1, 2. Eaa ta tetai taeake i kite mai no runga iaia uaorai, e eaa tana i rave?

KUA papetitoia a Robert i tona mapuanga, inara kare ko te tuatua mou te mea puapinga rava atu i tona oraanga. Karanga aia: “Kare au e rave ana i tetai apinga tarevake, mari ra te rave ua nei au i te au mea tei matauia. Akaraanga te matutu nei toku turanga pae vaerua, na te aere anga ki te au uipaanga e te tavini anga ei painia tauturu no tetai nga taime i te mataiti. Inara e mea tetai e ngere ra.”

² Kare a Robert i mārama eaa te mea e ngere ra e tae ua atu ki tona akaipoipoanga. Ei tamataora anga na maua, tetai taime ka uiui maua ko taku vaine i tetai au uianga Pipiria. Kua kite meitaki tana vaine i te Pipiria e ka māmā ua i te pau i te au uianga. Inara kare a Robert e kite i te au pauanga katoatoa e kua tupu te akama kiaia. Karanga aia: “Mei te mea atura e kare aku apinga i kite. Kua manako mai au, ‘Me ka anoanoia au kia riro mai ei upoko pae vaerua no taku vaine, ka rave au i tetai apinga.’” No reira kua pera aia. Karanga aia: Kua apii au i te Pipiria e kua apii putuputu ua atu rai i te reira, e kua akamata au i te mārama mai i te reira. Kua rauka iaku te mārama e tei maata  atu, kua akatupu au i tetai pirianga vaitata kia Iehova.”

3. (a) Eaa ta tatou ka kite mai mei to Robert turanga? (e) Eaa te au manako puapinga ka uriuri tatou?

³ Ka kite mai tatou i tetai au apiianga puapinga mei to Robert turanga. Penei e kite to tatou no te Pipiria, e te aere putuputu ra ki te au uipaanga e te tutu aere, inara kare teia e akariro ia tatou ei tangata manako pae vaerua. Me kore penei kua tauta takere tatou kia riro mai ei tangata manako pae vaerua, inara me akara matatio ia tatou uaorai, ka kite tatou i te au ngai kia akameitaki atu. (Philipi 3:16) I roto i teia atikara, ka pau tatou e toru uianga puapinga: (1) Eaa te ka tauturu ia tatou kia kite me te manako pae vaerua ra tatou? (2) Akapeea tatou e matutu ei i te pae vaerua? (3) Akapeea tetai turanga pae vaerua matutu me tauturu ia tatou i te au rā ravarai?

4. Ka tau te akoanga ia Ephesia 4:23 kiaai ma?

⁴ Me akamata tatou i te tavini i te Atua, ka rave tatou i te au tauianga te ka akakeu i to tatou oraanga katoa. Kare teia e akamutu me papetitoia tatou. Akakite mai te Pipiria: “E kia akaouia oki kotou i to kotou vaerua ra i te ngakau.” (Ephesia 4:23, 24) No te mea e aronga apa ua tatou, ka anoanoia tatou kia rave ua rai i te au tauianga. Noatu me kua tavini tatou ia Iehova no tetai tuatau roa, ka anoanoia tatou kia akamatutu ua rai i to tatou pirianga kiaia.—Philipi 3:12, 13.

5. Eaa te au uianga te ka tauturu ia tatou kia kite me te manako pae vaerua ra tatou?

⁵ Me e mapu tatou me kore e pakarikari, ka anoanoia tatou kia akara matatio tikai ia tatou uaorai. E ui kia tatou uaorai: ‘Te kite ra ainei au me te maata maira toku manako pae vaerua? Te aite ra ainei au mei ia Karaiti rai? Mei teaa rai toku tu e taku e rave ra i ko i te au uipaanga? Eaa ta taku au tuatua e akaari maira i taku e inangaro ra i roto i te oraanga? Eaa te tu o taku uaorai apii, toku kakau e te akamanea, e toku tu me akoia mai, e akakite maira no runga iaku? Eaa taku ka rave me timataia kia rave i te tarevake? E Kerititiano matutu ainei au?’ (Ephesia 4:13) Ka tauturu teia au uianga ia tatou kia kite mei teaa te matutu o to tatou turanga pae vaerua.

6. Eaa atu tetai ka tauturu ia tatou kia kite me te manako pae vaerua ra tatou?

⁶ Tetai taime ka anoano tatou i tetai ke kia tauturu mai kia kite me te manako pae vaerua ra tatou. Kua akamārama mai te apotetoro ko Paulo e kare te tangata pae kopapa me kore manako tangata, e mārama e kare tona tu oraanga e akamareka i te Atua. Inara ka mārama te tangata manako pae vaerua i to te Atua manako. Kua kite aia e kare a Iehova e mareka ana i tetai oraanga pae kopapa. (1 Korinetia 2:14-16; 3:1-3) Ka kite viviki te aronga pakari ma te manako o Karaiti i tetai au taeake me rave i te au peu pae kopapa, e ka tauta i te tauturu ia ratou. Me tauta te aronga pakari i te tauturu ia tatou, ka āriki ainei tatou i ta ratou tauturu e ka rave i te au tauianga tau? Me rave tatou i te reira,  te akaari ra tatou e te inangaro ra tatou kia matutu i te pae vaerua.—Koheleta 7:5, 9.

7. Akapeea tatou e kite ei e kare tetai tangata manako pae vaerua i te tangata e kite ua tona i te Pipiria?

⁷ Kare e rava ua te kite i te Pipiria i te akariro ia tatou ei aronga manako pae vaerua. E maata ta te Ariki ko Solomona i kite no runga ia Iehova, e ko tetai o tana au tuatua pakari kua riro mai ei tuanga o te Pipiria. Inara i muri mai, kua akaparuparu tona pirianga kia Iehova, e kare aia i vai tiratiratu. (1 Ariki 4:29, 30; 11:4-6) No reira, eaa atu ta tatou ka anoano kia rauka, kapiti mai te kite anga i te Pipiria? Ka anoanoia tatou kia akaketaketa ua atu i to tatou akarongo. (Kolosa 2:6, 7) Akapeea tatou me rave i teia?

8, 9. (a) Eaa te ka tauturu ia tatou kia akaketaketa i to tatou akarongo? (e) Eaa to tatou akakoroanga me apii e me akamanako oonu tatou? (Akara i te tutu mua.)

⁸ I te anere mataiti mua, kua akamaroiroi a Paulo i te au Kerititiano kia “aere rai tatou ki mua i te pakari mou ra.” (Ebera 6:1) Akapeea tatou me taangaanga i teia ako i teia tuatau? Tetai mataara puapinga koia oki kia apii i te puka How to Remain in God’s Love. Ka tauturu teia ia koe kia mārama akapeea me taangaanga i te au kaveinga Pipiria i roto i toou oraanga. Me kua apii takere koe i teia puka, e au puka ke atu tetai ka rauka ia koe i te apii i te tauturu kia ketaketa toou akarongo. (Kolosa 1:23) Ka anoano katoaia tatou kia akamanako oonu i ta tatou i apii mai e kia pati kia Iehova no te tauturu kia kite akapeea me taangaanga i te reira.

⁹ Me apii e me akamanako oonu tatou, to tatou akakoroanga koia oki kia akatupu i te inangaro maata no te akamareka e kia akarongo kia Iehova. (Salamo 40:8; 119:97) Ka anoano katoaia tatou kia patoi i tetai ua atu apinga te ka arai ia tatou kia matutu i te pae vaerua.—Tito 2:11, 12.

10. Eaa ta te au mapu ka rauka i te rave kia matutu i te pae vaerua?

¹⁰ Me e mapu koe, e au akakoroanga pae vaerua ainei taau? E pukapuka ua ana tetai taeake e angaanga ana i Betela ki te au mapu te ka papetitoia atu i ko i te au akaputuputuanga kotinga e ka ui atu no runga i ta ratou au akakoroanga pae vaerua. Ka kite mai aia  e e maata tei akamanako meitaki akapeea ratou me tavini ia Iehova a te tuatau ki mua. Kua parani tetai pae i te tavini tamou atu ia Iehova, me kore kia neke ki tetai ngai te anoano maataia ra te au papuritia. Inara kare tetai pae mapu e kite akapeea me pau i tana uianga. Ko te aiteanga ainei te reira e kare ratou e anoanoia kia akanoo i tetai akakoroanga pae vaerua? Me e mapu koe, e ui kia koe uaorai: ‘Te aere ainei au ki te au uipaanga e ki te tutu aere no te mea te inangaro maira toku nga metua kia pera au? Me kore e pirianga oa ainei toku uaorai ki te Atua?’ E tika, ka anoanoia tatou pouroa kia akanoo i tetai akakoroanga pae vaerua, noatu me e mapu me kore e pakarikari tatou. Ka tauturu teia au akakoroanga ia tatou kia matutu i te pae vaerua.—Koheleta 12:1, 13.

11. (a) Eaa ta tatou ka anoano i te rave kia manako pae vaerua tatou? (e) Eaa te akaraanga Pipiria ka rauka ia tatou i te aru?

¹¹ Me kite tatou i te au ngai ka anoanoia kia meitaki mai, ka anoanoia tatou kia rave i te au tauianga. E mea puapinga tikai teia te ka akaari me ka ora rai tatou me ka mate. (Roma 8:6-8) Kare a Iehova e tapapa mai kia apakore tatou, e ka oronga mai aia i tona vaerua tapu i te tauturu ia tatou. Inara ka anoanoia tatou kia angaanga pakari. Kua karanga ana te Taeake John Barr, tei tavini ana ei Pupu Akaaere, ia Luka 13:24 te na ko anga: “E manganui tei puapinga kore no te mea kare ratou i pakari roa i te akamaroiroi anga.” Ka anoanoia tatou kia aite mei ia Iakoba rai, tei kukumi ki tetai angera e kare i tuku i te au kia rauka roa tetai  akameitakianga. (Genese 32:26-28) Noatu e mea mataora i te apii i te Pipiria, auraka ra tatou e akatupu i te Pipiria ei puka tamataora. Ka anoanoia tatou kia tauta i te kimi i te au tuatua mou akaperepereia te ka tauturu ia tatou.

12, 13 (a) Eaa te ka tauturu ia tatou kia taangaanga ia Roma 15:5? (e) Akapeea to Petero akaraanga, e tana ako te tauturu anga ia tatou? (ng) Eaa taau ka rave kia matutu i te pae vaerua? (Akara i te pia “ Taau ka Rave Kia Matutu i te Pae Vaerua.”)

¹² Me tauta tatou i te akamatutu i te pae vaerua, ka tauturu mai te vaerua tapu ia tatou kia taui i to tatou aerenga manako. Aere ua rai, ka apii mai tatou i te akamanako mei ia Karaiti rai. (Roma 15:5) Ka tauturu te vaerua tapu ia tatou kia patoi i te au anoano tika kore e ka akatupu i te au tu te ka akamareka i te Atua. (Galatia 5:16, 22, 23) Me kite mai tatou e te akamou ra to tatou manako ki runga i te au mea materia me kore te au mea navenave, auraka tatou e tuku i te au. Kia pati ua rai tatou kia Iehova no te vaerua tapu kia tauturu ia tatou kia akamanako ua i te au mea meitaki. (Luka 11:13) E akamaara i te apotetoro ko Petero. Kare aia i manako ua ana mei ia Karaiti rai. (Mataio 16:22, 23; Luka 22:34, 54-62; Galatia 2:11-14) Inara kare aia i tuku i te au, e kua tauturu mai a Iehova iaia. Aere ua rai, kua apii mai a Petero kia manako mei ia Karaiti rai. E ka rauka katoa ia tatou.

¹³ Kua taiku a Petero i muri mai i tetai au tu te ka tauturu ia tatou. (E tatau ia 2 Petero 1:5-8.) Ka anoanoia tatou kia tauta pakari i te akatupu i te tu akatere ia koe uaorai, te akakoromaki, te aroa taeake, e tetai atu au tu meitaki. E ui kia tatou uaorai i te au rā ravarai, ‘Eaa te tu taku ka taangaanga i teia rā te ka tauturu iaku kia matutu i te pae vaerua?’

14. Akapeea te manako pae vaerua me akakeu i to tatou oraanga?

¹⁴ Me manako tatou mei ia Karaiti rai, ka akakeu te reira i to tatou tu i te ngai angaanga me kore i te apii, ta tatou ka tuatua, e te au ikianga ka rave tatou i te au rā tataki tai. Ka akaari mai ta tatou au iki anga e te tauta ra tatou i te aru ia Karaiti. No te mea e aronga manako pae vaerua tatou, kare tatou e inangaro i tetai ua atu kia takino i to tatou pirianga kia Iehova. Me timataia tatou kia rave i tetai tarevake, ka tauturu to tatou turanga pae vaerua ia tatou kia patoi i te au timataanga. I mua ake ka rave ei tatou i tetai iki anga, kia tāpu tatou e kia ui kia tatou uaorai: ‘Eaa te au kaveinga Pipiria te ka tauturu iaku? Eaa ta Karaiti ka rave i roto i teia turanga? Eaa te ka akamareka ia Iehova?’ Ka anoanoia tatou kia akamatau i te akamanako na teia tu. No reira ka uriuri tatou i tetai turanga penei ka tupu mai. No te turanga tataki tai, ka akara tatou i tetai kaveinga Pipiria ei tauturu ia tatou kia rave i te au ikianga meitaki.

15, 16 Akapeea te manako anga mei ia Karaiti rai me tauturu ia tatou kia tuku i te manako pakari no te (a) iki anga i tetai tokorua akaipoipo? (e) iki anga i to tatou au oa?

¹⁵ Iki anga i tetai tokorua akaipoipo. Tei roto te kaveinga Pipiria ia 2 Korinetia 6:14, 15. (E tatau.) Kua akataka mai a Paulo e ko te aronga manako pae vaerua, kare to ratou aerenga manako e aiteite ana ki te aronga manako pae kopapa, e te manako tangata. Akapeea teia kaveinga me tauturu ia koe kia iki i tetai tokorua akaipoipo?

¹⁶ Iki anga i to tatou au oa. Tei roto te kaveinga Pipiria ia 1 Korinetia 15:33. (E tatau.) Kare tetai tangata manako pae vaerua e akaoa atu ki te aronga te ka akaparuparu  i tona akarongo. E akamanako ana akapeea koe me taangaanga i teia kaveinga i roto i tetai turanga ke. Ei akaraanga, akapeea teia me tauturu ia koe kia rave i te au iki anga no runga i te social networking? Akapeea teia me tauturu ia koe kia iki me ka kanga koe ki tetai tangata ke i roto i te kanga initaneti?

17-19. Akapeea te riro mai anga ei tangata manako pae vaerua me tauturu ia koe (a) kia kopae i te au angaanga puapinga kore? (e) kia rauka te au akakoroanga meitaki? (ng) kia akameitaki i tetai taumaro anga?

¹⁷ Angaanga te ka takino i to tatou turanga pae vaerua. Ka kite mai tatou i tetai akamatakiteanga puapinga ia Ebera 6:1. (E tatau.) Eaa te au “angaanga mate” ka tauta tatou kia kopae? Ko te au angaanga puapinga kore teia kare e tauturu ia tatou kia matutu i te pae vaerua. Ka riro teia akamatakiteanga no runga i te au angaanga mate ei tauturu ia tatou kia pau i teia au uianga: ‘E puapinga ainei teia angaanga, me e puapinga kore? Ka tomo ainei au ki roto i teia pitiniti? Eaa ra au kare e tomo atu ki tetai pupu te tauta ra i te taui i te turanga o teianei ao?’

¹⁸ Akakoroanga pae vaerua. I roto i tana Ako i runga i te Maunga, kua oronga mai a Iesu i tetai akoanga meitaki no te au akakoroanga. (Mataio 6:33) Ka tuku te tangata manako pae vaerua i te Patireia e ko te mea mua ïa i roto i tona oraanga. Ka tauturu teia kaveinga ia tatou kia pau i teia au uianga: ‘Ka aere ainei au ki te apii university me oti taku apii tua rua? Ka āriki ainei au i tetai ngai angaanga ua?’

¹⁹ Taumaroanga. Ka tauturu ta Paulo akoanga ki te au Kerititiano i Roma ia tatou me tupu tetai taumaro anga ki tetai ke. (Roma 12:18) Te aru nei tatou ia Karaiti, no reira ka tauta tatou “kia noo au ua [tatou] i roto i te tangata katoa nei.” Eaa ta tatou ka rave me tupu tetai taumaro anga ki tetai ke? E mea ngata ainei ia tatou i te āriki i te manako o tetai ke? Me kore kua kiteaia ainei tatou ei tangata te tauta ra i te akatupu i te ‘au?—Iakobo 3:18.

20. Eaa koe ka inangaro ei kia aere ki mua ei tangata pae vaerua?

²⁰ Te akaari maira teia au akaraanga akapeea te au kaveinga Pipiria me tauturu ia tatou kia rave i te au iki anga te ka akapapu e te aratakiia ra tatou e te vaerua o te Atua. Me manako pae vaerua tatou, ka mataora to tatou oraanga e ka merengo. Karanga a Robert, tei taikuia i mua ana: Muri ake te akatupuanga au i tetai pirianga mou tikai kia Iehova, kua riro mai au ei tane e ei metua meitaki atu. Kua mataora au e kua mareka ua. Me rave tatou i ta tatou ka rauka kia aere ki mua ei tangata pae vaerua, ka mataora katoa tatou i te au akameitakianga e manganui. Ka rauka ia tatou tetai oraanga mataora i teianei, e i te tuatau ki mua ka rauka ia tatou “te ora mutu kore.”—1 Timoteo 6:19.