1, 2. Eaa te au uianga ka ui tatou no te au tuatua a Iesu i roto ia Mataio 24:14?

I TE tuatau openga, kua totou a Iesu e ka tutu aereia te nuti meitaki o te Patireia ki te tangata ravarai. (Mataio 24:14) Ei Au Kite o Iehova, kua kiteaia tatou i teianei ao no ta tatou angaanga tutu aere. E reka ana tetai au tangata i te karere ta tatou e tutu aere nei, inara kare tetai pae e reka ana. Noatu kare tetai pae e reka ana i ta tatou karere, te akangateitei ra ratou i ta tatou e rave nei. Te karanga nei tatou e ko tatou te rave ra i te angaanga ta Iesu i totou. E tikaanga ainei to tatou i te rave i te reira? Akapeea tatou i papu ei e ko ta tatou angaanga tutu aere ta Iesu i totou?

² E maata te au pupu akonoanga e karanga ra ko ratou tei tutu aere i ta Iesu karere. Inara kua kotingaia ta ratou angaanga tutu aere ei ako i ko i te are pure, i runga i te tivi, e i runga i te Initaneti, me kore ka akakite ua ratou e akapeea ratou i kite ei ia Iesu. Manako ra tetai pae na te tauturu anga i te tangata kare e tutaki ei taote, neti, e ei puapii, ko ta ratou angaanga tutu aere te reira. Inara ko  teia au angaanga ainei te angaanga tutu aere ta Iesu i akataka mai?

3. Kia tau kia Mataio 28:19, 20, eaa te au apinga e a ta te au pipi a Iesu ka rave?

³ Kua inangaro ainei a Iesu i tana au pipi kia tiaki no te tangata kia aere mai kia ratou? Kare! I muri ake i tona tuakaouanga, kua akakite a Iesu ki te anere ua atu pipi e: “E teianei, ka aere kotou, e akariro i to te pa enua katoa ei pipi; ka bapetizo atu ei ia ratou . . . , Ma te apii atu ia ratou, kia akono i te au mea katoa taku i akaue atu kia kotou.” (Mataio 28:19, 20) Ei au pipi na Iesu, ka anoanoia tatou kia rave e a apinga. Ka anoanoia tatou kia akariro i te tangata ei pipi, e papetito ia ratou, e kia apii ia ratou. Inara te mea mua, ka anoanoia tatou kia aere ki te tangata. Akamārama mai tetai tangata kite o te Pipiria: “Ka ‘aere,’ ko teia ta te aronga irinaki ka rave noatu i tetai tua o te mataara me kore i tetai tua o te moana.”​—Mataio 10:7; Luka 10:3.

4. Eaa te ō maira i te riro anga ei “ravakai tangata”?

⁴ Eaa ta Iesu e tapapa ra i tana au pipi kia rave? Kua inangaro ainei aia ia ratou kia tutu aere ko ratou anake ua, me kua inangaro aia ia ratou kia akaaereia ei pupu? I te mea e kare e rauka i te tangata okotai kia tutu aere ki te “pa enua katoa,” ka anoanoia tana au pipi kia akaaereia ei pupu. Ko teia te aiteanga o ta Iesu i tuatua kia riro mai tana au pipi ei “ravakai tangata.” (E tatau ia Mataio 4:18-22.) Kare a Iesu e tuatua ra no runga i tetai tangata tautai e takiri ra e te tiaki ra kia kai te ika. Mari ra, ko te angaanga tautai ta Iesu e akataka ra koia oki te tautai kupenga. Me tautai kupenga, ka anoanoia kia angaanga pakari, kia akaaere meitakiia e kia angaanga kapiti te au tangata e manganui.​—Luka 5:1-11.

5. Eaa te au uianga e a ka anoanoia kia pauia, e no teaa ra?

⁵ E kite ei koai ma te tutu aere nei i te nuti meitaki i teia tuatau, ka anoanoia kia pau e a uianga:

• Eaa te karere ta te au pipi a Iesu i tutu aere?

• Eaa te tumu ka tutu aere ratou?

• Eaa te au ravenga ta ratou ka taangaanga?

• Eaa te maata i ta ratou angaanga, e eaa te roa?

Ka riro te pauanga ki teia au uianga ei tauturu ia tatou kia kite koai ma te rave nei i teia angaanga akaora e ka akaketaketa i to tatou inangaro kia tutu ua atu rai.​—1 Timoteo 4:16.

6. Eaa ra koe i papu ei e te tutu aere nei te Au Kite o Iehova i te karere mou?

⁶ E tatau ia Luka 4:43. Kua tutu aere a Iesu i “te evangelia o te basileia,” e te inangaro ra aia i tana au pipi kia pera. Koai ma te tutu aere nei i teia karere ki te katoatoa? Ko te Au Kite o Iehova! Kua akatika katoa te aronga patoi i te  reira. Ei akaraanga, ka akamanako ana i ta tetai orometua tei noo i te au enua ke i karanga ki tetai Kite o Iehova. I te au enua tataki tai, kua ui te orometua ki te Au Kite o Iehova, eaa te karere ta kotou e tutu aere ra. Karanga te orometua: “E neneva tikai ratou e kua pau mai ratou pouroa: ‘Ko te evangelia o te basileia.’” Te akaari maira te tuatua a te orometua e kare tatou i nenevaia mari ra kua taokotaiia tatou ei au Kerititiano mou. (1 Korinetia 1:10) Ko te Patireia o te Atua te karere maata o Te Punanga Tiaki Akakiteanga i te Patireia o Iehova. Ka rauka teia makatini i roto i te 254 reo e kua neneiia mei te 59,000,000 kopi o te au itiu tataki tai. Ko teia te makatini tei tuʼa maataia i teianei ao!

7. Akapeea tatou i kite ei kare te au arataki o Kerititome e tutu aere nei i te karere tika?

⁷ Kare te au arataki o Kerititome e tutu aere nei i te Patireia o te Atua. Me tuatua ratou no runga i te Patireia, ka karanga te maata anga ia ratou e tei roto i te ngakau o te tangata. (Luka 17:21) Kare ratou e apii ana i te tangata e kavamani tika tikai te Patireia i te rangi e ko Iesu te tutara, mari ra ka tuatua ua ratou no runga ia Iesu i te tuatau Kiritimiti e te Easter. Kare ratou e akamārama ana e na te Patireia e akatikatika i te au manamanata o te tangata e ka takore takiri te reira i te kino mei te enua nei. (Apokalupo 19:11-21) Te taka ua ra, kare te au arataki o Kerititome i kite i ta Iesu ka rave ei Ariki no te Patireia o te Atua. I te mea kare ratou e mārama ana i ta Iesu karere, kare i reira ratou i mārama i te tumu ka tutu aere ei ratou.

8. Eaa te tumu tarevake no te rave i te angaanga tutu aere?

⁸ Kare te au pipi a Iesu e tutu aere ana kia rauka mai te moni me kore kia akatu i te au are mekameka. Kua karanga a Iesu: “E mea o mai ua to kotou, e oronga ua atu oki kotou.” (Mataio 10:8) No reira kare te angaanga tutu aere i te angaanga pitiniti. (2 Korinetia 2:17) Kare te au pipi a Iesu e pati ana kia tutakiia ratou. (E tatau ia Angaanga 20:33-35.) Noatu e te taka meitaki ua ra ta Iesu ikuikuanga, kua akavareia te au akonoanga kia koʼi moni ei akono i to ratou are pure e kia tutaki i to ratou au arataki orometua e te aronga angaanga. Tei tupu, e maata te au arataki o Kerititome tei riro mai ei aronga apinganui.​—Apokalupo 17:4, 5.

9. Peea te Au Kite o Iehova te akaari anga e kua rave ratou i te angaanga tutu aere ma te tumu tau tikai?

⁹ Ka koʼi moni ainei te Au Kite o Iehova i ko i to ratou Are Uipaanga Patireia e te uruoaanga? Kare! Kua turuia ta ratou angaanga e te moni oronga ua. (2 Korinetia 9:7) I te mataiti i topa, kua akapou te Au Kite o Iehova vaitata i te rua pirioni ora i te tutu aere i te nuti meitaki e kua rave ratou e tere atu i te iva mirioni apii Pipiria i te au marama. Kare ratou e tutakiia ana kia tutu aere,  inara kua rekareka ratou i te taangaanga i ta ratou uaorai moni i te rave i teia angaanga. Karanga tetai tangata kimikimi no runga i te angaanga a te Au Kite o Iehova: “Ko te akakoroanga maata koia oki ko te tutu aere e te apii i te tangata.” Karanga katoa aia e kare o ratou orometua tutakiia. No reira me kare tatou e tutakiia kia tutu aere, eaa i reira te tumu? Ka puareinga ua matou i te rave i teia angaanga no to tatou inangaro ia Iehova e te aroa no te tangata. Ka akatupu teia i te totou i roto ia Salamo 110:3. (E tatau.)

10. Eaa te au ravenga ta Iesu e tana au pipi i taangaanga i te tutu aere?

¹⁰ Eaa te au ravenga ta Iesu e tana au pipi i taangaanga kia tutu aere? Kua aere ratou ki te au ngai ka kitea te au tangata. Ei akaraanga, kua tutu aere ratou i te pae mataara e i ko i te makete. Kua kimi katoa ratou i te tangata i roto i to ratou kainga. (Mataio 10:11; Luka 8:1; Angaanga 5:42; 20:20) Te tutu anga ki tera are ki tera are, e ravenga meitaki ia no te itae atu i te tangata.

11, 12 No runga i te angaanga tutu aere, akapeea te tauta anga a Kerititome me akaaiteia ki to Iehova iti tangata?

¹¹ Kua tutu aere ainei te au akonoanga o Kerititome i te nuti meitaki mei ta Iesu rai? Maata anga o te taime, ka tutakiia te au arataki orometua kia oronga i te ako ki te katoatoa. Kare teia au arataki orometua e akariro ana i te tangata ei pipi, mari ra ka tāpu i to ratou au mema kia kore e akaruke i te akonoanga. I tetai au atianga, kua tauta  ratou i te akamaroiroi i te au mema kia tutu aere. Ei akaraanga, i te mataiti 2001, kua akakite te Pope John Paul II i roto i tana reta e ka tau te aronga aere pure i te tutu aere i te evangeria e kia aru i te akaraanga maroiroi o te apotetoro ko Paulo, i te na ko anga: “E ae oki toku kia kore au e tutu i te Evangelia!” E oti kua akakite mai te Pope e ka tau te aronga tereniia e te aronga aere pure kia rave i te angaanga tutu aere. Inara, e iti ua tei aru i taua akamaroiroi anga.

¹² Akapeea te Au Kite o Iehova? Te tutu aere nei ratou e kua tutara a Iesu ei Ariki i te mataiti 1914. Ka akarongo ratou kia Iesu te akariro anga i te angaanga tutu aere ei mea puapinga roa atu i to ratou oraanga. (Mareko 13:10) Akakite ra te puka Pillars of Faith​—American Congregations and Their Partners no runga i te Au Kite o Iehova, ko te angaanga tutu aere tetai mea puapinga tikai. Akakite katoa te reira e me kite ratou i te aronga tei mate pongi, maromaroa e te maki, ka tauturu ratou, inara kare e ngaropoina ia ratou te akakoro anga maata koia oki kia akakitekite e te vaitata maira te openga e kia apii i te tangata kia ora. Te tutu aere nei rai te Au Kite o Iehova i teia karere e te aru nei i te au ravenga tutu aere a Iesu e tana au pipi.

13. Eaa te maata o te angaanga tutu aere?

¹³ Karanga a Iesu e ka tutu aere tana au pipi “e kako rava ake te ao katoa nei.” Kua akaueia ratou kia akariro “i to te pa enua katoa ei pipi.” (Mataio 24:14; 28:19, 20) Tera te aiteanga ka tutu aereia te nuti meitaki i te ao katoa.

14, 15 Eaa te akapapu ra e kua akatupu te Au Kite o Iehova i te totou a Iesu no runga i te maata o te angaanga tutu aere. (Akara i te tutu mua.)

¹⁴ Ko te Au Kite o Iehova anake tei akatupu i ta Iesu totou kia tutu aere i te nuti meitaki i te ao katoa. Eaa tatou i tuatua akapera ai? I Marike, mei tetai 600,000 orometua i roto ia Kerititome, inara tere atu i te 1,200,000 Au Kite o Iehova e tutu aere nei i te nuti meitaki i tera enua. I te ao katoa, mei tetai 400,000 orometua Katorika, inara tere atu i te 8 mirioni Au Kite o Iehova e tutu aere nei i te nuti meitaki i roto i te 240 enua. Te taka meitaki ua ra, te tutu aere nei te Au Kite o Iehova i teianei ao, ei akangateitei e te akapaapaa ia Iehova!​—Salamo 34:1; 51:15.

¹⁵ To matou akakoroanga ei Au Kite o Iehova, kia tutu i te nuti meitaki ki te au tangata e manganui i mua ake ka tae mai te openga. Ei rave i te reira, kua uri e kua nenei matou i te mirioni ua atu puka, makatini, aenga pepa, e te au patianga ki te uruoaanga e te Akamaaraanga i te 700 tuma reo. Kare e tutaki me oronga i te reira. I te mataiti i topa, kua nenei matou e 4.5 pirioni puka Pipiria. Kua nenei katoa matou e 200 mirioni kopi o te New World Translation of the Holy Scriptures i te 130 tuma reo. I runga i ta matou website i akamanaia, ka rauka te au akakite anga i roto i te 750 tuma reo. Ko te Au Kite o Iehova anake te rave nei i teia angaanga umere tikai.

16. Akapeea tatou i kite ei kua rauka i te Au Kite o Iehova te vaerua tapu o te Atua?

¹⁶ Eaa te roa ka raveia te angaanga  tutu aere? Karanga a Iesu e ka akakiteia te nuti meitaki e tae ua atu ki te openga. Ei Au Kite o Iehova, kua rauka ia matou i te akakoromaki i te angaanga tutu aere i teia tuatau openga no te mea tei ia matou te vaerua tapu o Iehova. (Angaanga 1:8; 1 Petero 4:14) Penei ka tuatua mai te aronga akonoanga e: “Tei ia matou te vaerua tapu.” Inara ka rauka ainei ia ratou i te rave i teia angaanga ta te Au Kite o Iehova e rave ra i teia tuatau openga? Kua tauta tetai pae i te aru i ta tatou angaanga tutu aere, inara kua puapinga kore te reira. Kua tutu aere tetai pae no tetai tuatau poto ua. Te aere nei tetai pae mei tera are ki tera are kare ra ratou e tutu aere ana i te nuti meitaki o te Patireia. No reira kare ratou e rave ana i te angaanga ta Iesu i akamata.

17, 18 (a) Eaa tatou i papu ei ko te Au Kite o Iehova te aronga e tutu aere nei i te nuti meitaki o te Patireia i teia tuatau? (e) Akapeea e rauka ai ia tatou i te rave ua atu i teia angaanga?

¹⁷ Koai ma te tutu aere nei i te nuti meitaki i teia tuatau? Ko te Au Kite o Iehova! Akapeea tatou i kite ei? No te mea te tutu aere nei tatou i te karere tika, te nuti meitaki o te Patireia. Te kimi nei tatou i te tangata i roto i ta tatou angaanga tutu aere, no reira te taangaanga nei matou i te au ravenga tau tikai. E tumu meitaki to matou kia tutu aere, koia oki no to matou inangaro ia Iehova e te tangata. Te rave maata nei matou i te angaanga tutu aere ki te pa enua ravarai e te au reo katoa. E ka tutu ua rai matou i te nuti meitaki e tae ua atu ki te openga!

¹⁸ E mea umere tikai i te kite i te angaanga manea ta te Au Kite o Iehova e rave nei i te tutu aere i te nuti meitaki i teia tuatau openga. Inara akapeea e rauka ai ia tatou i te rave i teia ākā angaanga? Kua akamārama te apotetoro ko Paulo e: “Ko te Atua oki tei angaanga ki roto ia kotou, i te inangaro e te rave, mei tana i anoano ra.” (Philipi 2:13) Kia oronga ua mairai a Iehova i te maroiroi kia rauka ia tatou i te rave maroiroi tikai i te tutu aere i te nuti meitaki!​—2 Timoteo 4:5.