1, 2. (a) Akapeea tatou i kite ei e ka riro mai te au tangata ei oa no te Atua? (e) Eaa ta tatou ka akamanako i roto i teia atikara?

MEI te tuatau i anau mai ei tatou e mate ua atu ei, ka anoano tatou i te aroa. E anoano ana te tangata i te pirianga oa vaitata e te aroa, kare i te aroa akainangaro ua. Inara te mea puapinga rava atu, koia te aroa no ko mai ia Iehova. E manganui kare e irinaki ana e ka rauka i te tangata tetai pirianga oa vaitata e te aroa ki te Atua no te mea kare e rauka i te akara mata iaia e no tona mana ririnui. Inara kua kite tatou i te tika!

² Kua kite tatou mei te Pipiria e kua riro te tangata ei oa no te Atua. Ka anoanoia tatou kia apii i to ratou akaraanga. No teaa ra? No te mea ko te pirianga oa ki te Atua te akakoroanga puapinga rava atu i roto i te oraanga. Ka uriuri tatou i te akaraanga o Aberahama. (E tatau ia Iakobo 2:23.) Akapeea aia i riro mai ei ei oa no te Atua? Kua akatumuia to  Aberahama pirianga vaitata ki te Atua ki runga i te akarongo, e kua kiteaia aia ‘ei metua no te aronga ravarai tei akarongo ra.’ (Roma 4:11) Ia koe e akamanako ra i tona akaraanga, e ui kia koe uaorai, ‘Ka akapeea au me aru i to Aberahama akarongo e te akaketaketa i toku pirianga oa kia Iehova?’

3, 4. (a) Akataka mai eaa to Aberahama timataanga maata roa atu no tona akarongo. (e) No teaa ra a Aberahama i puareinga ua ai i te akaatinga ia Isaaka?

³ Akamanako ana ia Aberahama mei te 125 ona mataiti te kake marie anga ki runga i te maunga. ^[1] (Akara i te manako poto.) I muri iaia ko tana tamaiti ko Isaaka, e 25 ona mataiti. Na Isaaka i apai i te vaʼie, e na Aberahama i apai i te matipi e te au apinga tei anoanoia kia tutungi i te aʼi. Penei ko te tere ngata roa atu tera i roto i to Aberahama oraanga. Kare i te mea e kua ruaine aia, e maroiroi rai tona. Mari ra, e ngata tikai teia tere no te mea kua pati a Iehova iaia kia akaatinga i tana tamaiti!​—Genese 22:1-8.

⁴ Penei ko teia te timataanga maata roa atu i to Aberahama akarongo. Kua karanga tetai papaki tangata e tu kino to te Atua i te pati ia Aberahama kia akaatinga i tana tamaiti. Karanga katoa tetai papaki e kua puareinga ua a Aberahama i te rave i teia no te mea kare aia e inangaro ana i tana tamaiti. E tuatua akapera ana te tangata no te mea kare o ratou akarongo e kare ratou i kite eaa te akarongo tika tikai e akapeea te reira te angaanga anga. (1 Korinetia 2:14-16) Kare a Aberahama i akarongo matapo ua i te Atua me kore akarongo manako kore ua iaia. Kua akarongo aia no te mea e akarongo tika tikai tona. Kua kite aia e kare rava a Iehova e pati iaia kia rave i tetai apinga te ka akamamae tikai iaia. Kua kite a Aberahama e me akarongo aia, ka akameitaki a Iehova iaia e tana tamaiti akaperepere. Eaa ta Aberahama i anoano e rauka ai iaia taua akarongo ketaketa ra? Kua anoanoia te kite e te au tupuanga.

5. Akapeea a Aberahama i te apii anga no runga ia Iehova, e eaa tona manako no runga i tana i kite?

 ⁵ Te Kite. Kua utuutuia a Aberahama i roto i te oire ko Ura. Kua akamori te tangata i reira i te au atua pikikaa, pera katoa tona metua tane. (Iosua 24:2) No reira akapeea a Aberahama i te apii anga no runga ia Iehova? Te akaari maira te Pipiria e ko te tamaiti a Noa ko Sema, e kopu tangata aia no Aberahama. Te ora ra aia i te 150 mataiti o Aberahama. E tangata akarongo mou a Sema, e penei kua tuatua aia ki tona kopu tangata no runga ia Iehova. Kare tatou i kite papu, inara penei ko teia te mataara i apii ei a Aberahama no runga ia Iehova. Kua riro ta Aberahama i apii ei akakeu iaia kia inangaro ia Iehova, e na teia kite i tauturu iaia kia akaketaketa i tona akarongo.

6, 7. Akapeea te au mea tei tupu kia Aberahama i te akaketaketa anga i tona akarongo?

⁶ Te au Tupuanga. Akapeea te au mea tei tupu kia Aberahama i te akaketaketa anga i tona akarongo i roto ia Iehova? Karanga tetai pae e ka taki atu te au manako ki te manako te ka akakeu iaia kia rave i te reira. Kua akakeuia to Aberahama ngakau e tana i apii no runga i te Atua, e kua oronga i te akangateitei oonu no “te Atua teitei ra, kia Iehova, ki te Pu o te rangi e te enua nei.” (Genese 14:22) Te kapiki ra te Pipiria i teia akangateitei anga oonu ko te ‘mataku i te Atua.’ (Ebera 5:7) E rauka ai tetai pirianga oa vaitata ki te Atua, ka anoanoia tatou kia akaari i teia tu mataku. (Salamo 25:14) Na teia tu i akakeu ia Aberahama kia akarongo kia Iehova.

⁷ Kua akakite te Atua kia Aberahama raua ko Sara kia akaruke i to raua kainga i Ura e kia neke ki tetai enua ke. Kare raua i te nga tangata mapu, e ka anoanoia raua kia noo ki roto i te puakapa no te katoaanga o to raua oraanga. Noatu kua kite a Aberahama e e maata te au kino ta raua ka aro atu, kua tauta pakari aia kia akarongo ia Iehova. No tona akarongo kia Iehova, kua akameitaki e kua paruru te Atua iaia. Ei akaraanga, te raveia anga te vaine purotu a Aberahama ko Sara, e kua vaitata a Aberahama i te tamateia, e maata te au taime ta Iehova paruru anga ia raua ko Sara. (Genese 12:10-20; 20:2-7, 10-12, 17, 18) Kua tauturu teia au tupuanga i te akaketaketa i te akarongo o Aberahama.

8. Akapeea e rauka ai ia tatou te kite e te au tupuanga te ka akaketaketa i to tatou pirianga oa kia Iehova?

⁸ Ka rauka ainei ia tatou kia riro ei oa piri vaitata no Iehova? Ae, e mea papu roa! Mei ia Aberahama rai, ka anoanoia tatou kia  apii no runga ia Iehova. Pera katoa ka rauka ia tatou te kite e te au tupuanga ta tatou e anoano ra. I teia tuatau, e maata atu ta tatou i rauka i ta Aberahama. (Daniela 12:4; Roma 11:33) Kua ki te Pipiria i te kite no runga i te “Pu o te rangi e te enua.” Ka riro ta tatou e apii ra ei akakeu ia tatou kia inangaro ia Iehova e ka tauturu ia tatou kia akaari i te akangateitei oonu nona. Na teia aroa e te akangateitei no te Atua e akakeu ia tatou kia akarongo iaia. Me akapera tatou, ka kite tatou peea aia i te paruru anga e te akameitaki anga ia tatou, na teia e oronga mai i te au tupuanga e te kite ei akaketaketa i to tatou akarongo. Me tavini pu tikai tatou ia Iehova, ka rauka te mareka anga, te au, e te rekareka. (Salamo 34:8; Maseli 10:22) Te maata atu i to tatou kite e te au tupuanga ka rauka mai, ka akaketaketa te reira i to tatou pirianga oa kiaia.

9, 10. (a) Eaa tei anoanoia kia ketaketa atu tetai pirianga oa? (e) Eaa te akaari maira kua akaperepere e kua akaketaketa a Aberahama i tona pirianga oa kia Iehova?

⁹ Ka akaaiteia te pirianga oa vaitata ki tetai apinga akaperepereia. (E tatau ia Maseli 17:17.) Kare te reira mei tetai āriki oko maata ei akamanea ua. Kua aite te reira mei te tiare manea ka anoanoia te vai kia tupu ruperupe. Kua akaperepere e kua akono tamou a Aberahama i tona pirianga oa kia Iehova. Akapeea aia te rave anga i te reira?

¹⁰ Kua akaketaketa ua rai a Aberahama i tona tu mataku Atua e te akarongo. Ei akaraanga, iaia e aere ra ki Kanaana ma tona ngutuare tangata e te au tavini, kua tuku ua aia ia Iehova kia arataki iaia me rave i te au tuku anga tika maata e te meangiti. E tai mataiti i mua ake ka anauia ai a Isaaka, e 99 o Aberahama mataiti, kua akakite a Iehova kiaia kia peritome i te au tamaroa i roto i tona ngutuare tangata. Kua ekoko ainei a Aberahama ia Iehova me kore kua kimi i te kotoe anga kia kore e rave i tei patiia kiaia? Kare, kua irinaki aia ia Iehova e kua akarongo “i taua rā tikai ra.”​—Genese 17:10-14, 23.

11. No teaa ra a Aberahama i manamanata ai no runga ia Sodoma e Gomora, e akapeea a Iehova te tauturu anga iaia?

¹¹ No te mea e akarongo ua ana a Aberahama ia Iehova noatu i te au mea rikiriki, kua ketaketa atu to raua pirianga oa. Kua rauka iaia i te tuatua kia Iehova i tetai ua atu apinga, pera katoa te pati tauturu me ngata iaia i te mārama i te au uianga pakari. Ei akaraanga, te akakite anga a Iehova e ka takore aia i nga oire o Sodoma e Gomora, kua manamanata a Aberahama. No teaa ra? Kua mataku aia e ka mate kapiti atu te aronga meitaki e te aronga kino. Penei kua manamanata aia i te tamaiti a tona tuakana ko Lota e tona ngutuare tangata, tei noo i Sodoma. Kua irinaki a Aberahama ia Iehova, “te Akava i to te ao katoa nei,” no reira kua tuatua akaaka aia kia Iehova no  runga i tona au manamanata. Kua tiaki marie a Iehova i tona oa e kua akaari i Tona tu aroa ua. Kua akamārama a Iehova e noatu me ka apai mai aia i te akava anga, ka kimi aia i te aronga meitaki e ka akaora ia ratou.​—Genese 18:22-33.

12, 13. (a) Akapeea to Aberahama kite e tona tupuanga te tauturu anga iaia i muri mai? (e) Eaa te akaari maira e kua irinaki papu a Aberahama ia Iehova?

¹² Te taka ua ra kua riro to Aberahama kite e te au tupuanga ei akaketaketa i tona pirianga oa kia Iehova. I muri mai, te patianga a Iehova ia Aberahama kia akaatinga i tana tamaiti, kua kite aia e e tu akakoromaki to Iehova, te aroa ua, te irinaki e te paruru anga. Papu tikai ia Aberahama e kare a Iehova e viviki i te rave i te kino! No teaa ra tatou ka tuatua akapera ai?

¹³ Muri ake te akaruke anga aia i tona nga tavini, karanga a Aberahama: “E noo korua i ko nei e te asini; e aere maua ma te tamaiti nei ki ko akera e akamori, ka oki mai ei kia korua nei.” (Genese 22:5) Eaa te aiteanga i ta Aberahama tuatua? Te pikikaa ra ainei aia e ka oki mai raua ko Isaaka, te kite anga e ka akaatinga aia iaia? Kare. Karanga te Pipiria e kua kite a Aberahama e ka rauka ia Iehova i te akatuakaou ia Isaaka mei te mate. (E tatau ia Ebera 11:19.) Kua kite a Aberahama e kua oronga mai a Iehova i te mana kia anau tamariki noatu e kua ruaine raua ko Sara. (Ebera 11:11, 12, 18) No reira kite mai aia kare i te mea ngata ia Iehova kia rave i tetai ua atu apinga. Kare a Aberahama i kite eaa te ka tupu i taua rā ra. Inara e akarongo tona e ka akatuakaou mai a Iehova i tana tamaiti e ka tupu te au taputou pouroa a te Atua. Te tumu te reira i kapikiia ai a Aberahama‘ei metua no te aronga ravarai tei akarongo ra!’

14. Eaa te au akaaoanga taau e aro atura i te tavini ia Iehova, e akapeea to Aberahama akaraanga te tauturu anga ia koe?

¹⁴ I teia rā, kare a Iehova e pati ana ia tatou kia akaatinga i ta tatou tamariki, inara te pati maira aia ia tatou kia akarongo ki tana au akauenga. Penei kare tatou e mārama ana i te tumu no teia au akauenga, ka ngata i te akono i te reira. Te manako akapera ra ainei koe? No tetai pae, e mea ngata te angaanga tutu aere. Penei e akama ratou e e ngata i te tuatua ki te tangata kare ratou i kite. Tetai pae e mataku ana me kiteaia mai e tuke ratou i te ngai angaanga e te apii. (Exodo 23:2; 1 Tesalonia 2:2) Me patiia koe kia rave i tetai apinga ngata, e akamanako i te akaraanga meitaki o Aberahama no te akarongo e te ngakau toa. Me akamanako oonu tatou i te au akaraanga o te au tane e te au vaine tiratiratu, ka akakeu te reira ia tatou kia aru ia ratou e kia piri vaitata atu ki to tatou Oa, ko Iehova.​—Ebera 12:1, 2.

15. No teaa ra tatou ka papu e kare a Aberahama i tataraara ana i te akarongo tiratiratu kia Iehova?

¹⁵ Kua tataraara ainei a Aberahama i te akarongo i te au akauenga a Iehova?  Karanga te Pipiria e kua mate a Aberahama “i te ruaine meitaki anga ra.” (Genese 25:8) I tona 175 anga mataiti, kua rauka ia Aberahama i te akamanako i tona oraanga roa ma te mareka anga meitaki. No teaa ra? No te mea ko tona pirianga oa kia Iehova te mea puapinga maata kiaia. Inara, me tatau tatou ia Aberahama e kua ‘ruaine e te maata roa te mataiti,’ kare te aiteanga e kare ona anoano kia ora i te tuatauki mua.

16. Eaa te rekareka anga ta Aberahama ka kite mai i roto i te Parataito?

¹⁶ Karanga te Pipiria e te “maara ra [ia Aberahama] e e rauka te oire tumu mou, ko te akatu e te tutara o taua oire ra, ko te Atua ïa.” (Ebera 11:10) Kua irinaki a Aberahama e, a tetai rā ka kite aia i taua oire ra, koia te Patireia o te Atua, te tutara anga i te enua nei. E ka kite rai aia i teia! Akamanako ana mei teaa to Aberahama mataora te noo ki runga i tetai enua parataito e kia akaketaketa ua atu i tona pirianga oa ki te Atua. Ka mataora aia i te kite e kua riro tona akaraanga akarongo ei tauturu i te au tavini o te Atua no te tauatini tuma mataiti! I roto i te Parataito ka kite aia e kua riro te atinga i te Maunga Moria ei akatutu i tetai apinga maata rava atu. (Ebera 11:19) Ka kite mai aia e ko tona mamae i te akapapa i te akaatinga i tana tamaiti ko Isaaka, kua tauturu i te mirioni ua atu aronga tiratiratu kia mārama i to Iehova mamae te oronga anga mai i tana Tamaiti, ko Iesu Karaiti, ei oko no te tangata ravarai. (Ioane 3:16) Kua tauturu te akaraanga o Aberahama ia tatou pouroa kia āriki maata atu i te atinga oko, koia te aroa maata rava atu tei akaariia!

17. Eaa taau ka tauta i te rave, e eaa ta tatou ka uriuri i te atikara ka aru mai?

¹⁷ Kia tauta tatou tataki tai i te aru i te akarongo o Aberahama. Mei iaia rai, ka anoano tatou i te kite e te tupuanga meitaki. Ia tatou e apii ra no runga ia Iehova e te akarongo iaia, ka kite tatou akapeea aia te akameitaki anga e te paruru anga ia tatou. (E tatau ia Ebera 6:10-12.) Kia riro a Iehova ei oa no tatou e tuatau ua atu! I te atikara ka aru mai, ka uriuri tatou e toru akaou akaraanga o te aronga tiratiratu tei riro mai ei au oa piri vaitata no te Atua.