1, 2. (a) Eaa to te Au Kite o Iehova manako no te Pipiria? (e) Eaa taau tuanga reka rava atu o te Pipiria?

EI AU KITE NO IEHOVA, e inangaro ana tatou i te Pipiria. Ka akapumaana te reira ia tatou e ka oronga i te manakonakoanga e te ikuikuanga irinakiia. (Roma 15:4) Kare te reira i te puka na te tangata mari ra ‘e tuatua na te Atua.’​—1 Tesalonia 2:13.

² E mea papu, pouroa ia tatou e reka ana i te tatau i tetai au tuanga o te Pipiria. E reka ana tetai pae i te tatau i te au Evangeria no te mea te akaari maira i to Iehova au tu manea na roto ia Iesu. (Ioane 14:9) Tetai pae e reka ana ratou i te au puka totou mei ia Apokalupo, tei akaari mai kia tatou i “te au mea e vaitata i te tupu.” (Apokalupo 1:1) Ka akapumaanaia tetai pae me tatau ratou ia Salamo, e e reka ana tetai i te ako meitaki i roto i te puka o Maseli. Te taka meitaki ua ra, na te katoatoa te Pipiria.

3, 4. (a) Eaa toou manako no runga i ta tatou au puka? (e) Eaa te au puka tei rauka mai no te au pupu takake?

³ No to tatou inangaro i te Pipiria, ka inangaro katoa tatou i te au puka tei akatumuia ki runga i te Tuatua a te  Atua. Pouroa te au puka, au poroutia, au makatini, e tetai au puka ke, no ko mai ia Iehova. Ka tauturu te reira ia tatou kia piri vaitata kiaia e kia akaketaketa i to tatou akarongo.​—Tito 2:2.

⁴ Kua tataia te maata anga o ta tatou au puka no te Au Kite o Iehova. Inara, te vaira tetai au puka tei tataia no tetai au pupu takake, mei te au mapu me kore te au metua. Te maata anga o te au atikara e te au vitio i runga i ta tatou website, kua akapapaia no te aronga kare i te Au Kite o Iehova. Te akaari maira teia au mea tukeke e kua akatupu a Iehova i tana i taputou kia oronga i te au ikuikuanga ki te au tangata ravarai.​—Isaia 25:6.

5. Ka papu ia tatou e te mareka maira a Iehova i te aa?

⁵ Ka inangaro te maata anga ia tatou kia akapou maata i te taime i te tatau i te Pipiria e te au puka. Penei e tukeke te taime ka akapou tatou i te tatau i te au puka ravarai tei orongaia mai. Ka papu ia tatou e te mareka ra a Iehova me taangaanga meitaki i to tatou taime no te tatau e te apii i te Pipiria e ta tatou au puka. (Ephesia 5:15, 16) Inara, ka anoanoia tatou kia matakite. No teaa ra?

6. Eaa te ka akatupu ia tatou kia ngere i te au akameitakianga mei ta Iehova au mea i oronga mai?

⁶ Me kare tatou e matakite, penei ka manako tatou e kare tetai tuanga o te Pipiria e tetai au puka e tau kia tatou. Ei akaraanga, akapeea me kare tetai tuanga o te Pipiria e tau ki to tatou turanga? Akapeea e me kare tatou e ō atu ki roto i tetai pupu kua tataia te puka no ratou? Ka tatau viviki ainei tatou i te reira me kore kare tatou e tatau pouroa? Me koia a, penei ka ngere tatou i te au akakiteanga puapinga te ka riro ei meitaki no tatou. Akapeea tatou me kopae i te reira? E akamaara, no ko mai ia Iehova te au akakiteanga pouroa tei orongaia mai. Ka kite tatou i roto i te Pipiria: “Ko au toou Atua ra ko Iehova, ko tei akakite ia koe i te mea e puapingaʼi koe na.” (Isaia 48:17) I roto i teia atikara, ka uriuri tatou e toru ravenga te ka tauturu ia tatou kia puapingaia mei te au mea pouroa ta Iehova i oronga mai.

7. Eaa te tumu ka anoanoia kia tatau i te Pipiria ma te ngakau maoraora?

⁷ E tatau ma te ngakau maoraora. E tika kua tataia tetai au tuanga o te Pipiria no tetai tangata me kore pupu. Inara, te akakite maira te Pipiria e: “Te au tuatua tapu katoa i tataia ra, e mea akauruia mai e te Atua, e e mea meitaki.” (2 Timoteo 3:16) Ko te tumu te reira ka anoanoia tatou kia tatau i te Pipiria ma te ngakau maoraora. Kua tauta tetai taeake i te akamaara e e maata te au apiianga ka rauka mai mei te papaanga okotai. Ka tauturu te reira iaia kia kite mai i te au apiianga puapinga kare e taka meitaki roa ana. No reira i mua ake ka tatau ei i te Pipiria, kia pati tatou ia Iehova no te ngakau maoraora e te pakari kia mārama i te au apiianga tana i inangaro ia tatou kia kite.​—Ezera 7:10; e tatau ia Iakobo 1:5.

8, 9. (a) Me tatau i te Pipiria, eaa te au uianga ka ui tatou kia tatou uaorai? (e) Eaa ta te tu o te aronga pakari e akakite maira kia tatou no runga ia Iehova?

⁸ Ui i te au uianga. Me tatau koe i te Pipiria, e ui kia koe uaorai: ‘Eaa ra ta teia e akakite maira kiaku no runga ia  Iehova? Ka akapeea ra au me taangaanga i teia i roto i toku oraanga? Ka akapeea ra au me taangaanga i teia au irava ei tauturu i etai ke?’ Me akamanako oonu tatou i teia au uianga, ka puapinga meitakiia ta tatou tatau anga Pipiria. Ka uriuri ana tatou i tetai akaraanga. Te akataka maira te Pipiria i tetai au tu ka anoanoia e te aronga pakari Kerititiano. (E tatau ia 1 Timoteo 3:2-7.) Inara kare te maata anga ia tatou i te aronga pakari, no reira penei ka manako tatou e kare teia irava e tauturu mai ia tatou. Inara, ka ui ana tatou i te au uianga e toru tei taikuia mai kia kite akapeea teia au tu no te aronga pakari me tauturu ia tatou katoatoa.

⁹ “Eaa ra ta teia e akakite maira kiaku no runga ia Iehova?” Kua oronga mai a Iehova i te papaanga no te au tu ka anoanoia e te aronga pakari. E turanga teitei tana i akanoo no te au tane ei akono i te putuputuanga. Te akaari maira teia e mea akaperepere te putuputuanga kia Iehova. Karanga te Pipiria e kua oko aia i te reira i te toto o tana Tamaiti. (Angaanga 20:28) No reira, te umuumu ra a Iehova i te aronga pakari kia riro ei au akaraanga meitaki, e e apainga ta ratou no te tu e akono ra i te putuputuanga. Te inangaro nei aia ia tatou kia paruruia i raro ake i ta ratou akaaereanga. (Isaia 32:1, 2) No reira me tatau tatou i teia papaanga, ka kite mai tatou mei teaa tikai te maata i to Iehova inangaro ia tatou.

10, 11 (a) Me tatau i te papaanga no te au tu o te aronga pakari, akapeea tatou i te taangaanga i teia akakiteanga i roto i to tatou oraanga? (e) Akapeea tatou me taangaanga i teia au irava ei tauturu i etai ke?

 ¹⁰ “Akapeea ra au me taangaanga i teia i roto i toku oraanga?” Me e tangata pakari koe, ka tau koe kia akara putuputu i te papaanga no te au tu a te aronga pakari e kia akameitaki atu i te reira. “Kia inangaro tetai tangata i te taoonga episekopo,” ka tauta pakari aia i te akatupu i teia au tu. (1 Timoteo 3:1) Inara ka rauka i te au Kerititiano pouroa i te apiianga mei teia au tu. Ei akaraanga, te tapapa maira a Iehova ia tatou tatakitai kia akaari i te tu tau e te akono meitaki. (Philipi 4:5; 1 Petero 4:7) Me riro te aronga pakari ei ‘kaveinga no te anana,’ ka apii tatou mei ia ratou e ka “aru atu i to ratou akarongo.”​—1 Petero 5:3; Ebera 13:7.

¹¹ “Ka akapeea ra au me taangaanga i teia au irava ei tauturu i etai ke?” Ka rauka i te taangaanga i teia papaanga no te aronga pakari Kerititiano ei tauturu i te aronga apii Pipiria e te aronga tei akaari i te inangaro kia mārama i te tuke i rotopu i te aronga pakari Kerititiano e te au arataki akonoanga. Ka akamaara katoa tatou i te angaanga maroiroi a te aronga pakari i roto i te putuputuanga. Te ka tupu, ka tauturu ia tatou kia akangateitei i teia au taeake. (1 Tesalonia 5:12) Me akangateitei ia ratou, ka maata to ratou rekareka i te rave i ta ratou tukuanga angaanga.​—Ebera 13:17.

12, 13 (a) Me rave i te kimikimianga, eaa ta tatou ka rave? (e) Oronga mai i tetai akaraanga akapeea te au akakiteanga ke atu te akaari anga mai i te au apiianga kare e taka meitaki ana.

¹² Rave i te kimikimianga. Me apii tatou i te Pipiria, e kimi i te pauanga ki teia au uianga:

• Naai i tata i teia tuanga o te Pipiria?

• Teiea e inaea te reira i tataia ai?

• Eaa te au mea puapinga e tupu ra i te tataia anga teia puka?

Ka tauturu teia au ikuikuanga ia tatou kia kite i te au apiianga puapinga kare e taka meitaki ana.

¹³ Ei akaraanga, te na ko ra a Ezekiela 14:13, 14 e: “Kia ara te enua iaku nei, e kua maata rava te ara, e akatika au i toku rima ki runga i te reira enua, e e aati au i to reira tauturu ra, i te kai, e ka apai atu au i te onge i rungao ra, e akakore oki au i to reira tangata e te puaka katoa ra: E te noo ra eianei puke tangata toko toru, ko Noa, e ko Daniela, e ko Iobu i reira, ko to ratou uaorai vaerua te ka ora i ta ratou ra tuatua-tika, te tuatua maira te Atu ra ko Iehova.” Me rave tatou i te kimikimianga, ka kite mai tatou kua tata a Ezekiela i teia irava mei te 612 mataiti i mua ake ia Karaiti. Kua mate takere a Noa raua ko Iobu, noatu ra kua akamaara a Iehova i to raua tu tiratiratu. Inara te ora ua ra a Daniela. E mea papu, e 20 ona mataiti i te karanga anga a Iehova e e tangata tuatua tika aia mei ia Noa raua ko Iobu. Eaa ta tatou ka apii mai? Te kite maira e te akaperepere ra a  Iehova i tona au tavini tiratiratu, kapiti mai te au mapu.​—Salamo 148:12-14.

14. Akapeea te au puka tei neneiia no te au mapu te tauturu anga ia ratou, e akapeea tetai pae te puapinga anga mei te reira? (Akara i te tutu mua.)

¹⁴ Au puka no te au mapu. Kua apii tatou e ka puapingaia tatou mei te au tuanga ravarai o te Pipiria. Mei te reira katoa, ka puapingaia tatou mei te au puka ravarai. Ka akara ana tatou i tetai au akaraanga. I te au mataiti i topa, kua oronga mai a Iehova i te au akakiteanga no te au mapu. ^[1] (Akara i te manako poto.) Te tauturu maira teia au akakiteanga ia ratou kia akono i te au taomianga i te apii e te au akaaoanga o te oraanga mapu. Inara akapeea tatou pouroa e puapingaia ai me tatau i teia au atikara e te au puka? Me tatau i te reira, ka kite tatou i te au manamanata o te au mapu e ka rauka i te tauturu e te akamaroiroi ia ratou.

15. Eaa te tumu ka inangaro te au Kerititiano mamaata i te apii i te au akakiteanga no te au mapu?

¹⁵ Eiaa te au Kerititiano mamaata e ngakau parau e kare e tatau i te au akakiteanga ki te au mapu. Te maata anga i te manamanata tei uriuriia i roto i te atikara no te au mapu, ka tau ki te au Kerititiano pouroa. Ei akaraanga, ka anoanoia tatou pouroa kia paruru i to tatou irinakianga, kia akatere i to tatou manako, kia patoi i te au taomianga, e kia kopae i te kapiti anga kino e te tamataora anga kino. No reira noatu kua tataia teia au puka no te au mapu, no roto mai te au akakiteanga i te Pipiria, e ka puapingaia te au Kerititiano pouroa.

16. Eaa ta te au puka e tauturu ra i te au mapu kia rave?

¹⁶ Ka riro te au puka tei tataia no te au mapu ei tauturu ia ratou kia akaketaketa i to ratou pirianga oa kia Iehova. (E tatau ia Koheleta 12:1, 13) Ka puapinga katoaia te aronga mamaata. Ei akaraanga, i roto i te makatini E Ara! o Tiurai-Tepetema 2009, kua tataia te atikara “Ui te au Mapu E . . . Akapeea Au e Mataora ai i Taku Tatauanga Pipiria?” E maata te au tauturu i roto i teia atikara e kua kapitiia mai tetai pia te ka tipuia, akaputuia e kia taangaangaia no te apii. Kua puapinga ainei te aronga mamaata mei teia atikara? Karanga tetai metua vaine e i mua ana e ngata iaia i te tatau i te Pipiria. Inara kua taangaanga aia i te au manako i roto i teia atikara e teianei e reka ana aia i te tatau i te Pipiria. Karanga aia e te rekareka nei aia i te kite akapeea te au puka o te Pipiria te rotai anga e te akataka maira i tetai tutu manea. Karanga katoa aia, “Kare rava au i kite ana i te mataora mei teia rai mei te tatau anga Pipiria.”

17, 18 Akapeea tatou e puapinga ai mei te au puka tei tataia no te papuriki? Oronga mai i tetai akaraanga.

¹⁷ Au puka no te papuriki. Mei te  mataiti 2008 kua rekareka tatou i te tuanga apii o Te Punanga Tiaki. Kua tataia teia no te Au Kite o Iehova, inara te vaira tetai au makatini tei tataia no te papuriki. Akapeea tatou e puapingaia ai mei te reira? Ka akamanako ana i tetai akatutuanga. Me pati koe i tetai tangata ki te Are Uipaanga Patireia e kua aere mai aia, mataora tikai koe. I te taeake e oronga ra i tana ako, ka akamanako koe i taau tangata i pati. Penei ka manako koe eaa ta tera tangata e manako ra no runga i tana i rongo e akapeea te ako i te taui anga i tona oraanga. Tei tupu, ka tukia toou ngakau e ka mataora atu koe i te reira tumu manako.

¹⁸ Ka tupu teia me tatau tatou i te au puka tei tataia no te papuriki. Ei akaraanga, te tuanga papuriki o Te Punanga Tiaki e te au atikara i runga i te jw.org, te akamārama maira i te Pipiria na roto i te au tuatua māmā ua kia mārama. Me tatau tatou i te reira, ka akaoonu atu i to tatou mārama e te inangaro i te au tuatua mou o te Pipiria tei kite takere tatou. Pera katoa, ka apii tatou i te au mataara ou kia akamārama atu i to tatou irinakianga i roto i te angaanga tutu aere. Pera katoa, ka riro te makatini Awake! ei akaketaketa i to tatou irinaki i roto i Tei Anga mai ia tatou. Ka tauturu katoa ia tatou kia paruru i to tatou irinakianga.​—E tatau ia 1 Petero 3:15.

19. Akapeea tatou me akaari i te tu āriki rekareka no te au mea ta Iehova i oronga mai?

¹⁹ Te taka meitaki ua ra, kua oronga mai a Iehova i te au ako e te au ikuikuanga kia puapinga tatou. (Mataio 5:3) Kia tatau e kia taangaanga ua rai tatou i te au akakiteanga pouroa tana i oronga mai. Me akapera tatou, ka puapingaia tatou e ka akaari kia Iehova i to tatou tu āriki rekareka no te au mea tana i oronga mai.​—Isaia 48:17.