1-3. (a) No teaa ra tatou ka papu ei e ka rauka ia tatou kia riro ei oa no te Atua? (e) Koai ma ta tatou ka uriuri i roto i teia atikara?

I ROTO i te Pipiria, kua kapikiia a Aberahama e toru taime ei oa no te Atua. (2 Paraleipomeno 20:7; Isaia 41:8; Iakobo 2:23) Koia anake ua te tangata tei kapiki tikaiia ei oa no te Atua i roto i te Pipiria. Ko te aiteanga ainei e ko Aberahama anake ua te tangata tei riro mai ei oa no Iehova? Kare. Te akaari maira te Pipiria e ka rauka ia tatou pouroa teia tika anga.

² Te ki ra te Tuatua na te Atua i te au akapapaanga o te au tane e te au vaine tiratiratu tei mataku ia Iehova, tei tuku i to ratou akarongo ki roto iaia, e kua riro mai ei oa piri vaitata nona. (E tatau ia Salamo 25:14.) Ko ratou tetai tuanga o te “urupu maata i kite nei” tei taikuia e Paulo. Pouroa teia aronga tukeke e au oa ratou no te Atua.​—Ebera 12:1.

³ Ka akara vaitata ana tatou e toru au oa o Iehova tei akatakaia i roto i te Pipiria: (1) Ko Ruta, te vaine takaua e te tiratiratu no Moabi mai, (2) Ko Hezekia, te ariki tiratiratu o Iuda, e te (3) Ko Maria, te metua vaine akaaka o Iesu. Eaa ta tatou  ka apii mai mei te au turanga i riro mai ei ratou ei oa no te Atua?

4, 5. Eaa te iki anga pakari ta Ruta i rave, e no teaa ra i riro ei ei mea ngata? (Akara i te tutu mua.)

⁴ E mamao te aerenga o Naomi e tana nga unonga tamaine ko Ruta e Orapa, mei Moabi mai ki Iseraela. I runga i te mataara, kua manako a Orapa kia oki ki tona kainga i Moabi. Inara kua inangaro a Naomi i te oki ki tona enua anau i Iseraela. Eaa ta Ruta ka rave? Kua anoanoia aia kia rave i tetai ikianga pakari. Ka oki ainei aia ki tona ngutuare i Moabi ki tona kopu tangata, me kore ka aru ainei aia ia Naomi, tona metua vaine ongai, i te aere ki Betelehema?​—Ruta 1:1-8, 14.

⁵ Kua noo to Ruta kopu tangata ki Moabi. Ka rauka iaia kia oki, e ka akono ratou iaia. Kua kite aia i te iti tangata, te reo, e ta ratou peu i Moabi. Kare e rauka ia Naomi i te taputou kia Ruta i tetai ua atu o teia au apinga i Betelehema. E kua mataku a Naomi kare e rauka iaia te oronga i tetai tane akaipoipo nana e tetai ngutuare nona. No reira kua akakite atu a Naomi kia oki aia ki Moabi. Kua kite tatou kua oki a Orapa “ki tona au tangata ra, e ki tona au atua.” (Ruta 1:9-15) Inara kare a Ruta i inangaro i te oki ki tona iti tangata e to ratou au atua pikikaa.

6. (a) Eaa te ikianga meitaki ta Ruta i rave? (e) No teaa ra a Boaza i tuatua ai no Ruta e te kimi ra aia i te akapuanga i raro ake i to Iehova peau?

⁶ Te akaraanga kua apii a Ruta no runga ia Iehova no ko mai i tana tane me kore ia Naomi. Kua apii aia e kare a Iehova e aite ana ki te au atua o Moabi. Kua inangaro aia ia Iehova e kua kite aia e ka tau te aroa e te akamorianga kiaia. No reira kua rave a Ruta i te ikianga meitaki. Kua akakite aia kia Naomi: “Ko toou iti-tangata, ko toku katoa ïa iti-tangata; e toou ra Atua, ko toku ïa Atua.” (Ruta 1:16) Ka akakeuia to tatou ngakau me akamanako tatou i to Ruta aroa no Naomi. Inara te mea umere roa atu ko to Ruta aroa no Iehova. Kua umere katoa a Boaza, tei akapaapaa iaia i muri mai no te ‘aere anga e akaruru i raro ake i to Iehova peau ra.’ (E tatau ia Ruta 2:12.) Te au tuatua ta Boaza i taangaanga penei ka akamaara ia tatou i tetai punua manu e kimi ra i te paruru anga i raro ake i te peau o tona mama. (Salamo 36:7; 91:1-4) Na teia tu katoa, kua paruru a Iehova ia Ruta ma te aroa e kua akameitaki iaia no tona akarongo. Kare roa a Ruta i ekoko ana i tana ikianga.

7. Eaa te ka tauturu i te aronga te ekoko ra i te akatapu i to ratou oraanga kia Iehova?

⁷ E manganui te tangata tei apii no runga ia Iehova inara kare i kimi i tana akapuanga. Kua ekoko ratou i te akatapu i to ratou oraanga kiaia e kia papetitoia. Me te manako akapera ra koe, e akamanako no teaa ra koe i ekoko ei. Te tavini ra te katoatoa e tai atua me kore tetai atu. (Iosua 24:15) Te ikianga meitaki, koia oki kia tavini i te Atua mou. Me akatapu koe i toou oraanga kia Iehova, te akaari ra koe e kua tuku koe i toou akarongo kiaia ei akapuanga noou. E ka tauturu aia ia koe kia tavini ua atu iaia noatu te au manamanata. Ta te Atua teia i rave no Ruta.

8. E akataka mai i to Hezekia tupuanga.

⁸ E tuke tikai to Hezekia tupuanga ki to Ruta. E tuanga aia no tetai iti tangata tei akatapuia ki te Atua. Inara kare te katoa  anga o te ngati Iseraela i vai tiratiratu ana. E kino tikai te metua tane o Hezekia, te Ariki ko Ahaza. Kare aia i akangateitei ana i te iero o te Atua e kua akakeu aia i te iti tangata kia akamori i te au atua ke. Kua akaatinga ora ua a Ahaza i te au teina o Hezekia ki te atua pikikaa. E kino tikai to Hezekia tupuanga!​—2 Ariki 16:2-4, 10-17; 2 Paraleipomeno 28:1-3.

9, 10. (a) No teaa ra a Hezekia i kore ei e viviki ua i te riri? (e) No teaa ra tatou ka kore ei e riri atu i te Atua? (ng) No teaa ra kare tatou e akariro i to tatou tupuanga kia akataka mai i to tatou tu tangata?

⁹ Ka rauka to Ahaza akaraanga kino i te akakinokino i tana tamaiti ia Hezekia e te akakeu iaia kia riri ia Iehova. I teia rā, te manako ra tetai pae e meangiti ake ta ratou akakoromaki anga i ta Hezekia, e e tumu anga meitaki ta ratou kia ‘riri ia Iehova’ me kore i tana akaaereanga. (Maseli 19:3) Te manako ra tetai pae e ka riro to ratou tupuanga kopu tangata ei akakeu ia ratou kia akakino i to ratou oraanga me kore kia aru i te au tarevake o te nga metua. (Ezekiela 18:2, 3) Inara e tika ainei teia?

¹⁰ Te akapapu maira te oraanga o Hezekia e te pauanga ki teia uianga, e kare. Kare rava e tumu anga meitaki kia riri ia Iehova. Kare aia e akatupu ana i te au mea kino ki te tangata. (Iobu 34:10) E tika ka rauka i te au metua i te apii i ta ratou tamariki kia rave i te meitaki me kare te kino. (Maseli 22:6; Kolosa 3:21) Inara kare te aiteanga e ka riro to tatou tupuanga ngutuare tangata ei akataka mai i to tatou tu tangata. No teaa ra? No te mea kua oronga mai a Iehova i te apinga aroa o te tu rangatira, te iki kia rave i te meitaki me kare te kino. (Deuteronomi 30:19) Akapeea a Hezekia te taangaanga anga i teia apinga aroa?

11. Eaa tei akariro ia Hezekia ei ariki meitaki roa atu no Iuda?

¹¹ Noatu kua riro tona metua tane e ko tetai o te au ariki kino roa atu i Iuda, kua riro mai a Hezekia koia tetai ariki meitaki roa atu. (E tatau ia 2 Ariki 18:5, 6.) Kare aia i iki ana kia aru i te akaraanga kino o tona metua. Mari ra, kua iki aia i te akarongo meitaki ki te au peroveta a Iehova, mei ia Isaia, Mika e Hosea. Kua akarongo meitaki aia i ta ratou akoanga e te akatikatika anga. Kua akakeu teia iaia kia akatikatika i te au manamanata ta tona metua tane i akatupu. Kua tāmā aia i te iero, e kua pati  i te Atua kia akakore mai i te au ara a te iti tangata, e kua takore i te au itoro i te enua nei. (2 Paraleipomeno 29:1-11, 18-24; 31:1) I muri mai, te tamataku anga te ariki o Asura ko Senakeriba i te tamaki atu ia Ierusalema, kua akaari a Hezekia i te tu ngakau toa e te akarongo. Kua irinaki aia i te paruruanga a Iehova e kua akamaroiroi i tona iti tangata. (2 Paraleipomeno 32:7, 8) I tetai tupu anga, kua ngakau parau a Hezekia, inara i to Iehova akatikatika anga iaia, kua taakaaka aia. (2 Paraleipomeno 32:24-26) Te taka ua ra, e akaraanga meitaki a Hezekia no tatou kia aru. Kare aia i akariro ana i tona tupu anga ngutuare tangata ei takino i tona oraanga. Mari ra, kua akaari aia e oa aia no Iehova.

12. Mei ia Hezekia, akapeea te maataanga i teia tuatau te riro anga ei au oa no Iehova?

¹² E kino tikai teia ao i teia tuatau e te aroa kore, kua tupu mai te maata anga o te tamariki ma te aroa kore e te akono kore anga a te metua. (2 Timoteo 3:1-5) Noatu e maata te au Kerititiano i teia tuatau no roto mai i te au tupuanga ngata o te ngutuare tangata, kua iki ratou i te akatupu i tetai pirianga oa kia Iehova. Mei ia Hezekia, kua akaari ratou e kare na te tupuanga o te ngutuare tangata e akaaere e mei teaa to ratou tu a te tuatau ki mua. Kua oronga mai te Atua i tetai apinga aroa koia oki te tu rangatira, e ka rauka ia tatou kia iki i te tavini e te akangateitei iaia, mei ta Hezekia i rave.

13, 14. No teaa ra i riro ei ta Maria apainga ei mea ngata, inara akapeea aia i te ariu atu ki ta Gaberiela tuatua?

¹³ I te au mataiti i muri ake i to Hezekia tuatau, kua akatupu tetai vaine mapu akaaka ko Maria i tetai pirianga takake kia Iehova e kua orongaia tetai apainga umere kiaia. Kua nui aia, kua anau e kua utuutu i te Tamaiti a te Atua! Papu e kua inangaro e kua irinaki a Iehova ia Maria e rauka ai i te oronga i teia akangateitei anga umere kiaia. Inara akapeea aia i te ariu anga atu i tona akarongo mua anga i teia apainga?

¹⁴ E tuatua putuputu ana tatou no runga i te akangateitei anga maata tei orongaia kia Maria. Inara eaa tetai o tona au manako taitaia? Ei akaraanga, akakite te angera ko Gaberiela kiaia e ka tō aia noatu e kare e pirianga ainga ki te tane. Inara kare a Gaberiela i oronga i te akamārama anga ki tona ngutuare tangata e te au tangata i vao mai e ka akapeea aia e nui ei. Eaa ra to ratou manako? Ka akapeea aia i te akapapu kia Iosepha e kare aia i tiratiratu kore kiaia? Kapiti mai, e apainga maata tana no te utuutu i te Tamaiti a te Atua! Kare tatou i kite i te katoaanga o to Maria manako taitaia, inara kua kite tatou eaa tana i rave i muri  ake i te tuatua anga a Gaberiela kiaia. Karanga aia: “I na, ei tavini au no te Atu; kia peraia mai au mei taau i tuatua ana.”​—Luka 1:26-38.

15. No teaa ra to Maria akarongo i te mea umere tikai?

¹⁵ E mea umere tikai to Maria akarongo! Kua papa ua aia i te rave i tana i patiia, mei tetai tavini vaine rai. Kua irinaki tikai aia ka akono e ka paruru a Iehova iaia. Akapeea to Maria akarongo i ketaketa ai? Kare tatou i anauia mai ma te akarongo. Inara e akarongo to tatou me tatanu i te reira e me pati ki te Atua kia akameitaki mai i ta tatou aruaru anga. (Galatia 5:22; Ephesia 2:8) Kua angaanga pakari a Maria i te akaketaketa i tona akarongo. Akapeea tatou i kite ei? Ka akara ana tatou akapeea aia i te akarongo anga e tana i tuatua.

16. Eaa te akaari maira e e vaine akarongo meitaki a Maria?

¹⁶ Akapeea a Maria te akarongo anga. Akakite mai te Pipiria “kia rapurapu ua te tangata ravarai i te akarongo, kia tavarevare i te tuatua.” (Iakobo 1:19) E vaine akarongo meitaki a Maria. Te akaari maira te Pipiria e kua rongo meitaki aia i tana i akarongo, te au mea tikai tana i apii no runga ia Iehova. Kua tuku aia i te tuatau kia akamanako oonu no runga i teia au mea puapinga. Tetai akaraanga, i to Iesu anau anga, kua akakite te au tiaki mamoe kia Maria i ta te angera i tuatua. E i muri mai, e 12 o Iesu mataiti, kua tuatua aia i tetai apinga tei umere a Maria. I roto i teia nga tupuanga, kua akarongo, kua maara, e kua akamanako meitaki a Maria i tana i rongo.​—E tatau ia Luka 2:16-19, 49, 51.

17. Eaa ta tatou ka apii mai no runga ia Maria mei tana i tuatua?

¹⁷ Ta Maria i tuatua. Kare e maata ana ta te Pipiria e akakite maira no runga i ta Maria i tuatua. Tana tuatua roa atu, tei roto ia Luka 1:46-55. Te akaari maira teia au tuatua e kua kite meitaki a Maria i te au Tuatua Tapu Ebera. Akapeea ra? Kua aiteite te tuatua a Maria ki te tuatua i roto i te pure a Hana, te metua vaine o Samuela. (1 Samuela 2:1-10) I te akara anga e 20 taime kua taiku a Maria i te au irava i roto i tana tuatua. Te taka ua ra kua inangaro aia i te akakite i te tuatua mou tana i kite mai mei tona Oa maata ko Iehova.

18. I teea au mataara ka aru tatou i to Maria tu akarongo?

¹⁸ Mei ia Maria, penei ka orongaia mai tetai tuanga angaanga no ko mai ia Iehova ta tatou ka manako e e ngata roa te reira. Kia aru tatou i tona akaraanga, kia āriki akaaka ua i te au tuanga angaanga, e kia irinaki ia Iehova kia tauturu ia tatou. Kia aru katoa tatou i te tu akarongo o Maria na te akarongo meitaki anga kia Iehova, e te akamanako oonu atu i ta tatou i apii no runga iaia e tona au akakoroanga. I reira tatou e mataora ai i te akakite atu ki te katoatoa ta tatou i apii mai.​—Salamo 77:11, 12; Luka 8:18; Roma 10:15.

19. Me aru tatou i te au akaraanga umere no te akarongo i roto i te Pipiria, eaa ta teia ka akapapu kia tatou?

¹⁹ E mea papu e ko Ruta, Hezekia, e Maria, e oa ratou no Iehova, mei ia Aberahama rai. Ko ratou tetai o te “urupu maata i kite” tei rauka katoa ia ratou teia akameitakianga kia riro mai ei oa no te Atua. Kia aru ua rai tatou i teia au akaraanga umere no te akarongo. (Ebera 6:11, 12) Me akapera tatou, te tapapa atura tatou i te au akameitakianga ei oa mutu kore no Iehova!