1. Te ara anga a Adamu e Eva, eaa ta Iehova i akakite mai no runga i to tatou enemi?

KUA kite a Adamu e kare te au ovi e kite i te tuatua. Inara, te akarongo anga aia e kua tuatua tetai ovi kia Eva, penei kua kite a Adamu e e vaerua teia tei tuatua mai. (Genese 3:1-6) Kare ra a Adamu e Eva i kite e koai teia vaerua. Inara, kua iki a Adamu i te aru i teia vaerua e kua meameaau atu i tona Metua aroa i te rangi. (1 Timoteo 2:14) I taua taime ra, kua akakite mai a Iehova e koai teia enemi kino e kua taputou mai e ka takoreia aia. Inara kua akamatakite mai a Iehova e, ko te vaerua tei tuatua na roto i te ovi, ka patoi ua rai aia i te aronga pouroa tei inangaro i te Atua.—Genese 3:15.

2, 3. Eaa te tumu kare a Iehova i akakite maata no runga ia Satani i mua ake ka tae mai ei te Mesia?

² Kare a Iehova i akakite mai ana i te ingoa o te angera tei meameaau atu iaia. * (Akara i te tataanga rikiriki i raro.) Kua pou rai e 2,500 mataiti i muri ake i te meameaau anga i Edene,  i akakite mai ei a Iehova e koai te reira. (Iobu 1:6) Kua kapikiia aia e ko “Satani,” te aiteanga ko “Tei Patoi.” E toru rai puka i roto i te Tuatua Tapu Epera tei taiku ia Satani, ko 1 Paraleipomeno, Iobu e Zekaria. Eaa te tumu kare i maata te akakiteanga no runga i teia enemi i mua ake ka tae mai ei te Mesia?

³ Kare a Iehova i tuku i tetai akakiteanga no runga ia Satani e tana i rave i roto i te Tuatua Tapu Epera. No te mea, kua akapapaia te Tuatua Tapu Epera no te tauturu i te tangata kia kite e kia aru i te Mesia. (Luka 24:44; Galatia 3:24) Te tae anga mai te Mesia, kua taangaanga a Iehova iaia e tana au pipi kia akakite maata no runga ia Satani e te au angera tei aru atu iaia. * (Akara i te tataanga rikiriki i raro.) Kua tau rai teia, no te mea ka taangaanga a Iehova ia Iesu e te aronga akatainuia no te takore ia Satani e tei aru atu iaia.—Roma 16:20; Apokalupo 17:14; 20:10.

4. Eaa te tumu kare tatou e mataku atu i te Tiaporo?

⁴ Kua akataka te apotetoro ko Petero ia Satani te Tiaporo “mei te liona ngunguru ra,” e kua kapiki a Ioane iaia e ko te “ovi,” e ko te “taae maata.” (1 Petero 5:8; Apokalupo 12:9) Inara, auraka tatou e mataku i te Tiaporo. Kua kotingaia tona mana. (E tatau ia Iakobo 4:7.) Ka paruru a Iehova, a Iesu e te au angera tiratiratu ia tatou. Ma ta ratou tauturu, ka rauka ia tatou i te patoi i to tatou enemi. Inara, ka anoanoia tatou kia kite i te pauanga ki teia au uianga puapinga e toru: Mei teaa te maata o ta Satani akakeuanga? Akapeea aia me tauta i te akakeu i te tangata? E eaa te au apinga kare e rauka iaia i te rave? Ka pau tatou i teia au uianga kia kite i te au apiianga mei te reira.

5, 6. Eaa te tumu kare e rauka i te au kavamani i te oronga mai i te au mea tei anoano maataia e te tangata?

⁵ E manganui te au angera tei piri kia Satani i te patoi i te Atua. I mua ake i te Vaipuke, kua akakeu a Satani i tetai ia ratou kia piri ainga atu ki te au vaine. Akamārama mai te Pipiria i teia na te karanga anga e ko te taae maata tei tiriaia mai ki raro mei te rangi, kua aru mai e okotai tuanga o te toru tuanga o te au etu iaia. (Genese 6:1-4; Iuda 6; Apokalupo 12:3, 4) Te akaruke anga taua au angera ra ei tamariki na te Atua, kua tuku ratou ia ratou uaorai ki raro ake i te akatere anga a Satani. Auraka tatou e manako e e pupu mako kore teia au angera meameaau. I roto i te ao vaerua, kua akanoo a Satani i tana uaorai kavamani na te aru anga i to te Atua Patireia. Kua akariro aia iaia uaorai ei ariki, e kua akanoonoo aia i te au temoni, kua akamana ia ratou, e kua akariro ia ratou ei tutara no teianei ao.—Ephesia 6:12.

 ⁶ Ka taangaanga a Satani i tana akaaerenga ei akatere i te au kavamani a te tangata. Kua papu teia, no te mea te akaari anga aia kia Iesu i “te au basileia katoa o te ao nei,” karanga aia: “E oronga atu au i te au, e te inuinu i teianei pa enua, kia koe na; kua tukuia mai oki kiaku, e naku e oronga atu na taku tangata e inangaro.” (Luka 4:5, 6) No reira, e maata te au kavamani te rave ra i te meitaki no tona iti tangata, e te inangaro tikai ra i te tauturu ia ratou. Inara kare e rauka i tetai tutara a te tangata i te oronga mai i te au mea tei anoano maataia e tatou.—Salamo 146:3, 4; Apokalupo 12:12.

7. I te pae i te au kavamani, akapeea a Satani me taangaanga i te au akonoanga pikikaa e te au pitiniti o teianei ao? (Akara i te tutu mua.)

⁷ Ka taangaanga katoa a Satani e te au temoni i te au akonoanga pikikaa e te au pitiniti o teianei ao kia akavare “i to te ao katoatoa nei,” me kore te tangata ravarai. (Apokalupo 12:9) Taangaanga a Satani i te au akonoanga pikikaa ei arai i te tika no runga ia Iehova, e kua tauta katoa aia i te uuna i te ingoa o te Atua. (Ieremia 23:26, 27) Tei tupu, te manako ra tetai aronga meitaki e te akamori ra ratou i te Atua, inara ko te au temoni ta ratou e akamori ra. (1 Korinetia 10:20; 2 Korinetia 11:13-15) Taangaanga katoa a Satani i te pitiniti o teianei ao kia pikikaa e ka apai mai te moni e te au mea materia i te mataora ki te tangata. (Maseli 18:11) Ko tei irinaki i teia, kua akapou i to ratou taime i te tavini i te “Mamona,” e kare i te Atua. (Mataio 6:24) Noatu kua inangaro ana ratou i te Atua, ka ketaketa atu to ratou inangaro no te au mea materia e ka ngaro te inangaro no te Atua.—Mataio 13:22; 1 Ioane 2:15, 16.

8, 9. (a) Eaa te nga apiianga e rua ka kite tatou mei ta Adamu, ta Eva e te au angera meameaau i rave? (e) Eaa ra i puapinga ai kia kite tatou e ko Satani te akatere o teianei ao?

⁸ E rua apiianga puapinga ka kite mai tatou mei ta Adamu, ta Eva, e te au angera meameaau i rave. Mea mua, kua kite tatou e e rua rai tua ka iki, e ka iki tatou e okotai. Me ka noo ki to Iehova tua me ki to Satani. (Mataio 7:13) Te rua, kua kite tatou e kua kotingaia te meitaki o te aronga tei piri kia Satani. Kua rauka ana ia Adamu e Eva tetai tika anga kia iki eaa te mea tika e eaa te mea tarevake. E mana to te au temoni i te akatere i te au kavamani a te tangata. (Genese 3:22) Inara e tupu ua ana rai te kino me iki i te aru ia Satani. Kare e meitaki e rauka mai!—Iobu 21:7-17; Galatia 6:7, 8.

⁹ Eaa ra i puapinga ai kia kite tatou e ko Satani te akatere o teianei ao? Ka oronga mai te reira i te manako tau no runga i te au kavamani, e ka akakeu ia tatou kia tutu aere i te nuti meitaki. Te inangaro maira a Iehova ia tatou kia akangateitei i te au kavamani. (1 Petero 2:17) Te tapapa maira aia ia tatou kia akono i ta ratou ture me kare te reira e patoi i tona au turanga. (Roma 13: 1-4) Inara ka anoanoia tatou kia vai takake e auraka e turuturu i tetai pupu poritiki me kore tetai arataki. (Ioane 17:15, 16; 18:36) No te mea te tauta nei a  Satani i te uuna e i te akakino i to Iehova ingoa, ka tauta i reira tatou i te apii i te tangata i te tika no runga i te Atua. Ka ngakau parau tatou i te apai e te taangaanga i tona ingoa. E puapinga maata atu te inangaro i te Atua i te inangaro i te moni e te au apinga.—Isaia 43:10; 1 Timoteo 6:6-10.

10-12. (a) Akapeea a Satani te taangaanga anga i te maunu ei akavare i te au angera? (e) Eaa ta tatou ka apii mai mei ta te au angera i rave?

¹⁰ Ka taangaanga a Satani i te au ravenga kikite ei akakeu i tetai ke. Kia rave i tana ka inangaro, tetai taime ka taangaanga aia i te maunu ei akavare ia ratou e i tetai taime ka takino atu ia ratou.

¹¹ Taangaanga ana a Satani i te maunu i te akavare i te au angera. Penei kua akara ana aia ia ratou no tetai tuatau roa kia kite akapeea me rave i te reira. Kua vare tetai au angera e kua piri ainga atu ki te au vaine. E au toa uritumu kino tikai ta ratou tamariki tei takino atu i te tangata. (Genese 6:1-4) Kapiti mai ki te tu tau kore ei akavare i taua au angera, penei kua taputou katoa a Satani e ka rauka ia ratou te mana kia akatere i te tangata. Na teia tu, penei kua tauta ana a Satani i te arai kia kore e akatupuia ta Iehova taputou no te ‘uanga a te vaine.’ (Genese 3:15) Inara kare a Iehova i akatika kia tupu tana. Kua apai mai aia i te Vaipuke, e kua takoreia ta Satani e ta te au temoni parani.

¹² Eaa ta tatou i apii mai mei teia? Ko te ainga tau kore e te tu parau, e tu maunu meitaki te reira. Kua noo ana te au angera tei piri kia Satani i te rangi no tetai tuatau roa ma te Atua! Noatu te reira, e maata ia ratou kua akamanako i teia au anoano tika kore, e kua akatupu atu i te reira. Kia akamaara tatou e noatu eaa te roa ia tatou te tavini anga ia Iehova, ka tupu rai te au anoano kino i roto i to tatou ngakau. (1 Korinetia 10:12) No reira ka anoanoia tatou kia akara putuputu eaa to roto i to tatou ngakau e kia kopae takiri i te au manako ainga tau kore e te tu ngakau parau!—Galatia 5:26; e tatau ia Kolosa 3:5.

13. Eaa tetai akaou tu maunu ta Satani e taangaanga nei, e akapeea tatou me kopae i te reira?

 ¹³ Ko tetai akaou tu maunu e taangaanga ana a Satani, ko te au vaerua mana ririnui. I teia tuatau, te maani nei aia i te tangata kia reka i te au temoni na te taangaanga anga i te au akonoanga pikikaa e te au tamataora. Na roto i te au teata, au mea kangakanga uira, e tetai ua atu tu, kia akara anga meitaki te au vaerua mana ririnui. Akapeea tatou me kopae i teia maunu? Kare tatou e tapapa i te akaaerenga a te Atua kia oronga mai i tetai akapapaanga tamataora meitaki e te kino. Ka anoanoia tatou kia tereni i to tatou akava ngakau no te rave i te au ikianga meitaki kia tau ki ta Iehova au kaveinga. (Ebera 5:14) E me e aroa “pikikaa kore” to tatou no te Atua, ka rave tatou i te au ikianga meitaki. (Roma 12:9) Ka tuatua tetai tangata pikikaa i tetai apinga e ka rave i tetai apinga ke. No reira me iki tatou i tetai tamataora, e ui kia koe uaorai: ‘Te aru ra ainei au i te au kaveinga taku e akakite nei ki te tangata? Eaa te manako o taku aronga apii Pipiria me kore taku e atoro ana me kite i taku tu tamataora?’ Me aru tatou i te au kaveinga ta tatou e akakite ra ki tetai ke, ka māmā i reira ia tatou i te kopae i ta Satani maunu.—1 Ioane 3:18.

14. Akapeea a Satani me takinokino mai ia tatou, e akapeea tatou e vai tiratiratu ei?

¹⁴ Ka tauta katoa a Satani i te takinokino e te tamataku ia tatou kia kore tatou e vai tiratiratu kia Iehova. Ei akaraanga, ka akakeu aia i te au kavamani kia arai i te angaanga tutu aere. Ka akakeu aia i to tatou oa angaanga me kore oa apii kia aviri ia tatou no te aru i te au kaveinga Pipiria. (1 Petero 4:4) Ka akakeu katoa aia i to tatou ngutuare tangata kare i te Au Kite, penei e akakoroanga meitaki to ratou, kia arai ia tatou no te aere ki te au uipaanga. (Mataio 10:36) Eaa ta tatou ka rave me takinokino mai a Satani? Auraka tatou e poitirere i teia au takinokino anga, no te mea e tamaki anga ta Satani kia tatou. (Apokalupo 2:10; 12:17) Ka akamaara katoa tatou i teia mea puapinga: Te karanga ra a Satani e te tavini nei tatou ia Iehova i te au taime  meitaki ua e ka kopae tatou i te Atua me ngata te turanga. (Iobu 1:9-11; 2:4, 5) Te openga, kia pati ua rai tatou kia Iehova no te maroiroi. E akamaara e kare a Iehova e akangaropoina ia tatou.—Ebera 13:5.

15. Ka rauka ainei ia Satani i te māro ia tatou kia rave i tetai apinga kare tatou e inangaro i te rave? Akamārama mai.

¹⁵ Kare e rauka ia Satani i te māro i te tangata kia rave i tetai apinga kare ratou e inangaro i te rave. (Iakobo 1:14) Kare te maata anga o te tangata i kite e te aru nei ratou ia Satani. Inara me kite tetai i te tuatua mou, ka anoanoia aia kia iki me ka noo ki to Iehova tua me ki to Satani. (Angaanga 3:17; 17:30) Me akarongo tatou ki te Atua, kare e rauka ia Satani i te takore i to tatou tu tiratiratu.—Iobu 2:3; 27:5.

16, 17 (a) Eaa atu tetai apinga kare e rauka ia Satani e te au temoni i te rave? (e) Eaa te tumu kare tatou e mataku i te pure ma te reo maata kia Iehova?

¹⁶ E au mea ke atu tetai kare e rauka ia Satani e te au temoni i te rave. Ei akaraanga, kare te Pipiria i akakite ana e ka kite ratou eaa to roto i to tatou manako me kore ngakau. Ko Iehova e ko Iesu anake ua te ka kite. (1 Samuela 16:7; Mareko 2:8) No reira ka mataku ainei tatou i te tuatua me kore te pure ma te reo maata, ko te rongo aea mai te Tiaporo e te au temoni e ka takino mai ia tatou? Kare! Eaa te tumu? Akamanako ana i teia: Kare tatou e mataku i te rave i te meitaki me tavini ia Iehova no te mea ka kite mai te Tiaporo. Mei te reira katoa, kare tatou e mataku i te pure ma te reo maata no te mea ka akarongo mai te Tiaporo. Pera katoa, akakite mai te Pipiria e e maata te taime kua pure reo maata te au tavini o te Atua, e kare roa tatou i tatau ana e kua mataku ratou e ka akarongo mai te Tiaporo. (1 Ariki 8:22, 23; Ioane 11:41, 42; Angaanga 4:23, 24) Me tauta tatou i te tuatua e te rave i ta te Atua e inangaro maira, papu roa e kare a Iehova e akatika i te Tiaporo kia tamamae ia tatou no tetai tuatau roa.—E tatau ia Salamo 34:7.

¹⁷ Ka anoanoia tatou kia kite i to tatou enemi, e kare e mataku atu iaia. Noatu e aronga apa ua tatou, ma te tauturu a Iehova, ka rauka ia tatou i te autu atu ia Satani! (1 Ioane 2:14) Me patoi tatou iaia, ka rere ke atu aia. (Iakobo 4:7; 1 Petero 5:9) I teia tuatau, te akaraanga te tamaki nei aia i te au mapu. Akapeea ratou me patoi i ta te Tiaporo tamaki anga? Ka uriuri tatou i te reira i roto i te atikara ka aru mai.