1, 2. (a) Akamārama mai i te tumu i puapinga ai te papetitoanga. (e) Eaa ta tetai ka akapapu i mua ake ka papetito ei, e no teaa ra?

E MAPU ainei koe tei inangaro kia papetitoia? Me koia ïa, ko te akangateitei anga maata rava atu teia. Tei taikuia i roto i te atikara openga, e ikianga puapinga tikai te papetitoanga. Te akaari ra te reira ki te katoatoa e kua akatapu koe i toou oraanga kia Iehova, koia oki, kua taputou koe kia tavini iaia e mutu kore ua atu, pera katoa ko te rave anga i tona anoano te mea puapinga rava atu. No te mea e taputou puapinga tikai teia ki te Atua, ka tau koe kia papetitoia me rauka te tu pakari, me ko toou uaorai anoano te reira, e kua mārama koe i te aiteanga kia akatapu i toou oraanga ki te Atua.

² Inara, penei ka manako koe e kare koe i papa ake no te papetito. Me kore kua papa koe inara, kua manako toou nga  metua e ka tau koe kia tiaki e kia pakari mai kia maata toou kite i te oraanga. Eaa taau ka rave? Auraka e taitaia. Mari ra, e akapou i te reira tuatau kia tere ki mua e rauka ai ia koe kia papetitoia. Me ko tera toou manako, e akanoo i teia au akakoroanga e toru: (1) taau e irinaki papu ra, (2) taau e rave ra, e te (3) toou tu āriki rekareka.

3, 4. Eaa te apiianga ta te au mapu ka kite mai mei te akaraanga o Timoteo?

³ E akamanako ana akapeea koe me pau i teia au uianga: Eaa te tumu i irinaki ei au e Atua tetai? Eaa au i papu ei e no ko mai te Pipiria i te Atua? Eaa te tumu ka akono au i ta te Atua au akaueanga e kare e aru i te tu oraanga o teianei ao? Ka tauturu teia au uianga ia koe kia akono i te akoanga a te apotetoro ko Paulo: “Kia taka tikai ia kotou i to te Atua ra anoano, tei meitaki, e te tau, e te apa kore oki.” (Roma 12:2) Eaa ra koe ka rave ei i teia?

⁴ Ka tauturu te akaraanga o Timoteo ia koe. Kua kite meitaki aia i te Tuatua Tapu no te mea kua apii tona mama e te mama ruau i te Tuatua Tapu kiaia. Inara, kua akakite a Paulo kia Timoteo e: “Kia mou marie ra koe i taau i apii ra, i tei tukuia atu ia koe.” (2 Timoteo 3:14, 15) Te aiteanga o te tuatua tei “tukuia atu” koia oki “kia papu tikai e kua tika tetai apinga.” No reira kua anoanoia a Timoteo kia papu e ka kite aia i te tuatua mou i roto i te au Tuatua Tapu. Kua āriki aia i te reira, kare no te mea kua akakite tona mama e te mama ruau iaia kia pera, mari ra no te mea kua akamanako aia i tana i apii tei tukuia atu kiaia.​—E tatau ia Roma 12:1.

5, 6. No teaa ra i puapinga ai noou kia kite i te taangaanga i toou tu karape i te akamanako i te tuatau e mapu ra koe?

⁵ Akapeea koe? Penei kua roa koe i te kite anga i te tuatua mou. Me koia ia, e akanoo i te akakoroanga kia akamanako i te au tumu o taau i irinaki. Ka tauturu teia ia koe kia akaketaketa i toou akarongo e kia kore e rave i te au ikianga tarevake no te au taomianga, te manako o teianei ao, e toou uaorai manako.

⁶ Me kite koe i te taangaanga i toou tu karape i te akamanako i te tuatau e mapu ra koe, ka rauka ia koe i te pau i teia au uianga a toou au oa: ‘Akapeea koe i papu ei e Atua tetai? Naringa te Atua i inangaro mai ia tatou, eaa te tumu i akatika ai aia i te kino kia tupu? Akapeea tatou i papu ei i vai ua ana rai te Atua?’ Me akapapa koe, kare teia au uianga e akatupu i te manako ekoko mari ra ka akakeu ia koe kia apii maata atu i te Pipiria.

7-9. Akataka mai akapeea te tuanga i runga i te Initaneti, “What Does the Bible Really Teach?,” te tauturu anga ia koe kia akaketaketa i toou irinaki anga papu.

⁷ Me rave koe i te apii naau uaorai, ka tauturu te reira ia koe kia pau i te au uianga, kia kopae i te manako ekoko, e te akaketaketa i toou tu irinaki papu. (Angaanga 17:11) E maata ta tatou au puka te  ka tauturu ia koe kia rave i te reira. E manganui tei tauturuia na te apiianga i te poroutia The Origin of Life​—Five Questions Worth Asking e te puka Is There a Creator Who Cares About You? Pera katoa, e maata te au mapu tei puapingaia mei teia tuanga “What Does the Bible Really Teach?” i runga i te jw.org. Ka kitea te reira i roto i te reo Papaa i raro ake i te BIBLE TEACHINGS. Ka tauturu te au pepa apii i teia au tuanga kia akaketaketa i toou irinaki papu no tetai tumu manako o te Pipiria.

⁸ Ei tangata apii i te Pipiria, penei kua kite takere koe i te pauanga ki te au uianga o teia au pepa apii. Inara kua papu ainei ia koe taau pauanga? Ka tauturu teia au pepa apii ia koe kia akamanako meitaki i te au irava tukeke e ka akamaroiroi ia koe kia tata i te au tumu no taau e irinaki ra. Ka tauturuia koe kia kite akapeea me akamārama atu i toou irinakianga ki tetai ke. Me ka rauka ia koe i te aere ki runga i te Initaneti ki te “What Does the Bible Really Teach?” ka rauka ia koe i te taangaanga i te reira ei apiianga naau uaorai, kia akaketaketa i toou irinaki papu.

⁹ Ka anoanoia koe kia akapapu kia koe uaorai e ko te tuatua mou teia. Na teia e tauturu ia koe kia akapapa no te papetito. Karanga tetai tuaine mapu e: “I mua ake ka iki ei au kia papetitoia, kua apii au i te Pipiria e kua kite mai e ko teia te akonoanga mou tikai. I te au rā o toku oraanga, te ketaketa ua atura teia irinaki papu.”

10. Eaa ra i tau ei kia irinaki e ka rauka i tetai Kerititiano te au angaanga tei rotai ki tona akarongo?

¹⁰ Te akakite ra te Pipiria e: “Te akarongo, kare e angaanga, e mea mate ïa.” (Iakobo 2:17) Me e tu irinaki papu toou, ka akaariia teia na roto i taau e rave ra. Ka akatupu koe i ta te Pipiria e kapiki ra e e “tuatua tapu e te akono i te Atua.”​—E tatau ia 2 Petero 3:11.

11. Akamārama mai i te aiteanga o te au angaanga i tau ki te “tuatua tapu.”

 ¹¹ Eaa te au angaanga i tau ki te “tuatua tapu”? Me e angaanga tapu taau e rave ra, e oraanga mā toou. Ei akaraanga, akamanako ana i te ono marama i topa. I te timataia anga koe kia rave i tetai angaanga tarevake, kua akamanako meitaki ainei koe eaa te mea tika e eaa te mea tarevake? (Ebera 5:14) Te maaraara ainei koe i tetai atianga taka meitaki kare koe i tuku atu ki te timataanga me kore te au taomianga? I te apii, te riro ra ainei koe ei akaraanga meitaki ki tetai ke? Ka vai tiratiratu ainei koe kia Iehova, me ka aru ainei koe i toou oa apii kia kore ratou e aviri mai ia koe? (1 Petero 4:3, 4) E tika, e aronga apa ua tatou. Tetai taime, ka akamā tetai pae tei tavini ia Iehova no tetai tuatau roa, e e ngata no ratou i te tutu aere ki tetai ke. Inara tetai tangata tei akatapuia ki te Atua, ka mataora aia me riro mai ei Kite no Iehova, e ka akaari aia i teia na roto i tona tu mā.

12. Eaa tetai au angaanga e ō maira i te “akono i te Atua,” e eaa taau ka manako no runga i te reira?

¹² Eaa te aiteanga o te “akono i te Atua”? Te ō maira te au angaanga taau e rave ra i roto i te putuputuanga, mei te aere anga ki te au uipaanga e te angaanga tutu aere. Inara te kapiti katoa ra te au angaanga kare tetai ke e kite mai, mei taau pure kia Iehova e taau uaorai apii. Ko tetai tei akatapu i tona oraanga kia Iehova, kare aia i manako e e au angaanga teiaa roa teia. Mari ra, ka aite tona manako ki te Ariki ko Davida tei karanga e: “E mea tau naku te rave i toou anoano, e taku Atua; te vai nei oki taau ture tei roto i toku nei ngakau.”​—Salamo 40:8.

13, 14. Eaa te apinga tei orongaia mai te ka tauturu ia koe kia rave i te au angaanga “akono i te Atua,” e akapeea tetai au mapu te puapinga anga mei te reira?

¹³ Ei tauturu ia koe kia akanoo i te au akakoroanga, e pepa apii tetai i te kapi 308 e te 309 o te puka Questions Young People Ask​—Answers That Work, Volume 2. I runga i te pepa apii, e tata koe i taau pauanga ki te au uianga mei te: “E taka meitaki tikai ainei taau pure, e eaa ta te reira e akaari maira no toou inangaro ia Iehova?” “Eaa te ō maira i roto i taau uaorai apii?” “Te piri ra ainei koe ki te angaanga orometua noatu me kare toou nga metua e rave i te reira?” I roto katoa i te pepa apii, e ngai va tetai noou kia tata i te au akakoroanga taau ka akanoo no taau pure, te apii naau uaorai, e te angaanga tutu aere.

¹⁴ Manganui te au mapu tei inangaro kia papetitoia, kua kite mai e e mea puapinga tikai teia pepa apii. Karanga tetai tuaine mapu ko Tilda e: “Kua taangaanga au i te pepa apii kia akanoo i te au akakoroanga. Aere ua rai, kua taeria e au taku au akakoroanga, e kua papa au no te papetito e tai mataiti i muri mai.” Aiteite katoa te manako o tetai taeake mapu ko Patrick tona ingoa. Karanga aia e: “Kua kite takere au i taku au akakoroanga, inara na te tataanga i te reira,  kua akakeuia au kia tauta pakari kia taeria te reira.”

15. Akamārama mai i te tumu ka riro te akatapuanga ei ikianga naau uaorai.

¹⁵ Tetai uianga i runga i te pepa apii koia oki: “Ka tavini ainei koe ia Iehova noatu e ka akamutu toou nga metua e te au oa i te tavini ia Iehova?” Me akatapu koe i toou oraanga kia Iehova e kua papetitoia, ka rauka ia koe tetai pirianga vaitata kiaia. No reira, ko taau ka rave no Iehova, kare i akatumuia ki runga i toou nga metua me kore tetai ua atu tangata. Ka riro taau tuatua tapu e te akono i te Atua ei akaari e kua papu tikai koe tei ia koe te tuatua mou, e ka inangaro koe kia akono i to te Atua au turanga. Kare e roa atu ana ka tau koe kia papetitoia.

16, 17. (a) Eaa te ka akakeu i tetai tangata kia riro mai ei Kerititiano? (e) Akapeea te tu āriki rekareka no te atinga oko me akatutuia?

¹⁶ Tetai rā, kua ui tetai tangata tei kite meitaki tikai i te Ture a Mose kia Iesu e: “Ko teea te akauenga i maata o te ture?” Kua pau a Iesu: “E anoano atu koe i to Atua ia Iehova ma to ngakau katoa, e ma to vaerua katoa, e ma to manako katoa.” (Mataio 22:35-37) Kua akamārama a Iesu e ko te aroa no Iehova  te tumu maata ka papetitoia tetai tangata e ka riro mai ei Kerititiano. Tetai mataara meitaki roa atu i te akaketaketa i toou inangaro no Iehova koia oki, kia akamanako meitaki no runga i te atinga oko, te apinga aroa maata rava atu ta te Atua i oronga mai ki te tangata. (E tatau ia 2 Korinetia 5:14, 15; 1 Ioane 4:9, 19.) Me rave koe i teia, ka inangaro koe i te akaari i toou tu āriki rekareka no teia apinga aroa.

¹⁷ Toou tu āriki rekareka no te atinga oko, penei ka akamāramaia na roto i teia akatutuanga: Akamanako ana me maremoia koe e kua akaora mai tetai tangata ia koe. Ka oki ainei koe ki te kainga, tamarō ia koe, e te akangaropoina i ta tera tangata i rave noou? Kare! Ka rekareka ua rai koe i tera tangata no te akaora anga mai ia koe! Mei te reira katoa, kia āriki rekareka ua rai tatou ia Iehova e Iesu no te atinga oko. E kaiou to tatou oraanga kia raua! Na raua i akaora mai ia tatou mei te ara e te mate. No to raua inangaro ia tatou, e manakonakoanga to tatou kia ora e tuatau ua atu i te enua Parataito!

18, 19. (a) Eaa ra koe kare e mataku me no Iehova koe? (e) Akapeea te tavini anga ia Iehova te akameitaki atu i toou oraanga?

¹⁸ Te āriki rekareka ra ainei koe i ta Iehova i rave noou? Me koia ïa, ko te akatapuanga e te papetitoanga te mea meitaki kia rave. Toou akatapuanga, e taputou teia naau ki te Atua no te rave i tona anoano e tuatau ua atu. Ka mataku ainei koe i te rave i teia akatapuanga? Kare! Te inangaro nei a Iehova i te mea meitaki rava atu noou, e ka akameitaki aia i te aronga tei rave i tona anoano. (Ebera 11:6) Me akatapu koe i toou oraanga ki te Atua e kia papetitoia, kare toou oraanga e kino atu, mari ra ka meitaki atu! Tetai taeake e 24 ona mataiti tei papetitoia i mua ake i tona mapu anga, karanga aia e, “Naringa au i pakari ake, penei ka mārama oonu atu au i te au mea katoa, inara te ikianga kia akatapu i toku oraanga kia Iehova, kua paruru iaku mei te aruaru anga i te au mea o teianei ao.”

¹⁹ Te inangaro nei a Iehova i te mea meitaki rava atu noou. Inara, e tu noinoi to Satani e kare aia e inangaro ia koe. Kare ana apinga meitaki i te oronga kia koe me aru koe iaia. Akapeea e rauka ai iaia i te oronga i tetai apinga me kare ana? Kare ana nuti meitaki, e kare ona manakonakoanga. Ka oronga ua aia i te au mea kino kia koe no te tuatau ki mua, no te mea ko teia te ka tupu katoa kiaia a te tuatau ki mua!​—Apokalupo 20:10.

20. Eaa ta tetai mapu ka rave kia tere ki mua e rauka ai i te akatapu i tona oraanga e kia papetitoia? (Akara i te pia “Ei Tauturu ia Koe Kia Tere ki Mua.”)

²⁰ Ko te akatapuanga i toou oraanga kia Iehova, e ikianga meitaki rava atu teia naau kia rave. Kua papa ainei koe i te rave i te reira? Me kua papa koe, auraka e mataku i te rave i teia taputou. Inara me manako koe e kare koe i papa, e taangaanga i te au manako i roto i teia atikara kia tere ua rai ki mua. Kua akakite a Paulo ki te au taeake i Philipi kia tere ua rai ki mua. (Philipi 3:16) Me aru koe i teia akoanga, kare e roa atu ana ka inangaro koe i te akatapu i toou oraanga kia Iehova e kia papetitoia.