Eaa te tumu kare e akatikaia kia tuku i te au puka a te Au Kite o Iehova ki runga i tetai atu au website me kore social media?

Te manako ra tetai au tangata e no te mea kare ta tatou puka e tutakiia ana, e tika anga to ratou kia kopi me kore kia tuku i te reira ki runga i tetai atu au website ke e te social media. Inara, ka akatupu teia i te manamanata maata e ka apa te reira i te Ture no te Taangaanga Anga i te Web Site * (Akara i te tataanga rikiriki i raro) no ta matou au website. Te akataka meitaki ra te Ture e kare tetai ua atu tangata e akatikaia i te “tuku i tetai ua atu tutu torōia, au puka, au akairo akamanaia, imene, au tutu, au vitio, me kore au atikara mei teia website ki runga i te Initaneti (tetai ua atu website, au website kua vaooia te au apinga e te au vitio kia akaraia e kia kopiia, me kore tetai website no te pukapuka anga).” Eaa ra teia au ture i anoanoia ai?

Pouroa te au apinga i runga i ta matou au website, kua tureia kia kopi, tera te aiteanga kua paruruia e te ture. E mea puapinga teia, no te mea ka paruru teia me taangaanga puapinga koreia te reira. Te aronga tei akaruke i te akarongo e tetai atu au tangata tei inangaro i te takino i ta tatou angaanga, tetai taime ka tuku ratou i ta tatou au puka ki runga i ta ratou website ei akavare i te Au Kite o Iehova e tetai pae. Inara i runga rai i taua au ngai, ka tuku katoa ratou i te au apinga te ka akaekoko i te manako o te tangata. (Salamo 26:4; Maseli 22:5) Kua taangaanga tetai pae i ta tatou apinga me kore ta tatou logo no te jw.org ki runga i ta ratou au advertisement, au mobile app, e te au apinga ta ratou e okooko ra. Inara, mei te mea kua paruru te ture i ta tatou au apinga e ta tatou logo, ka rauka ia tatou i te apai ia ratou ki te akavaanga no te arai ia ratou. (Maseli 27:12) Inara, penei kare te akavaanga e turu mai ia tatou me te akatika ra tatou i tetai pae tangata, to tatou au taeake, kia tuku i ta tatou au puka ki runga i tetai atu au website me kore kia taangaanga i te logo no te jw.org ei okooko i te au apinga ke.

Me kopi tatou i ta tatou au puka mei tetai ngai ke e kare i kopiia mei te jw.org, e mea kino te reira. Na Iehova e oronga maira i ta tatou kai pae vaerua na roto anake i “te tavini akono meitaki e te pakari.” (Mataio 24:45) Te taangaanga ra teia “tavini” i te au website no te oronga mai i te kai pae vaerua—www.pr418.com, tv.pr418.com, e te wol.pr418.com. E toru rai a tatou app no te au apinga apaipai—JW Language^®, JW Library^®, e te JW Library Sign Language^®. I runga i teia au website e teia au app, kare tatou e kite i tetai ua atu advertisement me kore tetai ua atu apinga no roto mai i to Satani ao. Inara me kopi mai tatou i ta tatou au puka mei ko mai i tetai website tuke me kore app ke mai, penei kua tauiia te reira.—Salamo 18:26; 19:8.

Pera katoa, me tuku tatou i ta tatou au apinga ki runga i te au website te ngai ka tuku te tangata i ta ratou tuatua, ka rauka i te aronga tei akaruke i te akarongo e tetai aronga ke i te akaapa i te akaaerenga a Iehova. Ka taumaro i reira tetai au taeake ki teia au tangata, e ka akakinoia a Iehova. Kare teia au uriurianga i runga i te Initaneti i te ravenga tau no te akatikatika i te manako o tetai tangata e te tauturu iaia kia mārama i te tuatua mou. (1 Timoteo 6:3-5; 2 Timoteo 2:23-25) Pera katoa, te akatupu ra tetai au tangata i te au website e te au social media account tei manakoia e no ko mai te reira i te akaaerenga me kore no ko mai i te au taeake o te Pupu Akaaere. Inara e aronga pikikaa teia. Kare okotai mema o te Pupu Akaaere e Web page e e account tana nana anake i runga i tetai ua atu social media.

Me arataki tatou i te tangata ki te jw.org, te turu ra tatou i te tutu aere i te “evangelia.” (Mataio 24:14) Te meitaki ua atura ta tatou au website e te au app. Ka inangaro tatou i te katoatoa kia puapingaia mei te reira. No reira ka akatikaia tatou kia imere i tetai kopi o tetai puka me kore kia tuku i tetai link kia aere ratou ki ta tatou website. Na teia tu, ka arataki tatou i te tangata ki te ngai tikai ta Iehova e oronga maira i te kai pae vaerua, na roto mai i “te tavini akono meitaki e te pakari.”