I MUA ake ka oki ei a Iesu ki te rangi, kua akakite aia ki tana au pipi: “Ei kite oki kotou noku, . . . e tae ua atu ki te openga o te enua.” (Angaanga 1:8) Akapeea ratou i te tutu aere anga takapini i te ao katoa?

Karanga a Martin Goodman, e tangata kite i Oxford University, e kua riro “te angaanga tei orongaia ki te au Kerititiano ei akatuke ia ratou mei te au akonoanga ke mai, kapiti mai te ngati Iuda i roto i te pa enua Roma i taito.” Kua tutu aere a Iesu mei tera ngai ki tera ngai. Ka anoanoia te au Kerititiano mou kia aru i tona akaraanga e kia tutu aere “i te evangelia o te basileia o te Atua” i te au ngai ravarai. Kua anoanoia ratou kia kimi i te aronga tei inangaro i te kite i te tuatua mou. (Luka 4:43) No reira rai i te anere mataiti mua, e au apotetoro tetai, te aiteanga kia unga atu oki aia ia ratou e rave i te angaanga. (Mareko 3:14) Kua akaue a Iesu i tana au pipi: “Ka aere kotou, e akariro i to te pa enua katoa ei pipi.”​—Mataio 28:18-20.

I teia tuatau kare te 12 apotetoro a Iesu i runga nei i te enua, inara e manganui te au tavini o Iehova tei aru i to ratou akaraanga i roto i te angaanga orometua. Me patiia ratou kia tavini i te ngai te anoano maataia ra te tauturu, ka pau ratou e: “Teia au; ko au taau e tono.” (Isaia 6:8) Kua neke tetai pae ki te enua mamao, mei te tauatini tuma aronga tei oti mai ta ratou apii i ko i te Apii Gileada. Tetai pae, kua neke ki tetai ngai ke i roto i to ratou enua. E manganui te apii nei i tetai reo ke ei tauturu i te putuputuanga me kore pupu. Kare teia i te mea māmā ua, inara kua puareinga ua teia au taeake e te au tuaine i te rave i te au akaatinga ei akaari i to ratou aroa no  Iehova e te tangata. No reira kua parani meitaki ratou e kua taangaanga i to ratou ora, maroiroi, e te moni ei tutu aere i te au ngai e anoano maataia ra te tauturu. (Luka 14:28-30) E puapinga tikai te angaanga a teia au taeake e te au tuaine e rave nei.

Kare te katoatoa e rauka kia neke i te ngai e anoano maataia ra te tauturu me kore i te apii i tetai reo ke. Inara ka rauka ia tatou pouroa kia aru i te tu o te au mitinari i roto i ta tatou uaorai putuputuanga.

I te anere mataiti mua, kua rave maroiroi te au Kerititiano i te angaanga tutu aere noatu e kua noo te maataanga ia ratou ki to ratou enua anau, e kare i te au mitinari. Akakite a Paulo kia Timoteo e: “E rave i te angaanga a te apii evangelia, e rave akaope takiri i to taoonga na.” (2 Timoteo 4:5) Kua tau teia au tuatua ki te au Kerititiano mua, pera katoa kia tatou i teia tuatau. Ka anoanoia te au Kerititiano ravarai kia akono i te akaueanga kia tutu aere i te karere Patireia, e kia akariro i te tangata ei pipi. I roto katoa i ta tatou putuputuanga, e maata te mataara ka rauka ia tatou i te aru i te tu o te au mitinari.

Ei akaraanga, me neke te au mitinari ki tetai enua ke, e tuke te au mea, e ka anoanoia ratou kia kimi ravenga i te akatanotano ki te oraanga ou. Noatu e kare tatou e neke ki tetai ngai e anoano maataia ra te tauturu, ka rauka ainei ia tatou i te kimi i te au ravenga ou kia tutu aere? Ei akaraanga, i te 1940, kua akamaroiroiia to tatou au taeake kia tutu aere i te pae mataara e tai rā i te epetoma. Kua tamata ainei koe i te tutu aere i te pae mataara? Kua taangaanga ainei koe i te pereoo puka? Te apiianga, te puareinga ra ainei koe i te tamata i te au ravenga ou no te tutu evangeria?

Me tu papu toou, ka maoraora koe e te maroiroi i roto i te angaanga orometua. Te aronga tei neke ki te au ngai e anoano maataia ra te tauturu e tei apii i tetai reo ke, e au papuritia tukatau ratou e ka tauturu maata i te putuputuanga. Ei akaraanga, na ratou e arataki ana i te angaanga tutu aere. E mea matau na te au mitinari kia arataki i te putuputuanga e tae ua atu ki te taime e tukatau ei te au taeake o te reira ngai. Me e taeake koe tei papetitoia, te “inangaro” ra ainei koe kia tavini i toou au taeake e te au tuaine i roto i taau putuputuanga ei tavini tauturu me kore ei tangata pakari?—1 Timoteo 3:1.

E au mataara ke tetai ka rauka ia tatou i te tauturu i ta tatou putuputuanga. Pouroa ia tatou, te au mapu e te aronga pakarikari, te au taeake e te au tuaine, ka rauka i te “akapumaana” i te au taeake irinaki me anoanoia te reira.​—Kolosa 4:11.

Me inangaro tatou i te tauturu i te au taeake e te au tuaine, ka anoanoia tatou kia kite meitaki ia ratou. Te akamaroiroi maira te Pipiria kia “akono marie rai tatou tetai ki tetai,” koia oki kia akamanako i te au anoano o te au taeake e te au tuaine me uipa kapiti tatou. (Ebera 10:24) Kare te aiteanga e ka tauta tatou kia apii no runga i to ratou oraanga. Mari ra, ka anoanoia tatou kia mārama i to tatou au taeake e te au tuaine e eaa ta ratou ka anoano. Penei ka anoano ratou i te tauturu tau, te turuturu anga i te pae manako ngakau, me kore te akamaroiroianga mei roto i te Pipiria. Tika rai, i tetai au atianga na te aronga pakari anake ua e te au tavini tauturu e tauturu ia ratou. (Galatia 6:1) Inara ka rauka i te katoatoa i te tauturu i te au taeake e te au tuaine pakarikari, me kore te au ngutuare tangata, te aro atura i te au manamanata.

Kua rauka ia Salvatore taua tauturu ra. No tona turanga manamanata maata i te pae moni, kua oko aia i tana pitiniti, tona are, e te au mea a tona ngutuare tangata. Kua manata tikai aia i tona ngutuare tangata. Kua kite atu tetai ngutuare tangata i roto i te putuputuanga e ka anoanoia te tauturu no ratou. Kua oake ratou i tetai moni na Salvatore e kua tauturu iaia e tana vaine kia kimi i tetai ngai angaanga. Kua akapou katoa ratou i te au aiai ma tona ngutuare tangata i te akarongo e te akamaroiroi ia ratou. Riro mai ratou ei au oa meitaki. Teianei kare e ngaropoina ana i te reira nga ngutuare tangata te tuatau mataora ta ratou i akapou i taua tuatau ngata ra.

Kare te au Kerititiano mou e emiemi ana i te akakite i to ratou irinaki anga ki tetai ke. Ka aru tatou ia Iesu e ka akakitekite ki te katoatoa i te au taputou umere ta te Atua i papau mai. Noatu e ka rauka ia tatou i te neke ki tetai ngai e me kare, ka rauka ia tatou pouroa i te tauturu maata atu i tetai ke i roto i ta tatou putuputuanga. (Galatia 6:10) Me oronga tatou ki tetai ke, ka mataora tatou e ka “tupu te au angaanga meitaki katoa.”​—Kolosa 1:10; Angaanga 20:35.