Te Tumu ‘Kia Maata to Tatou Uua Anga’
“Ko te mea ïa e akakakāiaʼi taku Metua, kia maata to kotou ua anga; e riro kotou ei pipi naku i reira.”—IOANE 15:8.
1, 2. (a) Eaa ta Iesu i uriuri ki tana au pipi i te po i mua ake ka mate ei aia? (Akara i te tutu mua.) (e) Eaa i puapinga ai no tatou kia akamaara i te tumu ka tutu aere ei tatou? (ng) Eaa ta tatou ka uriuri i teianei?
I TE po i mua ake ka mate ei aia, kua akamaroiroi atu a Iesu i tana au apotetoro. Kua akapapu aia i tona inangaro maata ia ratou. Kua akakite katoa aia i te akatutuanga o te vine, tei uriuriia i te atikara i mua ake. Kua inangaro a Iesu i te akamaroiroi i tana au pipi ‘kia maata to ratou uua anga,’ koia oki, kia tutu aere i te karere o te Patireia ma te tamou marie.—Ioane 15:8.
2 Inara, kua akakite a Iesu ki tana au pipi eaa ta ratou ka anoanoia kia rave, pera katoa te tumu ka anoanoia ratou kia rave i te reira. Kua akamārama aia i te tumu ka anoanoia ratou kia tutu aere ua atu rai. E mea puapinga teia no tatou kia akamaara katoa i te tumu ka tutu aere ua atu tatou. Ka akakeu teia ia tatou kia tamou marie i te tutu aere “ei kite no te pa enua ravarai.” (Mataio 24:13, 14) I teia atikara, ka uriuri tatou e ā tumu mei te Pipiria kia tutu aere tatou. Pera katoa, ka uriuri tatou e ā tauturu ta Iehova i oronga mai kia uua tatou i te ua.
KA AKAKAKA TATOU IA IEHOVA
3. (a) Kia tau kia Ioane 15:8, eaa te tumu puapinga rava atu kia tutu aere tatou? (e) Eaa te au ua vine i roto i ta Iesu akatutuanga, e eaa teia akaaiteanga i tau ei?
3 Te tumu puapinga rava atu kia tutu aere tatou, koia oki ka inangaro tatou i te akakaka ia Iehova e te akatapu i tona ingoa. (E tatau ia Ioane 15:1, 8.) Te akakite anga a Iesu i te akatutuanga o te vine, kua akaaite aia ia Iehova ki tetai tangata tanu kai, tei akono i te vine. Karanga a Iesu e koia te vine e ko tana au pipi te au rara. (Ioane 15:5) No reira i roto i teia akatutuanga, ko te au ua vine, ko te ua teia ta te au pipi a Iesu ka uua mai, me kore ko te angaanga tutu aere ta ratou e rave ra. Akakite a Iesu ki tana au apotetoro: “Ko te mea ïa e akakakāiaʼi taku Metua, kia maata to kotou ua anga.” Me uua mai te vine i te au ua meitaki, ka akangateitei te reira i te tangata tanutanu. Pera katoa, me rave maroiroi tatou i te tutu aere i te karere o te Patireia, ka akangateitei, me kore ka akakaka tatou ia Iehova.—Mataio 25:20-23.
Me maroiroi tatou i te tutu aere i te Patireia, ka akangateitei tatou ia Iehova
4. (a) Akapeea tatou me akatapu i te ingoa o te Atua? (e) Eaa toou manako no te tika anga kia akatapu i te ingoa o te Atua?
4 Kua tapu takere te ingoa o te Atua. Kare tatou e anoanoia kia akatapu maata atu i te reira. No reira akapeea tatou me akatapu i te ingoa o te Atua me tutu aere? Teia ta te peroveta ko Isaia i tuatua: “Ko Iehova Sabaota ra—ta kotou e akatapu.” (Isaia 8:13) Ka akatapuia te ingoa o te Atua, ko Iehova, me akamanako tatou e ko te ingoa maata rava atu teia, e me tauturu tatou i tetai ke kia mārama e e tapu te reira. (Mataio 6:9) Ei akaraanga, me tutu aere tatou i te tuatua mou ki te tangata no runga i te au tu manea o Iehova, e tona akakoroanga no te tangata kia noo mutukore i te Parataito, ka tauturu tatou ia ratou kia kite e pikikaa te au mea kino pouroa ta Satani i karanga no Iehova. (Genese 3:1-5) Ka akatapu katoa tatou i te ingoa o te Atua me tauturu tatou i te tangata kia kite e kua “tau te kakā ia koe, e [Iehova], e te akangateitei, e te mana.” (Apokalupo 4:11) Karanga a Rune, tei painia no tetai 16 mataiti: “Mataora tikai au i te kite e kua rauka iaku i te tutu aere no runga i Tei Anga i te ao katoa e pini ua ake. E kua akakeuia au kia tutu aere ua atu rai.”
INANGARO TATOU IA IEHOVA E TANA TAMAITI
5. (a) Eaa te tumu ka tutu aere ei tatou mei tei taikuia ia Ioane 15:9, 10? (e) Akapeea a Iesu te tauturu anga i tana au pipi kia mārama e ka anoanoia ratou kia tamou marie?
5 E tatau ia Ioane 15:9, 10. Te rua o te tumu ka tutu aere tatou i te karere o te Patireia, no te mea te inangaro ra tatou ia Iehova e Iesu. (Mareko 12:30; Ioane 14:15) Akakite a Iesu ki tana au pipi ‘kia noo ratou ma te akaperepereia e ïa.’ Eaa a Iesu i tuatua ai i teia? No te mea kua kite aia e ka anoanoia tana au pipi kia noo ei Kerititiano mou ma te tamou marie. Te tika, ia Ioane 15:4-10, kua taangaanga maata a Iesu i te tuatua “kia noo” ei tauturu i tana au pipi kia mārama e ka anoanoia ratou kia tamou marie.
6. Akapeea tatou me akaari e ka inangaro tatou kia akaperepereia e Karaiti?
6 Akapeea tatou me akaari e ka inangaro tatou kia akaperepereia e kia marekaia e Karaiti? Na te akarongo anga kiaia. Te pati ua maira a Iesu kia rave tatou i tana i rave. Karanga aia: “Mei iaku i akono i te au akauenga a taku Metua ra, e e vai akaperepereia mai au e ia.” Kua akanoo a Iesu i te akaraanga no tatou.—Ioane 13:15.
7. Eaa te pirianga o te akarongo ki te aroa?
7 Kua akataka meitaki a Iesu e te piri atura te akarongo ki te aroa, te na ko anga: “Tei iaia taku au akauenga, e kua akono aia i te reira ra, koia tei anoano mai iaku.” (Ioane 14:21) No ko mai ta Iesu akaueanga i tona Metua, no reira me akarongo tatou ki ta Iesu akaueanga no te tutu aere, te akaari katoa ra tatou e te inangaro ra tatou ia Iehova. (Mataio 17:5; Ioane 8:28) E me akaari tatou kia Iehova e Iesu e te inangaro ra tatou ia raua, ka akaperepere raua ia tatou.
KA AKAMATAKITE TATOU I TE TANGATA
8, 9. (a) Eaa tetai akaou tumu kia tutu aere tatou? (e) Akapeea te au tuatua a Iehova ia Ezekiela 3:18, 19 e te 18:23 te akakeu anga ia tatou kia tutu aere ua atu?
8 Te toru o te tumu kia tutu aere tatou, koia oki ka inangaro tatou i te akamatakite i tetai ke no te rā o Iehova e vaitata maira. I roto i te Pipiria, kua akatakaia a Noa e ko “te tangata i ako.” (E tatau ia 2 Petero 2:5.) I mua ake ka tupu ei te Vaipuke, papu kua kapiti mai ki roto i te karere a Noa ki te tangata, tetai akamatakiteanga no te mate e aere maira. Eaa te tumu? No te mea karanga a Iesu: “Mei tei te tuatau i muao i te diluvi ra, te kaikai ra ratou e te inu ra, te akaipoipo ra, e te orongaia ra kia akaipoipoia, e tae rava atu ki te rā i tomo ei a Noa ki roto i te araka, Kare rava i kite, e rokoia iora ratou e te diluvi, e ope takiri akera ratou i te mate; koia katoa te aerenga mai o te Tamaiti a te tangata nei.” (Mataio 24:38, 39) Noatu e kua kopae te maataanga o te tangata ia Noa, kua tutu tiratiratu rai aia i te karere akamatakiteanga a Iehova.
9 I teia rā, ka tutu aere tatou i te karere o te Patireia, e rauka ai i te tangata i te kite Ezekiela 18:23) Me tutu aere tatou mei tera are ki tera are e ki te ngai tangata, ka akamatakite tatou i te tangata e te vaitata maira te Patireia o te Atua te ka takore i teia ao kino.—Ezekiela 3:18, 19; Daniela 2:44; Apokalupo 14:6, 7.
eaa ta te Atua ka rave no te tangata a te tuatau ki mua. Mei ia Iehova, ka inangaro tikai tatou i te tangata kia akarongo mai i te karere “e kia ora.” (INANGARO TATOU I TE TANGATA
10. (a) Eaa te tumu ka tutu aere tatou mei tei taikuia ia Mataio 22:39? (e) Akapeea a Paulo e Sila te tauturu anga i te tangata tiaki mouauri i Philipi?
10 Te ā o te tumu ka tutu aere ua atu tatou, no te mea te inangaro ra tatou i te tangata. (Mataio 22:39) Ka riro teia inangaro ei tauturu ia tatou kia tutu aere ua atu no te mea kua kite tatou e ka taui te tangata i to ratou tu e to ratou turanga. Ei akaraanga, kua titiri te aronga patoi ia Paulo e Sila ki roto i te are auri i Philipi. Inara i te roa anga po, kua tupu tetai ngaruerue enua tei akangaueue i te are auri e kua akatuera i te ngutupa. Kua mataku tikai te tiaki mouauri penei ka oro te au mouauri e kua inangaro aia i te tamate iaia uaorai. Inara kua tāpu a Paulo iaia ma te ava atu: “Auraka e toetoea ia koe uaorai.” Ui atura te tangata tiaki: “Eaa au e oraʼi au?” Tuatua atura a Paulo e Sila kiaia: “E akarongo i te Atu ia Iesu Mesia, ka ora ïa koe.”—Angaanga 16:25-34.
Tutu aere tatou no to tatou inangaro ia Iehova, ia Iesu, e te tangata (Akara i te parakarapa 5, 10)
11, 12 (a) Eaa ta te tua no te tangata tiaki mouauri e apii maira no ta tatou angaanga tutu aere? (e) No teaa ra tatou ka inangaro ei i te tutu aere ua atu?
11 Eaa ta te tua o te tangata tiaki mouauri e apii maira ia tatou no te angaanga tutu aere? Kua kitea te taui anga o te tangata tiaki mouauri i muri ua ake i te ngaruerue enua e kua pati i te tauturu. Pera katoa, te aronga tei kore i akarongo ki te karere a te Pipiria i mua ana, penei ka taui to ratou tu e ka kimi tauturu me tupu tetai tumatetenga kia ratou. Ei akaraanga, penei kua poitirere tetai pae no tei ngere i te ngai angaanga me kore kua tataraia e te tokorua. Penei ka maromaroa tikai tetai pae no te mea e maki kino to ratou me kore kua takake atu to ratou akaperepere. Me tupu teia au mea, penei ka ui te tangata i te au uianga no runga i te oraanga, te au uianga kare ratou i manako ana. Penei ka akamanako ratou, ‘Eaa taku ka rave e ora ai?’ Penei ka inangaro ratou i te akarongo no te taime mua ki ta tatou karere o te manakonakoanga.
12 No reira me tutu tiratiratu ua rai tatou, ka papa ua tatou i te tauturu me inangaro te tangata i te āriki i te pumaana. (Isaia 61:1) Karanga a Charlotte, tei painia no tetai 38 mataiti: “Kare te tangata e kite e ka aere ratou kiea. Ka anoanoia ratou kia akarongo mai ki te nuti meitaki.” Karanga a Ejvor, tei painia no tetai 34 mataiti: “E manganui te tangata i teia tuatau te kite ra i te mamae ngakau. Ka inangaro tikai au i te tauturu ia ratou. Ka akakeu te reira iaku kia tutu aere.” Ma te papu, te riro ra te inangaro i te tangata ei tumu meitaki tikai no te tutu aere!
TE AU TAUTURU NO TE TAMOU MARIE
13, 14 (a) Eaa te tauturu tei taikuia ia Ioane 15:11? (e) Akapeea tatou e rekareka ai mei ia Iesu rai? (ng) Akapeea te tu rekareka me tauturu ia tatou kia tutu aere?
13 I taua po i mua ake ka mate ei aia,
kua taiku a Iesu i te au apinga te ka tauturu i tana au apotetoro kia uua i te ua. Eaa teia au apinga, e akapeea te reira me tauturu ia tatou i teia tuatau?14 Te rekareka. E apainga teiaa ainei te tutu aere? Kare. I muri ake te akakiteanga a Iesu i te akatutuanga o te vine, karanga aia e ka rauka te rekareka mei iaia rai, me tutu aere tatou. (E tatau ia Ioane 15:11.) Akapeea? E akamaara, i roto i ta Iesu akatutuanga, kua akaaite aia iaia uaorai ki tetai vine e ko te au rara ki tana au pipi. Ka rauka i te au rara tetai vai e te kai meitaki me piri kapiti ua te reira ki te vine. Pera katoa, ka rekareka ua rai tatou mei ia Iesu rai me noo kapiti e me taokotai tatou kiaia ma te aru vaitata i tona au takainga. Ka rauka i reira ia tatou te tu rekareka tei rauka iaia, no te rave anga i te anoano o te Atua. (Ioane 4:34; 17:13; 1 Petero 2:21) Karanga a Hanne, tei painia no tetai 40 tuma mataiti, “Kua riro te rekareka taku i kite i roto i te angaanga tutu aere ei akakeu iaku kia tavini ua atu ia Iehova.” Ka akatupu te rekareka i te tu maroiroi kia tutu aere ua atu tatou noatu kare te maataanga o te tangata e akarongo mai.—Mataio 5:10-12.
15. (a) Eaa te tauturu tei taikuia ia Ioane 14:27? (e) Akapeea te ‘au me tauturu ia tatou kia uua i te ua?
15 Te ‘au. (E tatau ia Ioane 14:27.) I te akamataanga o te aiai i mua ake ka mate ei a Iesu, akakite aia ki tana au apotetoro: “Ko taku nei au taku e o atu no kotou.” Akapeea to Iesu tu ‘au me tauturu ia tatou kia tutu aere ua atu? Me tutu aere ua atu tatou, ka rauka te tu ‘au no te mea kua kite tatou e te mataora ra a Iehova e Iesu. (Salamo 149:4; Roma 5:3, 4; Kolosa 3:15) Karanga a Ulf, tei painia no tetai 45 mataiti, “E roiroi ua ana au i te angaanga tutu aere, inara ka tupu te tu merengo tikai e kua puapingaia toku oraanga.” Rekareka tikai tatou kua kiteaia te tu ‘au!
16. (a) Eaa te tauturu tei taikuia ia Ioane 15:15? (e) Akapeea te au apotetoro te vai ua anga ei au oa no Iesu?
16 Te pirianga taeake. I muri ake i to Iesu akakiteanga ki tana au apotetoro e ka inangaro aia kia rekareka ratou, kua akamārama aia i te puapinga kia akaari ua rai i te tu aroa. (Ioane 15:11-13) E oti karanga aia: “Kua karanga ra au kia kotou e, e oa.” E mea meitaki kia riro mai tatou ei oa no Iesu! Inara akapeea te au apotetoro i te vai ua anga ei oa nona? Akamārama a Iesu: ‘Kia aere kotou e kia uua i te ua.’ (E tatau ia Ioane 15:14-16.) Koia oki, kia tutu aere ua atu rai ratou. E rua mataiti i mua atu, akakite a Iesu ki tana au apotetoro: “E tutu aere kotou, na ko atu, Te vaitata mai nei te basileia o te ao.” (Mataio 10:7) No reira, i te po i mua ake i tona matenga, kua akamaroiroi a Iesu i tana au pipi kia tutu aere ma te tamou marie. (Mataio 24:13; Mareko 3:14) E tika, kua kite a Iesu e kare teia akaueanga i te mea māmā. Inara ka rauka rai ia ratou kia riro mai, e kia vai ua rai ei oa nona. Akapeea? Na roto i tetai akaou tauturu.
17, 18 (a) Eaa te tauturu tei taikuia ia Ioane 15:7? (e) Akapeea te reira i te tauturu anga i te au pipi a Iesu? (ng) Eaa te ka tauturu ia tatou i teia tuatau?
17 Te au pauanga ki ta tatou pure. Karanga a Iesu: “E pati ua kotou i ta kotou e anoano ra, e e orongaia mai ïa kia kotou.” (Ioane 15:7, 16) Papu kua akamaroiroi tikai te totou a Iesu i te au apotetoro! * (Akara i te tataanga rikiriki i raro.) Kare te au apotetoro i mārama tikai ana e kare e roa atu ka mate a Iesu. Kare te aiteanga o tona matenga e kare o ratou tauturu. Ka rauka ia Iehova i te pau i ta ratou pure ma te tauturu i ta ratou angaanga tutu aere. E kua rave rai aia i te reira. I muri ake i to Iesu matenga, kua pati akatenga te au apotetoro ia Iehova no te tu ngakau toa, e kua pau mai a Iehova i ta ratou pure.—Angaanga 4:29, 31.
Papu roa ka pau mai a Iehova i ta tatou pure no te tauturu (Akara i te parakarapa 18)
18 E tika te reira i teia tuatau. Me tutu aere tatou ma te tamou marie, ka vai ua tatou ei oa no Iesu. Papu roa e te papa ua ra a Iehova i te pau mai i ta tatou pure no te tauturu me ngata te angaanga tutu aere. (Philipi 4:13) Mataora tikai e te pau maira a Iehova i ta tatou pure e kua riro a Iesu ei oa no tatou. Ka riro teia au tauturu no ko mai ia Iehova ei akamaroiroi ia tatou kia uua i te ua.—Iakobo 1:17.
19. (a) No teaa ra tatou ka tutu aere ua atu ei? (e) Eaa te ka tauturu ia tatou kia akaoti i te angaanga tei orongaia mai e te Atua?
19 I teia atikara, kua apii tatou e ā tumu kia tutu aere ua atu: kia akakaka ia Iehova e te akatapu i tona ingoa, te akaari i to tatou inangaro no Iehova e Iesu, te akamatakite i te tangata, e te akaari i to tatou inangaro no te tangata. Kua apii katoa tatou e ā tauturu: te rekareka, te tu ‘au, te pirianga taeake, e te pauanga ki ta tatou pure. Ka akamaroiroi teia au tauturu ia tatou kia akaoti i te angaanga tei orongaia mai e te Atua. Ka mataora tikai a Iehova me kite aia ia tatou e angaanga pakari ra ‘kia maata to tatou uua anga’!
^ para. 17 I tana akoanga i te au apotetoro, kua akamaara putuputu a Iesu e ka pau mai a Iehova i ta ratou pure.—Ioane 14:13; 15:7, 16; 16:23.