1. Eaa to tatou manako no runga i te akarongo?

KARE i rauka i te tangata katoatoa te akarongo. (2 Tesalonia 3:2) Inara te oronga maira a Iehova i te akarongo ki te aronga e akamori ra iaia. (Roma 12:3; Galatia 5:22) Mei teaa atura to tatou rekareka kua oronga mai a Iehova i te akarongo kia tatou!

2, 3. (a) Akapeea tatou e puapinga ai me e akarongo to tatou? (e) Eaa te au uianga ta tatou ka uriuri i teianei?

² Kua oronga mai a Iehova i tana Tamaiti akaperepere kia rauka i te akakore i te ara a te katoatoa tei akarongo ia Iesu. Ko te tumu teia ka rauka i te tangata i te riro mai ei oa no Iehova e kia ora e tuatau ua atu. (Ioane 6:44, 65; Roma 6:23) Mei teaa atura to Iehova takinga meitaki ia tatou! Noatu e aronga ara tatou tei tau kia mate, kua kite mai a Iehova e ka rauka rai ia tatou i te rave i te au mea meitaki. (Salamo 103:10) Kua tauturu aia ia tatou kia apii i te nuti meitaki no Iesu e tona atinga. Te akamataanga tatou i te akarongo ia Iesu e te aru iaia, kua tapapa tatou i te ora mutukore!​—E tatau ia 1 Ioane 4:9, 10

³ Inara eaa atu ta tatou ka apii no runga i te akarongo? Me kua kite tatou i ta te Atua i rave no tatou e tana ka rave a te  tuatau ki mua, ko te aiteanga ainei e akarongo to tatou? Ka akara ana tatou eaa atu ta tatou ka rave?

4. Me e akarongo to tatou, akapeea te reira me akakeu ia tatou?

⁴ Me e akarongo to tatou ia Iehova e Iesu, kare tatou i kite ua i ta raua i rave e ka rave no tatou. E anoano maata to tatou kia akono i te tu oraanga ta raua e apii maira ia tatou. E ka puareinga ua tatou i te tauturu i tetai ke kia kite ia raua. Karanga te apotetoro ko Paulo: “Kia aaki oki to vaa i te Atu ra ia Iesu, e kia akarongo to ngakau e kua akatu te Atua iaia mei te mate maira, ka ora ïa koe. Ko te ngakau oki to te tangata nei e akarongo, e kia rauka atu te tuatua-tika: ko te vaa oki tei aaki te tuatua e kia rauka atu te ora.”​—Roma 10:9, 10; 2 Korinetia 4:13.

5. No teaa ra te akarongo i puapinga roa ai, e eaa ta tatou ka rave kia rauka te akarongo ketaketa? Oronga mai i tetai akaraanga.

⁵ Te taka meitaki ua ra, kia mataora i te ora mutukore i te ao ou o te Atua, ka anoanoia tatou kia rauka te akarongo e kia akaketaketa ua atu i te reira. Kua aite te akarongo ki tetai pu rakau. Ka anoanoia tatou kia pîpî i te reira ki te vai kia matutu e kia tupu. Me kare tatou e pîpî ki te vai ka mae te reira e ka mate. Mei te reira katoa kia akapapu tatou kia vai oraora “tikai” to tatou akarongo e ka “tupu maata.”​—Tito 2:2; 2 Tesalonia 1:3; Luka 22:32; Ebera 3:12.

6. Eaa te nga mataara e rua te akataka maira a Ebera 11:1 i te akarongo?

⁶ Ia Ebera 11:1, te akataka maira te Pipiria i te akarongo. (E tatau.) (1) Te akarongo “ko te tumu tikai ïa i te au mea i tatariia nei.” Te au mea e tatariia nei te ō maira te au taputou a te Atua no te tuatau ki mua. Ei akaraanga, kua papu ia tatou e ka ope te kino e ka tae mai te ao ou. (2) Te akarongo ko “te kite ïa” me kore te akapapuanga tika, o “te au mea kare i akaraia nei.” Kua kite tatou e tika tikai te Atua ko Iehova, e Iesu Karaiti, te au angera, e te Patireia i te rangi, noatu e kare tatou e kite mata ia ratou. (Ebera 11:3) Akapeea tatou me akaari e akarongo tikai to tatou i te au taputou a te Atua e te au mea kare tatou e kite mata? Ka rave tatou i teia na roto i to tatou tu oraanga e ta tatou ka tuatua e ka rave.

7. Akapeea to Noa akaraanga te tauturu anga ia tatou kia mārama eaa te aiteanga kia rauka te akarongo? (Akara i te tutu mua.)

⁷ Eaa ta tatou ka apii mei ia Noa no runga i te akarongo? Karanga a Paulo no runga ia Noa e, “ka akakiteia mai ei aia e te Atua i te au mea kare rai i kitea maira, e rokoia iora e te mataku, i tarai ei i te pai, kia ora tona ngutuare.” (Ebera 11:7) No te mea e akarongo to Noa i ta Iehova i tuatua kiaia, kua akatu aia i te araka maatamaata. Penei kua ui tona au tangata tupu eaa te tumu i akatu ei aia i te araka. Ka papu ia tatou e kare a Noa i noo muteki ua. Te kapiki ra te Pipiria ia Noa e ko “te tangata i ako i te tuatua-tika ra.” (2 Petero 2:5) Kua akamatakite aia i te tangata e ka apai mai te Atua i tetai vaipuke ei takore i te aronga kino. Penei kua akakite aia kia ratou i ta Iehova i tuatua tikai kiaia: “Kua vaitata roa te openga o te tangata katoatoa ra iaku; kua ki oki te enua i te takinga-kino ia ratou,” e “teia au ka apai mai i te vai diluvi ki runga i te enua nei, kia mate takiri roa te au mea  ora e uti i te aʼo i raro ake i te rangi nei, te au mea katoa o te enua nei ka mate ïa.” I reira kua akamārama a Noa ki te tangata eaa ta ratou ka rave kia ora. Kua akaue a Iehova: “Ka tae koe ki roto i te araka.”​—Genese 6:13, 17, 18

8. Eaa ta Iakobo i tuatua no te akarongo?

⁸ Kua tata katoa a Iakobo no runga i te akarongo. Penei kua tata aia i teia i muri ua ake i ta Paulo tataanga ki te au Epera. Tata a Iakobo: “Ka akakite mai ana i toou akarongo kare e angaanga ra, ka akakite atu ei au ia koe i toku nei akarongo i taku nei angaanga.” (Iakobo 2:18) Kua akamārama a Iakobo e kia rauka te akarongo, e maata atu ta tatou ka rave i te irinaki. Te irinaki nei te au temoni i te Atua, inara kare o ratou akarongo ia Iehova. Mari ra, te patoi pakari ra ratou iaia. (Iakobo 2:19, 20) I tetai tua, me e akarongo to tetai tangata ka akamareka aia i te Atua na te raveanga i te au angaanga meitaki. Ko teia ta Aberahama i rave. Tata a Iakobo: “Kare aina to tatou metua ra ko Aberahama i akatikaia mai i te angaanga, ka apai ei aia i tana tamaiti ra ia Isaaka ki runga i te atarau ra? Te kite ra oki koe e na te akarongo i akatupu i tana angaanga, e no te angaanga i tika ravaʼi te akarongo?” Kua akamārama a Iakobo e e puapinga kore ua te akarongo kare e angaanga i te na ko anga e: “Mei te kopapa oki kia kore te vaerua, e mea mate ïa, koia katoa te akarongo kare e angaanga ra, e mea mate katoa ïa.”​—Iakobo 2:21-23, 26

9, 10 Eaa te aiteanga te taangaanga i te akarongo ki roto i te Tamaiti?

⁹ Tere atu i te 30 mataiti i muri mai, kua tata a Ioane i tana Evangeria e te au reta e toru. Mei tetai atu au tata Pipiria, kua mārama a Ioane i te akarongo. E maata te taime i roto i tana tataanga, kua taangaanga a Ioane i te verepa Ereni tei uriia i te reo Papaa ei “taangaanga i te akarongo.”

¹⁰ Ei akaraanga, kua akamārama a Ioane: “Ko te akarongo i te Tamaiti ra, e ora mutu kore tona: e te kore e akarongo i te Tamaiti ra, kare aia e kite i te ora; te vai ra ïa te riri o te Atua ki runga iaia.” (Ioane 3:36) Kia taangaanga i te akarongo ki roto i te Tamaiti, ka anoanoia kia akarongo kia Iesu. Te tika, ka kite tatou mei te au tataanga a Ioane, e kua karanga putuputu a Iesu kia rauka te ora mutukore, ka anoanoia kia taangaanga i te akarongo ki roto iaia e tona Metua.​—Ioane 3:16; 6:29, 40; 11:25, 26; 14:1, 12

11. Akapeea tatou me akaari kia Iehova to tatou tu āriki rekareka no te tuatua mou?

¹¹ Kua taangaanga a Iehova i tona vaerua tapu kia tauturu ia tatou kia mārama i te tuatua mou no runga iaia e tana Tamaiti e kia rauka te akarongo ia raua. (E tatau ia Luka 10:21.) Akapeea tatou me akaari kia Iehova to tatou tu āriki rekareka no te au mea tana i rave? Auraka rava tatou e akamutu i te akameitaki iaia no te akatika mai ia tatou kia rauka tetai pirianga kiaia na roto ia Iesu, koia “te tumu e te akaoti i to tatou akarongo.” (Ebera  12:2) E kia akaketaketa ua rai tatou i te akarongo na te pure putuputu kia Iehova e te apii i tana Tuatua.​—Ephesia 6:18; 1 Petero 2:2.

12. Me e akarongo to tatou, eaa ta tatou ka rave?

¹² Kia akaari ua rai tatou na roto i ta tatou au angaanga e e akarongo ketaketa to tatou i te au taputou a Iehova. Ei akaraanga, ka tutu ua rai tatou no runga i te Patireia o te Atua ki te tangata e ka tauturu ia ratou kia riro mai ei pipi na Iesu. Pera katoa “e takinga-meitaki tatou i te tangata ravarai, kia maata atura ki to te ngutuare o te akarongo ra.” (Galatia 6:10) E kia angaanga pakari tatou te ‘kopae i te tangata taito ra e tana katoa au ravenga’ no te mea kare tatou e inangaro i tetai ua atu apinga kia takino i to tatou pirianga kia Iehova.​—Kolosa 3:5, 8-10.

13. Mei teaa rai te puapinga o “te akarongo i te Atua”? Akapeea te Pipiria me akataka i te reira e no teaa ra?

¹³ Te karanga ra te Pipiria: “Kare ra e akarongo ra kare rava aia e mareka: ko te akamori i te Atua ra, kia akarongo aia e, e Atua e tikaʼi, e koia tei tutaki mai i te aronga i kimi tikai iaia.” (Ebera 11:6) Te akaari katoa ra te Pipiria ko “te akarongo i te Atua” tetai mea mua kia rauka i te au Kerititiano mou. E tuanga te reira i to tatou “tumu ra,” koia oki to tatou tango. (Ebera 6:1) I te pae mai i te akarongo, ka anoano katoaia tetai au tu puapinga kia rauka te pirianga oa kia Iehova e kia akono i te reira.​—E tatau ia 2 Petero 1:5-7; Iuda 20, 21

14, 15 Me akaaiteia ki te aroa, mei teaa te puapinga o te akarongo?

¹⁴ E maata atu te taime i taiku ei te au tata Pipiria i te akarongo i tetai ua atu tu. Ko te aiteanga ainei e ko te akarongo te tu puapinga roa atu ta tatou ka anoano?

¹⁵ Kua akaaite a Paulo i te akarongo ki te aroa. Tata aia: “E tei iaku te au akarongo katoa, e tikaʼi iaku kia apai ke i te maunga, e kare oku aroa, kare ua aku e puapinga.” (1 Korinetia 13:2) Karanga a Iesu e ko “te akauenga i maata o te ture” te inangaro i te Atua. (Mataio 22:35-40) Ka tauturu te aroa ia tatou kia rauka te au tu e manganui tei akamareka i te Atua. Ei akaraanga, te karanga ra te Pipiria no te aroa “e akarongo i te au mea katoa.” No reira ka tauturu  te aroa ia tatou kia rauka te akarongo i te au mea katoa ta te Atua e akakite maira i roto i te Pipiria.​—1 Korinetia 13:4, 7.

16, 17 Eaa ta te Pipiria e karanga ra no runga i te akarongo e te aroa? Ko teea i teia nga tu te mea maata atu, e no teaa ra?

¹⁶ E nga tu puapinga tikai te akarongo e te aroa e e maata te taime kua taiku kapiti te au tata Pipiria i teia nga tu. Kua akamaroiroi a Paulo i tona au taeake kia kakau i “te tapoki-umauma ra, ko te akarongo e te inangaro.” (1 Tesalonia 5:8) Kua tata a Petero no Iesu: “Ko ta kotou i anoano na, kore ua atu rai te kite iaia; . . . i te akarongo anga atu, kore ua rai kotou i te akara atu iaia i teianei.” (1 Petero 1:8) Kua ui a Iakobo i tona au taeake akatainuia: “Kare aina ko te aronga apinga kore o teianei ao ta te Atua i iki, ei aronga apinga maata i te akarongo ra, e ei aronga tuanga i te basileia tana i karanga e e oronga mai i te aronga i anoano iaia ra.” (Iakobo 2:5) Kua tata a Ioane e ko te akauenga a te Atua “kia akarongo tatou i te ingoa o tana Tamaiti o Iesu Mesia, e e aroa tatou ia tatou uaorai.”​—1 Ioane 3:23.

¹⁷ Inara kua tata katoa a Paulo: “E teianei, te vai nei te akarongo, te manakonako, e te aroa, e toru ra; ko tei maata ra i taua toru nei, ko te aroa ïa.” (1 Korinetia 13:13) I te tuatau ki mua, kare e anoano akaouia te akarongo i te au taputou a te Atua no te ao ou no te mea ka tupu te reira. Ka noo tatou i te oraanga umere ta te Pipiria e akataka maira. Inara ka anoanoia rai tatou kia inangaro i te Atua e te tangata. Te tika, ka tupu to tatou aroa no ratou e tuatau ua atu.

18, 19 Eaa tei tupu mai no te akarongo o te iti tangata o te Atua i teia tuatau, e koai tei tau kia akapaapaaia no te reira?

¹⁸ E akarongo to te iti tangata o Iehova i teia tuatau i te Patireia o te Atua e te turu ra i te reira. Te inangaro katoa ra ratou i tetai e tetai. Te tumu, no te mea te akatika ra ratou i te vaerua tapu o te Atua kia arataki i to ratou oraanga. (Galatia 5:22, 23) Eaa tei tupu mai? E tere atu i te varu mirioni au taeake e te au tuaine takapini i teianei ao tei rauka te au e te taokotai i roto i ta ratou putuputuanga. Te taka meitaki ua ra, e nga tu ririnui tikai te akarongo e te aroa.

¹⁹ Kua rauka anake teia tu taokotai ma te tauturu a to tatou Atua. Ka tau kia akapaapaa iaia no te reira. (Isaia 55:13) E mataora tikai tatou e nona “i ora oki [tatou] . . . i te akarongo.” (Ephesia 2:8) Ka tauturu ua rai a Iehova i te manganui kia rauka te akarongo iaia. I reira i te openga ka ki te enua i te aronga apa kore, tuatua tika, e te mataora tei akapaapaa ia Iehova e tuatau ua atu!