1, 2. (a) Akapeea te au mapu Kerititiano me autu i te tamaki atu ia Satani e te au temoni? (Akara i te tutu mua.) (e) Eaa ta tatou ka uriuri?

KUA akaaite te apotetoro ko Paulo i te au Kerititiano ki te au vaeau. E tamakianga ta tatou! Kare ki te au tangata, mari ra kia Satani e te au temoni. E au tumutoa ratou no tetai tauatini tuma mataiti e te meitaki katoa ra i te tamaki. No reira penei ka manako tatou e kare tatou e autu i teia tamaki anga, no te mea e mapu ua tatou. Ka rauka ainei i te au mapu te autu atu i te tamaki ki teia au enemi mana ririnui? Ae ka rauka, e te autu nei rai ratou! Akapeea? No te mea kua rauka ia ratou te mana mei ko mai ia Iehova. Pera katoa, mei te au vaeau tereni meitakiia, kua “kakau [ratou] i te rakei katoa a te Atua ra” kia papa ratou no te tamaki anga.—E tatau ia Ephesia 6:10-12.

² Te akakite anga a Paulo i teia akatutuanga, penei te manako ra aia i te rakei o te au vaeau o Roma. (Angaanga 28:16) I roto i teia atikara, ka akara matatio tatou i teia  akatutuanga manea. Ka uriuri katoa tatou i ta tetai au mapu i akakite no runga i te manamanata e te puapinga ka rauka mai me aao i te au tuanga tataki tai o to tatou rakei pae vaerua.

3, 4. Akapeea te tuatua mou a te Pipiria i aite ei ki te tatua o te vaeau Roma?

³ E tatau ia Ephesia 6:14. E auri tetai i runga i te tatua o te vaeau Roma ei paruru i tona taukupu e kia tamou i tona tapoki umauma ki tona ngai. E vairanga ketaketa katoa tetai i runga i tetai au tatua no te koke e te matipi. Me piri te tamou anga o teia tatua, ka maroiroi tona manako me aere aia ki te tamaki.

⁴ Mei te tatua rai, ka paruru te tuatua mou a te Pipiria ia tatou mei te au apii anga pikikaa. (Ioane 8:31, 32; 1 Ioane 4:1) E me inangaro maata tatou i te tuatua mou a te Pipiria, ka māmā i reira i te aru i ta te Atua au turanga, me kore i te aao i te “tapoki-umauma.” (Salamo 111:7, 8; 1 Ioane 5:3) Pera katoa, me mārama meitaki tatou i teia au tuatua mou, ka kite meitaki tatou i te paruru i te reira mei to tatou au enemi.—1 Petero 3:15.

5. Eaa ra tatou ka akakite ua rai ei i te tika?

⁵ Mei te mea e puapinga te au tuatua mou a te Tuatua a te Atua, ka akarongo tatou i ta te Pipiria e karanga ra e ka akakite ua rai tatou i te tika. Ko te pikikaa tetai ravenga puapinga rava atu ta Satani e taangaanga nei. Ka mamae te tangata tei pikikaa e te tangata tei irinaki i te reira. (Ioane 8:44) No reira, noatu e tu apa ua to tatou, kare rava tatou e pikikaa. (Ephesia 4:25) E mea ngata teia i te rave. Karanga a Abigail, e 18 ona mataiti: “Penei i tetai taime kare e tau kia akakite i te tika, me ka riro te reira i te kiriti mai ia koe mei roto i tetai turanga ngata.” Inara eaa aia i tauta ei i te akakite ua rai i te tika? Karanga aia: “Me akakite au i te tika, e akava ngakau mā toku i mua ia Iehova. E ka irinaki mai toku nga metua e toku au oa iaku.” Karanga a Victoria, e 23 ona mataiti: “Me akakite koe i te tika ma te paruru i toou irinaki anga, ka akakinoia mai koe. Inara e maata te meitaki ka rauka mai: Ka matutu toou turanga, ka akapiri vaitata atu koe kia Iehova, e ka akangateitei mai te tangata ia koe.” Te kite ra ainei koe i te puapinga kia aao i ‘te tatua o te tuatua-mou’ i te au taime ravarai?

6, 7. Eaa te tuatua tika i akaaiteia ai ki te tapoki umauma?

⁶ Te maata anga o te taime, kua maaniia te tapoki umauma o tetai vaeau Roma ki te au potonga auri tei amingiia kia tano ki tona umauma. Ka tamouia teia au auri ki runga i tetai kiri e tapeka auri to te ope. Ka tapokiia tona pakuivi ki tetai akaou auri tei tamouia ki runga i te kiri. Ka akaiti teia tapoki umauma i tana ka rave, e ka anoanoia aia kia akara putuputu me te vai meitaki ua ra te au auri i tona ngai. Ka paruru teia tapoki umauma i tona pukuatu e  tetai ua atu au mero ke mei te koke me kore te au kakao!

⁷ Ka riro to Iehova au turanga tuatua tika, tei akaaiteia ki te tapoki umauma, i te paruru i to tatou “ngakau.” (Maseli 4:23) Kare rava tetai vaeau e taui i tona tapoki umauma auri matutu ki tetai tei maaniia ki te auri paruparu. Mei te reira rai, kare rava tatou e taui i to Iehova turanga no te tika, ki ta tatou e manako ra e ko te tika. Kare o tatou kite pakari no te paruru i to tatou uaorai ngakau. (Maseli 3:5, 6) No reira tatou ka akara putuputu ei i to tatou “tapoki umauma,” me te paruru ra te reira i to tatou ngakau.

8. Eaa tatou ka aru ei i to Iehova au turanga?

⁸ Ka manako ainei koe e te riro ra ta Iehova au turanga i te apai ke i toou tu rangatira, me kore i te arai ia koe kia rave i taau e inangaro ra? Karanga a Daniel, e 21 ona mataiti: “E aviri mai ana te au puapii e te au tamariki apii iaku no te aru i te au kaveinga Pipiria. No tetai tuatau, kua paruparu toku manako e kua tupu te taitaia.” Eaa tona manako i teianei? Karanga aia: “Aere ua rai, kua kite mai au i te puapinga o ta Iehova au turanga. Kua akamata tetai o toku au ‘oa’ i te kai apinga akakona; kua akaruke vave tetai pae i te apii. E tupu anga maromaroa tikai teia no ratou. E te paruru nei a Iehova ia tatou.” Karanga a Madison, e 15 ona mataiti: “E ngata tikai iaku i te aru i to Iehova au turanga e te kopae i te aru i te au manako o toku au ao.” Eaa i reira tana i rave? “Kua maara iaku e te apai nei au i te ingoa o Iehova e te timata mai nei a Satani iaku na roto i teia tu. Me autu au i tetai timataanga, ka mataora toku ngakau.”

9-11. (a) Eaa te tamaka akatutuanga ta te au Kerititiano ka aao? (e) Eaa te ka tauturu ia tatou kia marū ta tatou angaanga tutu aere?

⁹ E tatau ia Ephesia 6:15. Kare tetai vaeau Roma e aere ki te tamaki ma te kore ona tamaka. E maaniia ana teia ki te kiri e toru taime te petetue kia matutu tikai te reira. Ka marū teia tamaka i runga i te vaevae o te vaeau e kare ratou e patere me aaere.

¹⁰ I te mea e kua tauturu te tamaka i te au vaeau Roma kia autu i te tamaki, ka tauturu i reira te tamaka akatutuanga ia tatou kia akakite i te “evangelia o te au.” (Isaia 52:7; Roma 10:15) No reira, ka anoano maataia te tu ngakau toa no te tutu aere i tetai taime. Karanga a Bo, e 20 ona mataiti: “I mataku ana au i te tutu aere ki toku au oa apii. E tu akamā tikai toku. Me akamanako au i tera tuatau, kare au i kite eaa au i pera ei. Teianei te mataora nei au i te tutu aere ki toku au oa.”

¹¹ E maata te au mapu Kerititiano tei kite mai e ka marū to ratou ngakau i roto i te angaanga tutu aere me akapapa ratou na mua. Akapeea koe me akapapa? Karanga a Julia, e 16 ona mataiti: “E tuku ana au i tetai puka ki roto i taku kete apii, e ka  akarongo au ki te manako e te irinaki anga o toku au oa apii. Ka kite mai au i reira akapeea me tauturu ia ratou. Me akapapa meitaki au, ka akakite au i te au mea meitaki kia ratou.” Karanga a Makenzie, e 23 ona mataiti: “Me akaari koe i te tu meitaki ma te akarongo kia ratou, ka mārama i reira koe i te turanga o toou au oa. Ka tauta au i te tatau i te au puka katoatoa tei tataia no te au mapu. I reira e rauka ai iaku i te akaari i tetai apinga mei te Pipiria me kore te jw.org te ka tauturu i toku au oa.” Na te akapapa meitaki anga no te tutu aere, kua aite te reira ki te aao anga i te “tamaka.”

12, 13 Eaa tetai au ‘tao ai” a Satani?

¹² E tatau ia Ephesia 6:16. E apai ana te vaeau Roma i tetai paruru maatamaata. Ka paruru te reira i tona kopapa mei tona pakuivi ki tona turi mei te au koke, korare, e te au tao ai.

¹³ Eaa te au “tao ai” ta Satani ka pei mai kia koe? Penei ka akavare aia ia koe na te pikikaa anga no runga ia Iehova. Inangaro  a Satani kia manako koe e kare a Iehova e tetai ua atu tangata e inangaro mai ia koe. Karanga a Ida, e 19 ona mataiti: “E manako ana au e kare a Iehova i akavaitata mai kiaku e kare e inangaro iaku ei Oa nona.” Eaa tana ka rave me tupu teia? “E akaketaketa ana te au uipaanga i toku akarongo. I mua ana, ka noo ua au e kare e paupau, ma te akamanako e kare e tangata e inangaro i te akarongo mai kiaku. Inara, i teianei, ka akapapa au no te au uipaanga e ka tauta i te pau e rua me koe e toru uianga. Kare teia i te mea māmā, inara ka marū toku ngakau me rave au i te reira. E ka akamaroiroi mai te au taeake e te au tuaine iaku. Ka akaruke au i te uipaanga ma te kite e te inangaro maira a Iehova iaku.”

14. Eaa ta tatou ka apii mei tei tupu kia Ida?

¹⁴ Ko te paruru a te vaeau, e vai ua ana rai te reira e okotai tu. Inara mei tei tupu kia Ida, kare to tatou akarongo i aite ki te reira. Ka akamaataia me kore ka akameangitiia to tatou akarongo, ka akaketaketaia me kore ka akaparuparuia. Na tatou rai te ikianga. (Mataio 14:31; 2 Tesalonia 1:3) E rauka ai i teia ‘paruru o te akarongo’ te tauturu ia tatou, ka akamaata e ka akaketaketa ua rai tatou i te reira!

15, 16 Akapeea to tatou manakonakoanga i aite ei ki te pare?

¹⁵ E tatau ia Ephesia 6:17. Ka aao te vaeau Roma i tetai pare ei paruru i tona upoko, kaki, e tona mata. Tetai au pare, e mouranga tona kia rauka i te vaeau i te apai i te reira i roto i tona rima.

¹⁶ Mei te pare te ka paruru i te roro o te vaeau, ka paruru ‘te pare o te ora’ i to tatou aerenga manako. (1 Tesalonia 5:8; Maseli 3:21) Ka tauturu te manakonakoanga ia tatou kia akamou i te manako ki ta te Atua au taputou e kia kore e akaparuparuia me tupu te manamanata. (Salamo 27:1, 14; Angaanga 24:15) Inara e rauka ai i teia manakonakoanga te paruru ia tatou, ka irinaki tatou e e tika te reira. Ka anoanoia tatou kia aao i te “pare,” kare kia apai i roto i to tatou rima!

17, 18 (a) Akapeea a Satani me tiriki ia tatou kia kiriti i to tatou pare? (e) Akapeea tatou me akapapu e kare tatou i akavareia e Satani?

¹⁷ Akapeea a Satani me tiriki ia tatou kia kiriti i to tatou pare? Akamanako ana i tana i rave kia Iesu. Kua kite takere a Satani e ka riro mai a Iesu ei tutara no te tangata. Inara ka tamamae e ka tamateia a Iesu na mua. E oti ka tiaki aia no tetai tuatau ta Iehova i akanoo kia riro mai ei Ariki. No reira kua oronga a Satani i tetai atianga kiaia kia tutara vave. Taputou a Satani e me ka akamori a Iesu iaia, ka riro mai aia ei tutara no te ao nei i taua taime tikai. (Luka 4:5-7) Kite katoa a Satani e kua taputou a Iehova i te oronga mai i tetai au mea manea i roto i te ao ou no tatou. Inara ka roa ta tatou tiaki anga kia akatupuia teia taputou, e penei e maata te au manamanata ka tupu mai. No reira ka tauta a Satani i te oronga mai i tetai oraanga meitaki no tatou i teia taime tikai. Ka inangaro aia ia tatou kia tuku i to tatou uaorai anoano na mua e ko te Patireia o te Atua te rua.—Mataio 6:31-33.

¹⁸ E maata te au mapu Kerititiano kare i akavareia e Satani. Ei akaraanga, karanga a Kiana, e 20 ona mataiti: “Kua kite au e  na te Patireia o te Atua anake e akatikatika i to tatou au manamanata.” Akapeea tona manakonakoanga i te akakeu i tona aerenga manako e tona oraanga? Ka tauturu te reira iaia kia akamaara e tuatau poto ua to te au mea o teianei ao. Kare aia i tauta i te kimi puapinga i roto i teia akatereanga, mari ra kua taangaanga a Kiana i tona taime e te maroiroi no te tavini ia Iehova.

19, 20 Akapeea tatou me taangaanga meitaki i te Tuatua a te Atua?

¹⁹ Ko te koke a te au vaeau Roma, e 50 centimeter (20 inches) te reira i te roaroa. E tu karape to ratou i te taangaanga i te koke no te mea ka apiipii ratou i te taangaanga i te reira i te au rā ravarai.

²⁰ Akakite te apotetoro ko Paulo e kua aite te Tuatua a te Atua ki te koke. Na Iehova i oronga mai i te reira. Inara ka anoanoia tatou kia taangaanga meitaki i te reira no te paruru i to tatou akarongo me kore i te akatano i to tatou aerenga manako. (2 Korinetia 10:4, 5; 2 Timoteo 2:15) Akapeea koe me taangaanga meitaki i te reira? Karanga a Sebastian, e 21 ona mataiti: “Ka tata au e okotai irava mei te pene ravarai o taku tatau anga Pipiria. Te koikoi nei au i taku au irava reka roa atu.” Ka tauturu teia iaia kia mārama i to Iehova aerenga manako. Karanga a Daniel: “I roto i taku tatau anga Pipiria, ka iki au i te au irava te ka tauturu i te au tangata i roto i te angaanga tutu aere. Kua kite mai au e ka akarongo mai te tangata me kite ratou i toou inangaro maata no te Pipiria e te tauta ra koe i te tauturu ia ratou.”

21. Eaa te tumu kare tatou e mataku ia Satani e te au temoni?

²¹ Mei ta tatou i kite mai mei te akaraanga o te au mapu i roto i teia atikara, kare tatou e anoanoia kia mataku ia Satani e te au temoni. E tika e ririnui ratou, inara e ririnui atu a Iehova ia ratou. E kare ratou e ora e tuatau ua atu. Ka tapekaia ratou e kare e rauka akaou i te tamamae i tetai ua atu tangata no te Tauatini Mataiti o ta Karaiti Tutaraanga, e i te openga ra ka takoreia atu ratou. (Apokalupo 20:1-3, 7-10) Kua kite tatou i to tatou enemi, tana akavareanga, e tona akakoroanga. Ma te tauturu a Iehova, ka rauka ia tatou i te patoi pakari i te Tiaporo!