NO TE mea e ngata tikai te oraanga i teia “tuatau openga,” ka anoano maataia te tu akakoromaki. (2 Timoteo 3:1-5) E manganui te tangata i teia tuatau kare e akakoromaki ana. E tu karapii to ratou, e reka ana ratou i te taumaro, e kare e tu akono meitaki. No reira ka anoanoia tatou kia ui: ‘Kua aite ainei au ki te maata anga o te tangata kare e tu akakoromaki? Eaa tikai te aiteanga o te tu akakoromaki? Eaa taku ka rave kia rauka te tu akakoromaki?

Eaa te aiteanga o te tuatua “akakoromaki” me taangaangaia i roto i te Pipiria? Tona aiteanga, e maata atu te ka o mai i te akakoromaki ua anga i tetai manamanata? Ka tamou marie tetai tangata akakoromaki i te akakoroanga, koia oki, ka akamanako atu aia e ka meitaki mai te turanga. Kare aia e manako ua iaia uaorai, mari ra ka akono katoa i te au manako ngakau o tetai ke, e te aronga tei akariri mai me kore tei takinokino iaia. Ka tapapa ua atu aia i te akamanako e ka meitaki mai to raua pirianga. Kare i te mea poitirere e te karanga ra te Pipiria e no roto mai te tu akakoromaki i te tu aroa. * (Akara i te tataanga rikiriki i raro.) (1 Korinetia 13:4) E tuanga katoa te tu akakoromaki no te ua o “te vaerua.” (Galatia 5:22, 23) No reira, eaa ta tatou ka rave kia rauka te tu akakoromaki?

Kia akakoromaki, ka anoanoia tatou kia pure no te tauturu o te vaerua o Iehova, ka oronga mai aia ki te aronga tei irinaki iaia. (Luka 11:13) E ririnui tikai te reira vaerua, inara ka anoanoia rai tatou kia aru ma te taangaanga i ta tatou pure. (Salamo 86:10, 11) Tera te aiteanga, kia taangaanga meitaki tatou i te akaari i te tu akakoromaki. Inara, i tetai taime kua puapinga kore te reira. Eaa te ka tauturu ia tatou?

Ka anoanoia tatou kia apii e te aru i te akaraanga apa kore o Iesu. Te tuatua anga te apotetoro ko Paulo no runga i te tu “akatangata ou,” tei o mai te tu akakoromaki, kua akamaroiroi aia: “E te au o te Atua, ei mana ïa i roto i to kotou ngakau.” (Kolosa 3:10, 12, 15) Ei rave i teia, ka aru tatou i to Iesu akaraanga ma te irinaki pu tikai e ka akatikatika te Atua i te au mea i te tuatau tau. Me irinaki tatou, kare to tatou tu akakoromaki e aere ke, noatu eaa te tupu ra kia tatou.—Ioane 14:27; 16:33.

Ka inangaro pouroa tatou i te ao ou kia tae viviki mai. Inara ka apii tatou kia akakoromaki maata atu me akamanako tatou akapeea a Iehova te akakoromaki tikai anga ia tatou. Akapapu maira te Pipiria ia tatou: “Kare ua te Atu i akaroaroa i tana i tuatua maira, mei ta tetai pae e karanga ra e, e akaroaroa; e akakoromaki maata ra tona ia tatou, kare rava i anoano e kia mate atu tetai, kia rauka katoatoa ra te tataraara.” (2 Petero 3:9) No reira me akamanako tatou i to Iehova tu akakoromaki, ka akakoromaki maata katoa tatou i tetai ke. (Roma 2:4) Eaa tetai au turanga ka anoanoia tatou kia akakoromaki?

Te vaira te au turanga o te oraanga ka anoanoia te tu akakoromaki. Ei akaraanga, ka anoanoia te tu  akakoromaki kia kore e tamanata atu i tetai ke me manako tatou e e apinga puapinga ta tatou ka inangaro i te tuatua kiaia. (Iakobo 1:19) Ka anoano katoaia te tu akakoromaki me akariri mai tetai ia tatou. I te mea e ka riri atu koe, e mea meitaki i te akamaara akapeea a Iehova e Iesu i te ariu anga mai ki to tatou tu apikepike. Kare raua e akamou ua ki runga i te au tarevake rikiriki ta tatou ka rave. Mari ra, te kite ra raua i to tatou au tu memeitaki e ka akakoromaki ma te oronga mai i te tuatau kia akamako tatou ia tatou uaorai.—1 Timoteo 1:16; 1 Petero 3:12.

Ka anoano katoaia te tu akakoromaki me akakite mai tetai kia tatou e kua tuatua me kore kua rave tatou i tetai mea tarevake. Penei te mea mua, ka riri tatou e ka paruru ia tatou uaorai. Inara te akakite maira te Tuatua a te Atua kia ariu tatou na tetai mataara ke. Karanga te reira: “E mea meitaki te tangata ngakau akakoromaki i te tangata ngakau parau ra. Auraka kia rapurapu ua to ngakau i te riri: tei te manava o te neneva ra te riri i te vai marie anga.” (Koheleta 7:8, 9) No reira, noatu e kua akaapa pikikaaia mai, ka anoanoia tatou kia akakoromaki e kia akamanako meitaki i mua ake ka riri ei. Ko ta Iesu te reira i rave i te akaapa tarevake anga tetai pae iaia.—Mataio 11:19.

Ka anoano tikaiia te au metua kia akakoromaki me tauturu ratou i ta ratou tamariki kia akatikatika i to ratou tu e kia kopae i te au anoano kino. Akara ana i te akaraanga o Mattias, i roto i te Betela i Scandinavia. I tona mapu ou anga, kua aviri tona au oa apii iaia no tona irinakianga. I te akamata anga, kare tona nga metua i kite e te tupu ra teia kiaia. Inara kua kite raua i tona akamata anga i te ekoko i tona irinakianga. Karanga a Gillis, te papa o Mattias, e kua anoanoia raua ko tana vaine kia akakoromaki i teia turanga. Ka ui a Mattias i te au uianga: “Koai te Atua? Akapeea me kare te Pipiria i te Tuatua na te Atua? Akapeea tatou e kite ei e ko te Atua tikai te inangaro maira i tetai apinga mei ia tatou?” Ka ui katoa aia ki tona papa: “No teaa ra au ka akavaia ai me kare au e irinaki ana i taau e irinaki ra?”

Akamārama a Gillis: “Tetai taime ka tuatua riri ua mai ta maua tamaiti i tana au uianga, kare no te patoi ia maua ko tona mama, mari ra no te patoi i te tuatua mou, tana i manako e kua akariro i tona oraanga ei mea ngata.” Akapeea a Gillis te tauturu  anga i tana tamaiti? “Ka noo maua ko taku tamaiti ma te puka no tetai tuatau roa.” Te maata anga o te taime, ka akarongo ua a Gillis kia Mattias e kua ui i te au uianga ma te tauta i te mārama i tona au manako ngakau. I tetai taime, kua akamārama a Gillis i tetai apinga ki tana tamaiti e kua akakite kia akamanako aia i te reira no tetai rā me kore e maata atu i mua ake ka pukapuka akaou ei raua. I tetai au taime, ka karanga a Gillis e kua anoano rai aia i tetai au rā no te akamanako i tetai apinga ta tana tamaiti i tuatua. Na roto i teia au pukapuka anga, kua akamata a Mattias i te mārama i te aiteanga o te oko akaatinga, e kia mārama e te inangaro maira a Iehova ia tatou, e e tika anga tona kia tutara ki rungao ia tatou. Karanga tona papa: “Kua pou rai te tuatau, te maata anga o te taime e ngata tikai, inara aere ua rai kua akamata aia i te inangaro ia Iehova ma te ngakau tae. Mataora tikai maua ko taku vaine e kua pauna rai to maua tauta anga i te akakoromaki kia tauturu i ta maua tamaiti kia na roto i tona mapu ou anga e kua itaeia tona ngakau.”

Koi tauturu ei a Gillis e tana vaine i ta raua tamaiti, kua irinaki raua e ka tauturu mai a Iehova ia raua. Karanga a Gillis: “Kua putuputu au i te akakite kia Mattias e na to maua inangaro oonu iaia, i akakeu ia maua ko tona mama kia pure akatenga maata, e ka tauturu a Iehova iaia kia mārama.” Mataora tikai teia nga metua e kua akakoromaki raua e kare i tuku ana i te au!

Ka anoano katoaia te tu akakoromaki me te akono ra tatou i tetai mema makimaki o te ngutuare me kore e oa makimaki no tetai tuatau roa. Akara ana i te akaraanga o Ellen * (Akara i te tataanga rikiriki i raro), te noo katoa ra i Scandinavia.

Mei te varu mataiti i topa ake nei, kua tupu te maki akamate kopapa e rua taime ki te tane a Ellen tei takino i tona roro. Te tupu anga te reira, kare aia e kite akaou ana i te tu mataora, te maromaroa, e te tu tangi. E ngata tikai teia kia Ellen. Karanga aia: “Kua pou rai te akakoromaki e te au pure.” Karanga katoa aia: “Taku irava reka tei akapumaana iaku ko Philipi 4:13, te na ko ra: ‘E tika iaku te au mea ravarai nei i te Mesia, ko tei akamaroiroi mai iaku nei.’” Ma te ririnui e te tauturu a Iehova, kua rauka ia Ellen i te akakoromaki i tona turanga.—Salamo 62:5, 6.

E tikai, ko Iehova te akaraanga meitaki rava atu no te tu akakoromaki. (2 Petero 3:15) I roto i te Pipiria, ka tatau putuputu tatou i te tu akakoromaki maata o Iehova. (Nehemia 9:30; Isaia 30:18) Te maara ra ainei ia koe akapeea a Iehova te ariu anga kia Aberahama i tona ui anga i te au uianga no runga i Tana tukuanga tika no te takore ia Sodoma? Kare a Iehova i tapupu ana ia Aberahama. Kua akarongo meitaki aia i te au uianga e te au manamanata tataki tai o Aberahama. I reira, kua akaari a Iehova e kua rongo aia i to Aberahama au manamanata e kua akapumaana iaia e kare rava Aia e takore ia Sodoma noatu me e tai ngauru rai tangata tuatua tika i roto i te reira oire. (Genese 18:22-33) E akarongo ua ana a Iehova ma te akakoromaki, e kare rava aia e riri ua!

E tuanga puapinga tikai te tu akakoromaki no te tu akatangata ou e kia rauka i te au Kerititiano katoatoa. Me maroiroi tatou i te akakoromaki, te akangateitei ra tatou i to tatou Metua akono e te akakoromaki, ko Iehova, e ko tatou tetai i rotopu i “te aronga i rauka tei tuatuaia maira i te akarongo e te akakoromaki.”—Ebera 6:10-12.