1. Eaa tetai au akaraanga no te ture Pipiria, e akapeea tatou e puapinga ai me akono i te reira?

I ROTO i te Pipiria, kua akakite mai a Iehova i te au ture tei akaari tika mai i tana i inangaro no tatou. Ei akaraanga, te akakite maira aia kia tatou auraka e akamori itoro, e keia, e kona kava, e rave i te ainga tau kore. (1 Korinetia 6:9, 10) Kua oronga mai te tamaiti a Iehova ko Iesu i teia akauenga ki tana au pipi: “Ka aere kotou, e akariro i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti, e no te Vaerua Tapu; Ma te apii atu ia ratou, kia akono i te au mea katoa taku i akaue atu kia kotou: e i na, tei vaitata ua ra au ia kotou, e tae ua atu ki te openga o teianei ao.” (Mataio 28:19, 20) Ka riro te au mea ta Iehova e Iesu e akakite maira ia tatou kia rave ei mea meitaki no tatou. Te apii maira ta Iehova ture ia tatou kia akono ia tatou uaorai e to tatou ngutuare tangata e ka tauturu ia tatou i te pae kopapa e kia rauka te mataora. Tei maata atu, me akono tatou i ta Iehova au akauenga, kapiti mai te akauenga kia tutu aere, te mareka maira aia ia tatou e ka akameitaki ia tatou.

2, 3. (a) Eaa te tumu kare te Pipiria e oronga mai i te au ture no te au turanga ravarai o te oraanga? (e) Eaa te au uianga ka uriuriia i roto i teia atikara? (Akara i te tutu mua.)

 ² I taua taime rai, kare te Pipiria e oronga mai i te au ture no te au turanga ravarai o te oraanga. Ei akaraanga, kare e arataki anga taka meitaki i roto i te Pipiria no te kakau ta tatou ka aao. Te akaari maira teia i to Iehova tu pakari. Noatu e tukeke te kakau o te au tangata takapini i teianei ao, e taui ua ana te akamanea anga, kare ra te Pipiria e taui ana. Pera katoa, kare e maata te au ture i roto i te Pipiria no runga i te angaanga moni, te tamataora anga, e ta tatou ka rave kia rauka te oraanga kopapa meitaki. Te akatika maira a Iehova i te au tangata tatakitai e te au upoko o te ngutuare kia rave i teia au ikianga meitaki.

³ No reira, me anoanoia tatou kia rave i tetai ikianga puapinga te ka akakeu i to tatou oraanga, me kare e ture i roto i te Pipiria no runga i te reira, penei ka manako tatou: ‘Te manako maira ainei a Iehova i toku iki anga manako? Ka mareka ainei aia i taku iki anga noatu kare au e aati i tetai ture i roto i te Pipiria? Akapeea au e akapapu ei ka mareka mai aia i taku ikianga?’

4, 5. Akapeea ta tatou iki anga te akakeu anga ia tatou e tetai ke?

⁴ Manako tetai pae e ka rave ua atu ratou i ta ratou i inangaro. Inara ka inangaro tatou i te akamareka ia Iehova. No reira i mua ake ka tuku ei tatou i ta tatou iki anga, ka anoanoia tatou kia akamanako i ta te Pipiria e akakite maira e kia akono i te reira. Ei akaraanga, te akakite maira te Pipiria i to Iehova manako no te toto, no reira ka aru tatou i te reira. (Genese 9:4; Angaanga 15:28, 29) Ka pati tauturu tatou kia Iehova kia tuku i te iki anga te ka akamareka iaia.

⁵ Ka akakeu ta tatou iki anga ia tatou uaorai. Ka riro tetai iki anga meitaki ei akavaitata atu ia tatou kia Iehova. Ka riro tetai iki anga tarevake ei takino i to tatou pirianga oa kiaia. Ka ō katoa mai tetai ke ki roto i ta tatou au iki anga. Kare tatou e inangaro i te akariri atu i to tatou au taeake e kia akaparuparu i to ratou akarongo. Kare katoa tatou e inangaro i te akatupu manamanata ki te au taeake i roto i te putuputuanga. No reira e mea puapinga no tatou kia rave i te au iki anga meitaki.​—E tatau ia Roma 14:19; Galatia 6:7.

6. Eaa te ka arataki ia tatou me rave i te au iki anga?

⁶ Me kare te Pipiria e akakite mai eaa tikai ta tatou ka rave, akapeea tatou me rave i te au iki anga meitaki? Kare tatou e rave i ta tatou ka inangaro mari ra ka akamanako meitaki i to tatou turanga e oti ka rave i tetai iki anga te akamareka ra ia Iehova. Ei reira tatou e papu ei ka tauturu mai aia ia tatou kia puapingaia.​—E tatau ia Salamo 37:5.

7. Me kare e ture Pipiria, akapeea tatou e kite ei i ta Iehova e inangaro ra ia tatou kia rave?

⁷ Akapeea ra tatou e kite ei eaa te akamareka ra ia Iehova? Te akakite maira a Ephesia 5:17 e: “Kia kite ra kotou i to te Atu ra anoano.” No reira me kare e ture taka meitaki i roto i te Pipiria, ka anoanoia  tatou kia kite me kore kia mārama eaa ta Iehova e inangaro ra ia tatou kia rave. Akapeea tatou me rave i te reira? Ka anoanoia tatou kia pure kiaia e te akatika i te vaerua tapu kia arataki ia tatou.

8. Akapeea a Iesu i kite ei i ta Iehova i inangaro iaia kia rave? Oronga mai tetai akaraanga.

⁸ Kua kite ua rai a Iesu i ta Iehova i inangaro iaia kia rave. Ei akaraanga, e rua taime kua mate pongi te urupu tangata kua pure a Iesu e kua angai i te katoatoa na roto i tetai temeio. (Mataio 14:17-20; 15:34-37) Inara kia mate pongi aia i roto i te metepara e kua inangaro te Tiaporo iaia kia taui i te au toka ki te varaoa, kua patoi a Iesu. (E tatau ia Mataio 4:2-4.) Kua kite meitaki tikai aia i tona Metua no reira kua kite aia kare a Iehova e inangaro iaia kia taangaanga i te vaerua tapu no tona uaorai anoano. Kua papu iaia e ka arataki e ka angai a Iehova iaia.

9, 10 Eaa te ka tauturu ia tatou kia rave i te au iki anga pakari? Akatutu mai.

⁹ Mei ia Iesu rai, ka rauka ia tatou i te rave i te au iki anga meitaki me irinaki tatou kia Iehova no tana arataki anga. Te akakite maira te Pipiria: “E irinaki kia Iehova ma to ngakau katoa ra; auraka ra e irinaki ki toou uaorai kite. Auraka e akangaropoina iaia i toou katoa ra au aerenga; e nana e akakite kia koe i toou ra au arataa. Auraka koe kia pakari i toou uaorai manako: ko Iehova ra taau e mataku, ka akaruke ei i te kino.” (Maseli 3:5-7) Me apii tatou i te Pipiria e to Iehova aerenga manako, ka mārama tatou i tana e inangaro ra ia tatou kia rave i tetai ua atu turanga. Te maata atu i ta tatou apii anga i to Iehova aerenga manako, ka māmā atu i te rave i te au iki anga te akamareka ra iaia. Me akapera tatou, ka rauka “te ngakau maru” koia oki, me aru i te aratakianga a te Atua.​—Ezekiela 11:19.

¹⁰ Akamanako ana e kua aere tetai vaine akaipoipo ki te toa e kua kite aia i tetai nga tamaka manea. Inara e ākā moni te reira. Noatu kare tana tane i reira, kua kite te vaine i te manako o tana tane me oko aia i te reira. Akapeea te vaine i kite ei? Kua roa tona akaipoipo anga kiaia, no reira kua kite aia eaa tona manako no te taangaanga i ta raua moni. Mei te reira katoa, me apii tatou i to Iehova au manako e tana i rave i mua ana, ka kite tatou eaa tana ka inangaro ia tatou kia rave i roto i te au turanga ke ke.

11. Eaa te au uianga ka ui tatou me tatau e te apii i te Pipiria? (Akara i te pia “ Me Apii Koe i te Pipiria, e ui Kia Koe Uaorai.”)

¹¹ Akapeea tatou e kite ei eaa to Iehova manako? Te mea puapinga rava atu koia oki kia tatau e kia apii putuputu i te Pipiria. Ia tatou e rave ra i teia, penei ka ui tatou uaorai: ‘Eaa ta teia e apii maira iaku no Iehova? Eaa te tumu i rave ei aia i te reira?’ Mei ia Davida rai,  ka anoano katoaia tatou kia pati i ta Iehova tauturu kia kite meitaki atu iaia. Tata a Davida: “E akakite mai koe kiaku i to au arataa, e Iehova; e apii mai koe iaku i to au aerenga. E arataki koe iaku i te tuatua-mou naau ra, e apii mai oki iaku; ko koe oki te Atua o toku ora; te irinaki nei au ia koe e po ua atu te rā.” (Salamo 25:4, 5) Me apii tatou no runga ia Iehova, ka rauka i te akamanako i te au turanga kia taangaanga i ta tatou i apii. Ka rauka ainei i te taangaanga i te reira i roto i te ngutuare tangata, i te ngai angaanga, i te apii e te angaanga tutu aere? Me akamanako tatou i tetai turanga, ka māmā atu te kite akapeea tatou me taangaanga i te reira mei ta Iehova e inangaro maira.

12. Akapeea ta tatou au puka e te au uipaanga me tauturu ia tatou kia kite i to Iehova manako no runga i te au mea ke?

¹² Tetai atu mataara kia kite i to Iehova aerenga manako koia oki kia akarongo meitaki ki ta tona akaaerenga e apii maira ia tatou mei te Pipiria. Ei akaraanga, me anoanoia tatou kia rave i tetai iki anga, ka tauturu te Watch Tower Publications Index e te Research Guide for Jehovah’s Witnesses ia tatou kia kite i to Iehova manako. Ka puapingaia tatou  mei te au uipaanga me akarongo meitaki tatou, me paupau, e me akamanako oonu i te au apiianga. Ka tauturu te reira ia tatou kia manako i to Iehova manako. Te ka tupu, ka rave tatou i te au iki anga te ka akamareka iaia e ka akameitaki aia i te reira.

13. Akakite mai i tetai akaraanga akapeea tatou me rave i te iki anga pakari na te akamanako anga i to Iehova manako.

¹³ Ka akamanako ana tatou i tetai akaraanga akapeea me rave i te iki anga meitaki na te akamanako anga i to Iehova manako. Penei ka inangaro koe i te painia. Kua rave koe i te au taui anga kia maata atu toou taime i te tutu aere. Inara kare koe i papu me ka mataora tikai koe me iti mai taau moni e te apinga. E tika, kare te Pipiria i akakite mai e ka anoanoia tatou kia painia ei tavini ia Iehova. Ka rauka ia tatou i te tavini ua atu ia Iehova ei au papuritia. I tetai tua, karanga a Iesu e ka akameitaki a Iehova i te aronga tei rave i te au akaatinga no te Patireia. (E tatau ia Luka 18:29, 30) Te akakite katoa ra te Pipiria te mareka ra Iehova me tauta tatou i te akapaapaa iaia, e ka inangaro aia kia mataora tatou i te tavini iaia. (Salamo 119:108; 2 Korinetia 9:7) Me pure tatou no runga i te reira e me akamanako oonu, ka rave tatou i tetai iki anga tau tikai e ka akameitaki mai a Iehova i te reira.

14. Akapeea koe e kite ei i to Iehova manako no runga i tetai akamanea anga kakau?

¹⁴ Teia akaou tetai akaraanga: E reka ana koe i tetai tu akamanea anga, inara kua kite koe e kare tetai pae i roto i te putuputuanga e reka ana me aao koe i teia kakau. Kare te Pipiria e akakite mai i tetai mea no runga i teia akamanea anga. No reira akapeea koe e kite ei i to Iehova manako? Te akakite maira te Pipiria kia tatou: “E te au vaine ra oki, kia akamanea ia ratou uaorai i te kakau e tau ra, ma te akatietie kore, e te akono meitaki; auraka ma te rauru iri, e te auro, e te poe, e te kakau oko maata ra; Ma te tuatua meitaki ra, ko tei tau i te au vaine i mou i te akono i te Atua ra.” (1 Timoteo 2:9, 10) E tika, ka rauka i te au tavini pouroa o Iehova, kapiti mai te au tane i te apii mei teia au tuatua. Me akaari tatou i te tu tau, ka akamanako tatou i to tetai ke manako no runga i to tatou kakau. No te mea te inangaro ra tatou i te au taeake, kare tatou e akamareka kore atu e te akariri ia ratou. (1 Korinetia 10:23, 24; Philipi 3:17) Me akamanako tatou i ta te Pipiria e akakite ra e to Iehova aerenga manako, ka rave tatou i te au iki anga te ka akamareka iaia.

15, 16 (a) Eaa to Iehova manako me akamanako ua rai tatou no runga i te au mea ainga tau kore? (e) Me iki tatou i te tamataora anga, akapeea tatou e kite ei i ta Iehova e mareka ra? (nga) Akapeea tatou me rave i te au iki anga puapinga?

¹⁵ Ka kite tatou mei te Pipiria, e e mamae tikai ana to Iehova ngakau e te maromaroa me rave te tangata i te au angaanga kino e te akamanako i te au mea kino. (E tatau ia Genese 6:5, 6.) Te taka meitaki ua ra kare a Iehova i inangaro ia tatou kia akamanako i te au peu ainga tau kore. Te tika, me akamanako ua rai tatou i teia au mea, penei ka rave tatou i te reira. Mari ra, te inangaro  maira a Iehova ia tatou kia akamanako i te au mea mā e te meitaki. Kua tata te pipi ko Iakobo no runga i to Iehova pakari “e mea iro koreia ïa, e mea au ïa, e te maru, e te akarongo ngoie, kua ki ïa i te aroa, e te takinga-meitaki, kare oki e akatu ke i te tangata, kare oki e pikikaa.” (Iakobo 3:17) No reira te apii maira te Pipiria ia tatou kia kopae i tetai ua atu tamataora anga te ka akakeu ia tatou kia akamanako i te au mea viivii e te tau kore. Me mārama meitaki tatou i ta Iehova e inangaro ra e tana e makitakita ra, ka māmā atu i reira no tatou kia kite eaa te au puka, te au teata, e te au vitio kangakanga ka iki tatou. Kare tatou e pati i tetai ke eaa ta tatou ka rave.

¹⁶ Me rave tatou i tetai iki anga, te maata anga o te taime e maata te au iki anga tukeke ta tatou ka iki te ka akamareka ia Iehova. Inara me anoanoia tatou kia rave i tetai iki anga puapinga tikai, e mea meitaki kia pati i tetai tangata pakari me kore tetai taeake me kore tuaine kia oronga mai i to ratou manako. (Tito 2:3-5; Iakobo 5:13-15) E tika, kare tatou e pati ia ratou kia rave i tetai iki anga no tatou. Mari ra, ka akamanako meitaki tatou i ta tatou i apii i roto i te Pipiria e ka rave i ta tatou uaorai iki anga. (Ebera 5:14) Karanga te apotetoro ko Paulo e: “Ei runga iaia uaorai ta te tangata ravarai apainga.”​—Galatia 6:5.

17. Akapeea tatou e puapinga ai na te rave anga i te au iki anga tei akamareka ia Iehova?

¹⁷ Me rave tatou i te au iki anga te akamareka ra ia Iehova, ka akavaitata atu tatou kiaia e ka akameitaki mai aia ia tatou. (Iakobo 4:8) Ka ketaketa atu to tatou akarongo ia Iehova. No reira kia akamanako oonu i ta tatou i apii i roto i te Pipiria e kia kite i tona aerenga manako. Te tika, e maata te au mea ou ta tatou ka apii no runga ia Iehova. (Iobu 26:14) Inara me tauta tatou i te apii no runga iaia i teianei, ka manako pakari atu tatou e ka rave i te au iki anga meitaki. (Maseli 2:1-5) E taui ua ana te au akakoro anga e te au manako o te tangata, kare ra a Iehova e taui ana. Kua karanga te tata salamo: “Te akakoro a Iehova ra, ka tu ïa e rimua; te manako o tona ngakau ki tera uki ki tera uki.” (Salamo 33:11) Te taka meitaki ua ra ka rave tatou i te au iki anga meitaki rava atu me akamanako tatou i to Iehova manako e me rave i te au mea tana e mareka ra.