1-3. (a) Eaa ta tatou ka akariro ei mea puapinga maata? (e) Eaa te au akaaoanga takake ta te aronga e apii ra i tetai reo ou ka aro atu, e eaa te au uianga ka uiia? (Akara i te tutu mua.)

I TEIA tuatau, te angaanga maroiroi nei te Au Kite o Iehova i te akatupu i te totou kia tutu aere “ki te pa enua katoa, e te au kopu, e te au reo, e te au iti-tangata.” (Apokalupo 14:6) Ko koe ainei tetai e apii ra i te reo ke? Tetai pae te tavini ra ei mitinari me kore te tutu aere ra i te au enua te anoano maataia ra te tauturu. E tetai pae kua akamata i te aere ki te au uipaanga a te putuputuanga reo ke i to ratou enua.

² Ka anoanoia te au tavini pouroa o te Atua kia akariro i to ratou turanga pae vaerua e to ratou ngutuare tangata ei mea puapinga maata. (Mataio 5:3) Inara i tetai taime, penei e maata roa ta tatou angaanga e e ngata kia kitea te tuatau no ta tatou uaorai apii puapinga. Inara e ngata atu te reira no te aronga i roto i te au putuputuanga reo ke.

³ Te aronga e tavini ra i tetai putuputuanga reo ke ka anoanoia kia apii i tetai reo ou, inara ka anoano katoaia kia  akapapu e te apii putuputu ra i te au mea oonu o te Atua. (1 Korinetia 2:10) Akapeea ratou me rave i teia me kare ratou e mārama meitaki ana eaa te tuatuaia ra i roto i te putuputuanga? E no teaa ra te au metua Kerititiano e tavini ra i roto i te putuputuanga reo ke ka akapapu e kia itae te tuatua mou i te ngakau o ta ratou tamariki?

4. Eaa te ka takino i to tatou pirianga kia Iehova? Oronga mai i tetai akaraanga.

⁴ Me kare tatou e mārama i te au apiianga Pipiria i te reo ke, ka riro te reira ei takino maata i to tatou pirianga kia Iehova. I te oki anga a Nehemia ki Ierusalema, kua kite aia e kare tetai au tamariki i kite i te tuatua i te reo Epera. (E tatau ia Nehemia 13:23, 24) No te mea kare teia au tamariki i mārama i te Tuatua a te Atua, kua apikepike to ratou pirianga kia Iehova.​—Nehemia 8:2, 8.

5, 6. Eaa ta tetai au metua Kerititiano e tavini ra i roto i te putuputuanga reo ke i kite mai, e eaa te manamanata?

⁵ Kua kite mai tetai au metua Kerititiano e tavini ra i roto i te putuputuanga reo ke e kua apikepike te pirianga o ta ratou tamariki kia Iehova. No te mea kare ta ratou tamariki e mārama meitaki ana eaa te tuatuaia ra i ko i te au uipaanga, kare te au akakiteanga e akakeu ia ratou. “Me tuatua no runga i te au mea pae vaerua,” i na Pedro ei, tei neke i tona ngutuare tangata mei Marike Apatonga ki Autireria, “te o maira te au manako ngakau.” ^[1] (Akara i te manako poto.)​—Luka 24:32.

⁶ Me tatau tatou i roto i tetai reo ke, penei kare to tatou ngakau e pakia me akaaiteia ki te tatau anga i to tatou uaorai reo. Pera katoa, no te ngata i te komunikeiti i tetai reo ke, penei ka roiroi tikai tatou e ka takinoia ta tatou akamorianga ia Iehova. No reira ia tatou e akono ra i te anoano kia tavini i roto i te putuputuanga reo ke, ka anoanoia rai tatou kia paruru i to tatou pirianga kia Iehova.​—Mataio 4:4.

7. Akapeea to Babulonia te māro anga ia Daniela kia āriki i ta ratou peu e te akonoanga?

⁷ Te akatuikaaia anga a Daniela e tona au oa i Babulonia, kua tauta to Babulonia i te māro ia ratou kia āriki i ta ratou peu e te akonoanga. Akapeea ra? Kua apiiia ratou ki “te reo o te au Kaledea ra” e kua orongaia te au ingoa Babulonia no ratou. (Daniela 1:3-7) Kua tapaia te ingoa ou o Daniela ki runga i te atua maata i Babulonia, ko Bela. No reira penei kua inangaro te Ariki ko Nebukanesa i te akakeu ia Daniela kia irinaki e e ririnui atu te atua o Babulonia i te Atua o Daniela ko Iehova.​—Daniela 4:8.

8. Akapeea a Daniela te akaketaketa anga i tona pirianga kia Iehova?

⁸ I Babulonia, kua orongaia te kai reka tikai a te ariki kia Daniela. Inara “te manako ra te ngakau o Daniela e” kare aia e aati i te ture a te Atua. (Daniela 1:8) No te mea kua apii ua rai aia i ‘te au buka tapu’ tei tataia i te reo Epera, kua akaketaketa aia i tona pirianga kia Iehova iaia e noo ra ki te enua ke. (Daniela 9:2) Te tika, e 70 mataiti i muri ake i tona tae  anga ki Babulonia, kua kapikiia rai aia i tona ingoa Epera ko Daniela.​—Daniela 5:13.

9. Eaa te tu o tei tata ia Salamo 119 ki te Tuatua a te Atua?

⁹ Ko tei tata ia Salamo 119, kua anoanoia kia akakoromaki i te akakino anga a te au mema o te paepae ariki. Inara kua kite mai aia i te maroiroi i roto i te Tuatua a te Atua, e kua tauturu teia iaia kia tuke ki tetai ke. (Salamo 119:23, 61) Kua tuku aia i te tuatua a te Atua kia akakeu oonu i tona ngakau.​—E tatau ia Salamo 119:11, 46

10, 11 (a) Eaa to tatou akakoroanga me apii i te Tuatua a te Atua? (e) Akapeea tatou e taeria ai to tatou akakoroanga? Oronga mai i tetai akaraanga.

¹⁰ Noatu e maata tikai ta tatou apainga i roto i te putuputuanga e te ngai angaanga, ka anoanoia tatou pouroa kia akanoo i te tuatau no ta tatou uaorai apii e te akamorianga ngutuare. (Ephesia 5:15, 16) Kare to tatou akakoroanga kia tatau maata i te au kapi me kore kia akapapa i tetai pauanga no te uipaanga. Mari ra, to tatou akakoroanga kia tuku i te Tuatua a te Atua ei akakeu ia tatou e te akaketaketa i to tatou akarongo.

¹¹ Kia taeria to tatou akakoroanga, ka anoanoia kia akatupu i te tu tau. Me apii tatou, auraka e akamanako ua i to tetai ke anoano mari ra, e akamanako katoa i toou uaorai anoano. (Philipi 1:9, 10) Kia kite tatou e me akapapa no te angaanga tutu aere, te au uipaanga, me kore tetai ako, kare te aiteanga e ka akono i ta tatou e tatau ra kia tatou uaorai. Ei akaraanga, noatu e ka tongi te tangata tunu kai i tana e tunu ra i mua ake ka oronga ai i te reira, kare aia e ora me ko te reira ua tana ka kai. Me inangaro aia kia matutu tona kopapa, ka anoanoia kia akapapa i te kai meitaki nana uaorai. Mei tera te tu, me inangaro tatou i te akaketaketa i to tatou pirianga kia Iehova, ka anoanoia kia apii putuputu i te Pipiria. Ka riro teia apii oonu ei akamerengo i to tatou uaorai anoano.

12, 13 No teaa ra te manganui i manako ei e mea meitaki kia apii i te Pipiria i to ratou uaorai reo?

¹² E manganui tei tavini i roto i te putuputuanga reo ke tei manako e e mea meitaki kia apii putuputu i te Pipiria i ‘te reo, i anau ei ratou.’ (Angaanga 2:8) Kua kite katoa te au mitinari e kia maroiroi ua rai i roto i ta ratou tuanga angaanga i te enua ke, kare ratou e irinaki ua ki ta ratou e rongo ra i ko i te au uipaanga.

¹³ Ko Alain, tei apii i te reo Peresia no tetai varu mataiti, akakite aia e: “Me akapapa au no te au uipaanga i te reo Peresia, ka akamou au i toku manako ki runga i te reo. No te mea te taangaanga maata ra au i toku roro, kare toku ngakau e pakia mei te au manako pae vaerua taku  e tatau nei. No reira rai au i akanoo ei i te tuatau kia apii putuputu i te Pipiria e te au puka i toku reo anau.”

14. Eaa ta te au metua ka akapapu, e no teaa ra?

¹⁴ Kia akapapu te au metua Kerititiano e kia itae te tuatua mou i te manako e te ngakau o ta ratou tamariki. Akamanako ana ia Serge e tana vaine ko Muriel, tei tavini i tetai putuputuanga reo ke no tetai toru tuma mataiti. Kua kite mai raua e kare ta raua tamaiti, e 17 ona mataiti e reka ana i te angaanga orometua e te au uipaanga. “E riri ana aia i te tutu aere i tetai reo ke, inara i mua ana e reka ana aia i te tutu aere i tona reo anau, te reo Varani,” i karanga ai a Muriel. Akamārama a Serge: “Te kite anga maua e kua arai teia turanga i ta maua tamaiti kia kore aia e tere ki mua i te pae vaerua, kua iki maua i te oki ki ta maua putuputuanga i mua ana.”

15. (a) Eaa te ka tauturu i te au metua kia iki me ka taui i ta ratou putuputuanga? (e) Eaa te arataki anga ta Deuteronomi 6:5-7 e oronga ra ki te au metua?

¹⁵ Eaa te ka tauturu i te au metua kia iki me ka oki ratou ki te putuputuanga tei taangaanga i te reo ta te tamariki e mārama meitaki ra? Te mea mua, kia iki ratou me ka rava to ratou taime e te maroiroi i te apii i ta ratou tamariki kia inangaro ia Iehova e i taua taime rai kia apii i te reo ke. Te rua, penei ka kite mai ratou e kare ta ratou tamariki e inangaro i te tutu aere,  te aere ki te au uipaanga, me kore i te tavini i te ngai reo ke. Kia tau ki teia au tumu anga, penei ka iki te au metua i te oki ki te putuputuanga tei taangaanga i te reo ta te tamariki i mārama. I reira, me akatupu te tamariki i tetai pirianga ketaketa kia Iehova, penei ka iki te au metua i te oki ki te putuputuanga reo ke.​—E tatau ia Deuteronomi 6:5-7.

16, 17 Eaa tei tauturu i tetai au metua kia apii i ta ratou tamariki no runga ia Iehova?

¹⁶ Kua kite mai tetai au metua i te ravenga kia apii i ta ratou tamariki no runga ia Iehova i to ratou reo anau, ia ratou e aere ra ki te au uipaanga a tetai putuputuanga me kore pupu reo ke. Ko Charles e metua tane e toru ana tamaine mei te 9 ki te 13 mataiti. E piri ana ratou ki tetai pupu reo Lingala. Karanga aia: “Kua iki matou i te rave i te au tuanga apii e te akamorianga a te ngutuare ki te tamariki i to matou reo anau. Inara ka kapiti katoa matou i te au uriurianga e te tamataora anga i te reo Lingala kia mataora ratou i te apii i te reo.”

¹⁷ Ko Kevin e metua tane e rua ana tamaine e rima e te varu mataiti. Ka angaanga pakari aia i te apii i te tuatua mou ki tana nga tamaine no te mea kare raua e mārama meitaki ana i te au uipaanga a te putuputuanga reo ke ta te ngutuare e aere ana. Karanga aia: “E apii ana maua ko taku vaine i ta maua nga tamaine i te reo Varani, to raua reo anau.  Kua akanoo katoa matou i tetai akakoroanga kia aere ki tetai uipaanga reo Varani e tai taime i te marama, e i to matou tuatau orote ka aere matou ki tetai uruoaanga i roto i to matou reo anau.”

18. (a) Akapeea a Roma 15:1, 2 me tauturu ia koe kia rave i te ikianga meitaki no te tauturu i taau tamariki? (e) Eaa te au manako tauturu ta tetai au metua i oronga mai? (Akara i te manako poto.)

¹⁸ Ka iki te au ngutuare tangata tataki tai, eaa te mea meitaki roa atu no ta ratou tamariki e to ratou pirianga kia Iehova. ^[2] (Akara i te manako poto.) (Galatia 6:5) Karanga a Muriel e noatu kua inangaro raua ko tana tane i te tavini ua atu i roto i te putuputuanga reo ke, kua iki raua i te akaruke ei tauturu i ta raua tamaiti kia akaketaketa i tona inangaro ia Iehova. (E tatau ia Roma 15:1, 2.) I teia rā, kua kite a Serge e kua rave raua i te ikianga meitaki. Karanga aia: “Mei te tuatau i oki ei matou ki te putuputuanga reo Varani, kua tupu manea ta maua tamaiti i te pae vaerua e kua papetitoia. I teianei te tavini ra aia ei painia tamou. Te akamanako katoa nei aia kia oki ki tetai pupu reo ke!”

19, 20 Akapeea tatou me akaari i to tatou inangaro no te Tuatua a te Atua?

¹⁹ Inangaro a Iehova i te tangata katoatoa. Kua tuku mai aia i te Pipiria i te anere ua atu reo kia rauka i “te tangata katoatoa” te kite i te tuatua mou. (1 Timoteo 2:4) Kua kite aia e ka akaketaketaia to tatou pirianga kiaia me tatau i te Pipiria i te reo ta tatou e mārama meitaki ra.

²⁰ Ka anoanoia tatou pouroa kia angaanga pakari i te akaketaketa ua rai i to tatou pirianga kia Iehova. Ka akapera tatou me apii putuputu i te Pipiria i te reo ta tatou e mārama meitaki ra. Ka tauturu katoa tatou i te ngutuare tangata kia paruru i to ratou turanga pae vaerua, e ka akaari e te inangaro tikai ra tatou i te Tuatua a te Atua.​—Salamo 119:11.