1, 2. (a) Akapeea te au taui anga poitirere me akatuke i to tatou oraanga? (Akara i te tutu mua.) (e) Kia tau kia Salamo 131, eaa te ka tauturu ia tatou kia rauka te manako ‘au?

I MURI mai, kua tavini a Lloyd e Alexandra no tetai 25 tuma mataiti i Betela, kua tukuia atu raua ki tetai ngai tutu anga. I te akamata anga, kua maromaroa raua. Karanga a Lloyd: “Kua manako au e kua riro a Betela e taku tukuanga angaanga ei ngai noo tamou noku. Mareka tikai au te tumu i taui ei te reira, inara no tetai au epetoma e te marama i aereia, kua putuputu au i te manako e kua kopaeia au.” I tetai atianga, kua manako papu rai a Lloyd i te taui anga, e tetai atianga kua taitaia aia.

² I tetai taime, e au taui anga tetai i roto i te oraanga kare tatou e tapapa atu, e ka tupu ua te manako apiapi e te taitaia. (Maseli 12:25) Me ngata te au taui anga i te āriki e te akatanotano, eaa ta tatou ka rave kia maru mai? (E tatau ia Salamo 131:1-3.) Ka akara tatou akapeea tetai au tavini o Iehova, i te tuatau taito e i to tatou tuatau,  i rauka ai te manako ‘au, noatu me taui poitirere te oraanga.

3. Akapeea to Iosepha oraanga i taui poitirere ei?

³ Akamanako ana i tetai akaraanga, no Iosepha. Pouroa ta Iakoba tamariki tamaroa, e akaperepere ana aia ia Iosepha. Kua vareae tona ai tuakana iaia. I to Iosepha 17 anga mataiti, kua oko ratou iaia ei tuikaa. (Genese 37:2-4, 23-28) No tetai 13 mataiti, kua mamae tikai aia i Aiphiti, mea mua ei tuikaa e i muri mai ei mouauri. Kua mamao ke roa a Iosepha mei tona metua tane, tana i akaperepere tikai. Penei ka riro rai tona turanga ei mea puapinga kore e te riri, inara kare aia i pera ana. Eaa tei tauturu iaia?

4. (a) Eaa ta Iosepha i rave i roto i te areauri? (e) Akapeea a Iehova te pau anga i ta Iosepha pure?

⁴ I to Iosepha tamamaeia anga i roto i te areauri, kua akamou ua rai aia ki runga i ta Iehova tauturu anga. (Genese 39:21; Salamo 105:17-19) Penei kua manako katoa aia no runga i te au totou moemoea i tona meangiti anga e te manako tau meitaki e tei iaia a Iehova. (Genese 37:5-11) E pure putuputu ana aia mei roto i tona ngakau e te akakite i tona manako kia Iehova. (Salamo 145:18) Kua pau mai a Iehova i ta Iosepha pure na te oronga anga kiaia te manako papu e “tei iaia ra te Atua” noatu eaa te ka tupu.—Angaanga 7:9, 10. * (Akara i te tataanga rikiriki i raro.)

5. Akapeea “te au o te Atua” te akariro anga ia tatou kia tauta ua rai i te tavini ia Iehova?

⁵ Noatu eaa te ngata i to tatou turanga, ka rauka ia tatou “te au o te Atua” ei paruru i to tatou “manako” e ka rauka te manako maru. (E tatau ia Philipi 4:6, 7.) Me manako apiapi e te taitaia tatou, ka akamaroiroi mai te “au o te Atua” ia tatou kia tavini ua rai ia Iehova e auraka e tuku i te au. Ka tatau tatou i te au akaraanga o te au taeake e te au tuaine i teia tuatau tei na roto ana i te tu ngata.

6, 7. Akapeea ta tatou pure te tauturu anga ia tatou kia rauka akaou te manako ‘au? Oronga mai i tetai akaraanga.

⁶ Te rongo anga a Ryan raua ko Juliette e kua akaoti i ta raua tukuanga angaanga poto ua ei painia takake, kua manako taitaia raua. Karanga a Ryan: “Kua tuatua tika maua kia Iehova na roto i te pure. Kua kite maua e e atianga takake teia no te akaari i to maua irinaki anga ki roto iaia. E manganui i roto i ta matou putuputuanga e au aronga ou, kua pure maua kia Iehova kia tauturu mai ia maua kia akanoo i tetai akaraanga meitaki tikai no te akarongo.”

⁷ Akapeea a Iehova te pau anga i ta raua pure? Karanga a Ryan: “I muri ua ake i te pure viviki anga, kua akamata te manako taitaia e te apiapi i te ngaro. Te arataki ra te ‘au o te Atua i to maua manako ngakau. Kua manako maua e kia angaanga ua rai maua kia Iehova me akono tamou maua i te tu tau.”

8-10. (a) Akapeea te vaerua tapu o te Atua te tauturu anga ia tatou me taitaia? (e) Akapeea a Iehova me tauturu ia tatou me tavini tamou iaia?

⁸ Ka riro te vaerua o te Atua i te akamaru mai ia tatou, e ka arataki te reira ia tatou  ki roto i te au irava o te Pipiria ei tauturu ia tatou kia mārama eaa tikai te mea puapinga i te oraanga. (E tatau ia Ioane 14:26, 27.) Akamanako ana eaa tei tupu kia Philip e Mary, e tokorua akaipoipo i Betela no tetai 25 mataiti. I roto i te ā marama, kua mate atu to raua nga mama e tetai o te kopu tangata, e kua akono raua i to Mary papa, e maki dementia tona.

⁹ Karanga a Philip: “Manako nei au e te meitaki ua ra au no tetai atianga, inara e mea tetai i ngere au. Kua tatau au ia Kolosa 1:11 i roto i te atikara apii Punanga Tiaki. Kua rauka rai te akakoromaki, inara kare i rava meitaki. Kua anoanoia au kia ‘maata atu te akakoromaki ma te maru anga roa e te rekareka.’ Te akamaara maira teia irava iaku e ko toku mataora i te oraanga, kare no runga ua i toku turanga, mari ra no te vaerua o te Atua i roto i toku oraanga.”

¹⁰ No te mea kua akamou a Philip raua ko Mary i te tavini ua atu ia Iehova, kua akameitaki ia raua na tetai au ravenga ke. Kare i roa i muri mai to raua akaruke anga ia Betela, kua rauka mai tetai tangata apii Pipiria e tere ra ki mua e kua inangaro i te apii no tetai epetoma. Karanga a Mary: “Kua riro teia ei mea mataora kia maua e te au ravenga ta Iehova i akakite mai e ka meitaki te au mea ravarai.”

11, 12 (a) Akapeea a Iosepha te rave anga i tetai mea te ka rauka ia Iehova i te akameitaki mai? (e) Akapeea a Iehova i te tutaki anga ia Iosepha?

¹¹ Me taui poitirere te oraanga, ka riro teia ei mea taitaia e ka manako ua tatou i to tatou au manamanata. Ka tupu rai teia kia Iosepha. Inara, kua iki aia kia rave i tana ka rauka i roto i tona turanga. Mei ta Iosepha i angaanga pakari na Potiphara, kua angaanga pakari aia i roto i te areauri mei ta te tiaki opita i tuku kiaia kia rave.—Genese 39:21-23.

¹² I tetai rā, kua akanooia a Iosepha kia akono i tetai nga mouauri tei tavini ana i te paepae o Pharao. Kua akono meitaki a Iosepha ia raua, e kua pumaana te nga tangata raverave i te akakite i to raua manamanata e te moemoea kino ta raua i moe. (Genese 40:5-8) Kare a Iosepha i kite vave ana i te reira taime, e ka taki atu te reira pukapukaanga ki tona akarangatiraia anga. E rua mataiti i muri mai, kua tukuia mai aia ki vao i te areauri e kua riro mai koia tetai tangata maata rava atu i Aiphiti. Ko Pharao ua rai te tangata mana ririnui roa atu ia Iosepha!—Genese 41:1, 14-16, 39-41.

13. Akapeea tatou me rave i ta Iehova i akameitaki mai, noatu eaa te turanga?

 ¹³ Mei ia Iosepha rai, penei ka ō atu tatou ki roto i tetai turanga kare e rauka ia tatou i te akatere. Inara me akakoromaki tatou e kia rave i te ka rauka, ka akameitaki mai a Iehova ia tatou. (Salamo 37:5) Noatu me e manako taii e te apiapi to tatou, “kare ra i ope te manakoanga” e kare tatou e manako puapinga kore. (2 Korinetia 4:8) Tei ia tatou a Iehova, me noo tamou tikai tatou i roto i te angaanga tutu aere.

14-16. Akapeea a Philipi te tangata evangeria i te akamou anga ki runga i tana angaanga tutu aere, noatu te au taui anga i tona oraanga?

¹⁴ Ko Philipi te tangata evangeria tetai akaraanga meitaki, no tetai tei akamou ki runga i tana angaanga tutu aere, noatu te taui anga i tona oraanga. Tetai taime, mataora aia i tana tukuanga angaanga i Ierusalema. (Angaanga 6:1-6) I reira kua taui te au mea pouroa. I muri ake i te tamateia anga a Setephano, kua takinokinoia te au Kerititiano e kua oro ratou mei ia Ierusalema. No te mea kua inangaro rai a Philipi i te tavini tamou ia Iehova, kua aere aia ki te oire i Samaria, kia akarongo te tangata i te nuti meitaki.—Mataio 10:5; Angaanga 8:1, 5.

¹⁵ Kua puareinga ua a Philipi i te aru i te aratakianga a te vaerua tapu o te Atua. No reira kua taangaanga a Iehova iaia kia tutu aere ki te ngai tei reira te tangata tei kore i akarongo i te nuti meitaki. E manganui te au ngati Iuda tei akavaavaa i to Samaria e te takinokino ia ratou. Inara kare a Philipi i te tangata akavaavaa, e kua tauta ua atu i te akakite i te nuti meitaki kia ratou. Kua akarongo mai to Samaria e “kua rotai marie maira te ngakau o te tangata”!—Angaanga 8:6-8.

¹⁶ Aru mai, kua arataki te vaerua tapu o te Atua ia Philipi kia tutu aere ki te au oire o Asedoda e Kaisarea, te ngai e maata te aronga mei te enua ke. (Angaanga 8:39, 40) I reira kua taui akaou to Philipi oraanga. Kua noo aia ki reira e kua uangaia. Inara noatu te taui anga i to Philipi oraanga, kua rave ua rai aia i te angaanga tutu  aere, e kua akameitaki ua atu a Iehova iaia e tona ngutuare tangata.—Angaanga 21:8, 9.

17, 18 Me taui to tatou oraanga, akapeea te akamou anga ki runga i te angaanga tutu aere me tauturu ia tatou?

¹⁷ E manganui tei tavini tamou tei karanga e kua akamou ratou ki runga i te angaanga tutu aere ei tauturu ia ratou kia mataora e te papu tikai, noatu te taui anga. Ei akaraanga, tetai nga tokorua i Aperika tonga ko Osborne e Polite tei akaruke ia Betela, manako raua e mea māmā i te kimi i tetai ngai angaanga e te ngai nooanga. Inara karanga a Osborne: “Te mea tangi, kare te angaanga i kitea vivikiia mai mei ta maua i manako.” Karanga a Polite: “Kare i rauka ana tetai angaanga na maua no tetai marama, e kare katoa a maua moni. E akaaoanga tikai teia.”

¹⁸ Eaa tei tauturu ia Osborne e Polite i roto i teia turanga taitaia? Karanga a Osborne: “Te tutu aere anga ki te putuputuanga tei tauturu ia maua kia akamou i to maua manako e te tau tikai.” I te mea e ka noo ua ki te kainga ma te manata, kua manako raua kia angaanga ua rai i roto i te angaanga tutu aere. Kua tupu te mataora kia raua! Karanga akaou a Osborne: “Kua kimi ua rai maua i te ngai angaanga, e i muri mai kua rauka tetai angaanga.”

19-21. (a) Eaa te ka tauturu ia tatou kia akamou i te manako ‘au? (e) Akapeea tatou e puapinga ai me akatanotano ki tetai taui anga viviki?

¹⁹ Me akara tatou i to tatou turanga e te irinaki tikai ia Iehova, ka rauka ia tatou te ‘au noatu eaa te ka tupu. (E tatau ia Mika 7:7.) Kare e roa, ka kite tatou e na te akatanotano anga ki te au taui anga, kua akaketaketa i to tatou pirianga oa kia Iehova. Akamārama a Polite, e na te akaruke anga i te Betela kua apii mai te reira i te aiteanga tikai kia irinaki ua ki runga ia Iehova, noatu te ngata o te oraanga. Karanga aia: “Kua oonu atu toku pirianga kiaia.”

 ²⁰ Kua taiku a Mary i te akamata anga, te akono nei rai aia i tona papa e te painia katoa. Karanga aia: “Kua kite mai aia e me taitaia au, ka anoanoia au kia akamutu, kia pure, e kia akangaroi. Kia akaruke i te au mea ravarai ki roto i te rima o Iehova, ko te apiianga maata rava atu te reira taku i apii mai, e ka anoanoia te reira a te tuatau ki mua.”

²¹ Akakite a Lloyd e Alexandra e kua riro te au taui anga i to raua oraanga ei timata i to raua akarongo kare rava raua i tapapa atu ana. Inara kua kite raua i teia au timataanga ei tauturu ia raua. I teianei kua kite raua e te matutu nei to raua akarongo kia akapumaana ia raua me e manamanata tetai, e kua riro mai raua ei aronga meitaki.

22. Me rave tatou i te ka rauka i to tatou turanga, akapeea tatou e papu ei?

²² I roto i teia akatereanga, ka taui poitirere to tatou oraanga. Penei ka orongaia mai tetai tukuanga angaanga tuke no te tavini ia Iehova, ka tupu te au manamanata pae kopapa, me kore ka anoanoia kia akono i to tatou ngutuare tangata. Inara noatu eaa te ka tupu, kia papu e te akono maira a Iehova ia koe e ka tauturu ia koe i te tuatau tau tikai. (Ebera 4:16; 1 Petero 5:6, 7) E i teianei, ka rave tatou i te ka rauka ia tatou. Pure ki to tatou Metua ko Iehova, e kia irinaki ua rai iaia. Noatu te au taui anga o te turanga, ka rauka ia koe te manako ‘au no ko mai ia Iehova.