KUA anauia au i te mataiti 1926 i Crooksville, Ohio, i Marike. Kare a Papa raua ko Mama e aere pure ana, inara kua akakite mai raua kia matou toko varu tamariki kia aere ki te pure. Kua aere au ki te akonoanga Methodist. I toku 14 anga mataiti, kua oake mai te orometua i tetai apinga aroa no tei aere au ki te pure i te au Tapati ravarai o te mataiti.

I te reira taime, kua akamata a Margaret Walker tei noo i te pae mai ia matou, koia tetai o te Au Kite o Iehova, i te atoro i toku mama e te uriuri i te Pipiria kiaia. I tetai rā, kua manako au i te piri atu ki ta raua uriuri anga. Kua manako a mama e ka tamanamanata au i tana apii, no reira kua akakite mai aia kia aere au ki vao. Inara kua akarongo ua au i ta raua uriuri anga. I muri ake i nga uriuri anga e rua, kua ui mai a Margaret kiaku, “Kua kite ainei koe to te Atua ingoa?” Karanga atu au, “Kua kite ua te katoatoa​—ko te Atua oki.” Karanga mai aia e, “Rave mai i taau Pipiria e akara ia Salamo 83:18.” Kua akara rai au e kua kite i to te Atua ingoa e ko Iehova. Kua oro atu au ki toku au oa te akakite kia ratou e, “Me tae kotou ki te kainga i teia po, e akara ia Salamo 83:18 i roto i te Pipiria kia kite kotou koai to te Atua ingoa.” Penei ka karangaia e kua akamata au i te tutu aere i te reira taime.

Kua apii au i te Pipiria e kua papetitoia i te 1941. Kare i roa i muri mai, kua tukuia au kia rave i te apii puka a te putuputuanga. Kua akamaroiroi au i toku mama e toku au teina e te au tuaine kia aere mai, e kua akamata ratou pouroa i te aere ki te apii puka taku i rave. Kare a Papa i inangaro i te aere.

E maata taku apainga tei orongaia mai i roto i te putuputuanga, e kua akaputu au i tetai au puka tei neneiia e te Au Kite o Iehova. Tetai rā, kua toʼu toku Papa ki taku au puka e kua karanga mai e: “Te kite ra koe i tena au apinga? Kia titiriia te reira, e koe atu rai te aru anga.” Akaruke atura au i te kainga aere atura i te noo i te pae mai i Zanesville, Ohio, inara kua oki ua atu au i te akamaroiroi i toku ngutuare tangata.

Tauta a Papa i te tāpu ia Mama kia kore e aere ki te au uipaanga. I tetai au taime iaia e aere ra, kua arumaki  a Papa iaia e kua uuti mai ki roto i te are. Inara kua oro atu aia ki vao na tetai ngutupa ke e kua aere ki te uipaanga. Kua akakite au kia Mama: “Auraka e manamanata. Te vai nei te rā ka akaroi aia i te arumaki mai ia koe.” Kare i roa ana, kua akamutu a Papa i te tāpu iaia, e kua tae ua aia ki te au uipaanga.

I te akamata anga te Apii Orometua Teokaratiki i te 1943, kua akamata au i te oronga i te au akoanga i roto i taku putuputuanga. Kua riro te ako anga i muri mai i taku au tuanga no te apii ei tauturu iaku kia riro mai ei vaa tuatua meitaki.

I te mataiti 1944 i te tuatau o te Tamaki II o te Ao, kua akaueia au kia piri ki roto i te vaeau. Kua tae au ki Fort Hayes i Columbus, Ohio, kua akaraia toku turanga kopapa, e kua akaki i te au pepa. Kua akakite katoa au ki te aronga akaaere e kare au e riro mai ei vaeau. Kua tuku ratou iaku kia aere. I nga rā i muri mai, kua aere mai tetai akava i te akakite mai kiaku e, “E Corwin Robison, e pepa akautunga anga taku noou.”

E rua epetoma i muri mai i roto i te akava anga, karanga te akavanui e: “Naringa e tei runga iaku, ka akautunga au ia koe no te katoa anga i toou oraanga. E apinga ainei taau ka tuatua?” Kua pau atu au e: “E te Ngateitei, tano anga tikai ka karangaia e e orometua au. Te au ngutupa katoatoa ko toku atarau ïa, e kua tutu aere au i te nuti meitaki o te Patireia ki te tangata e manganui.” Kua akakite te akavanui ki te aronga akava e: “Kare to kotou akakoroanga kia iki me e orometua teia mapu tane e me kare. To kotou akakoroanga kia akapapu me kua tae aia ki te ngai o te vaeau me kare.” I raro ake i te āpa ora, kua iki te aronga akava e kua apa au. Kua akautunga te akavanui iaku e rima mataiti ki roto i te are auri i Ashland, Kentucky.

Kua pou iaku e rua epetoma i roto i te are auri i Columbus, Ohio, e i te rā mua kua noo ua au ki roto i toku pia tapeka anga. Kua pure au kia Iehova: “Kare e rauka iaku i te noo ua ki roto i tetai pia tapeka anga e rima mataiti. Kare au e kite eaa taku ka rave.”

I tera mai rā, kua tuku te aronga tiaki iaku kia aere ki vao. Kua aere atu au ki tetai mouauri, e āka tangata tumutumu e kua tu ua maua ki reira i te akara anga ki vao. Kua ui mai aia, “E te tangata poto eaa koe i tae mai ei ki konei?” Karanga atu au e, “Ko au tetai o te Au Kite o Iehova.” Karanga mai aia e: “Ko koe ainei tetai? Eaa toou tumu i konei?” Karanga atu au: “Kare te Au Kite o Iehova e aere ana ki te tamaki e e tā tangata ana.” Karanga mai aia, “E tuku ana ratou ia kotou ki roto i te are auri no te mea kare kotou e tā tangata ana. E tuku ana ratou i tetai atu aronga ki roto i te are auri no te mea e tā tangata ana ratou. Te tano ra ainei te reira?” Karanga atu au, “Kare.”

E oti karanga aia, “I toku 15 anga mataiti i roto i tetai atu are auri, kua tatau au i ta kotou puka.” I toku  rongo anga i te reira, kua pure au, “E Iehova e, tauturu mai i teia tangata kia aru mai iaku.” I te reira taime, kua karanga teia mouauri ko Paul e: “Me amiri ua ake teia pupu tangata ia koe, e ava mai koe. Naku e paruru ia koe.” Iaku i reira, kare oku manamanata ki te 50 mouauri i toku ngai.

I te neke anga te aronga akaaere iaku ki te are auri Ashland, kua aravei au i te au taeake tukatau i reira. Kua tauturu ratou iaku e tetai pae kia noo vaitata ua kia Iehova. Kua oronga mai ratou i tetai tatau anga Pipiria i te au epetoma na matou, e kua akapapa matou i te au uianga e te pauanga no te au uipaanga tei kapikiia e ko te aronga maroiroi i te apii Pipiria. Tei roto matou i te pia tapeka anga maata maata e au roi to te pae i te au paruru. E taeake tetai nana e akaaere ana i ta matou ngai ka tutu aere. Ka tuatua mai aia kiaku: “E Robison, tera taau au roi ka tutu aere. Te tangata nona tera roi, ko taau tuanga ngai ïa. Akapapu koe kia tutu aere kiaia i mua ake ka akaruke ei.” Na reira matou i te akaaere anga i te tutu aere.

I te 1945 kua ope te Tamaki II o te Ao, inara kua noo au ki roto i te are auri no tetai tuatau roa i muri mai. Kua manamanata au i toku ngutuare tangata no te mea kua akakite mai a Papa kiaku, “Me ka rauka iaku i te akaatea ia koe, ka rauka katoa iaku kia pera i te katoatoa.” I toku tuku angaia ki vao, kua poitirere au e itu o toku ngutuare tangata te aere ra ki te au uipaanga e tai oku tuaine kua papetitoia, noatu ta Papa patoi anga.

Te akamata anga te Tamaki i Korea i te 1950, kua akaueia au kia tomo akaou ki roto i te vaeau. Kua akakiteia au kia aere akaou ki Fort Hayes. Muri ake i te akara akaou anga i toku turanga kopapa kua akakite mai te akaaere kiaku, “Naau te māka maata roa atu i toou pupu.” Karanga atu au, “Meitaki ua tena, inara kare au e tomo ki roto i te vaeau.” Kua taiku atu au ia 2 Timoteo 2:3 e kua karanga, “E vaeau takere au no Karaiti.” I muri ake i tetai muteki anga roa, karanga aia e, “Aere ra.”

I muri poto ua ake, kua aere au ki te uipaanga Betela i ko i te uruoaanga i Cincinnati, Ohio. Kua akakite mai te Taeake ko Milton Henschel kia matou e ka anoanoia te au taeake tei inangaro i te angaanga pakari no te Patireia kia aere ki Betela. Kua akaki au i te pepa no te tavini anga i Betela e kua ārikiia mai. Kua akamata au i te tavini i Betela i Brooklyn ia Aukute 1954, e nei.

E maata ua ana rai taku angaanga i Betela. No tetai au mataiti, e akono ana au i te matini i roto i te ngai nenei anga e te au opati, te au matini, e te ripea roka. E angaanga katoa ana au i ko i te au Are Akaputuputuanga i New York City.

E reka ana au i te au porokaramu i Betela, mei te akamorianga popongi e te Apii Punanga Tiaki a te Betela, pera katoa te tutu aere anga ma te putuputuanga. Me akamanako koe, e au mea teia ka tau tetai ngutuare tangata o te Au Kite o Iehova kia rave putuputu. Me uriuri  kapiti te au metua e te tamariki i te tia o te rā, te rave tamou i te akamori anga ngutuare, te piri ki roto i te uipaanga putuputuanga, te maroiroi i te tutu aere i te nuti meitaki, e mea papu ka noo vaitata ua te ngutuare tangata kia Iehova.

E maata toku au taeake i Betela e i roto i te putuputuanga. Tetai pae kua akatainuia e kua aere ki te rangi. Tetai pae kare i akatainuia. Inara e tu apa ua to te au tavini pouroa o Iehova, kapiti mai te au taeake o Betela. Me e taumāro anga taku ki tetai taeake, ka tauta ua rai au i te akaau atu. Ka manako au ia Mataio 5:23, 24 e akapeea i te akono i te au taumāro anga. Kare i te mea māmā i te karanga e “Kua tataraara au,” inara na teia ravenga e rapakauia ai te au taumāro anga.

I teianei e āka angaanga iaku i te tutu aere mei tera are ki tera are no toku ruaine anga, inara kare au e tuku i te au. Kua apii au i te reo Tinito Mandarin e te reka i te tuatua ki te aronga Tinito i runga i te mataara. I tetai au popongi ka tuʼa au e 30 me kore e 40 makatini ki te aronga tei akaari mai i te inangaro.

Kua rave au i tetai atoro akaou anga i Tinito! I tetai rā, kua katakata mai tetai manga tamaine kiaku iaia e tuʼa aere ra i te au akakitekiteanga no tetai ngai okooko ua rakau. Kua katakata atu au e kua oronga i Te Punanga Tiaki e te Awake! kiaia i roto i te reo Tinito. Kua tari aia i te reira e kua akakite mai, ko Katie tona ingoa. Muri akera, me kite ua mai aia iaku, ka aere mai aia ka tuatua mai kiaku. Kua apii au iaia i te ingoa o te au ua rakau e te rau rakau i te reo Papaa, e ka ripiti aia i taku i tuatua kiaia. Kua akamārama katoa au i te au irava Pipiria kiaia, e kua āriki aia i te puka ta te Pipiria e Apii Maira! Inara i muri ake i nga epetoma, kua ngaro aia.

I nga marama i muri mai, kua oronga au i te au makatini ki tetai akaou tamaine e tuʼa aere ra i te au akakitekite anga, e kua āriki aia i te reira. I tera mai epetoma, kua oake mai aia i tana tereponi apaipai te karanga anga mai, “E tuatua koe ki Tinito.” Karanga atu au, “Kare au i kite i tetai tangata i Tinito.” Kua māro mai aia, no reira kua mou au i te tereponi te karanga anga, “Kia Orana, ko Robison teia.” Tuatua mai te reo i tetai tua e, “E Robby, ko Katie teia. Tei Tinito nei au.” Karanga atu au, “Tei Tinito koe?” Pau mai a Katie, “Ae. Robby, kite koe te tamaine nana i oake atu i te tereponi kia koe? E teina aia noku. E maata taau au mea meitaki i apii mai kiaku. E apii rai koe iaia ine, mei taau i apii iaku.” Karanga atu au, “Katie, ka rave au i taku ka rauka. Meitaki no te akakite mai teea koe.” Kare i roa i muri mai, kua tuatua au ki to Katie teina no te taime openga. Noatu e teea teia nga tamaine i teianei, te irinaki nei au e te apii ra raua no runga ia Iehova.

Kua tavini au ia Iehova no tetai 73 mataiti i teianei, e te mataora nei au kua tauturu aia iaku kia vai takake e kia vai tiratiratu i roto i te are auri. Pera katoa, kua akakite mai toku ai taeake kiaku e kua akamaroiroiia ratou i toku akakoromaki anga i te patoi anga a Papa ma te kore e tuku i te au. I te openga, kua papetitoia toku mama pera katoa e ono au teina e te au tuaine. Kua manga taui katoa to Papa tu, e kua aere aia ki tetai o te au uipaanga i mua ake ka mate ei.

Me ka tika i te Atua, kia akatuakaouia mai toku ngutuare tangata e te au oa ki roto i te ao ou. Ka tamanako ana i to tatou rekareka i te akamori ia Iehova e tuatau ua atu ma te aronga ta tatou i inangaro! *—Akara i te tataanga rikiriki.