Naringa e tika teia, akamanako ana akapeea teia me tupu i to tatou oraanga. Ei akaraanga, kua tamate te tamaiti a tetai taeake iaia uaorai. Kua ati ngakau tikai te metua tane. Kua manako aia me kua akara a Iehova ki te tuatau ki mua e kua manako e ka rauka iaia e tana vaine i te akakoromaki i te tumatetenga. I roto i teia akatereanga, e maata ia tatou ka aro atu i te au tumatetenga. No reira, kia irinaki ainei tatou e ka akatere a Iehova i te au mea ravarai ka tupu i to tatou oraanga?

Ia tatou e akara matatio nei ia 1 Korinetia 10:13, ka kite tatou kare te Pipiria e turu i te manako e kua kite a Iehova na mua ake eaa ta tatou ka akakoromaki e oti ka iki eaa te timataanga te ka tupu kia tatou. Eaa tatou ka tuatua ai i teia? Ka akara matatio tatou e ā tumu.

Te mea mua, kua oronga mai a Iehova i te tu rangatira ki te tangata, kia tuku i ta ratou ikianga. Ka inangaro aia ia tatou kia iki i ta tatou uaorai ikianga. (Deuteronomi 30:19, 20; Iosua 24:15) Me iki tatou i te au ikianga te ka akamareka ia Iehova, ka rauka ia tatou i te irinaki iaia kia arataki ia tatou. (Maseli 16:9) Inara me iki tatou i te au ikianga tau kore, ka na roto rai tatou i te au tupuanga kino. (Galatia 6:7) No reira me iki a Iehova i te au timataanga ta tatou ka na roto, e tika ainei te akatupu ra tatou i to tatou tu rangatira?

Te rua, kare a Iehova e paruru ia tatou mei te au “tuatau ra, e te manuia ua.” (Koheleta 9:11) Penei ka tupu tetai tumatetenga kino ki tetai tangata no te mea tei roto aia i te ngai tau kore i te taime tau kore. Kua akakite a Iesu i tetai tumatetenga tei tupu, e 18 tangata tei mate te topa anga tetai are teitei ki runga ia ratou. Kua akataka meitaki aia e kare na te Atua i akatupu i to ratou mate. (Luka 13:1-5) Kare i reira i te mea tau kia manako e ka iki te Atua koai te ka ora e te ka mate i mua ake ka tupu ei tetai tumatetenga.

Te toru, kia akono tamou tatou tataki tai i te tu tiratiratu kia Iehova. Karanga a Satani e te tavini ra to Iehova au tavini Iaia no Tana e oronga ra kia ratou. Karanga a Satani e kare tatou e vai tiratiratu kia Iehova me rokoia tatou e te au timataanga. (Iobu 1:9-11; 2:4; Apokalupo 12:10) Me ka paruru a Iehova ia tatou mei tetai au timataanga, ka akara anga i reira kua tano ta Satani.

Te ā, kare a Iehova e iki kia kite aia na mua ake ka tupu ei te au mea ravarai kia tatou. E tika, ka rauka ia Iehova i te kite eaa te ka tupu i te tuatau ki mua me ka inangaro aia i te rave i te reira. (Isaia 46:10) Inara te akaari maira te Pipiria e kare aia e iki kia kite i te au mea ravarai i mua ake ka tupu ei te reira. (Genese 18:20, 21; 22:12) E tu aroa e te tuatua tika to Iehova, no reira kare aia e tamanata i to tatou tu rangatira kia iki i ta tatou uaorai au ikianga.​—Deuteronomi 32:4; 2 Korinetia 3:17.

Eaa i reira, te aiteanga o ta Paulo tuatua te karanga anga aia e “kare [a Iehova] e vaoo ia kotou kia timataia, mari ra ko te tika ia kotou kia akakoromaki ra”? I konei, te akataka ra a Paulo i ta Iehova ka rave i te tuatau o te au timataanga, kare i mua ake ka tupu ei te reira. * (Akara i te tataanga rikiriki.) Me irinaki tatou ia Iehova, ka tauturu aia, ia tatou e na roto ra i tetai ua atu timataanga i to tatou oraanga. (Salamo 55:22) Ka akara matatio tatou i teianei, e rua tumu ka tuatua ai a Paulo i teia.

Te tumu mua koia oki te au timataanga ta tatou e na roto ra “mei ta te tangata nei rai.” Ia tatou e noo nei i roto i te akatereanga a Satani, ka kite tatou katoatoa i te au tupuanga ngata, pera katoa te tumatetenga. Me irinaki tatou ki runga ia Iehova, ka rauka ia tatou i te akakoromaki i teia au timataanga e kia vai tiratiratu kiaia. (1 Petero 5:8, 9) I te  akamataanga o 1 Korinetia pene 10, tata a Paulo no runga i tetai au timataanga tei tupu ki te ngati Iseraela i roto i te metepara. (1 Korinetia 10:6-11) Te aronga tei irinaki ki runga ia Iehova, kua rauka ia ratou i te akakoromaki i taua au timataanga. Inara tetai pae ngati Iseraela kua akarongo kore kia Iehova. Kare ratou i vai tiratiratu no te mea kare ratou i irinaki ki runga iaia.

Te rua o te tumu “e tuatua mou ra ta te Atua.” Eaa te aiteanga o teia tuatua? Me akara tatou i ta Iehova akono anga i tona au tavini i roto i te tuatua enua, ka kite tatou i tona tauturu tiratiratu anga i “te aronga i inangaro iaia, e tei akono i tana au akauenga.” (Deuteronomi 7:9) Ka kite tatou e e akono ua ana rai a Iehova i tana taputou. (Iosua 23:14) Ka papu ia tatou e (1) kare a Iehova e tuku ua i tetai ua atu timataanga kia ngata roa kia kore rava e rauka ia tatou i te akakoromaki i te reira, e te (2) ka “akatupu katoa aia i te akapuanga” no tatou.

Akapeea ra a Iehova te akatupu anga i “te akapuanga” no te aronga tei irinaki ki runga iaia? E tika, ka rauka iaia i te akakore i tetai timataanga. Inara akamaara, karanga a Paulo “e akatupu katoa [a Iehova] i te akapuanga i taua timataanga ra, kia tika ia kotou kia akakoromaki.” No reira, i te maataanga o te taime, ka rauka ia Iehova i te oronga mai i te akapuanga na te akamaroiroianga ia tatou e rauka ai kia vai tiratiratu. Ka uriuri ana tatou i te au ravenga tana ka rave.

• Ko Iehova “tei akapumaana mai ia matou i to matou au mate katoa nei.” (2 Korinetia 1:3, 4) Ka rauka iaia i te akamaru i to tatou manako, ngakau, e te au manako ngakau na roto i te Pipiria, tona vaerua tapu, e te tavini akono meitaki.​—Mataio 24:45; Ioane 14:16; Roma 15:4.

• Ka rauka ia Iehova i te taangaanga i tona vaerua tapu ei arataki ia tatou. (Ioane 14:26) Ka rauka i te vaerua tapu i te tauturu ia tatou kia akamaara i te au papaanga e te au kaveinga Pipiria e rauka ai ia tatou i te rave i te au ikianga pakari.

• Ka rauka ia Iehova i te taangaanga i tana au angera ei tauturu ia tatou.​—Ebera 1:14.

• Ka rauka ia Iehova i te taangaanga i to tatou au taeake e te au tuaine ei tauturu ia tatou. Ka rauka ia ratou i te akamaroiroi ia tatou na roto i ta ratou ka tuatua mai e te rave.​—Kolosa 4:11.

No reira, eaa ta tatou ka apii mai mei te au tuatua a Paulo ia 1 Korinetia 10:13? Kare a Iehova e iki eaa te au timataanga ta tatou ka na roto. Inara ka papu ia tatou e me irinaki tatou ki runga ia Iehova, ka rauka ia tatou i te akakoromaki i tetai ua atu timataanga. Kua kite tatou e ka rauka ua rai ia Iehova i te oronga mai i te akapuanga me vai tiratiratu tatou kiaia.