1, 2. No teaa ra te Au Kite o Iehova i akanoo ei i te turanga tau no te akamanea? (Akara i te tutu mua.)

KUA akataka tetai nutipepa Orani i te akamanea anga o te au arataki akonoanga i ko i ta ratou uipaanga. Karanga te reira: “Kua kiteaia te kakau mako kore, i te tuatau vera tikai.” Inara, kua akakite teia nutipepa e kare te Au Kite o Iehova e akamanea ana mei teia rai i ko i ta ratou uruoaanga. Akakite te reira e kua aao te tamariki tamaroa e te au tane i te au pereue e te neketae e kua aao te tamariki tamaine e te au vaine i te pirikoti tei tau te roroa e te manea. E akameitakiia ana te Au Kite o Iehova no to ratou tu akamanea. Karanga a Paulo e ka tau te kakau ta te au Kerititiano e aao ana ei akaari i “te akatietie kore, e te akono meitaki” e kia tau no te au tavini o te Atua. (1 Timoteo 2:9, 10) Noatu e te tuatua ra a Paulo no te au vaine, ka tau rai teia turanga no te au tane Kerititiano.

² E mea puapinga te au turanga meitaki no te akamanea ki te iti tangata o Iehova, e e puapinga katoa ki te Atua ta tatou e akamori ra. (Genese 3:21) Te akapapu meitaki ra te  Pipiria e kua akanoo a Iehova, te Atu Ngateitei o te ao katoa, i te au turanga no te akamanea anga a tona au tavini. No reira, eiaa ta tatou akamanea anga ei akamareka ia tatou uaorai mari ra tei puapinga atu, kia akamareka i to tatou Atu Ngateitei ko Iehova.

3. Eaa ta tatou ka apii no runga i te akamaneaanga i roto i te Ture a te Atua ki te ngati Iseraela?

³ I te Ture a Mose, kua akanooia te au ture ei paruru i te ngati Iseraela mei te tu oraanga tau kore tikai o te au pa enua takapini ia ratou. Kua akaari mai te Ture e e manako pakari to Iehova no te kakau tei kore i akaari taka meitaki i te tuke i rotopu i te tane e te vaine. I teia tuatau, kua kapikiia teia akamanea e ko te tu kakau tane vaine. (E tatau ia Deuteronomi 22:5.) Mei te Ture, ka kite tatou e kare a Iehova e mareka ana i te kakau tei akariro i te tane mei te vaine rai e te vaine mei te tane rai, e e ngata i te kite i te tuke i rotopu i te tane e te vaine.

4. Eaa te ka tauturu i te au Kerititiano kia rave i te ikianga meitaki no te akamanea?

⁴ Ka tauturu te au kaveinga Pipiria ia tatou kia rave i te ikianga meitaki no te akamanea. Ka tau teia au kaveinga noatu te enua e te reva i te ngai e noo ra tatou, e ta tatou peu. Kare e anoanoia tetai papaanga roa no te kakau tei tau e tei tau kore. Mari ra ka anoanoia tatou kia aru i te au kaveinga Tuatua Tapu, tei akatika ia tatou kia aao i te kakau ta tatou e reka ra. Ka akamanako ana tatou i tetai au kaveinga Pipiria te ka tauturu ia tatou kia kite “i to te Atua ra anoano, tei meitaki, e te tau, e te apa kore oki” me iki i ta tatou ka aao.​—Roma 12:1, 2.

5, 6. Akapeea to tatou tu akamanea te akakeu anga i tetai ke?

⁵ Kua akauruia a Paulo kia taiku i te kaveinga puapinga ia 2 Korinetia 6:4. (E tatau.) Me akara te tangata ia tatou, ka akakeu i to ratou manako e ka akatupu i tetai manako no runga i to tatou tu akamanea. (1 Samuela 16:7) No te mea e tavini tatou no te Atua, kare tatou e aao ua i te kakau tei tau e ta tatou e inangaro ra. Me taangaanga i te au kaveinga Pipiria, kare tatou e aao i te kakau pipiri, te akaariari i te kopapa, me kore te kakau akameamea. Tera te aiteanga, kare tatou e aao i te kakau e akaari pu tikai ra i te au mero o te kopapa mei te mea rai te vai taaka ua ra. Kare tetai ua atu e anoanoia kia akama e kia uri ke to ratou mata me kite ratou i to tatou tu akamanea.

⁶ Me mako, mā, e me akamanea ma te kakau tau, ka akangateitei maata atu te tangata ia tatou ei au tavini no te Atu  Ngateitei ko Iehova. Penei ka inangaro ratou i te kite maata atu i te Atua ta tatou e akamori ra, ka akangateitei maata atu i ta tatou akaaerenga e ka inangaro i te akarongo ki ta tatou karere ora.

7, 8. Aea tikai tatou e anoanoia ai kia aao i te kakau tau?

⁷ E kaiou ta tatou ki te Atua tapu, ki te au taeake e te au tuaine Kerititiano, e ki te aronga i te ngai tutu aere kia akamanea na roto i te tu tei akangateitei ia Iehova e te karere ta tatou e tutu ra. (Roma 13:8-10) Ka riro ta tatou akamanea ei mea puapinga tikai me aere tatou ki te au uipaanga Kerititiano e me tutu aere. Kia riro to tatou tu akamanea ei mea tau no te iti tangata tei akamori i te Atua. (1 Timoteo 2:10) Te tika, te tu kakau tei tau i tetai ngai, kare ra e tau i tetai atu ngai. Noatu te ngai e noo ra tatou, ka tau tatou ei Au Kite no Iehova kia kopae atu i te akaturori i tetai ke na to tatou tu akamanea.

⁸ E tatau ia 1 Korinetia 10:31. Me aere tatou ki te akaputuputuanga e te uruoaanga, ka anoanoia to tatou kakau kia tau  ua e te mako. Kare tatou e aao i te au tu kakau tei matauia e to teianei ao. I mua ake e i muri ake i te uruoaanga, e me aere tatou e te akaruke i te otera, kia akapapu e kare to tatou kakau e mako kore e te paarua. Me akapera, ka ngakau parau tatou i te akataka ia tatou uaorai ei Au Kite no Iehova, e ka papa ua i te akakitekite i tetai ua atu taime.

9, 10 Akapeea a Philipi 2:4 te tauturu anga ia tatou kia iki i ta tatou ka aao?

⁹ E tatau ia Philipi 2:4. Eaa ra tatou ka akamanako ei akapeea to tatou kakau me akakeu i te au taeake e te au tuaine Kerititiano? Tetai tumu koia oki te tauta pakari nei te iti tangata o te Atua i te aru i teia kaveinga: “E tenana ka tamate i to kotou au melo i te au mea o teianei ao; te akaturi, te tuatua viivii, te anoano viivii ra, te inangaro tika kore.” (Kolosa 3:2, 5) Kua akamutu tetai au taeake e te au tuaine i te oraanga ainga tau kore, inara penei te tamaki nei rai ratou i to ratou au anoano tau kore. Me kare tatou e matakite, ka riro to tatou tu akamanea ei mea ngata atu no ratou kia aru i te ako a te Pipiria kia kopae i teia au anoano. (1 Korinetia 6:9, 10) Kare tatou e inangaro kia ngata roa atu ta ratou tamaki anga, me kare ainei?

¹⁰ Me noo tatou ki rotopu i to tatou au taeake e te tuaine, ka paruruia tatou mei te aronga rave ainga tau kore. Ka riro to tatou tu akamanea ei turu i teia turanga mā, noatu e tei ko i te uipaanga me kore i te ngai tangata. Noatu e tei ia tatou te tika anga kia aao i ta tatou i inangaro ua, e apainga katoa ta tatou kia aao i te kakau kia māmā ua i tetai pae kia vai mā ua te manako, te tuatua, e te tu akono i mua i te mata o te Atua. (1 Petero 1:15, 16) “Kare [te aroa mou] e rave i te mea tau kore, kare e kimi i te meitaki nona uaorai.”​—1 Korinetia 13:4, 5.

11, 12 Akapeea a Koheleta 3:1, 17 te tauturu anga ia tatou kia akaari i te tu tau?

¹¹ Me iki te au tavini o te Atua i ta ratou ka aao, kua kite ratou “e atianga to te au mea katoa nei, e e tuatau to te au akakoroanga katoa.” (Koheleta 3:1, 17) Ka riro te reva, te atianga, te ngai nooanga e te au turanga tukeke ei akakeu i ta tatou ka aao. Inara kare to Iehova au turanga e taui ana.​—Malaki 3:6.

¹² I te ngai vera, ka ngata atu i te akapapu e e kakau tau to tatou e te ngateitei. E āriki ana to tatou au taeake e te au tuaine me kare tatou e aao i te kakau pipiri e te akaariari i te kopapa. (Iobu 31:1) Pera katoa, me aere tatou te paʼi tai me kore ki te ngai paʼi vai, kia tau ua to tatou kakau paʼi tai. (Maseli 11:2, 20) Noatu e manganui i teianei ao e aao ra i te kakau pai tai tei akaariari i te kopapa, kia akapapu tatou e ka riro ta tatou ikianga ei akangateitei i to tatou Atua tapu ko Iehova.

13. No teaa ra te akoanga ia 1 Korinetia 10:32, 33 ka akakeu ei i ta tatou ikianga no te kakau?

¹³ Te vaira tetai atu kaveinga puapinga  te ka akakeu i ta tatou ikianga no te kakau. Ka anoanoia tatou kia matakite auraka e takino i te akava ngakau o tetai ke. (E tatau ia 1 Korinetia 10:32, 33) E apainga ta tatou kia kopae i te kakau te ka akariri atu i te au taeake e te au tuaine pera katoa te aronga kare e tavini ana ia Iehova. Kua tata a Paulo: “E akarekareka tatou katoa nei i tetai ke, kia meitaki aia, kia maroiroi.” E oti akakite aia i te tumu: “Kare katoa oki te Mesia i akarekareka iaia uaorai.” (Roma 15:2, 3) Mei ia Iesu rai, ka akariro tatou i te rave anga i to te Atua anoano e te tauturu anga i tetai ke ei mea puapinga rava atu i ta tatou i inangaro. No reira ka iki tatou auraka kia aao i te tu kakau ta tatou e reka ana inara ka arai te tangata kia kore e akarongo ki te karere.

14. Akapeea te au metua te tereni anga i ta ratou tamariki kia akakakā i te Atua na to ratou tu akamanea?

¹⁴ E apainga ta te au metua Kerititiano kia apii i ta ratou tamariki kia aru i te au kaveinga Pipiria. Te ō maira te akapapu anga kia akarekareka ratou e ta ratou tamariki i te Atua na roto i to ratou kakau e te akamanea tau ua. (Maseli 22:6; 27:11) Akapeea te au metua te tereni anga i ta ratou tamariki kia akangateitei i to tatou Atua tapu e tona au turanga? Kia akanoo te au metua te akaraanga meitaki no ta ratou tamariki. E kia apii i ta ratou tamariki ma te aroa akapeea me kimi i te kakau tau. Kare te tamariki e iki i te kakau no te mea e reka ana ratou i te reira, mari ra tei puapinga atu, kia iki ratou i te kakau tei akangateitei ia Iehova, to ratou Atua.

15. Eaa te ka tauturu ia tatou kia rave i te ikianga meitaki?

¹⁵ E arataki tau meitaki te Pipiria te ka tauturu ia tatou kia rave i te ikianga meitaki ei akangateitei i te Atua. Noatu ra, ka riro to tatou kakau ei akaari i ta tatou e reka ra. Penei e tuke rai to tatou tu akamanea e te au kakau ki tetai ke. Inara ka tau to tatou kakau kia mako, mā, tau ua, tano no te atianga, e kia ārikiia i toou ngai nooanga.

16. No teaa ra ka pauna ai te taime kia tauta i te akamanea meitaki?

¹⁶ Kare i te mea māmā ua me kimi i te kakau meitaki e te tau. E maata te au toa e oko ana i te au tu kakau kare e tau ana. No reira penei ka pou te tuatau e te maroiroi i te kimi i te au pirikoti, te au pona, te au piriaro, me kore te iki i te au pereue e te piripou roa kare e pipiri ana. Inara ka kite mai e ka āriki rekareka te au taeake e te au tuaine i ta tatou tauta anga kia aao i te kakau manea e te tau ua. E ka riro te anoano no te akakakā i to tatou Metua aroa i te rangi ei turu i tetai ua atu ravenga ta tatou ka rave kia akakakā iaia na roto i to tatou tu akamanea.

17. Eaa tetai au tumu ka akakeuia tetai taeake i te iki me ka akatupu aia i te uruuru vaa?

¹⁷ E mea tau ainei no te au taeake kia akatupu i te uruuru vaa? Kua umuumuia te au tane i raro ake i te ture a Mose kia akatupu i te uruuru vaa. Inara, kare te au Kerititiano i raro ake i te Ture a Mose e kare i anoanoia kia aru i te reira. (Levitiku 19:27; 21:5; Galatia 3:24, 25) I tetai au peu enua, ka ārikiia te uruuru vaa tei  pakoti meitakiia e e akara anga tau, e kare e arai i te tangata mei te akarongo anga i te karere. Te tika, tetai au taeake akataoongaia e uruuru vaa to ratou. Noatu ra, penei ka iki tetai au taeake auraka e akatupu i te uruuru vaa. (1 Korinetia 8:9, 13; 10:32) I tetai atu au peu enua e te au ngai, kare te uruuru vaa i te mea matauia e kare e tau no te au orometua Kerititiano. Te tika, me akatupu tetai taeake i te uruuru vaa, penei ka araiia aia mei te akakakā anga i te Atua e kare aia e riro ei “tangata apa kore.”​—1 Timoteo 3:2, 7; Roma 15:1-3.

18, 19 Akapeea a Mika 6:8 te tauturu anga ia tatou?

¹⁸ E mataora tikai to tatou kare a Iehova i oronga mai i tetai papaanga roa no te kakau e te tu akamanea tei tau e kare i tau. Mari ra kua oronga mai aia i te tika anga kia rave i ta tatou uaorai ikianga tau tei akatumuia ki runga i te au kaveinga Pipiria. No reira me rave tatou i te au ikianga no te tu akamanea e te kakau, ka akaari tatou i to tatou inangaro kia noo ua ma te tau ia tatou e tavini ra i te Atua.​—Mika 6:8.

¹⁹ Ka āriki akaaka tatou e mā e te tapu a Iehova e ka riro tona au turanga ei arataki meitaki rava atu no tatou. Me ka inangaro tatou kia tau ua e te akaaka, ka aru tatou i tana au turanga i roto i te oraanga. Ka tauturu katoa te tu tau ia tatou kia akangateitei i te manako o tetai ke.

20. Akapeea to tatou tu akamanea e te kakau te akakeu anga i tetai ke?

²⁰ Kia akaari pu tikai to tatou kakau e e tavini tatou no Iehova. E au turanga teitei to Iehova e ka inangaro tatou i te aru i te reira. Ka tau kia akameitakiia to tatou au taeake e te au tuaine no ta ratou akamanea anga e te angaanga meitaki, tei arataki i te aronga ngakau tae ki te karere ora o te Pipiria e ka akakaka ia Iehova ma te akarekareka iaia. Me rave tatou i te au ikianga meitaki no te akamanea anga, ka akakakā ua rai tatou i te Atua Tei kakau iaia uaorai “ki te kakā e te mana.”​—Salamo 104:1, 2.