1-3. (a) Eaa te au taui anga penei ka ngata ia tatou i te rave i muri ake i te papetito anga? (e) Me ngata i te tere ki mua, eaa te au uianga ka ui tatou? (Akara i te tutu mua.)

NO TETAI tuatau roa, kua pere moni a Kevin, kua kai avaava, kai kava e te kai apinga akakona. ^[1] (Akara i te manako poto.) I reira kua apii aia no runga ia Iehova e kua inangaro kia riro mai ei oa nona. Inara kia rave i te reira, kua anoanoia aia kia rave i te au taui anga maata i roto i tona oraanga. Kua rauka iaia i te taui ma te tauturu a Iehova e te mana ririnui o tana tuatua te Pipiria.​—Ebera 4:12.

² I muri ake i to Kevin papetito anga, kua anoanoia aia kia taui i tona tu kia riro mai ei Kerititiano meitaki atu. (Ephesia 4:31, 32) Ei akaraanga, kua viviki ua aia i te riri. Poitirere aia i te kite e e ngata tikai i te akatere i tona riri. Te tika, karanga a Kevin e ngata atu i te akatere i tona riri i to te akamutu anga i te au peu kino tana i rave i mua ake i  tona papetito anga! Inara kua rauka iaia i te taui na te pati akatenga anga kia Iehova no te tauturu e te apii meitaki i te Pipiria.

³ I mua ake ka papetitoia ai tatou, te maata anga ia tatou kua anoanoia kia rave i te au taui anga maata i roto i te oraanga kia akarotai i te oraanga ki ta te Pipiria e karanga ra. Noatu ra, kua kite tatou e ka anoanoia kia rave i te au taui anga rikiriki kia aite mei te Atua e te Mesia. (Ephesia 5:1, 2; 1 Petero 2:21) Ei akaraanga, penei te kopekope maata ra tatou me kore te urutoe ra e te tuatua akakino ra i te au taeake. I tetai taime ka mataku tatou i ta tetai ke ka manako e ka tuatua, no reira kare tatou e rave i te mea tika. Penei kua tauta tatou i te rave i te au taui anga no tetai tuatau roa inara ka rave ua rai tatou i taua tarevake ra. No reira penei ka manako tatou: ‘Eaa ra i ngata tikai iaku kia rave i teia au taui anga rikiriki? Eaa taku ka rave kia akono i ta te Pipiria e karanga ra kia akameitaki ua atu i toku tu?’

4. Eaa te tumu kare e rauka ia tatou i te akamareka ia Iehova i te au taime ravarai?

⁴ E inangaro ana tatou ia Iehova, e ka inangaro tatou i te akamareka iaia ma te ngakau katoa. Te mea mii ra, kare e rauka ia tatou i te akamareka iaia i te au taime ravarai no te mea e tu apa ua to tatou. Te maata anga o te taime te manako ra tatou mei te apotetoro ko Paulo tei karanga e: “Ko te anoano ra, te vaitata ua nei ïa kiaku; kareka te rave i te mea meitaki ra, kare ïa i kitea iaku.”​—Roma 7: 18; Iakobo 3:2.

5. Eaa te au taui anga ta tatou i rave i mua ake ka papetito ei, inara eaa te au tu paruparu penei ka tamaki ua atu tatou?

⁵ I mua ake ka piri atu tatou ki te putuputuanga, ka anoanoia tatou kia akamutu i te au peu ta Iehova e makitakita ra. (1 Korinetia 6:9, 10) Inara e tu apa ua to tatou. (Kolosa 3:9, 10) No reira ka rave ua rai tatou i te tarevake noatu kua papetitoia tatou no tetai tuatau roa. I tetai taime, penei ka tupu te au anoano e te au manako ngakau tau kore, me kore e ngata ia tatou i te akatere i tetai tu paruparu. Te tika, penei ka anoanoia tatou kia tamaki atu i te reira tu paruparu no tetai tuatau roa.

6, 7. (a) Akapeea e rauka ai ia tatou kia riro ei oa no Iehova noatu to tatou tu apa ua? (e) Eaa ra tatou kare e tapupu i te pati kia Iehova kia akakore mai i ta tatou ara?

⁶ Noatu e aronga apa ua tatou, ka rauka rai tetai pirianga oa kia Iehova e te tavini iaia. E akamaara ua rai akapeea koe te riro anga mai ei oa no Iehova. Koia tei kite i te meitaki i roto ia koe e kua inangaro aia ia koe kia kite iaia. (Ioane 6:44) Kua kite katoa aia e tu tarevake toou e te paruparu e ka rave rai koe i te tarevake. Noatu ra kua inangaro rai a Iehova ia koe ei oa nona.

⁷ Kua aroa mai a Iehova ia tatou e kua oronga mai i tetai apinga aroa kia tatou. Kua tono mai aia i tana Tamaiti ko Iesu ki te enua nei e rauka ai iaia i te oronga i tona oraanga ei oko i ta tatou au ara. (Ioane 3:16) Me rave tatou i tetai tarevake, ka rauka i te pati ia Iehova kia akakore i te reira. No te atinga oko, ka papu ia tatou e ka akakore mai aia i ta tatou ara e ka riro rai tatou ei oa nona. (Roma 7:24, 25; 1 Ioane 2:1, 2) E akamaara, kua mate a Iesu no te aronga  ara tei tataraara. No reira noatu e e mea kino tikai ta tatou i rave, auraka rava tatou e akamutu i te pure kia akakore mai a Iehova i ta tatou ara. Me kare tatou e pati ia Iehova kia akakore i te ara, ka aite te reira ki te patoi anga i te orei i to tatou rima me ki i te repo. Mei teaa atura to tatou mataora kua akatika a Iehova ia tatou ei oa nona noatu to tatou tu apa ua!​—E tatau ia 1 Timoteo 1:15.

8. Eaa te tumu kare tatou e kopae i to tatou tu paruparu?

⁸ Kare tatou e kopae i to tatou tu paruparu e te kimi kotoe anga no te reira. Kua akakite mai a Iehova eaa tana aronga i inangaro ei oa nona. (Salamo 15:1-5) No reira me inangaro tatou i te akavaitata atu kiaia, ka tauta ua atu rai tatou i te aru iaia e tana Tamaiti. Ka anoano katoaia tatou kia akatere ua rai i to tatou au anoano tau kore, e penei ka rauka te reira i te akakore takiriia. Noatu eaa te roa i to tatou papetito anga, ka anoanoia tatou kia akameitaki ua atu rai i to tatou tu.​—2 Korinetia 13:11.

9. Akapeea tatou te kite anga e ka tauta ua rai i te akatangata ou?

⁹ Kua akakite a Paulo ki te au Kerititiano: “Kia kopae kotou i ta kotou tuatua i muatangana ra, i te tangata taito, i tei kino i te anoano pikikaa; E kia akaouia oki kotou i to kotou vaerua ra i te ngakau: E kia akatangata ou oki ko tei angaia kia tau i te Atua ra, i te tuatua-tika e te tapu mou.” (Ephesia 4:22-24) Tera te aiteanga ka anoanoia tatou kia tauta ua rai i te taui e “kia akatangata ou oki.” No reira noatu eaa te roa ta tatou tavini anga ia Iehova, ka rauka i te apii ua atu rai i tona au tu. E ka tauturu te Pipiria ia tatou kia taui ua rai i to tatou tu kia riro mei iaia rai.

10. Eaa ta tatou ka rave kia taui ua rai ma te tauturu a te Pipiria, e eaa te au uianga ta tatou ka ui?

¹⁰ Ka inangaro tatou pouroa i te aru i ta te Pipiria e karanga ra. Inara ka anoanoia tatou kia angaanga pakari me inangaro tatou i te taui ua atu rai. Eaa ra tatou ka anoanoia ai kia tauta pakari? Kare ainei a Iehova e akariro kia māmā atu no tatou i te rave i te mea tika?

11-13. Eaa te tumu ka tapapa a Iehova ia tatou kia tauta i te autu i to tatou au tu paruparu?

¹¹ Me akamanako tatou i te ao katoa e pini ua ake e tona ki katoa, kare e ekoko anga e mana to Iehova te rave i te au mea ravarai. Ei akaraanga, nana i anga i te ra, e e ririnui tikai te reira. I te au taime ravarai, ka oronga maata mai te ra i te marama e te maana. Inara, e meangiti ua te ririnui ka anoanoia no te oraanga i te enua nei. (Salamo 74:16; Isaia 40:26) Ka oronga katoa a Iehova i te ririnui ki tona au tavini i te enua nei me anoanoia te reira. (Isaia 40:29) Te taka meitaki ua ra naringa a Iehova i inangaro, ka akariro aia ei mea māmā ua  no tatou kia tamaki i to tatou tu paruparu e kia akakore i te anoano tau kore. No reira eaa te tumu kare aia e pera ana?

¹² Kua oronga mai a Iehova i te tu rangatira. Te akatika ra aia ia tatou kia iki no tatou uaorai me ka akarongo kiaia e me kare. Me iki tatou i te akarongo kiaia e me angaanga pakari i te rave i tona anoano, te akaari ra i to tatou inangaro nona e ka mareka mai aia. Te karanga nei a Satani e kare o Iehova tika anga kia tutara. Inara me akarongo tatou kia Iehova, te akaari ra tatou e koia to tatou Tutara. Ka papu ia tatou e te akaperepere ra to tatou Metua aroa i ta tatou tauta anga kia akarongo kiaia. (Iobu 2:3-5; Maseli 27:11) Me angaanga pakari tatou i te akatere i to tatou tu paruparu noatu e kare te reira i te mea māmā ua, ka tiratiratu tatou kia Iehova e ka akaari i to tatou inangaro iaia ei Tutara.

¹³ Te akakite maira a Iehova kia tatou kia angaanga pakari i te aru i tona au tu. (Kolosa 3:12; e tatau ia 2 Petero 1:5-7.) Te tapapa katoa ra aia ia tatou kia angaanga pakari i te akatere i to tatou au manako. (Roma 8:5; 12:9) I te au taime me angaanga pakari tatou kia rave i tetai taui anga e kua autu, ka mataora tikai tatou.

14, 15 Eaa ta tatou ka rave kia akatupu i te au tu ta Iehova e inangaro ra? (Akara i te pia “ Taui te Pipiria e te Pure i to Ratou Oraanga.”)

¹⁴ Eaa ta tatou ka rave kia akatupu i te au tu ta Iehova e inangaro ra? Auraka tatou e iki no tatou uaorai eaa tei anoanoia kia taui, mari ra kia tuku i te Atua  kia arataki ia tatou. Karanga a Roma 12:2 e: “Eiaa e akatau atu i teianei ao: ei tu ke ra to kotou i te akaou anga o to kotou ngakau, kia taka tikai ia kotou i to te Atua ra anoano, tei meitaki, e te tau, e te apa kore oki.” No reira kia kite eaa ta Iehova e inangaro ra, ka anoanoia kia irinaki tatou i te tauturu tana e oronga maira. Kia tatau tatou i te Pipiria i te au rā ravarai, kia akamanako oonu i ta tatou e tatau ra, e kia pure kia Iehova no tona vaerua tapu. (Luka 11:13; Galatia 5:22, 23) Me akapera tatou, ka tauturu a Iehova ia tatou kia mārama eaa te akamareka ra iaia, e ka kite tatou i tona manako. Te ka tupu, ka riro ta tatou e manako ra, e tuatua ra, e rave ra i te akamareka ia Iehova, e ka kite tatou i te akatere i to tatou au tu paruparu. Noatu ra, ka anoanoia rai tatou kia tamaki ua atu i te reira.​—Maseli 4:23.

¹⁵ Kapiti mai i te tatau anga i te Pipiria, ka anoanoia kia apii i te reira ma te tauturu a te au puka, mei Te Punanga Tiaki e te Awake! E maata te au atikara i roto i teia au makatini te apii ra ia tatou kia aru i to Iehova tu e kia tamaki atu i to tatou tu paruparu. Penei ka tatau tatou i te au atikara me kore te au irava te ka tauturu tikai ia tatou. Ka rauka i te akaputu i teia au irava e te au atikara e rauka ai te tatau i te reira i te au taime ravarai.

16. Eaa te tumu kare tatou e taitaia me kare tatou e viviki i te rave i te au taui anga?

¹⁶ Ka pou te tuatau i te apii kia aru i te  au tu o Iehova. No reira me manako koe e kare e maata ana taau taui anga i rave mei taau i inangaro, e akakoromaki. I te akamata anga, penei ka māroia koe kia rave i ta te Pipiria e karanga ra. Inara ko te maata atu ia koe i te manako e te akono i te au tu ta Iehova e inangaro ra, ka māmā atu noou kia akamanako i tona au manako e te rave i te mea tika.​—Salamo 37:31; Maseli 23:12; Galatia 5:16, 17

17. Me tiratiratu tatou kia Iehova, eaa te tuatau manea ki mua ta tatou ka akara atu?

¹⁷ Te tapapaia nei te tuatau me riro mai tatou ei aronga apa kore e te tavini ia Iehova e tuatau ua atu. I tera tuatau, kare tatou e anoanoia kia tamaki i tetai ua atu tu paruparu, e ka māmā atu no tatou i te aru ia Iehova. Noatu ra i teianei ka rauka ia tatou i te akamori ia Iehova no te mea kua oronga mai aia i te apinga aroa ko te oko. Noatu e tu apa ua to tatou, ka rauka i te akamareka iaia me angaanga pakari ua atu rai tatou kia rave i te au taui anga e kia aru i tana e apii maira i roto i te Pipiria.

18, 19 Akapeea tatou e papu ei e mana to te Pipiria kia taui i to tatou oraanga?

¹⁸ Kua rave a Kevin te au mea ravarai kia akatere i tona riri. Kua akamanako oonu aia i tana i tatau i roto i te Pipiria e kua tauta pakari i te rave i te au taui anga i roto i tona oraanga. Kua aru katoa aia i te ako a te au taeake Kerititiano. Noatu kua pou tetai nga mataiti no Kevin kia meitaki mai tona tu, aere ua rai kua riro mai aia ei tavini tauturu. I te 20 mataiti i topa, kua tavini aia ei tangata pakari. Noatu ra i teianei, kua kite aia e ka anoanoia rai kia tamaki ua atu i tona au tu paruparu.

¹⁹ Mei ia Kevin, ka rauka ia tatou i te akameitaki atu i to tatou tu. Me akapera tatou, ka akavaitata ua atu rai tatou kia Iehova. (Salamo 25:14) E me rave tatou i te au mea ravarai kia taui ei akamareka iaia, ka tauturu aia ia tatou kia autu. Ka papu ia tatou ma te tauturu a te Pipiria, ka rauka ia tatou i te rave i te au taui anga i roto i te oraanga.​—Salamo 34:8.