1, 2. (a) Eaa te au akaaoanga a te maata anga o te aronga ke i teia tuatau? (Akara i te tutu mua.) (e) Eaa te akamaaraanga ta te apotetoro Paulo i oronga mai, e eaa te au uianga ka akamanako tatou?

TERE atu i te 30 mataiti i topa, ko Osei, kare aia i riro ake ei Kite no Iehova, kua akaruke i tona kainga i Ghana kia noo i Europa. ^[1] (Akara i te manako poto.) Karanga aia: “Kare i roa ana kua kite mai au e kare te tangata e manako mai ana iaku. E tuke tikai te turanga o te reva. Te akaruke anga au i te ngai toanga pairere, kua kite tikai au i te anu no te taime mua i toku oraanga, e kua akamata au i te aue.” No te mea e ākā angaanga no Osei i te apii i te reo, kua pou e tai tuma mataiti kia rauka mai tetai ngai angaanga meitaki. E no te mea e mamao aia mei tona kainga, kua mii aia i tona ngutuare tangata e kua maromaroa.

² E akamanako ana akapeea koe me inangaro kia akonoia mai naringa ko koe tei roto i teia turanga. E mea papu ka mataora koe me āriki pumaanaia i ko i te Are Uipaanga Patireia e te aronga tei inangaro ia koe noatu noea mai koe e te  kara o toou pakiri. Te tika, te akakite maira te Pipiria ki te au Kerititiano mou “auraka e akakore i te kite atu i te tangata ke ke.” (Ebera 13:2) No reira ka akamanako ana tatou i teia au uianga: Eaa to Iehova manako i te aronga ke ke? Ka anoanoia ainei tatou kia taui i to tatou manako no te aronga ke ke? E akapeea tatou me tauturu i tetai no te pa enua ke kia manako te ārikiia ra aia ki roto i ta tatou putuputuanga?

3, 4. Kia tau kia Exodo 23:9, akapeea te Atua te inangaro anga i te ngati Iseraela kia akono i te aronga ke, e no teaa ra?

³ I muri ake i ta Iehova akarangatira anga i tona iti tangata mei te tuikaa i Aiphiti, kua oronga aia i te au ture tei apii ia ratou kia takinga meitaki atu i te aronga ke tei aru ia ratou. (Exodo 12:38, 49; 22:21) No te mea kare te oraanga o te aronga ke i te mea māmā ua, kua akono a Iehova ia ratou ma te aroa. Ei akaraanga, kua akatikaia ratou kia koʼi aere i te toenga kai ta te aronga kokoti i akaruke.​—Levitiku 19:9, 10

⁴ Kare a Iehova i akaue ua i te ngati Iseraela kia akangateitei i te aronga ke, mari ra kua inangaro aia ia ratou kia akamaara mei teaa tikai to ratou turanga ei tangata ke. (E tatau ia Exodo 23:9.) I mua ake ka riro mai te ngati Iseraela ei tuikaa i Aiphiti, kare to Aiphiti i reka ana ia ratou no te mea e tuke to ratou tu. (Genese 43:32; 46:34; Exodo 1:11-14) E ngata te oraanga o te ngati Iseraela ei aronga ke. Kua inangaro a Iehova kia akamaara ratou i te reira e kia takinga meitaki i te aronga ke e noo ra i rotopu ia ratou.​—Levitiku 19:33, 34

5. Eaa te ka tauturu ia tatou kia takinga meitaki i te aronga ke mei ia Iehova rai?

⁵ Kare a Iehova i taui. No reira me aere mai te aronga ke ki ta tatou putuputuanga, auraka e akangaropoina te takinga meitaki ra a Iehova i teia aronga. (Deuteronomi 10:17-19; Malaki 3:5, 6) Tāpū e te akamanako i te au akaaoanga ta teia aronga ke ka aro atu. Ei akaraanga, penei kare ratou e mārama ana i te reo ou e kua akono tau koreia. Kia tauta tatou i te tauturu e te takinga meitaki ia ratou.​—1 Petero 3:8.

6, 7. Eaa tei akaari mai kua autu te au Kerititiano ngati Iuda i te manako papakitai?

⁶ Kua apii te au Kerititiano mua kia kopae i te au manako papakitai tei matauia i rotopu i te ngati Iuda. Ia Penetekote mataiti 33, kua akaari te au Kerititiano ngati Iuda i Ierusalema i te tu takinga meitaki e te aroa no te aronga ou mei te au pa enua ke ke. (Angaanga 2:5, 44-47) Te akaari maira kua mārama te au Kerititiano ngati Iuda i te aiteanga o te tu takinga meitaki, koia oki, “te kite atu i te tangata ke ke.”

⁷ Inara i taua tuatau ra kua tupu tetai apinga. Kua kopekope te au ngati Iuda Ereni e kare ta ratou vaine takaua i akono  meitakiia. (Angaanga 6:1) Ei rapakau i te manamanata kua iki te au apotetoro e itu tangata kia akapapu e ka akono meitakiia te katoatoa. Kua iki te au apotetoro i te au tangata e ingoa Ereni to ratou, penei ei akapumaana i te au vaine takaua.​—Angaanga 6:2-6.

8, 9. (a) Eaa te au uianga ka tauturu ia tatou kia kite me e manako papakitai to tatou? (e) Eaa ta tatou ka akakore takiri? (1 Petero 1:22)

⁸ Noatu kua kite tatou e me kare, ka akakeu maataia tatou e ta tatou peu. (Roma 12:2) Pera katoa, penei ka rongo tatou i te tangata tupu, te au oa angaanga, me kore te au oa apii e akakino ra i te au tangata mei tetai enua ke, te kopu, me kore te kara o te pakiri. Mei teaa te oonu i to tatou akakeu angaia e teia au manako tarevake? E akapeea tatou me ariu atu me aviri tetai i to tatou pa enua me kore ta tatou peu?

⁹ E tuatau tetai kua akavaavaa te apotetoro ko Petero i te au tangata kare i te ngati Iuda. Inara i te tuatau i aereia, kua apii aia i te akakore i teia au manako kino. (Angaanga 10:28, 34, 35; Galatia 2:11-14) Mei te reira katoa, me kite tatou i tetai ua atu manako papakitai me kore te ngakau parau i to tatou iti tangata, kia angaanga pakari i te akakore takiri i te reira. (E tatau ia 1 Petero 1:22.) Eaa te ka tauturu ia tatou kia pera? E akamaara e aronga apa ua tatou pouroa, noatu e noea mai tatou, e kare tetai ua atu e tau kia ora. (Roma 3:9, 10, 21-24) No reira kare e tumuanga kia manako e e meitaki atu tatou i tetai ke! (1 Korinetia 4:7) Kia manako tatou mei te apotetoro ko Paulo. Kua akakite aia ki tona au oa Kerititiano e “kare atura kotou i te tangata ke e te tuitarere” mari ra ko “te ngutuare oki o te Atua.” (Ephesia 2:19) Ka anoanoia tatou pouroa kia angaanga pakari i te akakore i tetai ua atu manako papakitai kia rauka i te akatangata ou.​—Kolosa 3:10, 11

10, 11 Akapeea a Boaza te aru anga i to Iehova manako i te aronga ke ke?

¹⁰ Kua aru te tangata akarongo ko Boaza i to Iehova manako no te aronga ke ke? Akapeea ra? I te tutaka anga a Boaza i tana ngai tanutanu i te tuatau mou, kua kite aia ia Ruta, e vaine ke no te enua ko Moabi. Te angaanga pakari ra aia i te koʼi titona. I raro ake i te Ture a Mose, e tikaanga to Ruta kia koʼi aere. Inara te rongo anga a Boaza e kua pati aia me ka akatikaia kia koʼi i roto i tana ngai tanutanu, kua umere tikai aia e kua akatika ia Ruta kia koʼi aere na roto i te au ruru titona.​—E tatau ia Ruta 2:5-7, 15, 16

¹¹ Tei tupu i muri mai te akaari maira i to Boaza manako no Ruta e tona turanga ngata ei aronga ke. Kua pati aia ia Ruta kia noo mai ki tona au mapu vaine kia kore aia e takinoia e te au tane e angaanga ra i te ngai tanutanu. Kua akapapu katoa aia kia rava tana kai e te vai mei te aronga angaanga rai. Kua akangateitei a Boaza i teia vaine putaua no te enua ke e kua akamaroiroi iaia.​—Ruta 2:8-10, 13, 14

12. Akapeea te tu takinga meitaki me akakeu i te aronga ke ke?

¹² Kua takinga meitaki a Boaza ia Ruta kare no tona aroa tiratiratu i tona metua ongai ko Naomi, mari ra no te mea kua akamata a Ruta i te tavini ia Iehova e kua kimi i Tana paruru anga. Te takinga meitaki anga a Boaza iaia, te aru ra aia i to  Iehova aroa tiratiratu. (Ruta 2:12, 20; Maseli 19:17) Pera katoa i teia tuatau me takinga meitaki tatou, penei ka tauturu tatou i “te tangata katoatoa” kia apii i te tuatua mou e kia kite te inangaro tikai ra a Iehova ia ratou.​—1 Timoteo 2:3, 4.

13, 14 (a) No teaa ra tatou ka aravei i te aronga ke ke i ko i te Are Uipaanga Patireia? (e) Eaa ra te ka tauturu ia koe kia tuatua atu ki tetai e peu ke tana?

¹³ Ka takinga meitaki tatou i te aronga ke ke na te āriki pumaana ia ratou i ko i te Are Uipaanga Patireia. Me kua tae ua mai te au tuitarere ki tetai enua ou, penei ka akamā ratou e ka noo ua ko ratou anake. No ta ratou peu e to ratou turanga, penei ka manako e tei raro ake ratou i te aronga mei tetai enua ke. No reira kia aravei tatou ia ratou na mua e kia takinga meitaki e te inangaro ngakau tae ia ratou. Me kua rauka i toou reo, ka tauturu te JW Language app ia koe kia kite akapeea me karanga e, kia orana i to ratou reo.​—E tatau ia Philipi 2:3, 4.

¹⁴ Penei kare koe e reka ana i te tuatua atu ki tetai e peu ke tana. Kia kopae i teia au manako, e akakite kiaia tetai apinga no runga ia koe. Penei ka kite mai koe e maata atu te au mea ta korua e reka ana i taau i manako. E akamaara e tu maroiroi e te paruparu ta te au peu enua ravarai.

15. Eaa te ka tauturu ia tatou kia mārama i te aronga e akatanotano ra ki tetai enua ou?

¹⁵ Ei tauturu i tetai ke kia kite e te ārikiia ra ratou ki roto i te putuputuanga, e ui kia koe uaorai, ‘Naringa ko au tetai i roto i te enua ke, akapeea au me inangaro kia akonoia mai?’ (Mataio 7:12) E akakoromaki marie i te aronga e akatanotano ra ki  tetai enua ou. I te akamataanga, penei kare tatou e mārama meitaki i to ratou aerenga manako e te tu me ariu mai ratou. Inara auraka e tapapa ia ratou kia manako e kia aite ki te au tangata i to tatou peu enua, mari ra eaa ka kore ei e āriki ia ratou no to ratou tu?​—E tatau ia Roma 15:7.

16, 17 (a) Eaa ta tatou ka rave kia piri vaitata ki tetai e peu ke tana? (e) Eaa te tauturu tau ta tatou ka oronga no te au tuitarere i roto i ta tatou putuputuanga?

¹⁶ Me akapou tatou i te taime no te apii no runga i te enua e te peu a te aronga ke, ka māmā i reira kia kite ia ratou. I te tuatau o te akamorianga ngutuare, e kimikimi no runga i te au peu a te au tuitarere i roto i ta tatou putuputuanga me kore te ngai tutu aere. Tetai atu mataara kia piri vaitata ki te au tuitarere koia oki kia pati ia ratou ki to tatou kainga no te kai manga. “Kua kiriti [a Iehova] i te ngutupa akarongo anga no te etene,” no reira e aru tatou iaia e te akatuera i to tatou kainga “ki to te ngutuare o te akarongo.”​—Angaanga 14:27; Galatia 6:10; Iobu 31:32.

¹⁷ Me akapou tatou i te taime ki tetai ngutuare tei tae mai no tetai enua ke ka tauturu teia ia tatou kia mārama e kia akaperepere i ta ratou tauta anga i te akatanotano ki ta tatou peu. Penei ka kite tatou e ka inangaroia te tauturu kia apii i te reo. Penei ka arataki katoa ia ratou ki  te au akaaereanga te ka tauturu ia ratou kia kimi i tetai ngai nooanga meitaki me kore te ngai angaanga. Ka riro teia tauturu tau ei tauturu maata i to tatou au taeake e te tuaine.​—Maseli 3:27.

18. Eaa te akaraanga no te akangateitei e te tu akameitaki ta te au tuitarere ka aru i teia tuatau?

¹⁸ E tika, ka inangaro te au tuitarere kia tauta pakari i te akatanotano ki te au peu o to ratou enua ou. Kua akanoo a Ruta i te akaraanga meitaki no teia. Te mea mua, kua akangateitei aia i te peu a tona enua ou na te patianga me ka akatikaia aia kia koʼi aere. (Ruta 2:7) Kare aia i manako ana e nona teia tikaanga e ka tau tetai ke kia tutaki iaia. Te rua, kua viviki aia i te akakite i tana akameitakianga no te tu takinga meitaki tei akaariia kiaia. (Ruta 2:13) Me aru te au tuitarere i teia tu manea tikai, ka akangateitei te au taeake e te au tuaine pera katoa te aronga o te reira ngai ia ratou.

19. Eaa te au tumuanga ka turou mai tatou i te aronga ke ke?

¹⁹ Mataora tikai tatou e kua akaari a Iehova i te aroa takinga meitaki e kua akatika i te tangata katoatoa kia akarongo ki te nuti meitaki. I to ratou enua anau, penei kare tetai pae i rauka i te apii i te Pipiria e te aere ki te au uipaanga a te iti tangata o Iehova. Inara i teianei, e tikaanga to ratou kia uipa kapiti e tatou, no reira kia tauturu tatou ia ratou kia kore e manako e e aronga ke ke ratou. Penei kare e maata ana ta tatou moni e kare e rauka i te tauturu maata, inara me takinga meitaki tatou i te aronga ke, ka aru tatou i to Iehova aroa no ratou. No reira ‘e aru tatou i te Atua’ na te tauta maroiroi anga kia turou mai i te aronga ke ke i rotopu ia tatou!​—Ephesia 5:1, 2.