1, 2. No teaa ra te pirianga oa o Ionatana kia Davida e tona tu tiratiratu i riro ei ei akaraanga umere?

PAPU e kua umere a Ionatana i te tu ngakau toa o te mapu ko Davida. Kua tamate a Davida i te tuputupua ko Golia e kua apai i “te mimiti katoa o taua Philiseti ra” ki te metua tane o Ionatana, te Ariki o Iseraela ko Saula. (1 Samuela 17:57) Kare a Ionatana i ekoko ana e na te Atua i tauturu ia Davida, e mei reira mai, kua piri vaitata a Ionatana kia Davida. Kua taputou raua e ka vai tiratiratu ua rai raua ki tetai e tetai. (1 Samuela 18:1-3) I te roa anga o tona oraanga, kua vai tiratiratu a Ionatana kia Davida.

² Kua tiratiratu a Ionatana kia Davida noatu kua iki a Iehova ia Davida kia riro mai ei ariki no Iseraela, kare ia Ionatana. Te tauta anga a Saula i te tamate ia Davida, kua taitaia a Ionatana no tona taeake. Kua kite aia e tei roto a Davida i te metepara i te pae i te vaorakau, no reira kua aere a Ionatana ki reira e kua  akamaroiroi iaia kia irinaki ua ia Iehova. Akakite a Ionatana kia Davida: “Auraka e mataku: kare oki koe e rauka i te rima o toku metua ra o Saula; ka riro oki koe ei ariki ki runga ia Iseraela, e ei raro iti ake au ia koe.”​—1 Samuela 23:16, 17.

3. Eaa te mea puapinga atu kia Ionatana i te vai tiratiratu ua kia Davida, e akapeea tatou i kite ei? (Akara i te tutu mua.)

³ E umere ua ana tatou i te aronga tei tiratiratu. Inara ka umere ua ainei tatou ia Ionatana no te mea kua vai tiratiratu aia kia Davida? Kare, ko te mea puapinga roa atu i to Ionatana oraanga, kia vai tiratiratu ki te Atua. Te tika, ko teia te tumu i vai tiratiratu ei aia kia Davida e kare i vareae iaia, noatu ka riro mai a Davida ei ariki, kare koia. Kua tauturu katoa a Ionatana ia Davida kia irinaki ia Iehova. Kua vai tiratiratu raua kia Iehova e ki tetai e tetai. Kua akatupu raua i te taputou ta raua i papau: “Ko Iehova tei rotopu ia taua nei, e toku ra uanga, e toou ra uanga e tuatau ua atu.”​—1 Samuela 20:42.

4. (a) Akapeea e rauka ai ia tatou te mataora mou tikai e te marekaanga? (e) Eaa ta tatou ka uriuri i teia atikara?

⁴ Ka anoano katoaia tatou kia vai tiratiratu ki to tatou ngutuare tangata, au oa, au taeake e te au tuaine i roto i te putuputuanga. (1 Tesalonia 2:10, 11) Inara tei puapinga roa atu, kia vai tiratiratu tatou kia Iehova. Koia Tei oronga mai i te ora no tatou! (Apokalupo 4:11) Me tiratiratu tatou kiaia, ka rauka ia tatou te mataora mou tikai e te marekaanga. Inara kua kite tatou e ka anoanoia tatou kia vai tiratiratu ki te Atua noatu i te tuatau ngata. I teia atikara, ka uriuri tatou akapeea to Ionatana akaraanga te tauturu anga ia tatou kia vai tiratiratu kia Iehova i roto i te au turanga e ā: (1) me manako tatou e kare e tau ana kia akangateitei i tetai tangata e mana taoonga tona, (2) me iki tatou koai ta tatou ka tau kia tiratiratu atu, (3) me mārama kore tetai taeake arataki ia tatou e kua takinokino ia tatou, e te (4) me manako tatou e e ngata roa i te akono i ta tatou i taputou.

5. No teaa ra i ngata ai no te iti tangata o Iseraela kia vai tiratiratu ki te Atua noatu e e ariki a Saula?

⁵ Kua ō atu a Ionatana e te iti tangata o Iseraela ki roto i tetai turanga ngata. Kua akarongo kore te metua o Ionatana, te Ariki ko Saula e kua kopae a Iehova iaia. (1 Samuela 15:17-23) Noatu rai, kua tuku ua te Atua ia Saula kia tutara no tetai tuatau roa. No reira e ngata no te iti tangata kia vai tiratiratu ki te Atua no te mea e kino tikai te au mea tei raveia e te ariki tei ikiia kia noo i “te terono a Iehova.”​—1 Paraleipomeno 29:23.

6. Eaa te akaari maira e kua vai tiratiratu rai a Ionatana kia Iehova?

⁶ Kua vai tiratiratu a Ionatana kia Iehova. E akamanako i ta Ionatana i rave i muri ua ake te akarongo kore anga a Saula ki te Atua. (1 Samuela 13:13, 14) I te reira taime, kua aere te nuku vaeau maata o Philiseti ma te 30,000 kariota i te tamaki atu ia Iseraela. E 600 ua rai o Saula vaeau, e ko raua anake ua te nga tangata e taoonga tamaki ta raua. Inara kare a Ionatana i mataku. Maara iaia te tuatua a te peroveta a Samuela: “No tona ra ingoa maata e kore ei a Iehova e akaruke i tona iti-tangata.” (1 Samuela 12:22) Kua tuatua a Ionatana ki tetai atu vaeau: “Kare oki ïa  peu ia Iehova i te akono i te maata e te iti kia akaora ra.” No reira kua tamaki atu raua ko te vaeau i tetai pupu Philiseti e kua tamate atu e 20 ia ratou. E akarongo to Ionatana ia Iehova, e kua akameitaki a Iehova iaia. Kua akatupu a Iehova i tetai ngaruerue enua e kua mataku iora te au Philiseti. I reira kua tamaki ratou ia ratou uaorai, e kua re te ngati Iseraela i te tamaki.​—1 Samuela 13:5, 15, 22; 14:1, 2, 6, 14, 15, 20.

7. Akapeea a Ionatana te akono anga i tona metua tane?

⁷ Noatu kua akarongo kore ua atu a Saula ia Iehova, i te ngai ka rauka kua akarongo rai a Ionatana i tona metua tane. Ei akaraanga, ko raua i tamaki ei i te paruru i te iti tangata o Iehova.​—1 Samuela 31:1, 2.

8, 9. Akapeea tatou te vai tiratiratu anga ki te Atua me akangateitei tatou i te aronga mana taoonga?

⁸ Mei ia Ionatana, ka rauka ia tatou kia vai tiratiratu kia Iehova na te akarongo anga ki te kavamani o te enua e noo ra tatou. Te akatika ra a Iehova i teia “aronga mana taoonga” kia akatere ia tatou, e te umuumu maira aia kia akangateitei ia ratou. (E tatau ia Roma 13:1, 2.) Te tumu teia ka akangateitei tatou i te akaaere kavamani noatu kare aia e tuatua tika ana e ka manako tatou kare e tau kia akangateitei atu iaia. Te tika, ka tau tatou kia akangateitei i te aronga pouroa e mana taoonga to ratou no ko mai ia Iehova.​—1 Korinetia 11:3; Ebera 13:17.

⁹ Ko Olga, e tuaine no Marike Apatonga  mai, tei akaari i tona tu tiratiratu kia Iehova na te akangateitei anga i tana tane noatu e kua takinokino tana tane iaia. ^[1] (Akara i te manako poto.) Tetai taime kare tana tane e tuatua kiaia me kore ka tuatua akakino iaia no te mea koia tetai o te Au Kite o Iehova. Kua akakite katoa aia ki tana vaine e ka akaruke aia iaia e ka apai i te tamariki. Inara kare a Olga i tutaki “i te kino ki te kino.” Kua tauta aia kia riro ei vaine meitaki. Kua tunu aia i te kai nana, puʼa i tona kakau, e te akono i tona kopu tangata. (Roma 12:17) Me ka rauka, ka aru aia i tana tane i te atoro i tona kopu tangata e te au oa. Tetai akaraanga, kua inangaro te tane i te aere ki te tanumanga o tona papa i tetai oire maata, no reira kua akapapa aia i te au mea ta ratou ka anoano no te tere. E oti i ko i te tanumanga, kua tiaki aia i tana tane i vao mai i te are pure. I te au mataiti i muri mai, kua akamata te tane a Olga i te akono meitaki iaia no te mea kua akaari ua rai aia i te tu akakoromaki maata e te akangateitei. I teia taime e akamaroiroi ana aia i tana vaine kia aere ki te au uipaanga e ka kave aia iaia ki reira. Pera katoa tetai taime ka aere kapiti raua ki te uipaanga.​—1 Petero 3:1.

10. Akapeea a Ionatana i kite ei e koai tana ka tau kia tiratiratu atu?

¹⁰ I te karanga anga a Saula e ka tamate aia ia Davida, e iki anga ngata ta Ionatana i rave. Kua inangaro aia i te vai tiratiratu ki tona metua tane, inara kua inangaro katoa aia i te vai tiratiratu kia Davida. Kua kite a Ionatana e kua vaitata te Atua kia Davida kare kia Saula, no reira kua iki aia kia tiratiratu kia Davida. Kua akamatakite aia ia Davida kia pipini e oti kua akakite kia Saula i te tumu ka tau a Davida kia ora.​—E tatau ia 1 Samuela 19:1-6.

11, 12. Akapeea to tatou inangaro no te Atua te tauturu anga ia tatou kia tiratiratu kiaia?

¹¹ Ko Alice tetai tuaine no Autireria, kua anoanoia aia kia iki koai tana ka tiratiratu atu. Iaia e apii ra i te Pipiria, kua akakite aia ki tona ngutuare tangata i te au mea tana e apii ra. Akakite katoa aia kia ratou e kare aia e akono i te Kiritimiti e kua akamārama katoa aia i te tumu. I te akamataanga kua poitirere tona ngutuare tangata, inara i muri mai kua riri ratou iaia. Kua manako ratou e kare a Alice e inangaro akaou ia ratou. I reira kua karanga tona mama e kare aia e inangaro i te kite akaou ia Alice. Karanga a Alice e: “Kua poitirere au e te mamae no te mea e āka inangaro tikai toku i toku ngutuare tangata. Noatu rai, kua iki au i te tuku ia Iehova e tana Tamaiti ei mea puapinga i toku oraanga, e i muri mai kua papetitoia au i ko i te akaputuputuanga.”​—Mataio 10:37.

¹² Auraka tatou e tuku i te tu tiratiratu ki tetai ua atu apinga mei te pupu tipoti, te apii, me kore i te pa enua, ei mea puapinga atu i to tatou tu tiratiratu kia Iehova. Ei akaraanga, reka ana a Henry i te pere chess no tona pupu apii e kua inangaro aia kia rē tana apii. Inara no te mea e pere chess ana aia i te au openga epetoma ravarai, kare ona taime no te tutu aere e te au uipaanga. Karanga a Henry e kua riro mai te apii ei mea puapinga atu i te tiratiratu ki te Atua. No reira kua akamutu aia i te pere chess no tana apii.​—Mataio 6:33.

13. Akapeea te tu tiratiratu ki te Atua i te tauturu anga ia tatou i te au manamanata o te ngutuare?

 ¹³ Tetai taime e ngata i te vai tiratiratu ki te au mema ke o te ngutuare tangata i taua taime rai. Ei akaraanga, karanga a Ken e: “Inangaro tikai toku i te atoro putuputu i toku metua vaine pakarikari e kia noo mai aia kia matou i tetai au taime. Inara kare raua ko taku vaine e oaoa ana ki tetai e tetai.” Karanga katoa aia: “Kare e rauka i te akarekareka i tetai e te akamareka kore i tetai.” Kua akamanako a Ken i ta te Pipiria e tuatua ra e kua mārama aia i teia turanga, ka akarekareka aia i tana vaine e ka tiratiratu kiaia. No reira, kite mai aia i te mataara i te akarekareka i tana vaine. E oti, kua akamārama aia ki tana vaine eaa te tumu ka takinga meitaki aia i tona metua vaine. Akamārama katoa aia ki tona metua vaine eaa aia ka akangateitei ei i tana vaine.​—E tatau ia Genese 2:24; 1 Korinetia 13:4, 5.

14. Akapeea a Saula i te takinokino anga ia Ionatana?

¹⁴ Ka rauka katoa ia tatou kia vai tiratiratu kia Iehova me takinokino mai tetai taeake arataki ia tatou. Kua akatainuia te Ariki ko Saula e te Atua, noatu ra kua takinokino aia i tana tamaiti. Kare aia i mārama ana i te tumu i inangaro ei a Ionatana ia Davida. No reira te tauturu anga a Ionatana ia Davida, kua riri tikai a Saula e kua taakama i tana tamaiti i mua i te katoatoa. Noatu ra kua akangateitei a Ionatana i tona metua tane. I taua taime rai,  kua vai tiratiratu aia kia Iehova e Davida, tei ikiia e te Atua kia riro mai ei Ariki no Iseraela.​—1 Samuela 20:30-41.

15. Me akono tau kore tetai taeake ia tatou, akapeea tatou me ariu atu?

¹⁵ I roto i ta tatou putuputuanga i teia tuatau, ka akono te au taeake arataki i te katoatoa ma te tu tau. Inara e aronga apa ua ratou. No reira, penei kare ratou e mārama i te tumu i rave ei tatou i tetai apinga. (1 Samuela 1:13-17) No reira me akaapaia tatou e kua mārama koreia, ka vai tiratiratu ua tatou kia Iehova.

16. Eaa te au turanga kia vai tiratiratu tatou ki te Atua e kare e manako ia tatou uaorai?

¹⁶ E inangaro to Saula kia riro mai a Ionatana e koia te ariki ka aru mai kare ko Davida. (1 Samuela 20:31) Inara kua inangaro a Ionatana ia Iehova e kua vai tiratiratu kiaia. Kare a Ionatana i manako iaia uaorai, mari ra kua riro mai aia ei oa no Davida e kua akatupu i tana i taputou kiaia. Tika rai, tetai ua atu tei inangaro ia Iehova e kia vai tiratiratu kiaia koia “tei taputou ra, kino uaʼi aia uaorai, kare e taeke ua.” (Salamo 15:4) No te mea ka vai tiratiratu tatou ki te Atua, ka akatupu tatou i ta tatou i taputou. Ei akaraanga, me rave tatou i tetai tikaanga pitiniti, ka rave tatou i ta tatou i papau, noatu e ka riro ei mea ngata. Noatu me tupu te manamanata kia tatou i roto i te oraanga akaipoipo, ka akaari ua rai tatou i te aroa kia Iehova na te vai tiratiratu anga ki to tatou tokorua.​—E tatau ia Malaki 2:13-16.

17. Akapeea teia apii i te tauturu anga ia koe?

¹⁷ Kia tiratiratu tatou ki te Atua noatu te au turanga ngata, mei ia Ionatana rai. No reira kia vai tiratiratu ua tatou ki to tatou au taeake e te au tuaine me akataitaia mai ratou ia tatou. E oti ka akamareka tatou i te ngakau o Iehova, e ka mataora atu tatou. (Maseli 27:11) Kia papu tikai ia tatou e ka rave ua aia i te mea meitaki e ka akono ia tatou. I te atikara ka aru mai, ka apii tatou mei tetai pae tangata i to Davida tuatau tei tiratiratu e tei tiratiratu kore.