1, 2. (a) Eaa te iti tangata o te Atua i mataora ai i teia tuatau? (e) Akapeea te au metua e te aronga pakari te tauturu anga i te au mapu kia mārama i te aiteanga o te papetitoanga?

“KUA kite au ia koe mei toou anau anga mai,” i karanga ai tetai tangata pakari kia Christopher e 12 ona mataiti, “e te mataora nei au i te kite e ka inangaro koe kia papetitoia. Inangaro au i te ui kia koe, ‘Eaa koe i inangaro ei kia papetitoia?’” E tumu meitaki tikai ta tera tangata pakari kia ui i teia uianga. Te mataora nei tatou i te kite e tauatini ua atu au mapu e papetitoia nei i te au mataiti ravarai. (Koheleta 12:1) Inara kia akapapu te au metua Kerititiano e te aronga pakari i roto i te putuputuanga e na te au mapu uaorai i rave i ta ratou ikianga e kua mārama ratou i te aiteanga o te papetitoanga.

² I roto i te Pipiria, ka kite mai tatou e ko te akatapuanga e te papetitoanga, ko te akamataanga ïa o te oraanga Kerititiano.  Ka apai mai teia oraanga ou i te au akameitakianga no ko mai ia Iehova, inara ka patoi katoa a Satani ia koe. (Maseli 10:22; 1 Petero 5:8) No reira te au metua Kerititiano i tuku ei i tetai tuatau no te apii i ta ratou tamariki kia kite eaa tikai te aiteanga kia riro mai ei pipi na Karaiti. Ko te au mapu kare o ratou metua Kerititiano, na te aronga pakari i roto i te putuputuanga e oronga i te tauturu aroa kia mārama ratou eaa te aiteanga o te akatapuanga e te papetitoanga. (E tatau ia Luka 14:27-30.) Mei te akatu are rai, ka anoanoia kia akapapa meitaki e oti ei te reira, pera katoa te au mapu, ka anoanoia kia akapapa meitaki i mua ake ka papetito ei kia rauka ia ratou i te tavini tiratiratu ia Iehova “e tae ua atu ki te openga.” (Mataio 24:13) Eaa te ka tauturu i te au mapu kia akapapu kia tavini ia Iehova e mutu kore ua atu? Ka akara ana tatou i te reira.

3. (a) Eaa ta te au tuatua a Iesu e Petero e apii maira ia tatou no runga i te puapinga kia papetitoia? (Mataio 28:19, 20; 1 Petero 3:21) (e) Eaa te au uianga ta tatou ka akamanako, e no teaa ra?

³ E mapu ainei koe tei inangaro kia papetitoia? Me koia ïa, e akakoroanga meitaki tikai tena! E turanga ngateitei tikai no tetai kia papetitoia ei Au Kite no Iehova. Ka anoano katoaia tetai Kerititiano kia rave i te reira, e e takainga puapinga teia no te aronga te ka ora atu i roto i te mate maata. (Mataio 28:19, 20; 1 Petero 3:21) Me papetitoia koe, te akaari nei koe i taau i taputou kia tavini ia Iehova e mutu kore ua atu. Ka inangaro tikai koe i te akono i taau taputou, no reira ka tauturu te au uianga ka aru mai kia kite me kua papa koe no te papetitoanga: (1) Kua pakari ainei koe i te rave i teia ikianga? (2) E inangaro ainei toku kia rave i te reira? (3) Kua mārama ainei au i te aiteanga o te akatapu anga kia Iehova? Ka uriuri tatou i teia au uianga.

4, 5. (a) Eaa te tumu kare te papetitoanga no te aronga mamaata ua? (e) Eaa te aiteanga no tetai Kerititiano kia rauka te tu pakari?

⁴ Kare te Pipiria e akakite maira e ko te aronga mamaata ua me kare te aronga tei taea tetai mataiti tei tau kia papetitoia. Te na ko ra a Maseli 20:11: “E kitea te tu o te tamaiti i tana au ravenga; i te meitaki anga e te tiratiratu.” No reira ka rauka i tetai tamaiti kia mārama i te aiteanga kia rave i te tika e kia akatapu i tona oraanga ki Tei Anga mai. Inara, ko te papetitoanga e takainga puapinga teia no tetai mapu me rauka iaia te tu pakari e kua akatapu i tona oraanga kia Iehova.​—Maseli 20:7.

⁵ Eaa te aiteanga o te tu pakari? Kare te tu pakari e taiku ua ra i te tangata mamaata me kore i tona tupu anga pae kopapa. Te akakite ra te Pipiria e ko te tangata pakari,  “no te mātau i kite ei to ratou ngakau i te meitaki e te kino.” (Ebera 5:14) Kua kite te tangata pakari i te mea tika e kua iki i te rave i te reira i roto i tona ngakau. No reira kare aia e viviki i te akavareia kia rave i te kino. E kare aia e anoano i tetai kia akakite ua rai kiaia kia rave i te mea tika. E mea tau kia manako e me papetitoia tetai mapu, ka rave aia i te mea tika noatu kare tona nga metua me kore tetai tangata pakari i reira.​—Akaaite ia Philipi 2:12.

6, 7. (a) E akataka mai i te au akaaoanga ta Daniela i na roto atu iaia i Babulonia. (e) Akapeea a Daniela te akaari anga i te tu pakari?

⁶ Ka rauka ainei i tetai mapu i te akaari i teia tu pakari? Akamanako ana i te akaraanga o Daniela. Penei e mapu aia i tona apainaia anga mei tona nga metua ki Babulonia. Kite ua ake a Daniela, te noo ra aia i rotopu i te au tangata kare e akarongo ana i ta te Atua akaueanga. Inara ka akara matatio tatou i te turanga o Daniela. Kua akonoia aia mei tetai tangata puapinga rai i Babulonia. Koia tetai o te au mapu tei iki meitakiia ei tavini i te ariki. (Daniela 1:3-5, 13) Akara anga e turanga meitaki atu to Daniela i Babulonia i tona tuatau i Iseraela.

⁷ No reira akapeea a Daniela i te ariu anga? Kua akatika ainei aia i te tangata o Babulonia kia taui i tona tu e kia akaparuparu i tona akarongo? Kare! Te akakite ra te Pipiria e i tona tuatau i Babulonia, “te manako ra te ngakau o Daniela e, auraka aia e viivii,” e ka akaatea mai aia mei tetai ua atu apinga te piri atura ki te akamorianga pikikaa. (Daniela 1:8) E tu pakari tikai teia!

8. Eaa taau ka apii mai mei te akaraanga o Daniela?

 ⁸ Eaa taau ka apii mai mei te akaraanga o Daniela? Tetai mapu manako pakari, ka vai ngaueue kore aia ki tana irinakianga noatu te au turanga ngata. Kare aia e akariro iaia mei tetai moko rai tei taui i tona kara kia aite ki te au apinga takapini iaia. Kare aia e riro ei oa no te Atua i ko i te Are Uipaanga Patireia, inara e oa aia no teianei ao i te apii. Mari ra, ka vai tiratiratu aia me timataia.​—E tatau ia Ephesia 4:14, 15.

9, 10. (a) Akapeea tetai mapu e puapinga ai me akamanako e akapeea aia te ariu atu anga ki te au timataanga o te akarongo? (e) Eaa te aiteanga o te papetitoanga?

⁹ E tika, kare tatou i te aronga apa kore. I tetai taime e rave ana te au mapu pera katoa te aronga mamaata i te tarevake. (Koheleta 7:20) Inara me inangaro koe kia papetitoia, e mea meitaki kia akapapu mei teaa rai te maata o toou inangaro i te akarongo ki te akauenga a Iehova. No reira, e ui kia koe uaorai, ‘Kua roa ainei au i te akarongo kia Iehova?’ Akamanako akapeea koe i te ariu atu anga i te taime openga i timataia ai toou akarongo. Kua kite ainei koe eaa te mea tika taau ka rave? Mei ia Daniela rai, kua akamaroiroi ainei tetai tangata ia koe kia taangaanga i taau tareni i roto i to Satani ao? Me timataia koe mei teia rai, ka mārama ainei koe eaa to Iehova anoano?​—Ephesia 5:17.

¹⁰ No teaa i puapinga ei kia kite i te pauanga ki teia au uianga takake? No te mea ka tauturu te reira ia koe kia mārama i te puapinga o te papetitoanga. Te akaari ra te papetitoanga ki te katoatoa e kua papau koe i tetai tia puapinga kia Iehova. Kua tia kore e ka tavini iaia ma to ngakau katoa e mutu kore ua atu. (Mareko 12:30) Ka akapapu te aronga tei papetitoia kia akono i ta ratou i tia kia Iehova.​—E tatau ia Koheleta 5:4, 5.

11, 12. (a) Ka anoanoia tetai tangata tei inangaro kia papetitoia kia akapapu i teaa? (e) Eaa te ka tauturu ia koe kia rauka te manako meitaki no ta Iehova akanoonooanga no te papetito?

¹¹ Akakite ra te Pipiria e ka “puareinga roa” to Iehova iti tangata, kapiti mai te au mapu i te tavini anga iaia. (Salamo 110:3) No reira ka anoanoia tetai tangata tei inangaro kia papetitoia kia papu tikai e ko tona anoano teia. Penei ka umuumuia koe kia akara matatio i toou uaorai anoano, me kua utuutuia koe i roto i te tuatua mou.

¹² Ia koe e mamaata maira, penei e maata te aronga taau i kite tei papetitoia, mei toou au taeake rai e toou ngutuare tangata. Inara kia matakite auraka koe e manako e ka anoanoia koe kia papetito no te mea kua taea e koe tetai mataiti tei akanooia e no te mea, te papetitoia ra tetai aronga ke. Akapeea koe te akapapu anga e te mārama ra koe i to Iehova manako no runga i te papetitoanga? E tuku i tetai tuatau kia akamanako e eaa te tumu i puapinga ai te papetitoanga. Ka kite mai koe e maata te au tumu manako meitaki i roto i teia atikara e te atikara ka aru mai.

13. Akapeea koe e kite ei e ko taau ikianga kia papetito, no roto mai i toou ngakau?

 ¹³ Tetai mataara e kite ei koe e ko taau ikianga kia papetito, no roto mai i toou ngakau koia oki, taau pure. Eaa te putuputu o taau pure kia Iehova? Te akataka meitaki ra ainei koe i taau pure? Ka riro te pauanga ki teia nga uianga i te akaari mai mei teaa te vaitata o toou pirianga kia Iehova. (Salamo 25:4) E maata te taime ka pau mai a Iehova i ta tatou pure na roto i te Pipiria. No reira tetai atu mataara ka kite koe me e inangaro tikai toou i te piri vaitata kia Iehova e te tavini iaia mei roto mai i toou ngakau koia oki, kia akara matatio i taau papaanga no te apii. (Iosua 1:8) E ui kia koe uaorai: ‘Eaa te putuputu o taku uaorai apii Pipiria? Te inangaro puareinga ra ainei au i te piri ki roto i te akamorianga a te ngutuare?’ Ka riro te pauanga ki teia nga uianga ei tauturu ia koe kia kite e ko taau ikianga kia papetitoia, ko taau rai ïa e anoano ra.

14. E akataka mai i te tuke i rotopu i te akatapuanga e te papetitoanga.

¹⁴ Tetai au mapu, penei kare ratou i kite tikai i te tuke i rotopu i te akatapuanga e te papetitoanga. Penei ka karanga tetai pae e kua akatapu takere ratou i to ratou oraanga kia Iehova, inara kare i papa ake no te papetito. E tika ainei te reira? Ko te akatapuanga, te akakite ra koe kia Iehova na roto i te pure e kua tia koe kia tavini iaia e mutu kore ua atu. Me papetitoia koe, te akaari ra koe ki te katoatoa e kua akatapu takere koe i toou oraanga kia Iehova. No reira i mua ake ka papetito ei koe, ka anoanoia koe kia mārama eaa te aiteanga kia akatapu i toou oraanga ki te Atua.

15. Eaa te aiteanga o te akatapuanga?

¹⁵ Me akatapu koe i toou oraanga kia Iehova, te akakite ra koe kiaia e tei iaia toou oraanga. Te taputou ra koe e ko te tavini iaia te mea puapinga rava atu i roto i toou oraanga. (E tatau ia Mataio 16:24.) E mea puapinga tikai te reira taputou ki te Atua! (Mataio 5:33) No reira akapeea koe te akaari anga e tei ia Iehova te tika i toou oraanga, kare tei ia koe?​—Roma 14:8.

16, 17. (a) Akatutu mai i te aiteanga kia akaruke ia koe uaorai. (e) Eaa tikai ta te tangata tei akatapu i tona oraanga e karanga ra?

¹⁶ Ka uriuri tatou i tetai akaraanga. Akamanako ana e kua oronga mai toou oa i tetai motoka noou ei apinga aroa. Kua oronga atu aia i te au pepa tikaanga e kua karanga atu e: “Noou teia motoka.” Inara karanga toou oa e: “Ka mou au i te taviri. Naku e akaoro i te motoka, kare naau.” Eaa toou manako no runga i teia apinga aroa? Eaa toou manako no runga i toou oa tei oronga atu i te motoka noou?

¹⁷ Me akatapu tetai tangata i tona oraanga kia Iehova, te karanga ra aia ki te Atua: “Te oronga atu nei au i toku oraanga kia koe. Tei ia koe toku oraanga.” E tikaanga to Iehova kia umuumu i tera tangata kia akono i tana tia. Inara akapeea me akarongo kore tera tangata ia Iehova na te kapiti anga muna ki tetai tane me kore vaine kare e tavini ana i te Atua? Me kore akapeea me āriki te reira tangata i tetai angaanga e kare e rauka iaia te rave i te angaanga tutu aere pera katoa, kare aia e tae putuputu ki te uipaanga? Tera te aiteanga, kare te reira  tangata e akono ana i tana tia kia Iehova. Mei te mea rai e te mou ra aia i te taviri o te motoka. Me akatapu tatou i to tatou oraanga kia Iehova, te karanga ra tatou kiaia e, “Toku oraanga, noou, kare noku.” No reira ka rave ua rai tatou i ta Iehova i inangaro noatu e kare tatou e inangaro ana i te rave i te reira. Kia aru tatou ta Iesu tei karanga e: “I eke mai nei oki au mei te rangi mai, e akono i to tei tono mai iaku nei anoano, auraka i toku uaorai anoano.”​—Ioane 6:38.

18, 19. (a) Akapeea te au tuatua a Rose e Christopher te akatutu maira e ko te papetito, e turanga ngateitei ïa te ka taki atu ki te au akameitakianga? (e) Eaa toou manako i teia turanga ngateitei no te papetito?

¹⁸ Te taka ua ra, ko te papetitoanga e ikianga puapinga tikai teia. E turanga ngateitei te akatapu i te oraanga kia Iehova e kia papetitoia. Te au mapu tei inangaro ia Iehova e tei mārama i te aiteanga o te akatapuanga, kare ratou e emiemi i te akatapu i to ratou oraanga ki te Atua e kia papetitoia. Kare katoa ratou e tataraapa no ta ratou ikianga. Karanga tetai mapu ko Rose e: “Te inangaro nei au ia Iehova, e kare atu e angaanga e mataora ai au mari ra ko te tavini iaia. Kua papu tikai iaku i taku ikianga kia papetitoia.”

¹⁹ Eaa tei tupu kia Christopher, tei taikuia i te akamataanga i teia atikara? Eaa tona manako no tana ikianga kia papetitoia e 12 ona mataiti? Karanga aia e e mataora tikai aia e kua rave aia i teia ikianga. Kua akamata aia i te painia tamou e 17 ona mataiti e kua riro mai ei tavini tauturu e 18 ona mataiti. I teia rā, te tavini nei aia i ko i te Betela. Karanga aia e: “E ikianga meitaki te papetito. Kua mareka tikai toku oraanga i te rave anga i te angaanga a Iehova e tana akaaerenga.” Me inangaro koe kia papetitoia, akapeea koe me akapapa no te reira? Ka pauia teia uianga i roto i te atikara ka aru mai.