1-3. Eaa te aiteanga kia tavini ia Iehova “ma te ngakau tiratiratu”? Oronga mai i tetai akaraanga.

POUROA tatou e aronga apa e te rave i te tarevake. Noatu ra, kua oronga mai a Iehova i te oko e kua papa ua i te akakore mai i ta tatou ara. Me e tu akaaka to tatou e me tataraara, ka pati tatou kiaia no te akakoreanga. Papu ia tatou kare a Iehova e akaoko mai ia tatou, “kia aite ki ta tatou au ara.” (Salamo 103:10) Noatu ra, “ka akamori ei [tatou] iaia ma te ngakau tiratiratu,” koia oki te ngakau katoa. (1 Paraleipomeno 28:9) Akapeea tatou me rave i te reira noatu e aronga apa ua tatou?

² Ei tauturu ia tatou, penei ka akaaite tatou i te oraanga o te Ariki ko Asa ki to te Ariki ko Amazia. Kua rave te nga ariki i te meitaki, inara kua rave katoa i te tarevake no te mea e nga tangata apa ua raua. Inara karanga te Pipiria “kua tika rava ra te ngakau o Asa e ope rava akera tona au rā.” (2 Paraleipomeno 15:16, 17; 25:1, 2; Maseli 17:3) Kua tauta ua rai aia i  te akamareka ia Iehova “ma te ngakau tiratiratu” kiaia. (1 Paraleipomeno 28:9) Inara, kare a Amazia i tavini ia Iehova “ma te ngakau tiratiratu.” Muri ake i tona akavi anga i te au enemi o te Atua, kua akaoki mai aia i to ratou au itoro e kua akamori i te reira.​—2 Paraleipomeno 25:11-16.

³ Te tangata tei tavini i te Atua “ma te ngakau tiratiratu,” e inangaro oonu tona no Iehova e ka tavini iaia e tuatau ua atu. I roto i te Pipiria, te akataka maira te tuatua “ngakau” i to tatou tu tikai i roto. Kapiti mai to tatou aerenga manako, ta tatou e reka ana, ta tatou ka inangaro i te rave no te oraanga, e te tumu i pera ai tatou. Noatu e tu apa ua to tatou, ka rauka rai i te akamori ia Iehova ma te ngakau katoa. Ka tavini tatou iaia no to tatou inangaro iaia, kare no tei umuumuia e kare i te peu matau ua.​—2 Paraleipomeno 19:9.

4. Eaa ta tatou ka akamanako i teianei?

⁴ Ka mārama meitaki atu tatou i te aiteanga kia tavini ia Iehova ma te ngakau katoa na te akamanako anga i te oraanga o Asa e tetai atu au ariki meitaki e toru no Iuda. Ko Iehosaphata, Hezekia e Iosia. Noatu e kua rave teia au ariki e ā i te tarevake, kua akamareka ratou ia Iehova. Kua kite aia e te tavini ra ratou iaia ma te ngakau katoa. Eaa te tumu i manako akapera ai te Atua ia ratou, e akapeea tatou me aru ia ratou?

5. Eaa ta Asa i rave i tona riro anga mai ei ariki?

⁵ Ko Asa te toru o te ariki o Iuda i muri ake i te vee anga te ngati Iseraela e rua tuanga, koia te patireia o Iseraela e te patireia o Iuda. Te riro anga mai a Asa ei ariki no Iuda, kua tauta aia i te akaatea i te akamorianga pikikaa e te ainga viivii mei tona patireia. Kua takore aia i te au itoro tei akamoriia e te iti tangata e kua akaatea i te aronga sodoma o te iero. “E tona tupuna vaine ko Maaka, kua akangere aia iaia i te au, no te mea kua anga aia i tetai tiki no Asetoreta.” (1 Ariki 15:11-13) Kua akamaroiroi katoa a Asa i te iti tangata “e kimi i te Atua no to ratou ai metua ia Iehova” e “e akono oki i te ture e te akauenga.” Kua rave a Asa i tana i rauka kia tauturu i tetai ke kia akamori ia Iehova.​—2 Paraleipomeno 14:4.

6. Akapeea a Asa te ariu atu anga i te tamaki anga to Etiopia ia Iuda?

⁶ I te ngauru mataiti mua i ta Asa tutara anga, kare te patireia o Iuda i tamaki ana. I reira kua aere mai to Etiopia i te tamaki ia Iuda, e tai mirioni ona vaeau e te toru tauatini kariota. (2 Paraleipomeno 14:1, 6, 9, 10) Eaa ta Asa i rave? Kare aia i ekoko ana ka tauturu a Iehova i tona iti tangata. No reira kua pure aia kia Iehova no te tauturu kia autu ratou i te tamaki. (E tatau ia 2 Paraleipomeno 14:11.) Tetai taime, kua tauturu a Iehova i tona iti tangata kia autu i to ratou enemi, noatu e kare te au ariki i vai tiratiratu kiaia. Kua rave aia i teia ei akaari  e koia anake te Atua mou. (1 Ariki 20:13, 26-30) Inara i teia atianga, kua tauturu a Iehova i tona iti tangata no te mea kua irinaki a Asa iaia. Kua pau a Iehova i ta Asa pure, e kua autu ratou i te tamaki. (2 Paraleipomeno 14:12, 13) I muri mai kua rave a Asa i te tarevake kino i tana patianga ki te ariki o Suria no te tauturu, kare ia Iehova. (1 Ariki 15:16-22) Noatu te reira, kua kite a Iehova e te inangaro ra a Asa iaia. “Kua tika rava ra to Asa ra ngakau ia Iehova e ope rava akera ona au rā.” Akapeea tatou me aru i te akaraanga meitaki o Asa?​—1 Ariki 15:14.

7, 8. Akapeea koe me aru ia Asa?

⁷ Akapeea tatou e kite ei e ngakau tiratiratu to tatou kia Iehova? E ui kia koe uaorai: ‘Ka akarongo ainei au kia Iehova noatu e e ngata? Ka tauta pakari ainei au kia mā ua tana putuputuanga?’ E akamanako ana mei teaa te tu ngakau toa tei anoanoia e Asa kia akaatea i tona tupuna vaine mei te taoonga ariki vaine! I tetai taime, penei ka anoanoia koe kia ngakau toa mei ia Asa rai. Ei akaaraanga, ka akapeea koe me rave tetai mema o te ngutuare me kore tetai oa piri i te ara, kare aia i tataraara, e kua akaateaia mei te putuputuanga? Ka tauta pakari ainei koe auraka kia piri atu ki tera tangata? Eaa ta toou ngakau e akakeu ra ia koe kia rave?

⁸ Mei ia Asa rai, penei i tetai taime ka manako tatou te patoi ra te katoatoa ia tatou. Penei ka aviri mai toou oa apii e te puapii ia koe no te mea e Kite koe no Iehova. Me kore penei ka manako toou au oa angaanga e kua nenevaia koe no te mea kua orote koe mei te angaanga kia aere ki te akaputuputuanga e kare koe e putuputu ana i te angaanga roa. I teia au turanga, e irinaki ki te Atua mei ta Asa i rave. E pure kia Iehova, kia ngakau toa, e kia rave ua atu i te mea tika. E akamaara kua akamaroiroi te Atua ia Asa, e ka akamaroiroi katoa aia ia koe.

9. Akapeea tatou te akamareka anga ia Iehova me tutu aere?

⁹ Kare a Asa i manako iaia uaorai, mari ra kua akamaroiroi i tetai ke kia “kimi i te Atua . . . ia Iehova.” Ka tauturu katoa tatou i te tangata kia akamori ia Iehova. Te kite maira aia me tuatua tatou ki tetai ke no runga iaia. Mei teaa atura tona rekareka i te kite ia tatou e pera nei no to tatou inangaro iaia e no tei manako i te tangata e to ratou manakonakoanga no te tuatau ki mua!

10, 11 Akapeea tatou me aru ia Iehosaphata?

¹⁰ Te tamaiti a Asa ko Iehosaphata, kua “aere atura aia na te arataa o tona metua o Asa.” (2 Paraleipomeno 20:31, 32) Akapeea ra? Mei tona metua rai, kua akamaroiroi a Iehosaphata i te tangata kia akamori ua rai ia Iehova. Kua tono aia i te au tangata ki te au oire o Iuda kia apii i “te buka ture a Iehova” ki te iti tangata. (2 Paraleipomeno 17:7-10) Kua aere katoa aia ki te patireia apatokerau o Iseraela, ki te  iti tangata i te maunga o Epheraima, “e kua akaoki mai ia ratou ki te Atua o to ratou ai metua kia Iehova.” (2 Paraleipomeno 19:4) Ko te ariki ko Iehosaphata “tei kimi ia Iehova ma tona ngakau katoa.”​—2 Paraleipomeno 22:9.

¹¹ I teia rā, ka inangaro a Iehova i te au tangata o teianei ao kia apii no runga iaia, e ka rauka pouroa ia tatou i te turu i teia angaanga. E akakoroanga ainei toou kia piri atu ki teia angaanga i te au marama tataki tai? Ka rauka ainei ia koe i te apii i te Pipiria ki tetai ke kia riro mai ratou ei aronga akamori ia Iehova? Ko tera ainei tetai apinga taau ka pure? Me tauta koe, ka tauturu a Iehova ia koe kia akamata i tetai apii Pipiria. Ka puareinga ainei koe i te apii i tetai ke noatu e ka anoanoia koe kia oronga i toou tuatau va? E mei ia Iehosaphata rai tei tauta i te tauturu i tetai ke i te akamata i te tavini akaou ia Iehova, ka tauta tatou i te tauturu i te au taeake kua paruparu to ratou akarongo. Pera katoa, ka akanoo te aronga pakari o te putuputuanga i te aravei e te oronga tauturu ki te aronga tei akaateaia tei akamutu i te rave i te ara, i roto i te ngai tutu aere o te putuputuanga.

12, 13 (a) Te mataku anga a Iehosaphata, eaa tana i rave? (e) Eaa ra tatou ka aru ei i te akaraanga o Iehosaphata?

¹² Mei tona metua ko Asa, kua irinaki a Iehosaphata ki runga ia Iehova te aere anga mai tetai nuku vaeau i te tamaki ia Iuda. (E tatau ia 2 Paraleipomeno 20:2-4.) Kua mataku aia e kua pati i ta Iehova tauturu. I roto i tana pure, karanga aia e kare e rauka ia ratou i te takore i te enemi. Karanga katoa aia e kare ratou ko tona iti tangata i kite eaa ta ratou ka rave. Kare a Iehosaphata i ekoko ka tauturu a Iehova ia ratou. Karanga aia: “Tei runga ia koe ra to matou mata.”​—2 Paraleipomeno 20:12.

¹³ Mei ia Iehosaphata rai, tetai taime kare tatou i kite eaa ta tatou ka rave i tetai manamanata, e penei ka mataku tatou. (2 Korinetia 4:8, 9) Inara e akamaara i ta Iehosaphata i rave. I mua i te katoatoa, kua pure aia kia Iehova e kua akakite i to ratou tu paruparu. (2 Paraleipomeno 20:5) Ka tau te au upoko o te ngutuare kia aru i te akaraanga o Iehosaphata. E pati ia Iehova kia tauturu ia koe e toou ngutuare kia akakoromaki i te manamanata e kia kite i ta kotou ka rave. Auraka e akama me rongo toou ngutuare i taau pure no runga i teia. Ka kite ratou mei teaa te maata i toou irinaki ia Iehova. Kua tauturu aia ia Iehosaphata, ka tauturu katoa aia ia koe.

14, 15 Akapeea a Hezekia i irinaki pu tikai ei ki te Atua?

¹⁴ Ko Hezekia tetai ariki “kua piri tikai aia kia Iehova.” Kua pera aia noatu e kua akanoo tona metua tane i te akaraanga kino e kua akamori itoro. “Kua akaruke [a Hezekia] i te au ngai teitei, e kua akangaangaa i te au tiki, e kua tipu i te au Asetoreta, e kua vavaʼi oki i te ovi veo ra i angaia e Mose,” no te mea kua akamori te ngati Iseraela i te reira. E ngakau tiratiratu to Hezekia kia Iehova. “Kua akono ra aia i tana au akauenga ta Iehova i akaue mai ia Mose ra.”​—2 Ariki 18:1-6.

¹⁵ I te tuatau i ta Hezekia tutara anga, kua  tamaki te nuku vaeau ririnui o Asura ia Iuda e kua tamataku mai i te takore ia Ierusalema. Te ariki o Asura ko Senakeriba, kua aviri aia ia Iehova e kua māro ia Hezekia kia tuku i te au. I tera tuatau kino tikai, kua irinaki pu tikai a Hezekia kia Iehova e kua pure no tana tauturu. Kua kite aia e ririnui atu te Atua i to Asura e ka akaora i tona iti tangata. (E tatau ia Isaia 37:15-20.) Kua pau te Atua i tana pure na te tono anga i tetai angera kia tamate e 185,000 nuku vaeau Asura.​—Isaia 37:36, 37.

16, 17 Akapeea koe me aru ia Hezekia?

¹⁶ I muri mai, kua rokoia a Hezekia e te maki e kua vaitata i te mate. I tera tuatau ngata, kua pati akatenga aia kia Iehova kia akamaara i tona aerenga tiratiratu e kia tauturu iaia. (E tatau ia 2 Ariki 20:1-3.) Kua akarongo a Iehova i ta Hezekia pure e kua rapakau iaia. Kua kite tatou mei roto i te Pipiria, i teia tuatau kare tatou e tapapa atu i tetai temeio no ko mai i te Atua kia rapakau i to tatou maki e kia roa atu te oraanga. Inara mei ia Hezekia rai, ka rauka i te irinaki kia Iehova no te tauturu. Ka rauka i te akakite kiaia: “Teia taku tuatua kia koe, e Iehova e, e akamaara mai koe iaku i toku nei aerenga ki mua ia koe ma te tuatua-mou, e ma te ngakau tiratiratu.” Te irinaki ra koe e ka akono ua rai a Iehova ia koe, noatu me maki koe?​—Salamo 41:3.

¹⁷ Akapeea atu tatou me aru ia Hezekia? Penei te tamanata ra tetai apinga i to tatou pirianga kia Iehova me kore te akapou nei i to tatou tuatau mei te tavini iaia. Ei akaraanga, e manganui i teia tuatau tei akariro i te tangata ei itoro. E umere ana ratou i te aronga rongonui e tetai atu aronga kare ratou i kite. Ka akapou maata ratou i te taime i te tatau no runga i teia aronga e te akara i to ratou tutu. Ka taangaanga putuputu ratou i te social media e te au ravenga ke no te komunikeiti ki te tangata i runga i te Initaneti. E tika, e reka ana tatou i te komunikeiti ki te ngutuare tangata e te oa piri vaitata na roto i teia au ravenga. Inara penei ka kaimoumou maata i te taime ki runga i te social media. Penei ka akaparau katoa tatou me maata te tangata tei karanga e e reka ana ratou i ta tatou au tutu e te au tuatua tei tukuia ki runga i te Initaneti. E me kite tatou kua akamutu tetai pae i te akara i te reira, penei ka riri tatou. Ka apii tatou mei te akaaraanga o te apotetoro ko Paulo, Akuila, e Peresila. I toou manako kua akapou ainei ratou i te taime i te au rā ravarai i te kimi i te angaanga pouroa ta te tangata e rave ana, te aronga tikai kare e tavini ana ia Iehova? Te karanga ra te Pipiria “riro rava atura te vaerua o Paulo, kua akakite ua atura.” Pera katoa kua akapou a Peresila e Akuila i to raua taime i te tutu aere “e kua akakite tikai atura [ki tetai ke] i te tuatua a te Atua.” (Angaanga 18:4, 5, 26) E ui kia tatou uaorai: ‘Ka matakite ainei au auraka kia akariro i te tangata ei itoro? Ka kopae ainei au i te akapou maata i toku taime ki runga i te au mea kare ona puapinga?’​—E tatau ia Ephesia 5:15, 16.

18, 19 Akapeea tatou me aru ia Iosia?

¹⁸ Kua akarongo te Ariki ko Iosia i te au akaueanga a Iehova “ma te ngakau katoa.”  (2 Paraleipomeno 34:31) Ko Iosia te ina a Hezekia. I tona mapu ou anga, “kua akamata aia i te kimi i te Atua o tona tupuna o Davida.” E 20 ona mataiti, kua akamata aia i te takore i te au itoro mei Iuda. (E tatau ia 2 Paraleipomeno 34:1-3.) E maata atu te tauta pakari a Iosia i te akamareka ia Iehova i to te ariki o Iuda. I tetai rā, kua kite mai te taunga maata i te puka Ture a te Atua i roto i te iero. Penei ko teia te puka ta Mose i tata! Te tatau anga te tekeretere i te reira kia Iosia, kua mārama aia e maata atu tana i anoanoia kia rave kia tavini meitaki tikai ia Iehova. Kua akamaroiroi katoa aia i tetai ke kia pera. Tei tupu mai, “kare akerai [te iti tangata] i akapaki i te aru i te Atua o to ratou ai metua ia Iehova” i to Iosia tuatau.​—2 Paraleipomeno 34:27, 33.

¹⁹ Me e mapu koe, ka rauka ia koe i te aru ia Iosia e kia kite meitaki ia Iehova. Penei kua apii a Iosia mei te Ariki ko Manase, tona papa ruau tei tataraara e ka puareinga ua a Iehova i te akakore i te ara. Kia apii katoa koe mei te aronga pakarikari i roto i toou ngutuare e te putuputuanga. E maata ta ratou ka akakite mai kia koe no te au mea meitaki ta Iehova i rave no ratou. E tetai, e akamaara i ta Iosia i manako i te apiianga i ta te Tuatua Tapu e karanga ra. Kua inangaro tikai aia i te akamareka ia Iehova e kua rave viviki i te au tauianga. Me tatau koe i te au Tuatua Tapu, penei ka inangaro maata katoa koe i te akarongo kia Iehova. Te ka tupu, ka ketaketa atu toou pirianga oa kiaia e ka mataora atu koe. I reira ka inangaro koe i te akakite ki te tangata no runga ia Iehova. (E tatau ia 2 Paraleipomeno 34:18, 19.) Me apii koe i te Pipiria, penei ka kite mai koe i te au mataara ka rauka i te tavini meitaki i te Atua. Me koia ïa, e tauta pakari i te rave i teia au tauianga mei ia Iosia rai.

20, 21 (a) Eaa te mea aiteite i rotopu i te au ariki e ā ta tatou i uriuri ana? (e) Eaa ta tatou ka uriuri i te atikara ka aru mai?

²⁰ Eaa ta tatou ka apii mei te au ariki o Iuda e ā tei tavini ia Iehova ma te ngakau katoa? Kua tauta ratou i te akamareka ia Iehova e te akamori iaia no te katoaanga o to ratou oraanga. Kua irinaki ratou iaia i te tamaki anga mai te au enemi ririnui ia ratou. Tei puapinga roa atu, kua tavini ratou ia Iehova no to ratou inangaro iaia.

²¹ Noatu e tu apa ua to teia au ariki e ā e kua rave i te tarevake, kua mareka a Iehova ia ratou. Kua akara aia i roto i to ratou ngakau e kua kite e te inangaro tikai ra ratou iaia. E aronga apa katoa tatou e te rave tarevake. Inara ka mareka mai a Iehova ia tatou me kite aia te tavini ra tatou iaia ma te ngakau katoa. Te atikara ka aru mai, ka uriuri tatou i te au apiianga ta tatou ka mou mai mei te au tarevake a teia au ariki.