KA AKAMANAKO ana i te rā mataora roa atu i toou oraanga. Ko toou akaipoipoanga ainei me kore ko taau tama mua i anauia mai? Me kore ko toou rā papetito anga? Papu e ko te rā puapinga rava atu teia i toou oraanga. I te reira rā, mei teaa atura te rekareka i te au taeake e te au tuaine te kite ia koe te akapapu anga i toou aroa i te Atua ma to ngakau, vaerua, manako, e te maroiroi katoa!​—Mareko 12:30.

Papu e, kua kite koe i te rekareka maata i te tavini anga ia Iehova mei toou papetito anga. Inara, kua ngaro te rekareka tei vai ana o tetai au taeake. No teaa ra teia i tupu ei? Eaa te au tumu ka tavini ua atu rai tatou ia Iehova ma te rekareka?

Te apai maira te karere Patireia i te rekareka maata kia tatou. No teaa ra? No te mea kua taputou mai a Iehova e ka akaope te Patireia i te au kino o teianei ao e ka apai mai i te ao ou o te Atua. Akakite maira a Zephania 1:14 kia tatou: “Kua vaitata te rā maata o Iehova, kua vaitata, e te rapurapu roa maira.” Inara me te manako ra tatou e kua roa te tiaki anga, penei ka ngaro to tatou rekareka tei vai ana. Penei ka akatupu teia ia tatou kia aere marie i ta tatou tavini anga i te Atua.​—Maseli 13:12.

Me akapou tatou i te taime ki to tatou au taeake e te au tuaine, ka akamaroiroiia tatou kia tavini ua atu ia Iehova ma te rekareka. Penei na te tu meitaki o te iti tangata o Iehova i arataki ia tatou ki te akamorianga mou e tei tauturu ia tatou kia akamata i te tavini i te Atua ma te rekareka. (1 Petero 2:12) Inara, eaa te ka tupu me akoia tetai o to tatou au taeake me kore tuaine no te mea kare aia i akarongo i ta te Atua akauenga? Penei ka taitaia tetai pae i roto i te putuputuanga e ka ngaro to ratou rekareka.

Penei ko te apinga pae kopapa tetai tumu i ngaro ei to tatou rekareka. Akapeea ra? E tauta ana to Satani ao i te titau i te akavare ia tatou kia oko i te au apinga kare tatou e anoano ana. No reira kia akamaara tatou i ta Iesu tuatua: “Kare e tika i te tangata kia akono i nga pu e toko rua: ka riro aia i te riri atu ki tetai, e te anoano atu ki tetai; e kare ra, ka riro i te tau atu ki tetai, e te akaviivii atu ki tetai. Kare e tika kia akono atu i te Atua e te Mamona.” (Mataio 6:24) Kare e rauka ia tatou i te tavini ia Iehova ma te rekareka e i taua taime rai te tauta ra kia rauka te au apinga pouroa i teianei ao.

No te aronga tei inangaro ia Iehova, kare i te apainga teiaa i te tavini iaia. (1 Ioane 5:3) Akamaara kua karanga a Iesu e: “E aere mai kotou kiaku nei, ko te aronga katoa i roiroi, e te aronga teiaa i te apainga, naku e akaanga i to kotou roi. Ka rave mai i taku amo ki rungao ia kotou, e kia apiiia kotou e au; te maru nei au, e ngakau akaaka toku, e rauka  oki ia kotou te akaangaroianga i to kotou vaerua. Te maru nei taku amo, e te māmā nei taku apainga.” (Mataio 11:28-30) Ei Kerititiano mou ka tupu te rekareka e te tu oraora. E au tumu meitaki tikai ta tatou kia rekareka i te tavini ia Iehova. Ka akara ana tatou e toru tu.​—Habakuka 3:18.

Tavini tatou i to tatou Atua rekareka, Tei oronga mai i te ora. (Angaanga 17:28; 1 Timoteo 1:11) Kite tatou e e kaiou to tatou oraanga ki Tei Anga mai ia tatou. No reira ka tavini ua atu rai tatou iaia ma te rekareka, noatu eaa te roa o te tuatau tei topa mei to tatou papetito anga.

Akamanako ana ia Héctor, tei tavini ia Iehova ei akaaere kotinga no tetai 40 mataiti. “Tae ua atu ki te ruaine anga,” te rekareka ra aia i te tavini ia Iehova. (Salamo 92:12-14) Kua riro te maki o tana vaine ei akakotinga i tana tavini anga i te Atua, inara kare to Héctor rekareka i ngaro ana. Karanga aia e: “Noatu e maromaroa i te kite i te oraanga kopapa o taku vaine e kino ua atura e kua riro ei mea ngata te akono iaia, kare au i akatika ana i teia kia kore toku rekareka i te tavini anga i te Atua mou. Te kite anga e ka kaiou au i toku oraanga kia Iehova, tei anga i te tangata no tetai akakoro anga, e tumu anake ïa no te inangaro tikai e te tavini iaia ma te ngakau katoa. E tauta ana au kia vai maroiroi i roto i te angaanga tutu aere, e te tauta i te akariro i te manakonakoanga o te Patireia ei mea puapinga maata atu kia kore e ngaro toku rekareka.”

Oronga mai a Iehova i te atinga oko, te akariro anga ia tatou kia rauka te oraanga rekareka. E tika, “I aroa mai te Atua i to te ao nei, kua tae rava ki te oronga anga mai i tana Tamaiti anau tai, kia kore e mate te akarongo iaia, kia rauka ra te ora mutu kore.” (Ioane 3:16) Ae, ka akakoreia ta tatou ara e ka rauka te ora mutu kore me akaari tatou i te akarongo i roto i ta te Atua apinga aroa o te oko. E tumu meitaki tikai teia kia rekareka tatou! E ka riro to tatou tu rekareka no te atinga oko ei akakeu ia tatou kia tavini ia Iehova ma te rekareka.

Karanga tetai taeake ko Jesús, tei noo i Mexico e: “Kua riro au ei tuikaa ki taku ngai angaanga, i tetai au taime te angaanga ua anga no tetai rima tuanga tukeke kare e tāpupu. Kua rave au i te reira kia maata taku moni. E oti kua apii au no runga ia Iehova e akapeea aia te oronga anga mai i tana Tamaiti akaperepere no te tangata nei. E āka inangaro toku i te tavini iaia. No reira kua akatapu au i toku oraanga kia Iehova, e i muri ake i te 28 mataiti i toku angaanga anga na te kamupani, kua akaruke au i te reira no te angaanga tavini tamou.” Ko te reira te akamata anga a Jesús i te tavini ia Iehova ma te rekareka.

 Me noo tatou i te oraanga tau e te mā, ka tupu rai te mataora. Te maara ra ainei ia koe mei teaa toou oraanga i mua ake ka kite ei koe ia Iehova? Kua akamaara te apotetoro ko Paulo i te au Kerititiano i Roma e “ko kotou te tavini no te kino” inara kua riro kotou “ei tavini no te tuatua-tika.” No te mea te noo ra ratou i te oraanga mā i rauka ai ia ratou kia tapapa atu i te oraanga mutu kore. (Roma 6:17-22) Ka aru katoa tatou i to Iehova au turanga, no reira kare tatou e maromaroa no te oraanga tau kore e te tā ua. Mei teaa atura te rekareka!

Ka akamanako ana ia Jaime, kare aia i irinaki e Atua tetai, e irinaki tona i te au mea tupu ua pera katoa e tangata moto aia. Kua akamata a Jaime i te aere ki te au uipaanga Kerititiano e kua akakeuia e te aroa tana i kite i reira. Ei akaruke i tona tu oraanga taito, kua anoanoia a Jaime kia pati tauturu kia Iehova e kia irinaki ki roto Iaia. “Aere ua rai, kua kite mai au e e Metua aroa tetai e e Atua takinga meitaki aia,” i karanga ai a Jaime. “Na te akono anga i te au turanga tuatua tika o Iehova i paruru iaku. Naringa kare au i taui, kua mate rai au, mei toku au taeake moto rai. Ko te tavini anga ia Iehova te tuatau mataora roa atu ïa o toku oraanga.”

Eaa ta tatou ka manako ia tatou e tiaki ra i te openga o teia ao kino? E akamaara, te rave nei tatou i te anoano o te Atua e te tapapa atura i te ora mutu kore. “Auraka tatou e roiroi i te takinga-meitaki, ei te tuatau tikai oki tatou e kokoti ei, kia kore tatou e akaparuparu.” (Galatia 6:8, 9) Ma te tauturu a Iehova, kia akakoromaki tatou, kia angaanga pakari i te tatanu i te au tu te ka anoanoia kia ora atu i “te mate maata,” e kia tavini ua atu ia Iehova ma te rekareka.​—Apokalupo 7:9, 13, 14; Iakobo 1:2-4.

Ka papu ia tatou e ka akameitaki a Iehova i to tatou tu akakoromaki no te mea kua kite aia i ta tatou angaanga e rave ra e to tatou aroa nona e no tona ingoa. Me tavini ua tatou iaia ma te rekareka, ka aite tatou ki te tata salamo ko Davida, tei karanga e: “Kua tuku au ia Iehova ei mua ua rai iaku; tei toku rima katau aia kare au e ngaueue. I marekaʼi toku ngakau, e te rekareka nei toku kakā; ka moe katoa oki toku kopapa nei ma te tiaki.”​—Salamo 16:8, 9.