1, 2. Akapeea a Davida i te akaari anga e kua tiratiratu aia ki te Atua? (Akara i te tutu mua.)

TE KIMI ra a Saula e tona au vaeau e 3,000 ia Davida i roto i te metepara o Iuda kia tamate atu iaia. I tetai po, kua kitea e Davida e tona pupu tangata te ngai e noo ra a Saula e tona pupu vaeau. Te moe ra ratou, no reira kua aere marie atu a Davida raua ko Abisai na te pae i te au vaeau e kua kite atu ia Saula. Kua koumuumu atu a Abisai kia Davida: “E tuku mai ana koe, e ko ua ana au iaia ki te korare e mama ua atu ki raro i te one, kare au e tataki rua i te ko anga.” Inara kare a Davida i akatika iaia kia tā ia Saula. Akakite aia kia Abisai e: “Auraka aia e taia; koai ïa tangata kare e ara kia tāki i tona rima ki runga e ta i to Iehova tangata i akatainuia ra?” E oti akakite a Davida e: “Kia tāpu mai oki a Iehova iaku, kia kore au e tāki i toku rima ki runga e rave i te tangata o Iehova i akatainuia ra.”​—1 Samuela 26:8-12.

 ² Kua mārama a Davida i tana ka rave kia tiratiratu kia Iehova. Kua kite aia e kia akangateiteiia a Saula, e kare roa aia i manako i te takinokino iaia. No teaa ra? No te mea kua iki te Atua ia Saula ei ariki no Iseraela. I teia tuatau, te inangaro ra a Iehova i tona au tavini kia tiratiratu kiaia e kia akangateitei i te aronga tana i akataoonga.​—E tatau ia Mika 6:8.

3. Akapeea a Abisai te vai tiratiratu anga kia Davida?

³ Kua akangateitei a Abisai ia Davida no te mea kua kite aia e na te Atua i iki ia Davida ei ariki. Inara i muri mai i tona riro anga ei ariki, kua rave a Davida i te au ara kino. Kua rave aia i te pirianga ainga ki te vaine a Uria e kua akakite kia Ioaba kia tamate ia Uria i roto i te tamaki. (2 Samuela 11:2-4, 14, 15; 1 Paraleipomeno 2:16) E tuakana a Ioaba no Abisai, no reira penei kua rongo a Abisai i ta Davida i rave, inara kua akangateitei ua aia ia Davida. Kapiti atu, e rangatira vaeau a Abisai e e mana taoonga tona kia akariro iaia uaorai ei ariki, inara kare rava aia i pera ana. Mari ra, kua tavini aia ia Davida e kua paruru iaia mei tona au enemi.​—2 Samuela 10:10; 20:6; 21:15-17.

4. (a) Akapeea a Davida i riro ei ei akaraanga meitaki no te vai tiratiratu anga ki te Atua? (e) Eaa tetai au akaraanga ta tatou ka uriuri?

⁴ Kua tiratiratu a Davida kia Iehova i tona oraanga katoa. Tona mapu anga, kua tamate aia i te tuputupua ia Golia, ko tei akakino ia Iehova e te ngati Iseraela. (1 Samuela 17:23, 26, 48-51) I te riro anga mai a Davida ei ariki, kua anoanoia te peroveta a Iehova ko Natana kia akatikatika iaia no te au ara tana i rave. I te reira taime, kua akakite a Davida e kua ara aia, e kua tataraara. (2 Samuela 12:1-5, 13) Muri mai, te ruaine anga a Davida, kua oronga aia i te au apinga puapinga ei akatu i te iero o Iehova. (1 Paraleipomeno 29:1-5) Te taka ua ra e noatu kua rave a Davida i te tarevake kino i tona oraanga, kare rava aia i akamutu ana i te vai tiratiratu ki te Atua. (Salamo 51:4, 10; 86:2) I teia atikara, ka uriuri tatou i te akaraanga o Davida e tetai pae o te reira tuatau e ka apii akapeea tatou me vai tiratiratu maata atu kia Iehova kare ki tetai ke. E ka uriuri tatou i tetai au tu te ka tauturu ia tatou kia pera.

5. Eaa te apiianga ta tatou ka apii mai mei te tarevake o Abisai?

⁵ Te inangaro anga a Abisai i te tamate ia Saula, te tauta ra aia kia vai tiratiratu kia Davida. Inara no te mea kua kite a Davida e tarevake i te takinokino i “to Iehova tangata i akatainuia ra,” kare aia i akatika ia Abisai kia tā i te ariki. (1 Samuela 26:8-11) E apiianga puapinga teia no tatou: Me anoanoia kia iki koai te mea mua kia vai tiratiratu atu tatou, ka anoanoia kia akamanako eaa te au kaveinga Pipiria te ka tauturu ia tatou.

6. Noatu e e mea natura ua kia vai tiratiratu ki to tatou ngutuare tangata e te au oa, no teaa ra tatou ka matakite ei?

⁶ E mea natura ua kia vai tiratiratu ki tetai ta tatou i inangaro, mei te oa me kore tetai mema o te ngutuare tangata. Inara no to tatou tu ara ua, ka riro to tatou au manako ngakau ei akavare  ia tatou. (Ieremia 17:9) No reira me rave tetai ta tatou i akaperepere i te mea kino e ka akaruke i te tuatua mou, kia akamaara tatou e puapinga maata atu kia vai tiratiratu kia Iehova i tetai ke.​—E tatau ia Mataio 22:37.

7. Akapeea tetai tuaine te vai tiratiratu anga ki te Atua i roto i tetai turanga ngata?

⁷ Me kua akaateaia tetai i roto i toou ngutuare tangata mei te putuputuanga, ka tau koe kia akaari kia Iehova i toou tu tiratiratu Kiaia. Ei akaraanga, i tetai rā kua ringi atu te mama o Anne, tei akaateaia, e kua inangaro aia i te atoro ia Anne. ^[1] (Akara i te manako poto.) Karanga te mama o Anne e kare aia e mataora ana no te mea kare tona ngutuare tangata e tuatua kiaia. Kua maromaroa a Anne, e kua taputou e ka tata atu aia i tetai reta. I mua ake ka tata ei aia i te reta, kua akamanako a Anne i tetai au kaveinga Pipiria. (1 Korinetia 5:11; 2 Ioane 9-11) I roto i te reta, kua akamārama aia ma te tu maru e na tona mama i akaruke i te ngutuare tangata i tona ara anga e kare i tataraara ana. Akakite a Anne ki tona mama te ravenga e mataora akaou ei aia na te oki anga mai kia Iehova.​—Iakobo 4:8.

8. Eaa te au tu ka tauturu ia tatou kia vai tiratiratu ki te Atua?

⁸ I to Davida tuatau, kua akaaka katoa te au tavini tiratiratu o te Atua ma te takinga meitaki, e te ngakau toa. Ka akara ana tatou akapeea teia au tu te tauturu anga ia tatou kia vai tiratiratu kia Iehova.

9. No teaa ra a Abenera i tauta ei i te tamate ia Davida?

⁹ Te tamaiti a Saula ko Ionatana e te rangatira vaeau o Iseraela ko Abenera, kua kite raua ia Davida te apai anga i te mimiti o Golia ki te Ariki ko Saula. Kua riro mai a Ionatana ei oa no Davida e kua vai tiratiratu kiaia. (1 Samuela 17:57–18:3) Inara kare a Abenera i pera ana. Te tika, i muri mai kua tauturu aia ia Saula e kua inangaro i te tā ia Davida. (1 Samuela 26:1-5; Salamo 54:3) Kua kite a Ionatana raua ko Abenera e kua inangaro te Atua kia riro e ko Davida te ariki ka aru mai. Inara te mate anga a Saula, kare a Abenera i turu ana ia Davida. Mari ra, kua tauta aia i te akariro i te tamaiti a Saula ko Iseboseta ei ariki. Muri mai, kua inangaro a Abenera kia riro aia ei ariki, e penei te tumu te  reira i rave ei aia i te pirianga ainga ki tetai o te au vaine a te Ariki ko Saula. (2 Samuela 2:8-10; 3:6-11) No teaa ra a Ionatana raua ko Abenera i manako ke ei ia Davida? No te mea kua tiratiratu a Ionatana kia Iehova ma te akaaka, inara kare a Abenera i pera ana.

10. No teaa ra a Abasaloma i kore ei i vai tiratiratu ki te Atua?

¹⁰ Ko Abasaloma, te tamaiti a te Ariki ko Davida, kare aia i vai tiratiratu ana ki te Atua no te mea kare aia i akaaka ana. Kua inangaro aia kia riro mai ei ariki, no reira kua rave aia i te “au kariota, e te au oroenua, e te au tangata oki e rima ngauru ei oro na mua iaia.” (2 Samuela 15:1) Kua akakeu katoa aia i te au ngati Iseraela kia tiratiratu kiaia. Kua tauta katoa aia i te tamate i tona papa, noatu kua kite aia e na Iehova i akariro ia Davida ei ariki no Iseraela.​—2 Samuela 15:13, 14; 17:1-4.

11. Akapeea tatou e puapinga ai mei te au papaanga Pipiria no runga ia Abenera, Abasaloma, e Baruka?

¹¹ Me kare tetai tangata e akaaka e ka inangaro kia maata atu tona mana taoonga, ka ngata iaia kia vai tiratiratu ki te Atua. E tika, te inangaro ra tatou ia Iehova e kare e manako ua ia tatou uaorai ma te kino mei ia Abenera e Abasaloma. Inara kia matakite tatou kia kore e anoano atu i te moni me kore te ngai angaanga kia puapinga atu tatou. Ka takino teia i to tatou pirianga kia Iehova. No tetai tuatau, kua inangaro a Baruka, te tekeretere o Ieremia, i tetai apinga tana i ngere e i muri mai kua ngaro tona mataora i te tavini i te Atua. No reira kua tuatua a Iehova kia Baruka e: “I na, ko taku i patu ra, ko taku ïa e vavaʼi ki raro, e ko taku i tanu ra, ko taku ïa e kiriti, koia te enua katoa nei. Te kimi ra ainei koe i te meitaki maata noou uaorai? Auraka e kimiia.” (Ieremia 45:4, 5) Kua akarongo a Baruka kia Iehova. Kia akarongo katoa tatou kiaia, no te mea kare e roa atu ana ka takoreia teia ao kino.

12. Akaari mai i te tumu kare tatou e tiratiratu ki te Atua me manako ua tatou ia tatou uaorai.

¹² Kua anoanoia a Daniel, e taeake i Mexico, kia iki koai tana ka tiratiratu atu. Kua inangaro aia i te akaipoipo i tetai tamaine kare e akamori ana ia Iehova. Karanga a Daniel e: “Kua tata reta au kiaia noatu i muri ake i te tomo anga au ki roto i te angaanga painia.” Inara kua kite mai aia e te manako ua ra aia i te rave  i tana i inangaro. Kare aia i tiratiratu ana kia Iehova, e kua anoanoia te tu akaaka. No reira kua akakite aia ki tetai tangata pakari no runga i teia tamaine. Akataka a Daniel e: “Kua tauturu aia iaku kia kite mai me ka inangaro au kia tiratiratu ki te Atua, ka anoanoia au kia akamutu i te tata atu kiaia. I muri ake i taku au pure ma te aue, ko taku ïa i rave. Kare i roa, kua tupu toku rekareka i roto i te angaanga tutu aere.” I teianei e vaine ta Daniel tei inangaro ia Iehova, e te tavini ra aia ei akaaere kotinga.

13. Akapeea a Natana i te vai tiratiratu anga ki te Atua e Davida, te ara anga a Davida?

¹³ Me vai tiratiratu tatou kia Iehova, ka rauka katoa ia tatou kia vai tiratiratu ki tetai ke e ka tauturu ia ratou na te mataara meitaki rava atu. Kua vai tiratiratu te peroveta ko Natana kia Iehova e kua tiratiratu kia Davida. Muri ake te rave anga a Davida i te vaine a tetai tangata e kua tamate i tera tangata, kua tono a Iehova ia Natana kia ako ia Davida. Kua ngakau toa a Natana e kua akarongo ia Iehova. Inara kua akaari katoa aia i te tu pakari e kua tuatua atu kia Davida na roto i te tu maru. Kua inangaro aia i te tauturu ia Davida kia kite i te kino o tana ara i rave. No reira kua akakite aia i te tua o tetai tangata apinganui tei keia i te punua mamoe okotai a tetai tangata putaua. I te rongo anga a Davida i teia, kua riri tikai aia i ta te tangata apinganui i rave. E oti kua karanga a Natana e: “Ko koe rai taua tangata ra.” Kua kite i reira a Davida e kua ara aia ia Iehova.​—2 Samuela 12:1-7, 13.

14. Akapeea koe e vai tiratiratu ei kia Iehova e toou oa me kore tetai mema o te ngutuare?

¹⁴ Ka rauka katoa ia koe kia vai tiratiratu kia Iehova na mua e te vai tiratiratu ki tetai ke ma te tu takinga meitaki. Ei akaraanga, penei e akapapuanga taau e kua rave tetai taeake i te ara kino. Penei ka inangaro koe kia vai tiratiratu kiaia, i te mea tikai e oa piri vaitata aia me kore e mema no te ngutuare tangata. Inara kua kite katoa koe e puapinga atu kia vai tiratiratu kia Iehova. No reira mei ia Natana rai, e akarongo kia Iehova, inara kia takinga meitaki i toou taeake. E akakite kiaia e ka tau aia kia pati i te aronga pakari no te tauturu e kia tuatua viviki atu kia ratou. Me kare aia e rave i te reira, naau e tuatua atu ki te aronga pakari. Me pera koe, ka vai tiratiratu koe kia Iehova. I taua taime ra, te takinga meitaki ra koe i toou taeake no te mea ka tauturu te aronga pakari iaia kia rauka akaou mai tetai pirianga meitaki kia Iehova. Ka akatikatika ratou iaia na te tu maru.​—E tatau ia Levitiku 5:1; Galatia 6:1.

15, 16. No teaa ra a Husai i anoano ei i te tu ngakau toa kia tiratiratu ki te Atua?

¹⁵ Ko Husai tetai oa tiratiratu o te Ariki ko Davida. Te inangaro anga te tangata i te akariro  ia Abasaloma ei Ariki, kua anoanoia a Husai kia ngakau toa e kia vai tiratiratu kia Davida e ki te Atua. Kua kite aia e kua aere mai a Abasaloma ki Ierusalema e tona au vaeau e kua oro a Davida. (2 Samuela 15:13; 16:15) Inara eaa ta Husai i rave? Kua akaruke ainei aia ia Davida e kua turu ia Abasaloma? Kare. Noatu e kua ruaine a Davida e e maata te tangata tei inangaro i te tamate iaia, kua vai tiratiratu ua a Husai kiaia no te mea kua akataoonga a Iehova ia Davida ei Ariki. No reira kua aere a Husai ki te Maunga o Oliveta i te aravei ia Davida.​—2 Samuela 15:30, 32.

¹⁶ Kua pati a Davida ia Husai kia oki ki Ierusalema kia akatutu ei oa no Abasaloma e rauka ai iaia te akakeu ia Abasaloma kia akarongo i tana akoanga kare i ta Ahitophela. Kua tuku ngakau toa a Husai i tona oraanga ki roto i te kino kia akarongo kia Davida e kia vai tiratiratu kia Iehova. Kua pure a Davida kia tauturu a Iehova ia Husai, e ko te reira tei tupu. Kua akarongo a Abasaloma kia Husai kare kia Ahitophela.​—2 Samuela 15:31; 17:14.

17. No teaa ra tatou ka anoano ei kia ngakau toa e kia tiratiratu?

¹⁷ Ka anoano tatou i te tu ngakau toa kia vai tiratiratu e kia akarongo kia Iehova kare ki te au mema ngutuare tangata, au oa angaanga, me kore te au kavamani. Ei akaraanga, mei tona meangiti anga, kua rave a Taro i Tiapani, i te au mea kia rekareka tona nga metua. Kua akarongo aia kia raua ma te tiratiratu, no te mea e inangaro tona ia raua. Inara i tona akamata anga i te apii ki te Au Kite o Iehova, kua inangaro tona nga metua iaia kia akamutu. Kua maromaroa aia, e e ngata tikai iaia i te akakite kia raua e kua iki aia kia aere ki te au uipaanga. Karanga a Taro e: “Riri tikai raua, e no tetai tuatau roa kare au e akatikaia kia oki atu ki te kainga i te atoro ia raua. Kua pure au ma te ngakau toa kia tiratiratu ki taku ikianga. Teianei kua maru mai to raua tu, e ka rauka iaku i te atoro putuputu ia raua.”​—E tatau ia Maseli 29:25.

18. Akapeea koe e puapingaia ai mei teia apii?

¹⁸ Mei ia Davida, Ionatana, Natana, e Husai, kia kite katoa tatou i te mareka anga no te tiratiratu kia Iehova. Kare tatou e inangaro kia aite mei ia Abenera e Abasaloma, tei kore i vai tiratiratu. Tika rai e aronga ara ua tatou e te rave ra i te tarevake. Inara kia akaari tatou e ko te mea puapinga rava atu i roto i to tatou oraanga, ko te vai tiratiratu kia Iehova.