tatou me akaari e kua irinaki tatou e na Iehova te ravenga meitaki rava atu? Akamarama mai.

⁷ Tetai akaou tumu ka oronga ua tatou, koia oki no tetai mea tei tupu i te kainga i Edene. Karanga a Satani e ka mataora atu a Adamu raua ko Eva me kare raua e akarongo kia Iehova e me inangaro ua ia raua uaorai. Kua noinoi a Eva e kua inangaro aia kia aite mei te Atua rai. Kua noinoi a Adamu e kua inangaro aia i te akarekareka maata atu ia Eva e kare ko te Atua. (Genese 3:4-6) Kua taki atu teia ki te tumatetenga. Taka meitaki, kare tetai tangata e rekareka me e tu noinoi tona. Inara me e tu noinoi kore e te oronga ua to tatou, te akaari ra tatou e kua irinaki tatou e na Iehova te ravenga meitaki rava atu.

8. Eaa ra a Adamu raua ko Eva ka tau ei kia akamanako atu i tetai ke?

⁸ Noatu kua noo a Adamu raua ko Eva ko raua anake ua i te kainga i Edene, ka tau rai raua i te akamanako i tetai ke. No teaa ra? Kua oronga a Iehova i tetai angaanga na raua. Akakite aia kia raua kia akaki i te enua ki ta raua tamariki e kia akariro i te enua ei parataito. (Genese 1:28) Ka tau a Adamu raua ko Eva kia inangaro i ta raua tamariki kia rekareka, mei ia Iehova rai i inangaro i te katoatoa i te enua nei kia rekareka. Kia angaanga kapiti ratou i te akariro i te enua katoa ei parataito. E angaanga maata tikai teia!

9. Eaa te tangata ka mataora ai me akariro ratou i te enua ei parataito?

⁹ Ka anoano katoaia te au tangata apa kore kia angaanga kapiti kia Iehova e rauka ai te akariro i te enua ei parataito e te rave i tona anoano. Na teia tu, e rauka ai ia ratou i te akaō atu ki roto i tona akaangaroianga. (Ebera 4:11) Akamanako ana mei teaa tikai te meitaki e te mataora o teia angaanga! Ka akameitaki maata tikai a Iehova ia ratou no to ratou tu noinoi kore e te tu akono i tetai ke.

10, 11 Eaa te ka tauturu ia tatou kia tutu aere e kia akariro i te tangata ei au pipi?

¹⁰ I teia tuatau, kua oronga mai a Iehova i tetai angaanga puapinga na tatou kia rave. Inangaro aia ia tatou kia tutu aere e kia  akariro i te tangata ei au pipi. Kia rave i teia angaanga, ka anoanoia tatou kia inangaro tikai i te tangata. Ko te tika, ka rauka anake ia tatou i te rave ua rai i teia angaanga me e akakoroanga meitaki to tatou: kia inangaro ia Iehova e kia inangaro i te tangata.

¹¹ Karanga a Paulo no runga iaia e tetai au Kerititiano i te anere mataiti mua e, “e oa rave angaanga oki matou no te Atua” no te mea e tutu aere e e apii ana ratou i te tuatua mou ki te tangata. (1 Korinetia 3:6, 9) I teia tuatau, ka rauka katoa ia tatou kia riro mai ei ‘oa rave angaanga no te Atua’ na te oronga ua anga i to tatou taime, te maroiroi, e te moni no te rave i te angaanga tutu aere ta te Atua i oronga mai. E tika anga ngateitei tikai teia!

12, 13 Eaa te au akameitakianga ka rauka mai me akariro tatou i te tangata ei pipi?

¹² Me oronga ua tatou i to tatou taime e te maroiroi i te tutu aere e te apii, ka apai mai te reira i te mataora maata. Ko teia ta te au taeake e te au tuaine tei rave i te au apii Pipiria i akakite mai. E rekareka tikai ana matou me kite i te tu mataora o te aronga apii me mārama ratou eaa tikai ta te Pipiria e apii maira, me tupu to ratou akarongo, me rave i te au taui anga i roto i to ratou oraanga, e me akamata ratou i te akakitekite aere i ta ratou i apii mai. Kua rekareka katoa a Iesu te oki anga mai te 70 aronga tutu aere tana i tono “ma te rekareka” no te au mea meitaki tei tupu kia ratou.—Luka 10:17-21.

¹³ E rekareka ana to tatou au taeake e te au tuaine takapini i teianei ao me kite ratou akapeea te karere a te Pipiria te akameitaki anga i te oraanga o te tangata. Ei akaraanga, kua inangaro tetai tuaine mapu ko Anna tona ingoa i te tavini maata atu ia Iehova. * (Akara i te tataanga rikiriki i raro.) No reira kua neke aia ki tetai ngai i te Tua Itinga o Europa te anoano maataia ra te aronga tutu aere. Tata aia: “E maata te au apii Pipiria ka rauka ia koe i te rave i konei, e e reka tikai au i te reira. Te mataora tikai nei au i taku angaanga tutu aere. Me oki mai au ki te kainga, kare oku taime no te akamanako iaku uaorai. Ka akamanako au i taku aronga e apii ra—to ratou au manamanata e te tu apiapi. Ka kimi au i tetai ravenga no te akamaroiroi e te tauturu ia ratou. E kua papu tikai iaku “e mea meitaki i te oronga atu i te rave mai.”—Angaanga 20:35.

14. Akapeea tatou e mataora ai i te angaanga tutu aere noatu me kare te tangata e akarongo mai?

¹⁴ Noatu kare te tangata e akarongo mai kia tatou me tutu aere, ka mataora tatou me oronga i te atianga kia ratou kia rongo i te nuti meitaki. Te tapapa maira a Iehova ia tatou kia rave katoa i tana i tuatua kia Ezekiela: “E ko taku nei au tuatua taau e karanga atu kia ratou, to ratou akarongo anga, e te kore anga.” (Ezekiela 2:7; Isaia 43:10) No reira, noatu me ka akarongo mai te tangata e me kare, ka mataora a Iehova me tauta tatou. (E tatau ia Ebera 6:10.) Karanga tetai taeake no runga i tana angaanga  tutu aere: “Ka tanu matou, ka tamauu ki te vai, e ka pure ma te irinaki e ka akatupu mai a Iehova i te reira.”—1 Korinetia 3:6.

15. Ka oronga ua ainei tatou ki te aronga te ka āriki rekareka ua mai i ta tatou apinga? Akamārama mai.

¹⁵ Te inangaro ra a Iesu ia tatou kia oronga ua no te mea ka mataora tatou. Me oronga ua tatou, ka oronga katoa te tangata. No reira te akamaroiroi maira aia ia tatou: “Ka oronga, e ka rauka ta kotou; e ki te aite, e taomiia, e ruruia, e maringi ua atu, na te tangata e riringi mai ki roto i to kotou kakau. Ko te aite ta kotou e aite atu, ko ta kotou rai ïa kia akaaiteia mai.” (Luka 6:38) E tikai, me e tu oronga ua toou, kare te katoa anga o te tangata e āriki mai. Inara, noatu kare ratou e āriki mai, e oronga ua atu. Kare tatou e kite eaa te meitaki taau ka akatupu me oronga tatou i tetai apinga.

16. Koai ma ta tatou ka oronga ua atu, e no teaa ra?

¹⁶ Kare te aronga ngakau tae e oronga ua i tetai apinga ma te tapapa atu kia rauka mai tetai apinga na ratou. Karanga a Iesu: “Kia akatupu ra koe i te pokai, ko te tangata rikiriki te tiki atu, ko te rima motu ra, ko te pirikoki, ko te matapo: e e ao toou i reira, kare oki a ratou kia tutaki mai ia koe.” (Luka 14:13, 14) Akakite katoa te Pipiria: “E akameitakiia te tangata oronga,” e “E ao to tei akono mai i te tangata putaua ra.” (Maseli 22:9; Salamo 41:1) Kia oronga ua tatou no te mea ka inangaro tikai tatou i te tauturu i tetai ke.

17. Eaa atu tetai apinga ka rauka ia tatou i te oronga te ka akatupu i te mataora?

¹⁷ Te taiku anga a Paulo i ta Iesu tuatua e “e mea meitaki i te oronga atu i te rave mai,” kare aia e tuatua ua nei no runga i te oronga ua i te au apinga materia. Ka rauka katoa ia  tatou i te oronga i tetai akamaroiroianga, aratakianga a te Pipiria, e te tauturu ki te tangata. (Angaanga 20:31-35) Mei ta Paulo i tuatua e tana i rave, kua apii mai aia e e puapinga te oronga ua i to tatou taime, to tatou maroiroi, te tauturu, e to tatou aroa.

18. Eaa ta te aronga kimikimi i akakite mai no runga i te tu oronga ua?

¹⁸ Kua kite katoa mai te aronga kimikimi tei apii i te tu o te tangata e me oronga ua te tangata, ka akatupu te reira i te mataora. I roto i tetai atikara, karanga tetai aronga e e mataora ana ratou me rave ratou i tetai apinga meitaki no tetai ke. Karanga te aronga kimikimi e me tauturu tatou i tetai ke, ka kite mai tatou i te puapinga e te akakoroanga o to tatou oraanga. No reira kua tamanako te aronga kite karape e kia rave te tangata i te au angaanga tauturu e rauka ai tetai oraanga meitaki e te mataora. Ko te tika, kare tatou e poitirere i ta ratou i kite mai, no te mea kua karanga takere mai Tei Anga ia tatou, ko Iehova, e ka rauka te mataora me oronga ua tatou.—2 Timoteo 3:16, 17.

19, 20 Eaa ra koe ka inangaro ei kia oronga ua rai?

¹⁹ Me ka akono ua rai te au tangata ia ratou uaorai, ka ngata i reira ia tatou i te oronga ua atu rai ki tetai ke. Inara kua akamaara mai a Iesu i te nga akaueanga maata rava atu, kia inangaro tatou ia Iehova ma to tatou ngakau katoa, e ma to vaerua katoa, e ma to manako katoa, e ma to ririnui katoa e kia aroa atu i to tatou tangata tupu mei ia tatou uaorai. (Mareko 12:28-31) Kua apii mai tatou mei teia atikara e ko te aronga tei inangaro ia Iehova, ka aru ratou iaia. E tu oronga ua to Iehova raua ko Iesu. Te akamaroiroi maira raua ia tatou kia aru i to raua akaraanga, no te mea kua kite raua e ka oronga mai teia i te tu mataora tikai. Me oronga ua tatou ki te Atua e ki te tangata, ka akangateitei tatou ia Iehova e ka puapingaia tatou e tetai ke.

²⁰ Papu roa te rave nei koe i taau ka rauka i te oronga ua e i te tauturu i tetai ke, ki to tatou au taeake e te au tuaine tikai. (Galatia 6:10) Me rave ua rai koe i teia, ka āriki rekareka mai e ka aroa mai te tangata ia koe, e ka tupu te mataora. Karanga te Pipiria: “Te tangata oronga ra, e matu ïa: e tei tamauu ki te vai ra, ka tamauu katoaia mai aia.” (Maseli 11:25) I roto i to tatou oraanga e te angaanga orometua, e maata te au ravenga ka rauka ia tatou i te oronga ua ma te tu karapii kore. Ka uriuri tatou i te reira i roto i te atikara ka aru mai.