1. Eaa te au mea meitaki ta te atinga oko ka apai mai no tatou?

NO TE atinga oko o Iesu i rauka ai te au akameitakianga e manganui. Ei akaraanga, ka riro te akanoonooanga o te oko ei akatuera i te ngutupa no te uanga a Adamu tei inangaro i te tuatua tika kia riro ei tuanga no te pamiri o te Atua a tetai rā. Tetai atu akameitakianga, koia oki ka rauka ia tatou te oraanga mataora e tuatau ua atu. Tei maata atu, te piri ra te atinga oko ki te au mea puapinga tikai ki te katoatoa i te rangi e te enua nei.​—Ebera 1:8, 9.

2. (a) Eaa te au mea puapinga tikai i te rangi e te enua nei ta Iesu i kapiti mai ki roto i tana pure? (Akara i te tutu mua.) (e) Eaa ta tatou ka uriuri i teia atikara?

² E rua mataiti i mua ake ka mate ei a Iesu, kua apii aia i tana au pipi kia pure: “E to matou Metua i te ao ra, Kia tapu toou ingoa. Kia tae toou basileia. Kia akonoia toou anoano i te enua nei, mei tei te ao katoa na.” (Mataio 6:9, 10) Ka akara matatio tatou eaa te pirianga o te atinga oko ki te akatapuanga  i to Iehova ingoa, te tutaraanga o te Patireia o te Atua, e te raveanga i to te Atua anoano.

3. Eaa ta te ingoa o Iehova e akatutu maira? Akapeea a Satani te akakino anga i to Iehova ingoa?

³ Te mea mua rava, kua pure a Iesu kia akatapuia to Iehova ingoa. Te akatutu ra to Iehova ingoa iaia uaorai e koai aia. Koia Tei ririnui roa atu e te tuatua tika i te ao katoa e pini ua ake. Kapiki katoa a Iesu iaia ko te “Metua tapu.” (Ioane 17:11) No te mea e tu tapu to Iehova, pouroa tana au mea e rave ra e tana au ture e akatupu ra, e tapu ïa. Inara i te kainga o Edene, kua akaapa pikikaa a Satani i to te Atua tika anga kia akanoo i te au turanga no te tangata. Kua pikikaa aia ia Iehova e kua akakino i to te Atua ingoa, me kore tona tu.​—Genese 3:1-5.

4. Akapeea a Iesu te akatapu anga i te ingoa o te Atua?

⁴ I tetai tua, kua inangaro tikai a Iesu i te ingoa o Iehova e kua rave i te au mea tana i rauka kia akatapu i te reira. (Ioane 17:25, 26) Akapeea ra? Na roto i tona tu e te apiianga, kua tauturu a Iesu i tetai ke kia kite e tika to Iehova au turanga e e mea meitaki te au mea tana e pati ra ia tatou kia rave. (E tatau ia Salamo 40:8-10.) Noatu e kua akatupu a Satani i te mamae maata e te mate kiaia, kua vai tiratiratu a Iesu. Kua akapapu aia e ka rauka rai i te tangata apa kore i te akarongo tikai kia Iehova.

5. Akapeea tatou te akatapu anga i te ingoa o Iehova?

⁵ Akapeea tatou me akaari e te inangaro ra tatou i te ingoa o Iehova? Na roto i to tatou tu. Te umuumu ra a Iehova kia tapu tatou. (E tatau ia 1 Petero 1:15, 16.) Tera te aiteanga ka akamori tatou iaia anake ua e ka akarongo kiaia ma te ngakau katoa. Noatu e ka takinokinoia tatou, ka tauta pakari tatou i te aru i te tu oraanga ta Iehova e apii maira ia tatou. Me akono tatou i to Iehova au turanga, ka akakaka tatou i tona ingoa. (Mataio 5:14-16) Ka akapapu tatou e mea meitaki tana ture e e pikikaa a Satani. Kare tatou i te aronga apa kore, no reira ka rave tatou i te tarevake. Inara me rave i te reira, ka tataraara tatou e ka tauta pakari i te akamutu i te rave i te au mea tei akakino i te ingoa o Iehova.​—Salamo 79:9.

6. No teaa ra a Iehova i manako ei e aronga tuatua tika tatou, noatu e tu apa ua to tatou?

⁶ Me e aronga akatainuia tatou me kore e “mamoe ke atu,” ka akakore a Iehova i ta tatou ara me tuku i te akarongo ki roto i te atinga oko. Ka āriki aia i te aronga akamori tei akatapu ia ratou uaorai kiaia. Kua akatika aia i te au Kerititiano akatainuia ei tamariki tuatua tika nana e te “mamoe ke atu” ei au oa tuatua tika nona. (Ioane 10:16; Roma 5:1, 2; Iakobo 2:21-25) No reira, i teia taime, te tauturu ra te atinga oko ia tatou kia rauka te pirianga meitaki ki to tatou Metua e te akatapu i tona ingoa.

7. Eaa te au akameitakianga ka rauka mai no te atinga oko?

⁷ I roto i te pure a te Atu, karanga a Iesu: “Kia tae toou basileia.” Eaa te pirianga o te oko ki te Patireia o te Atua? Ko te Patireia, me kore te kavamani o te Atua, ko Iesu e te 144,000 tei ikiia mei te tangata nei. No te atinga oko e rauka ai i teia aronga kia akatuia ki te rangi. (Apokalupo 5:9, 10; 14:1) Ka riro mai ratou ei ui ariki e te kau taunga e ka tutara ki rungao i te enua ma Iesu no tetai tauatini mataiti. I tera tuatau, ka taangaanga a Iehova i te Patireia kia akariro i te enua ei  parataito e te tauturu i te tangata katoatoa kia rauka te tu apa kore. Ka riro mai i reira to Iehova au tavini i te rangi e te enua nei ei pamiri okotai. (Apokalupo 5:13; 20:6) Ka takore a Iesu ia Satani e ka akaatea i te au manamanata tana i akatupu.​—Genese 3:15.

8. (a) Akapeea a Iesu te tauturu anga i tana au pipi kia mārama i te puapinga o te Patireia o te Atua? (e) Akapeea tatou me turu i te Patireia i teia tuatau?

⁸ Kua tauturu a Iesu i tana au pipi kia mārama i te puapinga o te Patireia o te Atua. Ka akapeea ra? I muri ua ake i tona papetitoanga, kua akamata a Iesu i te tutu “i te evangelia o te basileia o te Atua” ki te au ngai ravarai tana i aere. (Luka 4:43) Akakite katoa aia ki tana au pipi e ka riro ratou ei kite nona “e tae ua atu ki te openga o te enua ra.” (Angaanga 1:6-8) I teia tuatau, na roto i te angaanga tutu aere i te Patireia, e atianga to te tangata kia apii no runga i te atinga oko e kia riro mai ei aronga i raro ake i te Patireia o te Atua. Ka akaari tatou i te tu tiratiratu ki te Patireia na te tauturu anga i te aronga akatainuia kia tutu aere i te nuti meitaki ki te ao katoa.​—Mataio 24:14; 25:40.

9. Eaa ra tatou i papu ei ka akatupu a Iehova i tona akakoroanga no te tangata?

⁹ Eaa te aiteanga i ta Iesu i tuatua i muri akera: “Kia akonoia toou anoano”? Me karanga a Iehova e ka tupu tetai mea, ka tupu rai te reira. (Isaia 55:11) Kare ta Satani patoi anga e rauka i te tāpu ia Iehova. Eaa to Iehova anoano no te enua nei? Kua inangaro aia kia ki te enua i te tamariki apa kore a Adamu raua ko Eva. (Genese 1:28) Naringa e kua mate a Adamu raua ko Eva e kare i anau tamariki, kare i reira to te Atua akakoroanga kia akaki i te enua ki ta raua uanga e tupu. No reira kua akatika a Iehova ia raua kia anau tamariki. Ka oronga te atinga oko i te tika anga no te katoatoa tei tuku i te akarongo kia riro mai ei aronga apa kore e kia ora e tuatau ua atu. E aroa ana a Iehova i te tangata e ka inangaro ia ratou kia rauka mai te oraanga mataora tana i akakoro no tatou.

10. Akapeea te atinga oko te puapinga anga i te aronga tei mate?

¹⁰ Akapeea ra te pirioni ua atu tangata tei mate e kare i kite ia Iehova? Ka inangaro a Iehova i te tangata kia ora. No reira ka akatu akaou mai aia i te aronga tei mate. No te atinga oko e rauka ai ia ratou kia ora akaou mai. I reira ka rauka ia ratou te apii no runga ia Iehova e kia ora e tuatau ua atu. (Angaanga 24:15) Ko Iehova te Tumu o te ora. Me akatu akaou mai a Iehova i te aronga tei mate, ka riro aia ei Metua no ratou. (Salamo 36:9) I roto i te pure a te Atu, karanga a Iesu e ko Iehova “to matou Metua i te ao ra.” (Mataio 6:9) Kua oronga a Iehova i te tuanga puapinga tikai kia Iesu no te akatu i te aronga tei mate. Karanga a Iesu: “Ko au te tuakaouanga, e te ora.”​—Ioane 6:40, 44; 11:25.

11. Eaa to te Atua anoano no te “aronga maata rava”?

¹¹ Karanga katoa a Iesu: “Ko te akono katoa i te anoano o te Atua ra, ko toku ïa taeake, e toku ïa tuaine, e toku oki metua vaine.” (Mareko 3:35) To Iehova anoano koia oki e manganui mei roto i te au pa enua ravarai te au kopu e te au reo te ka riro ei aronga akamori nona. Kua akatakaia ratou ei “aronga maata rava, kare takiri e pou kia tatau.” Kua tuku ratou i te akarongo ki roto i te atinga oko e ka inangaro i te akarongo ki te Atua. Ka akapaapaa ratou iaia i te na ko anga: “No to tatou Atua te ora, tei noo ki  rungao i te terono, e no te Punua-mamoe.”​—Apokalupo 7:9, 10.

12. Mei te pure a Iesu, eaa ta tatou ka apii no runga i to Iehova akakoroanga no te tangata?

¹² E maata ta tatou i apii mai ana no runga ia Iehova e tona akakoroanga mei ta Iesu pure. Te mea mua, ka tauta pakari tatou i te akatapu i to Iehova ingoa ma te akangateitei iaia. (Isaia 8:13) Ko te atinga oko o Iesu, tei oronga mai i te ora no tatou, te akangateitei katoa ra i te ingoa o te Atua. Te tika, ko te aiteanga o te ingoa o Iesu koia “Ko Iehova oki te Ora.” Te rua, taangaanga a Iehova i tona Patireia ei apai mai i te au akameitaki anga o te atinga oko ki te tangata akarongo. E te toru, ka papu ia tatou e kare tetai ua atu apinga e tāpu ia Iehova mei te akatupu anga i tona anoano.​—Salamo 135:6; Isaia 46:9, 10.

13. No teaa ra tatou i papetitoia ai?

¹³ Tetai mataara puapinga kia akaari i to tatou tu āriki rekareka no te oko koia oki kia akatapu i to tatou oraanga kia Iehova e kia papetitoia. Na roto i teia mataara, te akaari nei tatou i te akarongo i roto i te oko e te akapapu ra “no te Atu rai tatou.” (Roma 14:8) Me papetitoia tatou, te pati nei tatou ia Iehova kia oronga mai i “te akava-ngakau meitaki.” (1 Petero 3:21) Ka pau a Iehova ia tatou na te oronga anga i te puapinga o te oko kia tatou. Kua papu tikai ia tatou e ka oronga mai aia i te au mea ravarai tana i taputou mai.​—Roma 8:32.

14. No teaa ra a Iehova i akaue ei ia tatou kia aroa i tetai ke?

¹⁴ Pouroa te au mea ta Iehova e rave ra, no tona aroa. Ka inangaro aia i tona aronga akamori kia aru iaia e kia aroa i tetai e tetai. (1 Ioane 4:8-11) Me inangaro tatou i te tangata, te akapapu ra tatou e ka inangaro tatou kia riro “ei tamariki na to [tatou] Metua i te ao ra.” (Mataio 5:43-48) Te nga akauenga maata rava atu koia oki te mea mua, e aroa ia Iehova, e te rua, e aroa i tetai ke. (Mataio 22:37-40) Tetai mataara ka akaari tatou i te aroa no te tangata koia oki na te apii anga ia ratou i te nuti meitaki o te Patireia o te Atua. Me akono tatou i ta Iehova akauenga kia aroa i tetai ke, i te au taeake tikai, ka riro to tatou aroa nona ei mea “meitaki rava.”​—1 Ioane 4:12, 20.

15. (a) Eaa te au akameitakianga ta tatou e kite ra i teianei no ko mai ia Iehova? (e) Eaa te au akameitakianga ta tatou ka rauka mai i te tuatau ki mua?

¹⁵ Te akapapu ra a Iehova e no to tatou akarongo ki roto i te atinga oko, ka “taparaia” ta tatou ara. Ka akakore takiri aia i ta tatou ara. (E tatau ia Angaanga 3:19-21.) Mei tei uriuriia i mua ake nei, no te atinga oko i rauka ai ia Iehova te akatamariki i tetai pae tangata kia riro ei tamariki nana i te rangi. Ko ratou te aronga akatainuia. (Roma 8:15-17) Te pati nei aia i te “mamoe ke atu” ki roto i tona pamiri i te enua nei. Me riro mai ratou ei aronga apa kore, e timata anga openga tetai no ratou. Me vai tiratiratu ratou kia Iehova, ka akatamariki katoa aia ia ratou. (Roma 8:20, 21; Apokalupo 20:7-9) Ka aroa ua rai a Iehova i tana tamariki katoatoa. Ka apai mai te atinga oko i te au akameitakianga e tuatau ua atu. (Ebera 9:12) Kua oronga mai a Iehova i teia apinga akaperepereia e kare tetai ua atu e apai ke i te reira.

16. Akapeea te atinga oko te tauturu i te akarangatira ia tatou?

¹⁶ Me tataraara tatou i ta tatou au ara, kare e apinga ta Satani ka rauka i te rave ei tāpu ia tatou kia riro mai ei tuanga no to Iehova pamiri. “Okotai rava” o Iesu matenga. Kua tutaki takiriia te atinga oko. (Ebera 9:24-26) Kua apai mai a Adamu i te mate, ka riro ra ta Iesu atinga ei apai mai i te ora mutukore. Ka akarangatira te atinga oko ia tatou mei to Satani ao e te mataku i te mate.​—Ebera 2:14, 15.

17. Eaa te aiteanga o te aroa o Iehova noou?

¹⁷ Ka akatupuia rai ta te Atua au taputou katoatoa. Mei te au ture rai ta Iehova i akanoo no te mea natura kare ïa e taui, kare katoa a Iehova e taui. Kare rava aia e akataitaia ia tatou. (Malaki 3:6) E maata ua atu ta Iehova i oronga mai kia tatou i te apinga aroa o te ora. Te oronga maira aia i tona aroa no tatou. “Kua kite oki tatou e, kua akarongo tatou i to te Atua aroa ia tatou nei. Ko te Atua te aroa.” (1 Ioane 4:16) Ka tupu ua rai tana au taputou. Kare e roa atu ana, ka riro te enua ei parataito manea. Ka aru te katoatoa ia Iehova e ka aroa i tetai e tetai. I reira e karanga ai tona au tavini pouroa i te rangi e te enua nei e: “E tika ïa: ko te akapaatu, e te kakā, e te pakari, e te akameitaki, e te ngateitei, e te mana, e te maroiroi, ei to tatou Atua ïa, e tuatau e tuatau ua atu. Koia ïa.”​—Apokalupo 7:12.