1, 2. (a) Eaa te angaanga puapinga rava atu i to Iesu oraanga, e eaa te tumu? (e) Eaa ta tatou ka rave, kia autu ei ‘au oa rave angaanga no te Atua’?

E TANGATA kamuta a Iesu Karaiti i mua ana e i muri akera, kua riro mai aia ei orometua. (Mareko 6:3; Roma 15:8) Kua rave meitaki aia i te nga angaanga e rua. Ei kamuta, kua apii aia akapeea me taangaanga i tana au apinga tarai ei maani i te au apinga rakau memeitaki. Ei orometua, kua taangaanga aia i tona kite oonu o te au Tuatua Tapu ei tauturu i te tangata noa ua nei, kia mārama i te tuatua mou mei roto i te Tuatua a te Atua. (Mataio 7:28; Luka 24:32, 45) I to Iesu 30 mataiti, kua akamutu aia i te angaanga kamuta e kua riro mai ei orometua, no te mea kua papu iaia e ko te angaanga puapinga rava atu teia tana ka rauka i te rave. Karanga aia e ko te tutu aere i te nuti meitaki tetai tumu i tuku mai ei te Atua iaia ki te enua nei. (Mataio 20:28; Luka 3:23; 4:43) Kua akamou a Iesu i tona oraanga ki runga i te tutu aere anga i te nuti meitaki, e kua anoano aia i tetai ke kia pera katoa.—Mataio 9:35-38.

² Kare te maataanga ia tatou e aronga kamuta, inara e au orometua tatou katoatoa no te apii i te nuti meitaki ki tetai ke. E angaanga puapinga rava teia e te o maira te Atua ki roto. Te tika, ka kapikiia tatou e ‘e au oa rave angaanga no te Atua.’ (1 Korinetia 3:9; 2 Korinetia 6:4) Ka akatika tatou ki te tata  salamo tei karanga: “E tuatua-mou taau mei muatangana mai.” (Salamo 119:159, 160) E tuatua mou ta Iehova tuatua. Te tumu te reira ka akapapu tatou e, e “tika oki i te tua i te tuatua-mou ra” i ta tatou angaanga tutu aere. (E tatau ia 2 Timoteo 2:15.) No reira ka tauta ua atu tatou kia karape i te taangaanga i te Pipiria, koia oki ta tatou apinga puapinga rava kia apii no runga ia Iehova, ia Iesu e te Patireia. Ei tauturu ia tatou kia autu i ta tatou angaanga tutu aere, kua oronga mai te akaerenga a Iehova i tetai au apinga apii memeitaki, e ka anoanoia tatou kia kite akapeea i te taangaanga i te reira. Tei roto teia au apinga tauturu i ta tatou Apinga Apii.

3. Eaa ta tatou ka akara i ta tatou angaanga tutu aere, e akapeea a Angaanga 13:48 me tauturu ia tatou kia rave i te reira?

³ Penei te manako ra koe, eaa ra te reira ka kapikiia ai e e Apinga Apii e kare i te Apinga Tutu Aere. Te tumu no te mea, te aiteanga o te “tutu aere” ko te akakitekite i tetai karere, inara, te aiteanga o te “apii,” kia akamārama i te karere e kia mārama te reira tangata i tana e akarongo ra e kia akakeuia kia taangaanga i tana e apii ra. I te tuatau poto e toe nei no teia akatereanga, kia akamou tatou ki runga i te akamataanga i te au apii Pipiria, e te apii i te tangata no runga i te tuatua mou, e kia riro mai ratou ei pipi na Karaiti. Tera te aiteanga kia maroiroi tatou i te kimi i “te aronga i akonoia no te ora mutu kore” e te tauturu ia ratou kia akamata i te tavini ia Iehova.—E tatau ia Angaanga 13:44-48.

4. Akapeea e kitea ai e tatou “te aronga i akonoia no te ora mutu kore”?

⁴ Akapeea e kitea ai “te aronga i akonoia no te ora mutu kore”? No te au Kerititiano mua, te ravenga anake e kitea ai teia aronga, na roto i te angaanga tutu aere. Akakite a Iesu ki tana au pipi: “E te oire e te vila ta kotou e tomo, e ui atu i to reira tangata e tau.” (Mataio 10:11) Ka anoanoia tatou kia akapera i teia tuatau. E tikai, me kare o te tangata tu ngakau tae, e e tu ngakau parau to ratou, me kore kare e manako mai ana i te Atua, kare tatou e tapapa atu e ka akarongo mai ratou i te nuti meitaki. Te kimi nei tatou i te au tangata ngakau tae, akaaka, e tei inangaro tikai i te kite i te tuatua mou. Ka akaaite tatou i ta tatou kimi anga i te tangata ki ta Iesu i rave i tona tuatau ei kamuta. I mua ake ka maani ei aia i tetai apinga noonoo anga, te ngutupa, te amo, e tetai apinga ke, te mea mua, ka kimi aia i te rakau tau. E oti ka tiki mai aia i tana pia kamuta, ka taangaanga i tona tu karape no te maani i tetai apinga. Pera katoa i teia tuatau, ka kimi tatou i te aronga ngakau tae na mua, e oti ka taangaanga i ta tatou au apinga apii ma te karape i te tauturu ia ratou kia riro mai ei pipi.—Mataio 28:19, 20.

5. Eaa ta tatou ka anoanoia kia kite no runga i te au apinga tauturu i roto i ta tatou Apinga Apii? Akamārama mai. (Akara i te tutu mua.)

⁵ I roto i te pia kamuta, e akakoroanga to te au apinga tarai tataki tai. Ei akaraanga, akamanako ana i te au apinga kamuta ta Iesu i taangaanga. * (Akara i te tataanga rikiriki i raro.) Kua anoano aia i te au apinga ei vaito, akairo, tipu, viri, e te aʼu i te rakau, pera katoa te au apinga kamuta no te akatika i te au rakau e te tapiri i te reira. Pera katoa ta tatou apinga tauturu tataki tai i roto i ta tatou Apinga Apii, e akakoroanga rai to ratou. No reira ka akara  tatou akapeea me taangaanga i teia au apinga tauturu puapinga.

6, 7. (a) Akapeea koe me taangaanga i te au kāti jw.org? (e) Eaa te tumu ka taangaanga tatou i te au patianga ki te uipaanga putuputuanga?

⁶ Te au kāti jw.org. E au apinga tauturu rikiriki ua teia, e mako no te akakite ki te tangata koai tatou e kia taki ia ratou ki ta tatou website jw.org. I runga i ta tatou website, e maata atu ta ratou ka kite no runga ia tatou pera katoa kia pati i tetai apii Pipiria na ratou. I teianei, e tere atu i te 400,000 tangata tei pati i tetai apii Pipiria na ratou na runga i te jw.org, e e anere ua atu i te au rā ravarai. E apai i tetai au kāti jw.org naau e e taangaanga i te reira, ia koe e tuatua ra ki te tangata taau ka aravei atu i te au rā ravarai.

⁷ Te au patianga. I runga i te patianga ki ta tatou uipaanga, te karanga ra: “Patiia atu nei koe kia apii i te Pipiria ki te Au Kite o Iehova.” Akakite katoa te reira, e ka rauka ia koe i te rave i teia i ko i “ta matou uipaanga na te katoatoa” “me kore ki toou uaorai puapii.” No reira, te akakite ra te patianga ki te tangata e koai tatou e te pati ra i te aronga “tei manako i to ratou anoano i te pae vaerua” kia apii i te Pipiria kia ratou. (Mataio 5:3, NW) E tikai, ka ārikiia te tangata kia aere mai ki ta tatou uipaanga noatu me ka āriki ratou i tetai apii Pipiria e me kare. Me aere mai ratou ki ta tatou uipaanga, ka kite ratou mei teaa te maata ta ratou ka apii no roto mai i te Pipiria.

8. No teaa i puapinga ai no te tangata kia aere mai ki tetai o ta tatou au uipaanga? Oronga mai i te akaraanga.

⁸ E mea puapinga kia pati ua rai tatou i te tangata ki tetai o ta tatou uipaanga. Eaa te tumu? No te mea me aere mai ratou, ka kite ratou e te apii ra te Au Kite o Iehova i te tuatua mou o te Pipiria e te tauturu ra i te tangata kia kite i te Atua, e kare te au akonoanga pikikaa e rave ana i te reira. (Isaia 65:13) Ei akaraanga, i tetai au mataiti i topa ake nei, kua kite mai tetai tokorua akaipoipo i Marike ko Ray e Linda i teia tuke anga. Kua irinaki raua i te Atua e kua inangaro kia kite meitaki atu iaia. No reira kua akamata raua i te atoro i te au akonoanga pouroa i to raua oire, ma te akara e rua apinga i mua ake ka piri atu ei ki te reira akonoanga. Te mea mua, kia apii raua i tetai apinga i roto i te akonoanga, e te rua, kia akamanea te tangata ei tavini no te Atua. Kua pou rai tetai tuatau, no te mea e maata te au akonoanga. Inara kua poitirere tikai raua. Kare rava raua i apii ana i tetai apinga, e e tau kore tikai te akamanea anga o te aronga aere pure. I muri ake i to raua atoro anga i te akonoanga openga i runga i ta raua akapapaanga, kua aere a Linda ki te angaanga e kua oki a Ray ki te kainga. I tona oki anga ki te kainga, kua akaoro a Ray na te pae i tetai Are Uipaanga Patireia. Kua manako aia, ‘Ka aere ua ana au ki roto, ka akara eaa te tupu ra.’ Ae, e mea meitaki tikai taku i kite mai! E tu takinga meitaki tikai e te oaoa to te katoatoa ma te akamanea taurekareka tikai. Kua noo a Ray ki mua roa e kua reka i tana e akarongo ra! Te akamaara maira teia, i ta te apotetoro ko Paulo akataka anga i te tangata tei aere ki te uipaanga no te taime mua te karanga anga: “Tei rotopu tikai te Atua ia kotou.” (1 Korinetia 14:23-25) I muri ake i te reira, kua aere mai a Ray ki te uipaanga i te au Tapati ravarai. E oti kua  akamata aia i te aere mai ki te au uipaanga ravarai o te epetoma. Kua akamata katoa a Linda i te aere mai ki te uipaanga, e noatu mei te 70 o raua mataiti, kua apii raua i te Pipiria e kua papetitoia.

9, 10 (a) Eaa ra i mama ei i te taangaanga i te aenga pepa? (e) E akamārama mai, akapeea me taangaanga i te aenga pepa Eaa ra te Patireia o te Atua?

⁹ Te au aenga pepa. E varu aenga pepa i roto i ta tatou apinga apii. E māmā ua i te taangaanga, e te angaanga meitaki ra te reira no te akamata i te au pukapuka anga. Mei te taime i oti mai ei teia au aenga pepa i te 2013, e rima pirioni tei neneiia! Aiteite ua te akanoonooanga o teia au aenga pepa. Me kite koe i te taangaanga i tetai, ka kite rai koe i te taangaanga i te katoatoa! Akapeea koe me taangaanga i te aenga pepa, kia akamata i te pukapuka anga ki tetai tangata?

¹⁰ Penei ka inangaro koe i te taangaanga i te aenga pepa Eaa ra te Patireia o te Atua? E akaari ki te reira tangata te uianga i te kapi mua e e ui: “I manako ana ainei koe eaa te Patireia o te Atua? Ka karanga ainei koe e . . . ?” E oti e ui ko teea pauanga e toru tana ka iki. I te mea e ka karanga koe e kua tano me kore kua tarevake tana pauanga, e akatuera i te aenga pepa ki te tuanga “Akakite ra te Pipiria e” e oti tatau i te nga irava, Daniela 2:44 e Isaia 9:5. I te openga o taau pukapuka anga, e ui i te uianga i te kapi openga “Kia Akamanako”: “Mei teaa ra te tu o te oraanga i raro ake i te Patireia o te Atua? Ka rauka ia koe i te pau i teia uianga i te pukapuka anga ka aru mai. Me aravei akaou korua, e taangaanga i te apii 7 o te poroutia Nuti Meitaki no ko i te Atua!, ko tetai apinga tauturu teia no te akamata i te apii Pipiria.

11. Eaa te akakoroanga o te makatini, e eaa ta tatou i kite no te reira?

¹¹ Te au makatini. Ko Te Punanga Tiaki e te Awake! te nga makatini nenei e te uri maataia i teianei ao! No te mea te tatau ra te tangata i teia nga makatini i te au enua ke ke, e au tumu manako to runga i te kapi mua tei rekaia e te tangata i te au ngai ravarai. Kia taangaanga tatou i teia au makatini ei tauturu i te tangata kia akamou ki runga i te mea puapinga rava atu i te oraanga i teia tuatau. Inara te mea mua, ka anoanoia tatou kia kite e ko teea te makatini tei akakoroia no tetai tu tangata.

12. (a) Kua akakoroia te Awake! noai ma, e eaa tona akakoroanga? (e) Eaa taau au tupuanga meitaki i rauka mei teia apinga tauturu?

¹² Kua akakoroia te Awake! no te aronga e meangiti ua me kore kare a ratou apinga i kite no te Pipiria. Penei kare ratou i kite i te au apiianga Kerititiano, penei kare ratou e irinaki ana i te akonoanga, e penei kare ratou i kite e ka riro te Pipiria ei tauturu i to ratou oraanga. Tetai akakoroanga puapinga o te Awake! ko te akakeu i te tangata e tatau ra e te ora ra te Atua. (Roma 1:20; Ebera 11:6) Te tauta katoa ra te reira i te tauturu i te tangata e tatau ra kia rauka te akarongo no te Pipiria ‘ei tuatua na te Atua, e koia tika rai.’ (1 Tesalonia 2:13) E toru makatini no te 2018 ma te tumu manako: “The Way of Happiness,” “12 Secrets of Successful Families,” e te “Help for Those Who Grieve.”

13. (a) Kua akakoroia Te Punanga Tiaki a te katoatoa noai ma? (e) Eaa taau au tupuanga meitaki i rauka mai mei teia apinga tauturu?

 ¹³ Te akakoroanga puapinga o Te Punanga Tiaki na te katoatoa, koia oki kia akamārama i te au apiianga Pipiria ki te tangata tei akangateitei takere i te Atua e te Pipiria. Penei kua kite ratou i tetai au mea no runga i te Pipiria, inara kare i mārama tikai ta te reira e apii ra. (Roma 10:2; 1 Timoteo 2:3, 4) Te pau ra te au makatini e toru no te 2018 i teia au uianga: “Puapinga ainei te Pipiria i teia tuatau?,” Eaa te ka tupu a te tuatau ki mua?,” e “Te Manako Maira Ainei te Atua ia Koe?”

14. (a) Eaa tei akakoroia no te au vitio e ā i roto i ta tatou Apinga Apii? Eaa taau au tupuanga meitaki mei te akaari anga i teia au vitio?

¹⁴ Te au vitio. I to Iesu tuatau, e au apinga kamuta rikiriki ua tei taangaangaia. I teianei, e au apinga kamuta uira katoa ta te au kamuta, mei te keke, te viri, e te aʼu. Me tutu aere tatou i teia ra, i te pae i te au puka tei neneiia, e au vitio manea ta tatou no te akaari ki te tangata. E ā apinga tauturu i roto i ta tatou apinga apii: Eaa te tumu ka apii ei i te Pipiria?, Eaa te raveia ana i ko i tetai apii Pipiria?, Eaa te raveia ana i ko i te Are Uipaanga Patireia?, Au Kite o Iehova—Koai ra Matou? Ka rauka te au vitio potopoto i te akatangiia i raro ake i te 2 miniti e ka angaanga meitaki te reira no te atoro anga mua. Ka rauka te au vitio roroa i te taangaangaia no te au atoro akaou anga e ki te aronga e maata to ratou taime. E au apinga tauturu meitaki teia au vitio no te mea ka akakeu te reira i te tangata kia apii i te Pipiria e kia aere mai ki ta tatou uipaanga.

15. Eaa te ka tupu me akaraia tetai o ta tatou vitio i te reo o te reira tangata? Oronga mai i te au akaraanga.

¹⁵ Ei akaraanga, kua aravei tetai tuaine i tetai vaine no te au enua rikiriki mai e ko tona reo mua ko te reo Yap. Kua akaari te tuaine i te vitio Eaa te tumu ka apii ei i te Pipiria? i te reo Yap. Te akamata anga te vitio, karanga te vaine: “Noku teia reo. Aue taue! Kite au e no ko mai tera tangata i toku enua. Noku tera reo!” I muri ake i te reira, karanga aia e ka tatau e ka akara aia i te au mea ravarai i tona reo i runga i te jw.org. (Akaaite ia Angaanga 2:8, 11.) Tetai akaraanga, ko tetai tuaine i Marike, e noo ana tana tamaiti na tona taeake i te enua ke. Kua tuku aia i tetai link no taua vitio i tona reo. Kua akara tana tamaiti i te vitio, e kua imere mai iaia: “Kua reka tikai aia te taikuia anga te mana kino te akatere ra i teianei ao. Kua inangaro au i te apii i te Pipiria.” E meitaki tikai teia no te mea e noo ana aia i te enua te araiia ra ta tatou angaanga!

16. E akakite mai i te akakoroanga tikai o te au poroutia tataki tai: (a) Akarongo ki te Atua kia Ora e Tuatau ua Atu. (e) Nuti Meitaki no ko i te Atua! (ng) Koai ma te Rave ra i to Iehova Anoano i Teia Tuatau?

¹⁶ Te au poroutia. Akapeea tatou me apii i te tuatua mou ki tetai kare e kite meitaki i te tatau, me kore kare e puka Pipiria i tona reo? Ka rauka ia tatou i te taangaanga i te poroutia, Akarongo ki te Atua kia Ora e Tuatau ua Atu. * (Akara i te tataanga rikiriki i raro.) Tetai apinga tauturu meitaki ei akamata i te au apii Pipiria  ko te poroutia, Nuti Meitaki no ko i te Atua! Ka rauka ia koe i te akaari ki tetai tangata e 14 tumu manako i te kapi openga ma te ui kiaia ko teea tana ka inangaro i te kite. E oti e akamata i te apii i te reira apii. Kua tamata ainei koe i teia i taau atoro akaou anga? Te toru o te poroutia i roto i ta tatou apinga apii, Koai ma te Rave ra i to Iehova Anoano i Teia Tuatau? Kua akakoroia teia ei apii i te aronga apii Pipiria no runga i ta tatou akaaerenga. Kia kite akapeea me taangaanga i teia poroutia no te tuanga apii Pipiria tataki tai, e akara i te Oraanga Kerititiano e te Angaanga Orometua—Puka Angaanga no te Uipaanga.

17. (a) Eaa tikai te akakoroanga o te puka apii tataki tai? (e) Eaa te anoanoia ra i te aronga te ka papetitoia, e no teaa ra?

¹⁷ Te au puka. I muri ake i taau akamata anga i te apii ki tetai tangata ki roto i te poroutia, ka rauka ua ia koe i te aere ki runga i te puka, Eaa ta te Pipiria ka Apii Mai ia Tatou? i tetai ua atu taime. Ka tauturu teia i te tangata kia kite maata atu i te au apiianga tumu o te Pipiria. Mei te mea te tere ra te tangata apii ki mua e kua akaoti i tana puka, ka rauka ia koe i te apai i tana apii ki roto i te puka, Noo Tamou ki Roto i te Aroa o te Atua. Ka apii teia i te tangata apii akapeea me taangaanga i te au kaveinga Pipiria i tona oraanga. E akamaara, noatu i muri ake i tona papetito anga, ka anoanoia rai aia kia akaoti i tana puka apii e rua. Ka tauturu teia iaia kia rauka te akarongo ketaketa ki roto ia Iehova e kia vai tiratiratu kiaia.—E tatau ia Kolosa 2:6, 7.

18. (a) Eaa ta 1 Timoteo 4:16 e akamaroiroi maira ia tatou kia rave ei au puapii o te tuatua mou, e eaa te ka tupu mai? (e) Eaa to tatou akakoroanga me taangaangaia ta tatou Apinga Apii?

¹⁸ Ei Au Kite o Iehova, e apainga ta tatou kia apii i “te tuatua-mou i te evangelia nei” te ka taki atu i te tangata ki te ora mutu kore. (Kolosa 1:5; e tatau ia 1 Timoteo 4:16.) Ei tauturu ia tatou, te vaira te Apinga Apii e te au apinga tauturu. (Akara i te “ Apinga Apii.”) E taangaanga meitaki tatou i teia au apinga tauturu. Ka iki tatou ko teea apinga tauturu i roto i te apinga apii ta tatou ka taangaanga e aea. Kia akamaara, kare to tatou akakoroanga e kia tuʼa puka, e kare tatou e oake i te puka ki te tangata kare e inangaro i te reira. To tatou akakoroanga kia kimi i te au pipi ngakau tae, te akaaka, e te inangaro tikai ra i te kite i te Atua, “te aronga i akonoia no te ora mutu kore ra.”—Angaanga 13:48; Mataio 28:19, 20.