1, 2. (a) Akapeea te au mea ta tatou e tatari nei i tuke ei ki te au mea ta te tangata e tatari ra? (e) Eaa ta tatou ka uriuri i teia atikara?

KUA oronga mai a Iehova i te au mea umere tikai no tatou kia tatari atu. Kua taputou aia kia akatapu i tona ingoa e te akatupu i tona anoano i te rangi e te enua nei. (Mataio 6:9, 10) Ko teia te mea puapinga rava atu ta tatou e tapapa nei. Kua taputou katoa a Iehova i te akameitaki ia tatou ma te ora mutukore, i te rangi me kore i te enua nei. Mei teaa atura te rekareka! (Ioane 10:16; 2 Petero 3:13) Te tapapa katoa nei tatou i te kite akapeea a Iehova me arataki e te turuturu i tona iti tangata i teia au rā openga.

² Te akakite maira te Pipiria ko te akarongo, “ko te tumu tikai ïa” o te au mea ta tatou e tatari nei. Tera te aiteanga ko te aronga e akarongo to ratou kua papu tikai e ka tupu te au mea ta Iehova i taputou mai. (Ebera 11:1) I tetai tua, e manganui i teia tuatau te tatari ra e te inangaro nei i te au apinga, inara kare i papu ia ratou e ka tupu te reira. Ei akaraanga, penei ka manako atu tetai kia re i te lottery, inara kare  aia e papu e ka peke iaia te re. I teia atikara, ka akara tatou eaa ta tatou ka rave kia akaketaketa i te akarongo i ta te Atua taputou. Ka uriuri katoa tatou akapeea te akarongo ketaketa me tauturu ia tatou i teianei.

3. No teaa ra tatou i irinaki ei ka tupu te au taputou a te Atua?

³ Kare tatou i anau ma te akarongo. Ei akatupu i te akarongo, ka anoanoia tatou kia tuku i te vaerua tapu o te Atua kia arataki i to tatou ngakau. (Galatia 5:22) Ka tauturu te vaerua tapu ia tatou kia kite ia Iehova. Me mārama tatou e koia te mana katoatoa e te pakari, ka papu ia tatou e ka rauka iaia i te rave i tana i taputou mai. Te taiku katoa ra a Iehova i tana au taputou mei te mea rai kua tupu takere te reira i te na ko anga: “Kua tupu!” (E tatau ia Apokalupo 21:3-6.) Kua kite tatou te rave ua ra a Iehova i tana i taputou. Koia “te Atua pikikaa kore.” Ko teia te tumu ka irinaki tatou i te au mea ravarai tana i taputou no te tuatau ki mua.​—Deuteronomi 7:9.

4. Kua akatupu te au tavini o te Atua i te tuatau i topa i te akarongo ki roto i teaa?

⁴ Te taiku ra a Ebera pene 11 i te ingoa o te au tane e te au vaine e 16, e akarongo ketaketa to ratou i te au taputou a Iehova. Te taiku katoa ra i tetai aronga ke tei akamareka ia Iehova ‘no to ratou akarongo.’ (Ebera 11:39) Te tiaki ra ratou pouroa i te “uanga” ta Iehova i taputou mai. Kua kite ratou e na teia uanga e takore i te au enemi pouroa o te Atua e ka akariro i te enua ei parataito. (Genese 3:15) E akarongo ketaketa to teia au tavini o te Atua e ka akatu akaou mai a Iehova ia ratou. E tikai, kare ratou i tapapa ana i te oraanga i te rangi, no te mea kare a Iesu i akanoo ake i te reira. (Galatia 3:16) Mari ra, kua tapapa ratou i te noo e tuatau ua atu i te enua nei i roto i te parataito manea.​—Salamo 37:11; Isaia 26:19; Hosea 13:14.

5, 6. Eaa ta Aberahama e tona ngutuare tangata i tapapa atu? Akapeea ratou te akaketaketa anga i to ratou akarongo? (Akara i te tutu mua.)

⁵ Te akakite ra a Ebera 11:13 no runga i teia au tavini tiratiratu o Iehova: “I mate anake atura taua aronga ra ma te akarongo, kare rai i rauka tei tuatuaia maira, kua akara ra i taua au mea ra i te atea ke, e kua akarongo tikai, e kua āriki marie.” Kua tapapa ratou i te ao ou e kua tamanako ia ratou uaorai e noo ra i reira. Tetai ia ratou ko Aberahama. Karanga a Iesu e kua ‘rekareka a Aberahama kia kite’ aia i te reira taime. (Ioane 8:56) Kua tapapa katoa a Sara, Isaaka, Iakoba, e tetai pae i te Patireia, ‘ko te akatu e te tutara, ko te Atua’ me tutara ki rungao i te enua katoa.​—Ebera 11:8-11.

⁶ Akapeea a Aberahama e tona ngutuare tangata te akaketaketa anga i to ratou akarongo? Kua apii ua rai ratou no runga ia Iehova. Tetai taime, kua tuatua te Atua kia ratou na roto i te au angera, te au orama, e te moemoea. Penei kua apii katoa ratou mei te aronga pakarikari tei tiratiratu me kore mei te au tataanga taito. Kare rava a Aberahama e tona ngutuare i ngaropoina ana i te au taputou a te Atua, e kua reka tikai ratou i te akamanako oonu i te reira. Tei tupu, kare ratou i ekoko ana e ka akatupu a Iehova i tana taputou. No reira kua vai tiratiratu  kiaia noatu te mamae ngata e te takinokino.

7. Eaa ta Iehova i oronga mai ei akaketaketa i to tatou akarongo, e eaa ta tatou ka rave?

⁷ Eaa te ka tauturu ia tatou kia akaketaketa i to tatou akarongo? Kua oronga mai a Iehova i te Pipiria ei apii ia tatou no runga i tana au taputou no te tuatau ki mua. I roto i reira, te akaari maira aia eaa ta tatou ka rave kia mataora. Ko teia te tumu e mea meitaki no tatou kia tatau i te Pipiria i te au rā ravarai e kia aru i tana aratakianga. (Salamo 1:1-3; e tatau ia Angaanga 17:11.) Kua oronga katoa mai a Iehova i te ‘kai i te ora mou’ na roto i “te tavini akono meitaki e te pakari.” (Mataio 24:45) Mei te iti tangata o te Atua i te tuatau i topa, kia tatau putuputu tatou no runga i te au taputou a te Atua e te akamanako oonu i te reira. Ka tauturu teia ia tatou kia vai tiratiratu ki te Atua e kia tapapa i te tuatau me tutara tona Patireia i te enua katoa.

8. Akapeea te pure me akaketaketa i to tatou akarongo?

⁸ Eaa atu tei tauturu i te iti tangata o Iehova i te tuatau i topa kia akaketaketa i to ratou akarongo? Kua pure ratou kia Iehova i te pati tauturu, e i te kite anga ratou kua pau mai aia i ta ratou pure, kua ketaketa atu to ratou akarongo. (Nehemia 1:4, 11; Salamo 34:4, 15, 17; Daniela 9:19-21) Mei te reira katoa, me kite tatou e kua rongo mai a Iehova i ta tatou pure e kua oronga mai i ta tatou e anoano tikai ra i te ora mou, ka ketaketa atu to tatou akarongo iaia. (E tatau ia 1 Ioane 5:14, 15) Ka anoano katoaia tatou kia “pati” ia Iehova kia oronga mai i tona vaerua tapu kia maata atu to tatou akarongo.​—Luka 11:9, 13

9. Eaa tetai au apinga ta tatou ka tau kia pure?

⁹ Me pure tatou kia Iehova, eiaa e pati ua kia oronga mai aia i ta tatou e anoano ra. Ka tau katoa kia akameitaki e kia akapaapaa iaia i te au rā ravarai. Mei tera te tu, e maata te au mea umere tana i rave! (Salamo 40:5) Ka pure katoa te iti tangata o Iehova no to ratou au taeake takapini i teianei ao. Ei akaraanga, “e akamanako i te aronga i tapekaia ra.” Ka pure katoa tatou no te “au arataki.” Me kite tatou akapeea a Iehova te pauanga i ta tatou pure, ka ketaketa atu to tatou akarongo e ka akavaitata atu tatou kiaia.​—Ebera 13:3, 7.

10. Eaa tei tauturu i te manganui kia ngakau toa e kia vai tiratiratu ki te Atua?

¹⁰ Ia Ebera pene 11, karanga te apotetoro ko Paulo e: “I rauka akaou oki ta te au vaine tamariki i mate ra i akaora akaouia ïa: e tetai papaki akamamaeia ïa, kare i rave i te ora; kia rauka ia ratou te tuakaouanga i te mea meitaki rava.” (Ebera 11:35) E manganui tei akakoromaki i te au timata anga e kua vai tiratiratu ki te Atua no to ratou akarongo ketaketa i roto i te tuakaouanga ta te Atua i taputou. Kua kite ratou e i te tuatau ki mua, ka akatuakaou mai a Iehova ia ratou e ka ora e tuatau ua atu i te enua nei. E akamanako ana ia Nabota e Zekaria. Kua peiia raua ki te toka e kua mate no to raua akarongo ki te Atua. (1 Ariki 21:3, 15; 2 Paraleipomeno 24:20, 21) Kua tiria a Daniela ki raro i te vaarua liona, e kua tiriaia tona au oa ki roto i te aʼi kā. Kua puareinga ua ratou i te  mate kia kore e tiratiratu kore kia Iehova. E akarongo ketaketa to teia aronga e ka oronga mai a Iehova i tona vaerua tapu e ka tauturu ia ratou kia akakoromaki i te takinokino anga.​—Daniela 3:16-18, 20, 28; 6:13, 16, 21-23; Ebera 11:33, 34

11. Eaa te au timata anga ta tetai au peroveta i akakoromaki no to ratou akarongo?

¹¹ E maata te au peroveta, mei ia Mikaia e Ieremia, tei aviriia e tei tiria ki roto i te areauri. Tetai pae mei ia Elia, “i koka aere ua oki ratou i te medebara, e ki runga i te maunga, e te pipini anga ki roto i te au ana, e te au vaarua o te enua nei.” Pouroa ia ratou kua akakoromaki i te au timataanga e kua vai tiratiratu ki te Atua no te mea “ko te tumu tikai ïa i te au mea i tatariia nei.”​—Ebera 11:1, 36-38; 1 Ariki 18:13; 22:24-27; Ieremia 20:1, 2; 28:10, 11; 32:2.

12. Koai te akaraanga meitaki roa atu ka aru tatou? Eaa tei tauturu iaia kia akakoromaki i te au timata anga?

¹² Kua akakoromaki a Iesu Karaiti i te timata anga ngata roa atu e kua vai tiratiratu kia Iehova. Eaa tei tauturu iaia kia akakoromaki? Karanga a Paulo e: “Ko tei akakoromaki i te satauro, kare i akono i te akama, i te meitaki i tukuia mai ki mua i tona aroaro, e te noo ra i teianei i te pae katau i te terono o te Atua ra.” (Ebera 12:2) Kua akamaroiroi i reira a Paulo i te au Kerititiano i “akamaara marie” i te akaraanga o Iesu. (E tatau ia Ebera 12:3.) Mei ia Iesu rai, e maata te au Kerititiano i te anere mataiti mua tei mate no to ratou tu tiratiratu kia Iehova. Tetai ia ratou ko Anitipa. (Apokalupo 2:13) Kua rauka takere i teia au Kerititiano ta ratou tutaki, kare mei te au tavini o te Atua i mua ana tei tapapa i te oraanga i te enua nei. (Ebera 11:35) I muri ake i te riro anga mai a Iesu ei Ariki i te 1914, te au Kerititiano akatainuia tei mate, kua akatuia mai ki te oraanga i te rangi, e ka tutara kapiti ratou ma ïa ki rungao i te tangata.​—Apokalupo 20:4.

13, 14 Eaa te au timata anga ta Rudolf Graichen i akakoromaki, e eaa tei tauturu iaia kia vai tiratiratu ki te Atua?

¹³ Mirioni ua atu au tavini o te Atua te aru nei i te akaraanga o Iesu. Te akamanako oonu ra ratou i te au taputou a te Atua e te vai tiratiratu kiaia i te tuatau timata anga. Akamanako ana ia Rudolf Graichen, tei anauia i Tiamani i te 1925. I tona tamariki anga, kua tuku tona nga metua i te au tutu Pipiria ki runga i te paruru i to ratou are. Karanga aia e: “Kua akaari tetai tutu i te luko e te punua mamoe, te nemera e te punua puaka-nio, te punua puakatoro, e te liona​—tei noo kapiti ma te au, e na tetai tamaiti meangiti e arataki.” (Isaia 11:6-9) Kua tauturu teia ia Rudolf kia akamanako i te enua parataito e kua akaketaketa i tona akarongo.  Tei tupu, kua vai tiratiratu aia kia Iehova noatu kua takinokino pakariia no tetai tuatau roa e te Nazi Gestapo e oti i reira te Communist Stasi o Tiamani Itinga.

¹⁴ Kua akakoromaki katoa a Rudolf i te au timata anga ke ke. Kua tuia tona mama i te maki typhus e kua mate i roto i te puakapa tamamae anga i Ravensbrück. Kua taina tona papa i te pepa te karanga anga e kare aia i te Kite no Iehova. Inara kua akaketaketa ua rai a Rudolf i tona akarongo. Te tukuia anga aia ki vao i te areauri, kua tavini aia ei akaaere kotinga. E oti kua patiia aia ki te Apii Gileada e kua tukuia ki Chile, te ngai i tavini ei aia ei akaaere kotinga. I reira kua akaipoipo aia i tetai tuaine mitinari ko Patsy. Te mea mii ra, e tai mataiti i muri mai, kua mate ta raua pepe tamaine. E i muri mai, kua mate katoa a Patsy, e 43 rai ona mataiti. Noatu teia au timata anga kua tavini ua rai a Rudolf ia Iehova. Noatu e kua pakarikari aia e kua apikepike tona kopapa, kua tavini aia ei painia tamou e te tangata pakari. Ka  tatau tatou i tona tua oraanga i roto i Te Punanga Tiaki o Aukute 1, 1997, kapi 20-25. ^[1] (Akara i te manako poto.)

15. Oronga mai i te au akaraanga no te au taeake e te au tuaine i teia tuatau tei tavini ia Iehova ma te rekareka noatu e kua takinokinoia ratou.

¹⁵ I teia tuatau, e manganui te au taeake e te au tuaine tei tavini ia Iehova ma te rekareka noatu e kua takinokino pakariia ratou. E anere ua atu ia ratou tei tapekaia i Eritrea, Singapore e Korea Apatonga no te mea kare ratou e “rave i te koke.” (Mataio 26:52) Ei akaraanga, ko Isaac, Negede, e Paulos kua tukuia ki roto i te areauri i Eritrea no tetai 20 tuma mataiti! Kua takinokino tikaiia ratou i reira. E i teia au mataiti, kare ratou i rauka i te akaipoipo me kore i te akono i to ratou au metua. Noatu ra, kua vai tiratiratu ratou kia Iehova e e akarongo ketaketa to ratou. I teia taime e akangateitei ana te aronga tiaki mouauri ia ratou. Ka kiteaia tetai tutu no teia au taeake i runga i te website jw.org. E mata katakata to ratou, noatu e te mamae ra ratou.

16. Ka tauturu te akarongo ketaketa ia koe kia rave i teaa?

¹⁶ Kare te maata anga o te iti tangata o Iehova i tukuia ki roto i te areauri e kare i takinokino pakariia mei te au taeake tei taikuia. Inara e manganui tei mamae no te putaua, te tumatetenga natura, e te tamaki. Tetai pae kua aru i te akaraanga o Aberahama, Isaaka, Iakoba, e Mose i te akaruke i te rongonui e te apinganui kia akamou ki runga i te tavini anga ia Iehova. Eaa tei tauturu i to tatou au taeake kia tavini mataora ia Iehova? No to ratou inangaro iaia e te akarongo ketaketa ki tana au taputou. Kua kite ratou e ka akameitakiia tona au tavini tiratiratu ma te ora mutukore i te ao ou, e kare e tupu te kino.​—E tatau ia Salamo 37:5, 7, 9, 29

17. Akapeea koe me akaketaketa ua rai i toou akarongo, e eaa ta tatou ka uriuri i te atikara ka aru mai?

¹⁷ I teia atikara, kua kite tatou e ko te akarongo “ko te tumu tikai ïa i te au mea i tatariia nei.” Kia rauka teia akarongo, ka anoanoia kia pure kia Iehova e te akamanako oonu i tana au taputou. I reira ka rauka ia tatou i te akakoromaki i tetai ua atu timata anga. I te atikara ka aru mai ka uriuri tatou eaa te aiteanga kia rauka te akarongo.